Zhakubə təfə miy kaa ndərazhi ci va məŋə lə bakə ni
49
Dzəghwa Zhakubə mbaʼ ɓasəti ndərazhi ci. Ma kə kaa ngəshi na:«Ɓasətəvaŋuyim ee gəzaŋuy
kumaa dzaa kəsaŋuy mbə vəghu tsaa dzaa səəkə.
2 Ɓasətəvaŋuyim a ghuy fa kumee ghuy ndərazhee
fam kuma dzee ta gəzəŋuy yən dəŋuy Zhakubə.
3 Ghay Rubenəy, gha na tsa dikə tsa zəghwee,
kwa taŋa zəghu yakee
yən mbə məgəla tsee.
A gha taŋəti ngwardəŋa
tə dikə lə tə bərci.
4 Ya tsəgha nza gha nja ghərakwəli nza bərci mbiy,
ka dza ghaa nzaa kwa taŋa ndə mbə ngwardəŋa ghulaw,
sa nzanay, a gha hənəhu həni tə pi həni tsee lə nahuti malee.
A gha sawanti pi həni tsee.
5 Kar Shiməyuŋ lə Leviy, mbəzli kutiŋ ni na ghəshi.
A ghəshi sləkati miy tsa shi ta gulaŋ.
6 Yən na neyiy, mbə kuma sləkati ghəshi va nzeyaw,
vəshiree ta kuma jakəshi ghəshi va tiw.
Sa nzanay, a ghəshi bakwanti mbəzli tə sa satiy nəfə tsa shi,
mbaʼ ghəshi kaslanti bəlititi mbə shiɗəshiɗə kəɓəhi va vəshi mbə nəfə tsa shi.
7 Avee bazlantishi tə mbərkə nəfə tsa shi va satiy tərəŋu tsa
lə gulaŋ tsa gulaŋti ghəshi va kala slanshi ma hur tsa shi.
Ta tatahambə jijihishi dzee dzar mbə hulfə Zhakubə,
mbaʼee ndandanivərishi tə hiɗi ka Izərayel.
8 Na na ghay Zhuwday, ntsa tə slən dza ghaa nza va ngwardəŋa,
Ta iyapəti ka mbəzə gha dza gha ta nza ghəshi tə dəvə gha gwaʼ gwaʼa.
Ta tsəfəku dza ngwardəŋa kwa kuma gha.
9 A zəghwee Zhuwda, nja zəghu zhəl nza gha,
zəghu zhəl tsaa zhəghəvaa zhiti pi tsa ka naa dəkəva ti sa pərəhu na sliw tsa ci nza gha.
Mbaʼ kə zhəl ngwəliməti shiɗəshiɗə ciy həniyəy,
a ntsaa dzaa tahakati kiya?
10 Ya humɓay, mbə takə tsa Zhuwda dza mazə nza,
War mbə dəvə shi dza gəta mazə nza,
paʼa fəca dza ntsa nza mazə ka sa ciy səəkiy
ntsa dza hulfəhi mbəzli fa kuma və.
11 Ta nguraɓə dza fəhi ka məndiy ta tay tə ya shi tə veher ci,
ya əə pəəhə na kwantəmcahi ci mbə shiy,
shiy tiɓa dzaa shashanciw.
Lə tay dza naa yaɓə ɗankəci tsa ci,
kubaŋ tsa ci dikə tsa na, ka yaɓə lə məli ɓəsəkəvərim mbə ya fə ka məndiy ta tay ti.
12 Ngəsli ngəsli dza naa nza va tay,
sliʼi ci na tezlezliɓa ghəshi kaa ʼwa.
13 Zabuluŋəy, dziy miy kufahiy kərkəvama dza naa nza lə nziy tsa ci,
tə pi tsa ka kwambəweler garə.
Paʼa mbə məlmə Shiduŋ dza hiɗi ciy nza.
14 Isakarəy, nja kwantəmca kwa bərci na
Nja Kwantəmcaa hənita kwa səəmə dəzlay məndi lə kələm bakə,
15 mbaʼ nay pi tsa nza na va ti wəzə,
ka favə vəgha nzə wəzə tiɓa,
ka na dzay mbaʼ gwəməy hum ta ɓə shiy,
ka ghəra sləni nja mava.
16 Na na Daŋəy, ta sləkə ni ci mbəzli dza na,
nja nihuti takəhi mbə Izərayel.
17 Ghyanakə dza Daŋ nza,
nja shishi tsa kwa kwal,
nja kwara dzəgəzliy hənita va kwa kwal.
Sa ka naa həcanti gəduw tə səɗa ciy,
ɓərəzaŋ tsa dza gəduw məni na ɓəlaʼa ntsa məɓaa dzəti hiɗi.
18 A Kwa sləkəpə, əə cəʼuŋee a gha mbəlitəra.
19 Sa dza ka ghəliy pəslishi ta Gad na na ciy,
ta zhananatishi ghən dza na ka tihəshi.
20 Təruŋ dza shiy məni tə hiɗi Aser,
Ka məni shi wəzə ni ka mazə zəmə diɓa.
21 A na Neftaliy, nja kiməə gura ghən tsa nzə,
ka ya ndərazhi kiyas kiyas na.
22 Zhuzefə naci kiy, nja fə kwa yaa na,
fəə pəsəta vəgha mətsə yam,
ka kəli divədivi biti biti taŋ kaa kələm.
23 Ta pəla miy dza ka hə havə ti,
ka hə havəə dzəti,
ka mbəzə li.
24 Ya tsəgha nziy, zal zal dza naa kəsəvə tsa ci rigi.
Ta kəətiti dza Hiyala kwa bərcee,
ka dza dəvə ciy dali va hə shiyəw.
Ghəci dza naa ndəghu ka Izərayel,
ghəci dza haku tsa garə ghəshi tiy nza.
25 Nza Hyalee yən dəŋa kəətitəŋa.
Nza kwa bərci təfətəŋa miy səəkə mə ghumə
ka nzəməŋa van wəzə,
mbaʼ ndaŋa wəzə tsa mbə yaməə səəkə kərakə mbə hiɗi.
Nza təfətəŋa miy ta ya miʼi mbə hulfə gha,
ka ya dəmbəkə tsa gha.
26 Təfə miy tsaa səkwa mbə miy dəŋay,
aa taŋəti wəzə tsa mbə dəlagwahi ndimndim ni,
aa taŋəti shi wəzə ni gura məndiy ɗi mə hum pi tsa ndimndim tsa.
Nza təfə miy tsee yən dəŋa nza kən gha gha Zhuzefə.
Nza ghəci nza kən gha saa sləkə ngwardəŋa.
27 Ta na Benzhameŋəy, ndə gulaŋ na, nja kiri tsa kwamti,
ka na dza mekəshiy, mbaʼ kəsəvə sliw tsa ci ka pərə,
ma hetihwer na, ka təhə tsaa tərə kaa mbəzli ci.
28 Mbəzli va gwanashi na takəhi ka Izərayel va məŋ lə bakə ni. Ava tsəgha na kuma gəzanakəshi dəshi ghəci mbə təfanshi miy. Ya wa ndiy, aa niy təfanati tsa ci miy kutiy.
Məti Zhakubə
29 Dzəghwa Zhakubə ki, mbaʼ gəzanshi kuma dza ghəshiy məni kaa ndərazhi ci, ma kə na: «Sa kee mətiray, nza ghuy dzaa lantəra kwa kwəli jijihira, mbə ləgu mbə vəhə tsa Efərwəŋ ndə ka Hit va. 30 Ləgwə vay, tə pi tsa har məndi vaa Makəpela, vəgha Maməre tə hiɗi ka Kanahaŋ na. Va Efərwəŋ ndə ka Hit niy pavə Abəraham vəhə tsa va ta la mbəreketi ci mbə kwəli va. 31 Mbəɓa la məndi kar Abəraham lə mali ci Sara, mbəɓa kar Izakə lə mali ci Rebeka, zhini mbəɓa yən lanti Leya diɓa. 32 Vəhə tsa va lə ləgu mbə vay, va ndərazhi Hetə niy pavəshi məndi,» kə. 33 Ma sa kəɗanti Zhakubə mbəəzli miy tsa ci kaa ndərazhi ci ki na, dza na timə həniy mbaʼ mətiy, mbaʼ dzaa kəsashi jijihiy.