Ghava tsa Shiy 47

Sa gəzanakəshi Zhuzefə kuma va kaa ngwardiy ki na, dza na mbaʼ zhəghəghəvay dzaa gəzanci kaa Farawaŋ. «A kar dirə lə ngwardirə səəkəshi tə hiɗi ka Kanahaŋ, lə teŋkesli shi, mbaʼ kwiy shi, mbaʼ slay shi, mbaʼ shi və shi gwanashi səəkəshi ghəshi. Tə hiɗi Gwəshən na ghəshi lə nziy tsa shi sana,» kə. 2 Dza Zhuzefə ki mbaʼ pəməvə mbəzli cifə mbə ngwardiy, mbaʼ canatishi kaa Farawaŋ. 3 Ma kə Farawaŋ kaa ngəshi na: «A sləni ka ghuy mənia?» Kə. Ma kə ghəshi na: «Ka ndəghu shiy na ka sləni gha njasaa niy nza jijihiŋəy,» kə ghəshi. 4 Ma kə ghəshi diɓa na: «Təruŋəta na ma tə hiɗi ka Kanahaŋ, guzən tiɓa kaa dəmbəkə tsa ghiyuw. Nja ka məlmə səəkəŋəy ghiy tikə. Titihu aa cəʼuŋa ghiy, pəlatavəŋəy kwal a ghiy nziyŋəy tə hiɗi Gushen,» kə ghəshi kaa ngəci. 5-6 Ma kə Farawaŋ kaa Zhuzefə na: «Mbə dəvə gha na hiɗi Ezhiptə, njana nza na mbaʼ kar dəŋa lə ngwardəŋa səəkəshiy dzəvəgha ghay, ɓanavəshi pi tə hiɗi Gushen, pi tsaa gura tə wəzə. Mbaʼ pə gha sənashi mbəzli ka məhərli mbə shiy, mbaʼ gha fiyshi ka mbəzliy nighəə dzəkən dəmbəkə tsee,» kə.

7 Dza Zhuzefə mbaʼ ɓəkə diy Zhakubəə canati kaa Farawaŋ. Dza Zhakubə mbaʼ təfanati miy kaa Farawaŋ 8 Ma kə Farawaŋ kaa ngəci na: «Piya hum na sa ghaa?» Kə. 9 Ma kə na: «Piya bələku mbaʼ mahəkanə mətsəkə məntee mbə daŋərə. Mbə piyahi vay, ka dza kwaɓa ka dza kwaɓa niy nzee. Nzəy tseyiy, nziy tsa wəzə tsa naw, kiyaŋukiyaŋu haliree. Ya jijihiray, ka dza kwaɓa ka dza kwaɓa niy nza ghəshi, ya tsəgha nzə kiy, tərəŋuɓa ghəshi hishi na tə ghumə kaa ngəra,» kə. 10 Dza Zhakubə mbaʼ zhiniy təfanati miy kaa Farawaŋ, mbaʼ dzay. 11 Dza Zhuzefə, mbaʼ dzaa ɓanavəshi pi tsaa gura wəzə tə hiɗi ka Ezhiptə, tə hiɗi Raməsesə kaa kar diy lə ngwardiy ta nziy ghəshi ti, njasaa niy gəzəkə Farawaŋ va. 12 Dza Zhuzefə ki, ka ɓanshi shi zəmə kaa kar diy lə ngwardiy lə mbəzli kiy ghyi tsa shi. Ya tsama ghyi na, geʼi lə mbəzli kiyɓa, geʼi lə mbəzli kiyɓa ghəci ɓanshi shi zəmə.

Tsəhuli mənti Zhuzefə ghala mənta ma tə hiɗi ka Ezhiptə

13 Dza ma tərəŋu vəŋəta ki, kala shi zəmə tə hiɗi gwanashi ghula. War ə ghənzəə irə mbəzli tə hiɗi ka Ezhiptə lə mbəzli tə hiɗi ka Kanahaŋ. 14 Gənaa niy nza va mbəzli tə hiɗi ka Ezhiptə lə hiɗi ka Kanahaŋ ki na, mbaʼ Zhuzefə ɓasanti gwaʼ gwaʼa sa ka məndiy səəkə ta pa alkamari ti və. Dza na mbaʼ paghə gəna vaa dzakə ghyi tsa Farawaŋ. 15 Sa kəɗita gəna va mbəzli tə hiɗi ka Ezhiptə lə tə hiɗi ka Kanahaŋ ki na, mbaʼ ka Ezhiptə səəkəə kəsay Zhuzefə. Ma kə ghəshi kaa ngəci na: «Ndaŋəy shi zəmə, ə ka ghiy bəku va ma kwa kuma gha sa kama gəna va ghiy na?» Kə ghəshi. 16 Ma kə Zhuzefə kaa ngəshi na: «Kala gəna va ghuy ghulay, karam dəmbəkə tsa ghuy səəkə, nzee taŋuy shi zəmə ti,» kə.

17 Dzəghwa ghəshi ka kanci dəmbəkə tsa shi kaa Zhuzefə, mbaʼ Zhuzefə tatanavəshi shi zəmə tə gədewesli shi lə teŋkesli shi lə kwiy shi, lə slay shi mbaʼ kwantəmcahi shi. Ma tə nava piya ki na, mbaʼ kumanavəshi shi zəmə tə dəmbəkə tsa shi gwanay. 18 Sa kəɗita nava piya na, mbaʼ ghəshi zhiniy tsəhəshi va Zhuzefə. Ma kə ghəshi kaa ngəci na: «A ntsa ghiy dikə tsa, kuma tiɓa ghiy mbəliy va ghaw, tərə gəna va ghiyuw, dəmbəkə tsa ghiyəy, sa gha na. Tərə nihuti shiy va ghiy ta ɓəŋashi kala ghən tsa ghiy, mbaʼ veher ghiyuw. 19 Ə ka ghiy bəku kwa kuma gha, ta zlashi veher ghiy tiɓa gəməshi ki na? Ə pə gha pahuŋəy lə veher ghiyta gwaʼa, a gha taŋəy shi zəmə, nza ghiy nzaa mevivi Farawaŋ, mbaʼ veher ghiy ka shi ci. Ka ɗi bəku ghiyuw, tiŋəy hulfə ta tsəŋu, nza ghiy mbəə nza tə ghuməŋəy nəghətaa veher ghiy nza gəməshi,» kə ghəshi.

20 Dzəghwa Zhuzefə mbaʼ pahu veher tə hiɗi ka Ezhiptə gwanashi kaa Farawaŋ ki. Sa nzanay tərəŋuəta niy nza ma va, ndə ka Ezhiptə tiɓa kalaa niy ɗəlanti vəhə tsa ciw. Mbaʼ veher tə hiɗi va gwanashi mənishi ka shi Farawaŋ tsəgha ki. 21 Dzəghwa Zhuzefə ki, mbaʼ mənti ka Ezhiptə ka mevivi Farawaŋ, paʼa tə pi tsa kəray hiɗi ka Ezhiptə gwanashi. 22 War veher mbəzliy tanshi mbəreketi shi na shiy niy pahu ma Zhuzefə gwaʼa tsəgha. Sa nzanay a Farawaŋ niy pəhəti kuma tə hiɗi ka Ezhiptə ta nganshi shi zəmə. Va tsəgha niy ɗəl ma ghəshi ni shi veher.

23 Ma kə Zhuzefə kaa mbəzli ki na: «Avanara pahuŋuy lə veher ghuy ta kaa Farawaŋ. Ta tavəŋuy hulfə alkamari dzee ta tsəŋuy ghuy tə veher va. 24 Sa ka ghuy mənikə shiy kwamtiy, nza ghuy təhəvərishi cifə mbə, mbaʼ ghuy ɓanavə bəla kutiŋ kaa Farawaŋ. Ma na faɗə na bəlay, na ghuy dza navaa nza. Mbə hulfə ghuy, mbə na dza ghuy zəmə lə ndərazhi ghuy mbaʼ mbəzli kiy ghyi tsa ghuy gwanashi dza naa nza,» kə. 25 Ma kə mbəzli kaa ngəci na: «Njana mərshi gha lə ghiy, mbaʼ gha mbəlantəŋəy va bəkuŋiy ghiy va may, a ghiy zləɓavə nza ka mevivi Farawaŋ,» kə ghəshi. 26 Ava tsəgha pəhəti Zhuzefə kuma ta nuw məndi tə hiɗi ka Ezhiptə gwanashi: «Ya wa ndə zay, zakə ma na shiy na, cifə mbə kə dzaa təhəvərishi, mbaʼ ɓanavə bəla kutiŋ kaa Farawaŋ,» kə. War ghulashi məndi mbə nuw kuma va paʼa ndatsə. A na veher mbəzliy ta mbəreketi kaa ka Ezhiptə na na shiy, ni Farawaŋ niy nza nivaw.

Zhakubə mbəəzli kwa kərni miy tsa ci

27 Dzəghwa ka Izərayel ki, mbaʼ ghəshi nziyshi tə hiɗi ka Ezhiptə, tə pi tsa har məndiy Gushen, mbaʼ niva hiɗi mənishi ka shishi. Mbaʼ ghəshi yavə ndərazhi, ka mənishi ɗaŋ tərəŋu. 28 Piya məŋ lə mbərfəŋ niy mənti Zhakubə tə hiɗi ka Ezhiptə. Gwanata tsa piya ci tə hiɗiy, piya bələku mbaʼ faɗəmətsəkə mbərfəŋəti ghən kən niy nza na.

29 Sa kəətikəvata vici dza Zhakubə ta məti tiy, mbaʼ haray zəghu ci Zhuzefə. Ma kə kaa ngəci na: «Mbaʼ pə ghaa ɗi məniɗa kuma wəzə nay, sa kee mətira na, əntaa gha lara tə hiɗi ka Ezhiptə ma. Tə kuma va dza ghaa cikəvəri a ghaa ɗira, ka garə tə kuma gəzəkəŋee pə gha. Fəti dəvə gha ta val tsee, ta mbee sənay ta məni kuma va dza gha tsəgha pən. 30 Sa kee mətiray, nza gha ɓəvə mbəri tsee tə hiɗi ka Ezhiptə, mbaʼ gha dzaa lamtəra kwa kwəli jijihira,» kə. «Ta mənti dzee njasa gəzəkə gha va,» kə Zhuzefə. 31 «Zəməkəra fəla,» kə Zhakubə. Dzəghwa Zhuzefə mbaʼ zəmanakə fəla. Dza Zhakubə mbaʼ tsəfəkuy tə ghən pə həni tsa ci, ta məni ʼwəsa ki.