Kwa sləkəpə təravə mbəzliy dzaa məni shiy ta dzəmbə pi tsa dza məndiy kumə li
31
Ma kə Kwa sləkəpə kaa Muyisə diɓa na: 2 «Avee təravə Besalel zəghu Uri, jijiy Hur mbə takə tsa Zhuwda, 3 mbaʼee təhay lə safə tsee ta mbə ghəciy nza lə sənata kuma, mbaʼ sənashi shiy mbə ghən ci, mbaʼ məcaŋa və ta sənashi məni ya nimaɓa shiy. 4 Aa sənashi zəzə məni shiy, mbaʼ sənashi vasə mbəzə kwa shamshama lə vasə tsahi gəna, mbaʼ mbəzə ghəm na. 5 Aa mbashi tsasli shiy dzəti hərezli ka dimə ta nahə shiy dzəti shiy. A sənashi fəɗi shiy tə shighu. Ɗi naa gəziy, shiy tiɓa kala mbashi ghəciw. 6 Zhini diɓay, mbaʼee ɓanavə Uhuliyavə zəghu Ahisamakə mbə takə tsa Daŋ ta kəti ci. Ee ɓanavəshi sənata kuma kaa mbəzli nza məcaŋa və shi gwanashi, ta mbə ghəshiy məni shi gəzaŋee va gwanashi, shiy nja kar: 7 Gaska gamtaʼwaləə kumə va lə ya, mbaʼ sərndəkə tsa nza hərezli sla kiri va kwa, mbaʼ gal tsa miy sərndəkə, mbaʼ shi mbə pi tsaa kumə va lə ya gwanashi, 8 mbaʼ tabəl lə shi ti gwaʼa, mbaʼ shiy fə gərkuwahi məntim lə tsahi mbəzə kama kaɓə mbə shi, lə shi ti gwaʼa, mbaʼ pi tsaa dza məndiy ndi urdihi ti, 9 mbaʼ pi tsaa ndi shiy lə shi dza məndiy ghəra sləni li shi ti gwanashi, mbaʼ tsaghwa yam lə pi tsa dza məndiy fə ti, 10 mbaʼ kubeŋer sləni mbə makwaghwa, mbaʼ kubeŋer ndə ta Hiyala kaa Aruŋ, mbaʼ ni dza ndərazhi ciy paa dzəkən ghən ta ghəra sləni shi, 11 mbaʼ in tsaa vərə ntsa təravee ta sləni, mbaʼ urdiy ndi mbə pi tsaa kumə lə ya. Ya nimaɓa shiyəy, war njasa gəzaŋee va mənishi kə ghəshi dzaa məntishi,» kə.Vici dəkəva
12 Ma kə Kwa sləkəpə kaa Muyisə diɓa na: 13 «A pə gha dzaa ni kaa ka Izərayeliy: Fə tə ghuy ghən ta nuw vici dəkəvahee. Sa nzanay, ti shi dza məndiy sənay jakəva tsee lə ghuy paʼa va jijihiŋuy. Ta mbə məndiy sənay yən na Kwa sləkəpə, mbəzlee nza ghuy, kə məndi. 14 Fə tə ghuy ghən ta nuw vici dəkəva. Ka ɓəti ghuy nja vici gwanata na ma. Ya wa ntsaa ɗi ma fəti ta kuma va, ka ghəra sləni ghəci fəca vici dəkəva vay, tahanti tə məndi tsava ndə mbə ghuy, mbaʼ məndi paslanti. 15 Kwaŋ na vici dza ghuy ghəra sləni ti, kwa mbərfaŋa viciy, saba na nava, vici dəkəva kaa ngəra yən Kwa sləkəpə. Ya wa ntsaa dzaa ghəra sləni fəca vici vay, paslanti tə məndi tsava ndə. 16 Fə tə ka Izərayel ghən ta nuw vici saba paʼ tar jijihi shi. Sla kiri tsaa kərə ma ta paʼ kwa ndimndim kə dzaa nza. 17 Ya paʼ humɓay, vici saba va dza naa ci jakəva tsee lə ghuy. Sa nzanay, mbə vici kwaŋ məntee kar ghumə lə hiɗi. Ma tə kwa mbərfaŋa vici na, mbaʼee garəti sləni ta dəkətəvara,» kə.
18 Sa kəranti Kwa sləkəpə gəzə kuma lə Muyisə mə dəlagwa Shinay ki na, dzəghwa na mbaʼ ɓanavə hərezli ɓəleʼi ɓəleʼi ni va bakə ni tsaslati na kuma sla kiri lə dəvə nzə ti shi kaa Muyisə.