Zhakubə mbə təɗi ghyi tsa ciy dzəti hiɗi ka Ezhiptə
46
Dzəghwa Izərayel ki meʼe pavə shi ci gwanashi, kafə kafiy dzəghwa kwal ta dzəti hiɗi ka Ezhiptə. Sa tsəhiy na mbə məlmə Ber-Sheva na, dza na mbaʼ slənəy shiy kaa Hiyalaa niy fal diy Izakə va. 2 Dzəghwa Hiyala tə virɗi va ki mbaʼ gəzanakə kuma kwa shiw. Ma kə kaa ngəci na: «Zhakubə, Zhakubə,» kə. «Way, mbə faŋa nzee» kə Zhakubə. 3 Ma kə Hiyala na: «Yən na El, Hiyala dəŋa, ka dza her gha ta dzəmbə Ezhiptə ma. Sa nzanay, tə hiɗi va dzee zhəghəti hulfə gha ka hulfə mbəzli daŋ tərəŋu dalala. 4 Kwasəbə gha dzee nza tə hiɗi ka Ezhiptə. Zhini diɓay, ta zhinikə hulfə gha dzee. Ta dəvə Zhuzefə dza ghaa məti,» kə. 5 Dzəghwa Zhakubə ki, kafə kafiy mbə məlmə Ber-Sheva. Ma ghəshiy kafə na, dza ndərazhi ci va mbaʼ ghəshi faghwa dəshi lə miʼi shi mbaʼ ndərazhi shi kwa mutiti gədewesliy niy ghunikə Farawaŋ va ta ɓə shi. 6 Dzəghwa ghəshi ki mbaʼ ghəshi kavə dəmbəkə tsa shi, mbaʼ ghəshi ɓəvə shiy niy mənivə ghəshi tə hiɗi Kanahaŋ. Ava tsəgha təɗəhu Zhakubə ghyi tsa ci lə mbəzli kiy ghyi tsa ci gwanashi. 7 Ndərazhiy zhər ci, mbaʼ ghyehi ci, mbaʼ ghyehi ndərazhi ci. Ghəshi lə hulfə ci gwanata niy dzay Zhakubəə dzəti hiɗi Ezhiptə.Hulfə Zhakubə
8 Avanashi sləneɗemer ka Izərayelə səəkəshiy dzəmbə Ezhiptə: Kar Zhakubə lə ndərazhi ci mbaʼ jijihiy: Ruben kwa taŋa zəghu Zhakubə 9 lə ndərazhi ci: Hanuk, mbaʼ Palu, mbaʼ Hecərun mbaʼ Karmi. 10 Shiməyuŋ lə ndərazhi ci: Yemwel, mbaʼ Yamin mbaʼ Wəhadə, mbaʼ Yakin, mbaʼ Cwəhar, mbaʼ Shawəl zəghu zha ka Kanan. 11 Levi lə ndərazhi ci: Gwərshuŋ mbaʼ Kehatə mbaʼ Merari. 12 Kar Zhuwda lə ndərazhi ci: Er mbaʼ Wənan, mbaʼ Shela, mbaʼ Peresə, mbaʼ Zerahə. Kar Er lə Wənan kiy a ghəshi niy bekushi tə hiɗi ka Kanahaŋ. Ndərazhi Peresə niy nza kar Hecərun ghəshi lə Hamwəl. 13 Kar Isakar lə ndərazhi ci: Twəla, mbaʼ Pwəwa, mbaʼ Ywəvə, mbaʼ Shimərwən. 14 Kar Zabuluŋ lə ndərazhi ci: Seredə, mbaʼ Elwəŋ, mbaʼ Yahəlel. 15 Ava tsəgha na ndərazhi yakə kar Leya lə Zhakubə tə hiɗi Mezwəpwətamiy. Mbaʼ zhambəghəshi Dina diɓa. Ndərazhiy zhər lə niy Ghyehi yakə kar Zhakubə lə Leya mbaʼ jijihi shi gwanashiy, mahəkanə mətsəkə mahəkanti niy nza ghəshi. 16 Kar Gad lə ndərazhi ci: Cifiywəŋ, mbaʼ Hagwəy, mbaʼ Shuni, mbaʼ Ecəbwəŋ, mbaʼ Eri, mbaʼ Arwədi, mbaʼ Areli. 17 Kar Aser lə ndərazhi ci: Yiməna, mbaʼ Yishəwa, mbaʼ Yishwi, mbaʼ Beriya mbaʼ zhambəghəshi Sera. Bakə niy nza ndərazhi va Beriya, kar Heber lə Malkiel. 18 Ava ghəshi na mbəzliy səvəri mbə kar Zhakubə lə Zilpa, mavaa niy ɓanavə Labanə va kaa zha ci Leya. Gwanashi tsa shiy, məŋ lə kwaŋ niy nza ghəshi. 19 Rashel mali Zhakubəy, bakə niy yanakə na ndərazhi: kar Zhuzefə lə Benzhameŋ. 20 Tə hiɗi ka Ezhiptəy, bakə niy yavə Zhuzefə ndərazhi kwa mali ci Asənatə zha Puti-fera, ndə ta mbəri tsa mbə məlmə Wən. Kar Manase lə Efrayim niy nza ndərazhi va. 21 Məŋ niy yavə Benzhameŋ ndərazhi: kar bela, mbaʼ beker, mbaʼ Ashəbel, mbaʼ Gera, mbaʼ Naaman, mbaʼ Ehi, mbaʼ Rwəshə, mbaʼ Mwəpim, mbaʼ Hwəpim ghəshi lə Ardə. 22 Ava tsəgha na mbəzliy səvəri mbə kar Rashel ghəshi lə Zhakubə, məŋ lə faɗə niy nza ghəshi. 23 Kar Daŋ lə zəghu ci Hwəshim, 24 mbaʼ kar Neftali lə ndərazhi ci: Yasheel, mbaʼ Gwəni, mbaʼ Yecer, mbaʼ Shilem. 25 Ni mbərfəŋ ni vay, ndərazhi kar Zhakubə lə Biləha mbaʼ kəhita na ghəshi. Maliy niy pəmanavə Labanə va kaa zha ci Rashel ta ghəranta sləni. 26 Gwanashi tsa mbəzli Zhakubə, ndərazhi ci lə jijihiyiy niy dzashiy dzəti hiɗi ka Ezhiptəy, mbəzli kwaŋəmətsəkə kwaŋəti niy nza ghəshi. Mbərəkəshi miʼi ndərazhi ci. 27 Mətsəhə kaa ndərazhi Zhuzefə va bakə ni yavə na tə hiɗi ka Ezhiptəy, mbəzli mbərəfəŋ mətsəkə niy nza mbəzli kiy ghyi tsa Zhakubə səəkəshiy dzəti hiɗi va.
Zhakubə lə ghyi tsa ci tə hiɗi ka Ezhiptə
28 Dzəghwa Zhakubə mbaʼ ghunay Zhuwda kwa kuma ci, ta dza ta pəmə Zhuzefə ta səəkəə dzəti hiɗi Gushen. Ma kar Zhakubə lə mbəzli ci ndəku ta tsəhə tə hiɗi va ki na, 29 dzəghwa Zhuzefə mbaʼ pəhati muwta ci tə gədewesli ka kafə dzəmə Gushen ta dza ta kumə lə diy. War sa tsahuy na na, dza na giɗə zliy dzəta wəri diy, war ə ghəciy wahə ta wəri ci. 30 Ma kə Izərayel kaa Zhuzefə ki na: «Njana naŋee lə mətsee, tə ghuməŋa ghay, Ya əə mətiree nana na kuma tiɓaw,» kə.
31 Ma kə Zhuzefə kaa ngwardiy lə kaa nihuti mbəzli kiy ghyi tsa diy ki na: «Kadiwəm ee dzəmə ta gəzanci kaa Farawaŋ: “A ngwardəhira lə kar dirə lə mbəzli kiy ghyi tsa ci va niy nza tə hiɗi ka Kanahaŋ səəkəshi,” pən kaa ngəci. 32 “Ka ndəghu shiy na ghəshi, kəli dəmbəkə na sləni shi, lə təŋkesli shi, mbaʼ kwiy shi, mbaʼ slay shi, mbaʼ shi və shi gwanashi səəkəshi ghəshi,” dzee ni kaa ngəci. 33 Mbaʼ kə Farawaŋ dzaa haraŋuy ka ɗuw va ghuy: “A sləni ka ghuy mənia?” Kiy, 34 “kəli dəmbəkə na sləni ghiy, ghiy ka sləni gha ghala kəli ghiy paʼa ndatsə. Ghənzə na sləni niy məni jijihiŋəy,” pə ghuy dzaa ni. Ghalaɓay, “Nzəyŋuyim tə hiɗi Gushen” dza Farawaŋ ni kaa ngəŋuy. Sa nzanay ya tsama ndə kəli dəmbəkə na, ka ɗi kuma ci ka Ezhiptəw,» kə.