Səvəri 30

Pətsaa ndi shiy zən nja urdi

Ma kə Kwa sləkəpə kaa Muyisə diɓa na: «Sa ka gha dzay, mbaʼ gha dəʼuti pi tsaa ndi shiy zən nja urdi. Tə shighu Akasiya pə gha dzaa dəʼuti. 2 Bəlahi ci faɗanashiy, yimyim kə ghəshi dzaa nza. Bitə tsa ci dzati dzatiy, vəli dəvə kutiŋ, bəŋw tsa ci na, vəli dəvə kutiŋ diɓa. Ma bitə tsa ciy dzəta ghumə na, bazli kutiŋ. Ka gha dzay, mbaʼ gha manati shiy nja təlimim dzar tə miyhi bəlahi ci faɗanashi məkə məkə tə ghən. Shiy kutiŋ kə shi va dzaa nza lə pi tsa va. 3 Ka gha dzay, mbaʼ gha vasakən mbəzə kwa shamshama kala kaɓə mbə kən pi tsa va mə ghən ci, lə dzar vəgha bəlahi ci gwanashi, mbaʼ kən shi nja təlimim ni va. Dəzlə tsəɓə gha ghasləti dzar vəgha vəgha lə mbəzə kwa shamshama. 4 ka gha dza diɓay, mbaʼ gha vasati jaʼwahi tə mbəzə kwa shamshama, tə pi tsa va. Bakə tar nahuti slərpə ci, bakə tar nahuti, njasaa dzəta wəri ci. Ta mbəə i getesli dzar mbə jaʼwahi va ta ɓə pi tsa va ti shi. 5 Getesli bakə ni vay, tə shighu akasiya pə gha dzaa fəɗitishi, nza gha vasakən mbəzə kwa shamshama kən shi. 6 Kwa kuma gwadə tsaa kəlati sərndəkə tsa nza hərezli ɓəleʼi ɓəleʼi ni va ndəgha fəti ta sla kiri pə gha dzaa fiy pi tsaa ndi shiy zən va nja urdi. Tiɓa dzee kumə lə gha, gha Muyisə. 7 Njasa kərə pi mekəshiy, nza Aruŋ ndi shiy zən nja urdi tə pi tsa va, ghala vəghu tsa dza naa guma gərkuwahi. 8 Njasa səəkə tihwer, sa ka vici pəkuta diɓay, nza ghəci ndishi, geʼi lə vəghu tsa dza naa tsəʼu ghuə dzəti gərkuwahi. War ə pə ghuy dzaa ndi shiy zən va nja urdi kwa kumee yən Kwa sləkəpə, njasa dza jijihiŋuy dzar, ya paʼ humɓa. 9 Nəghətaa ghuy ndi ya nima shiy zən nja urdi kala war ni dzee vaa gəzaŋuy ma. Əntaa ghuy ndi ya dəmbəkə ya shi zəmə ti ma. əntaa ghuy shəkə tay dzəti ma. 10 Kutiŋ səɗa mbə piya kə Aruŋ dzaa yaɓanti kuma jikir na kən pi tsaa ndi shiy tsa va. Ta yaɓə pi tsa vay, miymiy dəmbəkə tsa dza məndi vaa sliy ta pəli kuma jikir na dza naa saɗati tə shi nja təlimim ni va faɗə ni. Njasa səəkə piya kə məndi dzaa məni kuma va tsəgha, njasa dza jijihiŋuy dzar ya paʼa humɓa. Pətsaa ndi shiy tsa vay, pi tsa ɗewɗew tərəŋu dza naa nza, ta ndira shiy məndi yən Kwa sləkəpə,» kə.

Tsəhə ghən ta guma gaska gamtaʼwaləə kumə lə Kwa sləkəpə

11 Ma kə Kwa sləkəpə kaa Muyisə diɓa na: 12 «Ghala vəghu tsa dza ghaa ɓəla ka Izərayeliy, ya tsamaɓa ndə mbə shi na, tsəhəra tə ghəci ghən ta mbərə piy tsa ci. Ghalaɓay, ka dza bəzəə dzəkənshi gha mbə ɓəlashiw. 13 Ya tsama zal tsa dza məndiy ɓəlatiy, reta gəna ghəra məndi sləni li mbə gaskaa gamtaʼwal dza naa wa. Ɗi naa gəziy, gəna gramə cifə. Gəna vay, kaa ngəra yən Kwa sləkəpə dza məndiy dza li. 14 Ya wa ndə ka Izərayel, kafə na tə piya bakəmətsəkə ka dzəmə dza məndiy ɓəla. ghəshi na shiy dzaa tsəhəra ghən tsa va kaa ngəra yən Kwa sləkəpə. 15 Ya ndə shiy na ndiy, ka dza naa tsəhə gəna va ɗaŋəɓa ghəciw, ya ndə ndərma nay, ka dza naa tsəhə juwɓa ghəciw. War gəna sliy ya va, gəna gramə tsa cifə tsa va dza ndəə tsəhə kaa ngəra yən Kwa sləkəpə ta mbəərə piy tsa ci. 16 Sa ka gha ɓasəvə gəna va gwanata va ka Izərayeliy, nza gha guma gaska gamtaʼwaləə kumə va lə Kwa sləkəpə. Ghalaɓa tsəgha kiy, ta zəzə dzee dzəkən ka Izərayel, sa nzana mbaʼ ghəshi tsəhəti ghən ta mbərə piy tsa shi,» kə.

Tsaghwaa shəkə yam kwa ta yaɓə jikir, ta nza ɗewɗew kwa kuma Kwa sləkəpə.

17 Ma kə Kwa sləkəpə kaa Muyisə diɓa na: 18 «Ka gha dza diɓay, mbaʼ gha vasəti tsaghwa ta shəkə yam dzəghwa ta yaɓə jikir, ta nza ɗewɗew kwa kuma Kwa sləkəpə, mbaʼ shi dza məndiy fə ti. Tə mbəzə ghəm na pə gha dzaa məntishi bakanashi. Sa ka gha dzay, mbaʼ gha fiy kwa jipə kar gaska gamtaʼwaləə kumə lə Kwa sləkəpə lə pi tsaa ta Hiyala va, nza gha təhay lə yam. 19 Yam va dza kar Aruŋ lə ndərazhi ciy ti, ta pi shiɗəshiɗə lə divədivi shi. 20 Ka ghəshi gha dzəmbə gaska gamtaʼwaləə kumə lə ya, lə dzəvəgha pi tsaa ta Hiyala ta ghəra sləni shi, lə ta ndira shiyiy, nza ghəshi ti yam va ta yaɓantəvashi. Ghalaɓay, ka dza ghəshiy bəkuw. 21 Va nəghətaa ghəshi bekushi dza ghəshiy pi divədivi lə shiɗəshiɗə shi. kuma vay, kumaa pəhəta ta nuw ghəshi lə jijihi shi na, ka dzar ya paʼ humɓa» kə.

In tsaa shəkəə dzəkən ndə ta fəə dzəmbə sləni Kwa sləkəpə

22 Ma kə Kwa sləkəpə kaa Muyisə diɓa na: 23 «Sa ka gha dza diɓay, mbaʼ gha pəlavə urdihiy guraa zən wəzə: Dimə fə har məndiy mirə, kilu cifə, mbaʼ lepər fə har məndiy sinamumə həhə, kilu bakə mbaʼ reta, mbaʼ guzən tsaa zən wəzə kilu bakə mbaʼ reta, 24 mbaʼ shi har məndiy kasə, nihuti shiy zən wəzə, kilu cifə, lə bərkə shi ka məndiy bərkə shiy tə pi tsa nza Kwa sləkəpə. Zhini mbaʼ in ulivə litər kwaŋ. 25 Sa ka ndə ta urdi dzay, mbaʼ dzavəɗiti shi va gwanashi, ka urdi kutiŋ, nza ghəshi nza ka in tsaa shəkə dzəkən ndə ta fəə dzəmbə sləni Kwa sləkəpə. Ghəci dza naa nza ka in tsa ɗewɗew tsa ta fə ndəə dzəmbə sləni Kwa sləkəpə. 26 In tsa va dza ghaa shəkəə dzəkən gaska gamtaʼwaləə kumə lə Kwa sləkəpə mbaʼ dzəkən sərndəkə tsa nza hərezli ɓəleʼi ɓəleʼi ni va ndəgha fəti ta sla kiri kwa, 27 mbaʼ tabəl tsa dza məndi vaa fə peŋ ti lə shi dza məndiy ghəra sləni li shi ti gwanashi, mbaʼ shiy fə gərkuwahi lə nihuti shi ti, mbaʼ pi tsaa ndi urdi ti, 28 mbaʼ pi tsa ka məndiy ndi sliw ti lə nihuti shi ka məndiy ghəra sləni ti gwanashi, mbaʼ tsaghwa yam lə pi tsaa fə tsaghwa va ti. 29 Nza gha fiy niva shiy gwanashi ka shiya, ta ghəraɗa sləni, nza ghəshi nza ka shiy gura ɗewɗew ni. Ya ndə ngəri dza naa dapashiy, see dza tsava ndəə zhəghiy, shiy kə dzaa dapashiy, shi ya dza ni va shiy zhəghəshi. 30 Shəkakən tə gha in tsaa fə ndə vaa dzəmbə sləni kən kar Aruŋ lə ndərazhi ci kuraku, nza ghəshi nza ka shi ya ta ghəraɗa sləni ka ka ta Hiyala.

31 Liy hum kiy, nza gha gəzanshi kaa ka Izərayel. A pə gha dzaa ni kaa ngəshiy: “Avanay in tsa ɗewɗew tsa dza məndiy shəkəə dzəkən ndə ta fəə dzəmbə sləni Kwa sləkəpə. Ya paʼa humɓay, kwataka sləni Kwa sləkəpə dza məndiy ghəra li gwaʼa tsəgha, ka dzar paʼa tar jijihiŋuy. 32 Nəghətaa ndə vərəva li ma. Nəghətaa ndə ta gəla in tsa va ma. In tsa vay, in tsa Kwa sləkəpə na, sa Kwa sləkəpə dza naa nza va ghuy ya paʼa humɓa. 33 War mbaʼ kə ndə dzaa tati gəla in tsa, mbaʼ varati tə vəgha ntsaa kamaa ndə ta Hyalay, ta tahanti tsava ndə dza məndi mbə hulfə ghummə,” pə gha dzaa ni kaa ngəshi,» kə Kwa sləkəpə.

Njasa dza məndiy ta urdi

34 Ma kə Kwa sləkəpə kaa Muyisə diɓa na: «Ka gha dza diɓay, mbaʼ gha pəlavə shiy zən wəzə: Dimə səturakəsə, mbaʼ dimə unikəsə, mbaʼ na galbanum, nza gha pəlavə dimə har məndiy Aŋəsaŋəsə kama kaɓə mbə yimyim lə shi mahəkanə ni va, mbaʼ gha dzavəɗayshi. 35 Nza gha pəlavə ndə ta urdi, nza ghəci jakətishi lə ghuni ta nza ghəshi ka shi ɗewɗew ni, ta ghəraɗa sləni. 36 Ka gha dzay, mbaʼ gha tivə nahuti bəla shi vaa hətishi kurɗikəɗikə nza gha fiy mbə gaska gamtaʼwaləə kumə lə Kwa sləkəpə, kwa kuma sərndəkə tsa nza hərezli ɓəleʼi ɓəleʼi ni va ndəgha fəti ta sla kiri, tə pi tsa dzee vaa kumə lə gha. Shiy gura ɗewɗew kə ghəshi dzaa nza va ghuy. 37 Gəla urdi dza gha vaa tatiy, əntaa ghuy ta gəla urdi va kaa ghən tsa ghuy ma. Shi fiy ghuy kwataka kaa Kwa sləkəpə kə dzaa nza. 38 War mbaʼ kə ndə tati gəla urdi va ta məniy dzəti vəgha ci ta zən tsa vay, tahanti tə ghuy tsava ndə mbə hulfə ghuy,» kə.