Təhuni mbəri tsa Zhakubə
50
Ma sa mətiy diy ki na, dza Zhuzefə mbaʼ ndəɓakənvay kən, ka wahə dzəmbə kuma ci, ka hutəmə. 2 Dza na mbaʼ gəzanshi kaa niy mbəli mbəzli mbə ka sləni ci a ghəshi varay mbəri tsa diy lə in va ghwaɓə ghəci. Dza mbəzli va ki mbaʼ ghəshi varay mbəri tsa Zhakubə. 3 Vici faɗəmətsəkə ghəshi mənti mbə vərə ci njasa sənaɓəshi məndi mbə məni. Vici mbərfəŋ mətsəkə ka Ezhiptə mənti mbə təhuni ci.4 Ma sa kəriy təhuni mbəri ki, ma kə Zhuzefə kaa mbəzli kiy ghyi tsa Farawaŋ na: «Mbaʼ pə ghuy gar mərshi lə yay, titihum, mbalam kəsayim mazə, a pə ghuy kaa ngəciy: “A kə Zhezhefiy 5 Ma kə dirə niy ni ngəra ghəci ghula ta mətiy: Avanara dzaa mətiy, zəməkəra fəla kala war tə hiɗi ka Kanahaŋ, kwa kwəli latee va pə gha dzaa lara kə niy ni kaa ngəra. Ndara kwal sənzənva ee dza ta lanti nzee zhəghəkəvara, kə,” pə ghuy kaa ngəci,» kə Zhuzefə kaa ngəshi. 6 Ma kə Farawaŋ na: «Mbala ghəciy lanti diy njasa zəmanakə na va fəla» kə. 7 Dza Zhuzefə ka dzay ta la diy ghəshi lə ka sləni Farawaŋ gwanashi, mbaʼ nihuti mbəzli dikə dikə ni kiy ghyi tsa Farawaŋ, mbaʼ mbəzli dikə dikə ni tə hiɗi ka Ezhiptə ki. 8 Zhini kwasəbəshi mbəzli kiy ghyi tsa Zhuzefə gwanashi, mbaʼ ngwardiy lə nihuti mbəzli kiy ghyi tsa diy. War ndərazhi ju ju ni mbaʼ dəmbəkə na shiy niy tərə tə hiɗi Gwəshən gwaʼa tsəgha. 9 Mbəzli tərəŋu dalala niy nza na kwasəbə, tsəgha mutiti gədewesli, tsəgha nihuti mbəzli mə gədewesli.
10 Ma sa tsəhəshi ghəshi taŋ həl Zhurdəŋ tə pi tsa har məndiy “lani kwa tekesli” na, dza ghəshi mbaʼ ghəshi təhuniti mbəri tiɓa tərəŋu. Vici mbərfəŋ Zhuzefə mənti tiɓa mbə təhuni mbəri tsa diy. 11 Ma kə ka Kanan tə hiɗi va sa nay ghəshi gəla tsava təhuni mbəri tsa kwa lani kwa tekesli va na: «Mbəri tsa dikə tsa na sasa tə hiɗi ka Ezhiptə,» kə ghəshi. Va tsəgha fanati məndi slən Abel-Misrayim kaa pi tsa taŋ həl Zhurdeŋ va, ɗi naa gəziy: Mbəri tsa Ezhiptə.
12 Ava tsəgha mənti ndərazhi Zhakubə kumaa niy gəzanakəshi dəshi ki. 13 Dza ghəshi mbaʼ ghəshi ɓəghə mbəri tsa ciy dzəti hiɗi ka Kanahaŋ. Mbaʼ ghəshi dzaa liy mbə ləgu tə pi tsa har məndi vaa Makəpela, vəgha Maməre. Tə vəhə tsaa niy pavə Abəraham va ta la mbəreketi ci, va Efərwəŋ ndə ka Hit. 14 Liy hum sa lanti Zhuzefə diy ki na, mbaʼ zhəghəkəvay dzəti hiɗi ka Ezhiptə ghəshi lə ngwardiy mbaʼ mbəzliy niy pəhay ta la mbəri gwanashi.
kumaa mənita liy hum məti Zhakubə.
15 Ma sa nay ngwardiy Zhuzefə dəshi mətiy ki, ma kə ghəshi kwa jipə shi na: «Nda nza Zhuzefə fə jakaa dzəti ghummə tə mbərkə kuma mananati ghummə va gwanata, ka ɗi wa shi ci tay,» kə ghəshi. 16 Dza ghəshi ki mbaʼ ghəshi ghunay ndə va Zhuzefə. Ma kə ghəshi kaa ntsa va na: «Ma pə gha kaa zhezhefiy: “A kə ngwardəŋay: A kə dəŋa niy ni kaa kuma kəray naa gəzaŋəy ghəci ghula ta mətiy: 17 A pə ghuy dzaa ni kaa Zhezhefiy: Titihu plashi tə gha ngwardəŋa mbə nəfə gha va rəɗa huti ghəshi va, kuma məntəŋa ghəshi va jikir na, kə niy niy. Ta na navay, a ghiy məntəŋa kuma jikir na tərəŋu, va tsəgha cəʼuŋa ghiy sana a gha plataŋəy kuma ghiy va jikir na, ghiy ghiy shiy nuw Hiyala kutiŋ na va lə dəŋa,’ kə ngwardəŋa,” pə gha kaa ngəci,» kə ghəshi kaa ntsa ghunay ghəshi va. Sa gəzanakə məndi kaa Zhuzefə tsəgha na, dza na ka wahə. 18 Dza ngwardiy va mbaʼ ghəshi səəkəshi dəʼu ghən tsa shiy kəsay, mbaʼ ghəshi tsətsəfəkushi kwa kuma ci. Ma kə ghəshi kaa ngəci na: «Mevivi gha nza ghiy,» kə ghəshi. 19 Ma kə Zhuzefə kaa ngəshi na: «Ka hazləni ghuy ma, yən na Hyalaw. 20 Na na ghuyiy kuma jikir na niy tarəkə ghuy məniɗa, dzəghwa Hiyala nanzə ki na, mbaʼ Zhəghanti jikir tsa ghuy va ka kuma wəzə na, ta mbəə mbəlanti piy tsa mbəzli ɗaŋ njasa nay ghuy tsa ndatsə. 21 Njana nzana tsəgha kiy, ka hazləni ghuy ma. Ta nighə dzee dzəkən ghuy lə dzəkən ndərazhi ghuy,» kə kaa ngəshi. Mbaʼ dəpəti nefer shi lə gəzə kuma wəzə na va tsəgha na ki.
Kwa kərni kuma Zhuzefə
22 Dzəghwa Zhuzefə mbaʼ nziyiy tə hiɗi ka Ezhiptə, ghəshi lə mbəzli kiy ghyi tsa diy ki. Piya bələku mbaʼ məŋ ghən kən niy mənti na tə ghumə. 23 Ghəci tə ghumiy niy ya Efrayim ndərazhi, paʼa ka yakə ni shi ndərazhi ndərazhi va, war ghəci tə ghumiy. Zhini diɓay, vəə niy kəli ndərazhi Makir, zəghu Manase. 24 Ma kə Zhuzefə kaa ngwardiy tə nahuti vici ki na: «Ndal təree ta mətiraw. Ee sənay ta kəətitəŋuy dza Hyalaa dza, mbaʼ ɓantəŋuy tə hiɗi ni. Ta zhinəghəŋuy dza naa dzəti hiɗiy niy zəməkə na va fəla ta ɓanshi kaa kar Abəraham lə Izakə mbaʼ Zhakubə,» kə. 25 Ma kə kaa ngəshi diɓa na: «Sa ka Hiyala kəətitəŋuyəy, ka dzee ɗi ghuy zlashi esleree tikuw. Zəməkəram fəla, ka dza ghiy zlashiw, pə ghuy,» kə. 26 Dzəghwa Zhuzefə ki, mbaʼ mətiy, ghəci lə piya bələku mbaʼ məŋ ghən kən, mbaʼ məndi varay mbəri tsa ci lə in, mbaʼ məndi lanti tə Hiɗi ka Ezhiptə kwa kes tsa fəɗitim tə haku.