Zhuzefə citi ghən tsa ci kaa ngwardiy
45
Ma sa fanti Zhuzefə kuma gəzə Zhuwda va ki na, mbə naa kəsəti nəfə tsa ci kwa kuma mbəzliy niy nza tiɓa vəgha gwanashiw. Ma kə kaa ka Ezhiptəə niy nza tiɓa vəgha na: «Ləvəriŋuyim gwanaŋuy» kə. Ma ghəshi kutishi lə ngwardiy ki na, mbaʼ canatishi ghən tsa ci. 2 Dza na ka wahə zlaŋ zlaŋ paʼa ka favə ka Ezhiptəə niy səvərishi va. Ya mbəzli kiy ghyi tsa Farawaŋ na, mbaʼ ghəshi favə diɓa3 Ma kə kaa ngwardiy na: «Yən na yən Zhuzefə, tə ghumiy na dirə na ci na?» Kə. Dza hazləni mbaʼ kəsəvə ngwardiy va tərəŋu kala mbə ghəshiy zləɓanci kuma. 4 Ma kə kaa ngəshi na: «Kətivam sar dzəvəghee,» kə. Dza ghəshi kəətə ghəshi kətəghəvashi. Ma kə na: «Yən na yən Zhuzefə, zədəŋuy tsa ɗəlanti ghuy va mbaʼ məndi ɓəghə dzəti hiɗi ka Ezhiptə. 5 Sənzənva kiy, ka səva ghuy ma, ka ɓə fəti ghuy kaa ghən tsa ghuy tə sa ɗəlantəra ghuy ma, sa nzanay, Hiyala ghunara na tə kuma ghuy ta mbəli piy tsa ghuy. 6 Kwa baka piya na ma sana tə hiɗi ni. Mbə piya cifə diɓay, Ka dza məndiy zaw, ka dza məndiy məni shiy kwamtiw. 7 Va tsəgha ɓəkəra Hiyala pərɓa yən kaa ngəŋuy dzəti hiɗi ni, nza ghuy mbəə yavə ndərazhi, mbaʼ ta mbəlantəŋuy piy tsa ghuy lə kwal tsa wəzə tsa tsətsə. 8 Ghuy ghunikəra na tikə kiw, Hiyala ghunikəra na. A Hiyala fiyra ka ntsaa ci kuma kaa Farawaŋ, Yən nighə naa dzəkən ghyi tsa ci gwanay, zhini yən nighəə dzəkən hiɗi ka Ezhiptə gwanashi. 9 Mbalam kiyaŋukiyaŋu a ghuy dza gəzanci kaa dirə. Ma pə ghuy dzaa ni ngəciy: “A kə zəghu gha Zhezhefiy: A Hiyala fiyəra ka ntsaa nighəə dzəkən hiɗi ka Ezhiptə gwanashi. Səkwa kiyaŋukiyaŋu a gha səəkəə kəsara. 10 Tə hiɗi Gushen dza ghaa nziy ndəku vəghee lə ndərazhi gha, mbaʼ jijihiŋa, mbaʼ teŋkesli gha, mbaʼ kwiy gha, mbaʼ slay gha, lə shi gha gwanashi. 11 Ta ndaŋuy shi zəmə dzee tikə ghuy lə mbəzli kiy ghyi tsa gha, mbaʼ dəmbəkə tsa gha. Shiy tiɓa ghuy dzaa ndərmaw. Sa nzanay, piya cifə tərəmbə ma diɓa, kə zəghu gha” pə ghuy kaa ngəci,» kə.
12 Ma kə Zhuzefə diɓa na: «Yən yən Zhuzefə gəzəŋuy na kuma lə miy tsee, ka nara ghuy lə məcici ghuy, ka nara zəmərə Benjaməŋ kuraku. 13 Mbalam gəzancim dikə tsa mənee tə hiɗi ka Ezhiptə kaa dirə, mbaʼ ghuy slanakə shi nashi ghuy gwanashi. Mbalam pəməkəm tikə kyaŋwkiyaŋu,» kə. 14 Dzəghwa na mbaʼ zlaghwavay kwa hati zəmbəghiy Bənjameŋ, hutəm ghəshi hutəmətəvashi ka wahə bakanashi. 15 Dza na ka huhutəmə ngwardiy va gwanashi kala wahə. Ma gha ghəshiy sla kuma li ki.
Farawaŋ haray Zhakubə ta səəkəə dzəti hiɗi ka Ezhiptə
16 Dzəghwa ki, mbaʼ məndi favə kiy ghyi tsa Farawaŋ: «A ngwardiy Zhuzefə tsahushi,» kə məndi. Sa favə kar Farawaŋ lə mbəzliy ghəranci sləni na, mbaʼ ghəshi vəshishi. 17 Ma kə Farawaŋ kaa Zhuzefə ki na: «Gəzanshi kaa ngwardəŋa a ghəshi pəhə shiy dzəti kwantəmcahi ta zhəghəvaa zhiti hiɗi ka Kanan, 18 a ghəshi dzaa pəməkə kar dəŋuy lə mbəzli ghuy gwanashi tikə. “Ta ndaŋuy hiɗiy guranti wəzə ta kəli dəmbəkə tə hiɗi ka Ezhiptə dzee, ta nziy ghuy ti shi, nza ghuy zəmə shiy guranti wəzə ni, kə Farawaŋ,” pə gha kaa ngəshi,» kə. 19 «A pə gha kaa ngəshi diɓay: “Ɓəvəm mutiti gədewesli tikə mbə Ezhiptə ta pa miʼi ghuy lə ndərazhi ghuy, mbaʼ dəŋuy kwa shi. 20 Əntaa mətsə ghuy dzaa məniŋuy ta shi ghuy dza ghuy ta zlashi ma. Sa nzanay tə hiɗiy guranti wəzə ta kəli dəmbəkə tə hiɗi ka Ezhiptə dza ghuy ta səəkə ta nziy, kə Farawaŋ,” pə gha kaa ngəshi,» kə.
21 Sa gəzanakə Farawaŋ tsəgha kaa Zhuzefə ki na mbaʼ Zhuzefə ɓanavəshi mutiti gədewesli kaa ndərazhi Izərayel, mbaʼ shi dza ghəshiy zəmə mbə kwal, ka dzashi ghəshi njasa gəzanakəshi məndi va. 22 Ya kaa wa ndə mbə shi na, mbaʼ ɓanavə kubaŋ tsa wəzə tsa. Ma kaa Benzhameŋ na cifə ghəci ɓanavəshi, mbaʼ gəna kwa tsahi diwiy diwiy mahəkanə. 23 Dza na diɓa mbaʼ ghunashi lə shi wəzə ni tə hiɗi ka Ezhiptə mə kwantəmcahiy zhər məŋ, mbaʼ alkamari, lə peŋ, mbaʼ nihuti shi zəmə ghənghən ghənghən mə kwantəmcahiy miʼi məŋ kaa diy ta zəməshi ghəci mbə kwal. 24 Dza na ki: «Mbalam, əntaa ghuy dzaa məni miy mbə kwal ma,» kə kaa ngəshi. 25 Mbaʼ ghəshi kafəshi tə hiɗi ka Ezhiptə ka dzashiy dzəti hiɗi ka Kanahaŋ, mbaʼ ghəshi dzaa kəsay dəshi Zhakubə ki. 26 Ma kə ghəshi kaa ngəci na: «Tə ghumiy na Zhuzefə. Ghəci nighə naa dzəkən hiɗi ka Ezhiptə gwanashi,» kə ghəshi. Sa gəzəkə ghəshi tsəgha na mbaʼ məhərli Zhakubə səəta. Sa nzanay, niy fiy kuma va na ka sa kataŋ naw. 27 Dzəghwa ghəshi ki, mbaʼ ghəshi zhananakə kuma gəzanshi Zhuzefə va gwanata, mbaʼ ghəshi cinti mutiti gədewesli ghunikə zəghu ci va ta ɓə ci. Ma gha her ciy dzəghwashi ki. 28 Ma kə ki na: «Ndata tə ghumiy na zəghwe Zhezhefiy, gwaʼaa kuma. Ee ɗi dza ta nay kee gha məti,» kə.