Zhakubə təfanati miy kaa ndərazhi Zhuzefə
48
Ma tə nahuti vici liy hum kuma va ki na, mbaʼ məndi səəkəə gəzanci kaa Zhuzefə: « Gwərapəy na dəŋa,» kə məndi. Dza na pəm pəməvə ndərazhi ci va bakə ni, kar Manase lə Efrayim ta dza ta nighə diy. 2 Sa tsəhəshi ghəshi ki na, mbaʼ məndi dzaa gəzanci kaa Zhakubə: «Ava zəghu gha səəkiy ta nighəŋa,» kə məndi kaa ngəci. Dza na mbaʼ jihəkəvay satiy nziyiy tə pi həni tsa ci. 3 Ma kə kaa Zhuzefə na : «A Hyalaa guranti tə bərci niy təzlita kaa ngəra mbə məlmə Lwəzə tə hiɗi ka Kanahaŋ, mbaʼ təfakənɗa miy. 4 Ma kə niy ni kaa ngəray: “Ta ndaŋa ya ndərazhi dzee ɗaŋ, mbaʼee məntəŋa ka jijihiy hulfəhi mbəzli ɗaŋ. Ta ɓanavəshi hiɗi ka Kanan ni dzee ka shishi kaa hulfə gha ta kwa ndimndim sa ka gha mətiŋa,” kə niy ni kaa ngəra,» kə. 5 Ma kə Zhakubə diɓa na: «Kar Efrayim lə Manase, ndərazhi gha ni bakə ni yakə gha tə hiɗi ka Ezhiptə yən ghula ta səəkə ta kəsaŋay, ni ya ndərazhi na niva nja kar Ruben lə Shiməyuŋ. 6 Ma ni dza ghaa yakə ndərazhi dzəkən shiy, ni gha dza nivaa nza. Niva ndərazhiy, mbə hiɗi dza məndiy slanavəshi kaa ngwarmbəghəshi bakə ni va dza ghəshiy kumavə ni shi hiɗi. 7 Ghala vəghu tsaa zhəghəkəvaree tə hidi Mezwəpwətamiy, yən ghula ta tsəhə mbə məlmə Efərata tə hiɗi ka Kanahaŋiy, mbaʼ məŋa Rashel mətita viya mbə kwal. Mbaʼee lamti tiɓa vəgha kwal,» kə. Efərata va na sa har məndi vaa Betəlehem ndatsə. 8 Sa nashi zhakubə ndərazhi Zhuzefə ki, ma kə na: «Kar waa shinia?» Kə. 9 Ma kə Zhuzefə kaa diy na: «Ndərazhi ndara Hiyala tikə na ghəshi,» kə. Ma kə diy na: «Pəmakarshiy dzəvəghee ee təfanatishi miy,» kə.10 A Zhakubə niy halantəvay, paʼa ka ghulfəshi məcici ci kala nay pi ghəci wəzə ghula. Dzəghwa Zhuzefə ki, mbaʼ pəməghə ndərazhi ci vaa dzəvəgha diy, dza diy ki, mbaʼ hutəməvəshi wəzə wəzə. 11 Ma kə kaa Zhuzefə ki na: «Niy səəkee zəzəti, ee dzaa zhiniy nata mətsə gha pənuw, Sanay, avanta Hiyala ndara kwal tsaa nashi lə ndərazhi gha ta,» kə. 12 Dzəghwa Zhuzefə ki, kəətə katanti ndərazhi ci va vəgha shinin diy, mbaʼ tsəfəkuy paʼa mbə hiɗi. 13 Zhini na mbaʼ kəəsəvə ndərazhi ci va bakə ni. Baŋ kəsəvə Efrayim lə dəvə kwa zleɓi ci ta mbə ghəciy nza tar dəvə kwa bəzəmə diy, ma Manase na, baŋ kəsəvə lə dəvə kwa bəzəmə ta mbə ghəciy nza tar dəvə kwa zleɓi diy. Dza na mbaʼ zhiniy pəməghəshi kaa jijishi. 14 Ma dza Zhakubə ki na, mbaʼ zlaŋəliti divədivi ci, mbaʼ faghwa kwa bəzəmə ci kwa ghən tsa Efrayim, ghəci tsa juw tsa, ma kwa zleɓi ci na, mbaʼ faghwa kwa ghən Manase, tsa dikə tsa zəghu. 15 Dza na ka təfə miy dzəkən Zhuzefə. Ma kə na:
«Ə cəʼwee Hyalaa niy fa kar jijira Abəraham lə dirə Izakə kuma və ya humɓa,
Hyalaa ndəghura ghala yakəram paʼa ndatsə.
16 Ə cəʼwee Ndə kwal Hiyala tsaa mbəlantəra va va ngəraʼu gwanay,
a ghəci təfanatishi miy kaa ndərazhi ni.
Nza slən tsee nza ghulay tə mbərkə ghəshi
njasa nza slən tsa kar jijira Abəraham va lə dirə Izakə.
Ɗaŋ kə ghəshi dzaa yakə ndərazhi tə hiɗi,» kə.
17 Nighə Zhuzefə na, diy faghwa dəvə kwa bəzəmə ci kwa ghən Efrayim, kala ɗi ghəci tsəgha. Dza na ka kəsə dəvə diy, ta ɓanti kwa ghən Efrayim, ta fəə dzəghwa ghən tsa Manase. 18 Ma kə ngəci na: «Tsəghaw diw, tsatsa ndə na tsa dikə tsa. Dzəghwa ghən tsa ci pə ghaa fə dəvə kwa bəzəmə gha,» kə. 19 Kala zləɓa diy. Ma kə na: «Ee sənay pəraa zəghwee, ee sənay. Hulfə mbəzli ɗaŋ dza jijihiy Manase nza kuraku. Ə na na nzanay, dikəɓa tsa juw tsa tsa ndə dza naa nza kaa ngəci, Hulfəhi mbəzli ɗaŋ dza na ta səvəri mbə jijihiy,» kə.
20 Dza na fəcava ki, mbaʼ təfanatishi miy, ma kə na: «Lə sləneɗemer ghuy dza ka Izərayel təfə miy kaa mbəzli. Ma dza ghəshiy niy: “Nza Hiyala məntəŋa wəzə hur njasa mananati na va kaa kar Efrayim lə Manase” dza ghəshiy ni,» kə. Ava tsəgha fiy Zhakubə Efrayim tə kuma Manase. 21 Ma kə Zhakubə kaa Zhuzefə na: «Avanara dzaa mətira. Ta na navay, kwasəbə ghuy dza Hyalaa nza, ta zhinəghəŋuy dza naa zhəti hiɗi jijihiŋuy. 22 Yən ndaŋa na hiɗi Shishem, wəzəɓa ghəshi na kən hiɗi dza ngwardəhiŋa ta kumavə. Yən zləghuvə na hiɗi va va ka Amur lə kafaʼi tsee mbaʼ rigi tsee,» kə.