Zhuzefəə nighə kuma ngwardiy
44
Liy hum ki, ma kə Zhuzefə kaa ntsaa nighəə dzəkən ghyi tsa ci na: «Tahanayshi gwararahi mbəzli va lə alkamari njasa dza ghəshiy mbay ɓəvə, Ya wa ndiy, nza gha zhananaghwa gəna ci kwa miy gwarara ci. 2 Ka gha dzay, mbaʼ gha faghwa kwakwa tsee va, məntim tə tsahi gəna kwa gwarara tsaa gura ju tsa va ndə, mbaʼ gəna ci diɓa,» kə. Dzəghwa ntsa va mbaʼ mənti njasa gəzanakə Zhuzefə va. 3 Ma way pi tə həzlimə ki na, mbaʼ məndi ɓanavəshi kwal kaa mbəzli va ta dzashi lə kwantəmcahi shi. 4 Ma sa səvərishi ghəshi mbə məlmə mbaʼ ghəshi dzavə dza juə ki, ma kə Zhuzefə kaa ntsaa nighəə dzəkən ghyi tsa ci na: «Kafə lə bali a gha dzaa kəsashi mbəzli va. A pə gha dzaa ni kaa ngəshi sa ka gha kəsashiy: “Tawa zhini ghuy kuma wəzə na lə na jikir naa? 5 Tawa ghələhu ghuy kwakwa tsa ka ntsee dikə tsaa sa shiy kwa, zhini kwa ghəciy nighə shiy dzaa mənivaa? A ghuy mənti kuma gəmgəm na,” pə gha dzaa ni kaa ngəshi,» kə.6 Dzəghwa ntsa va ki mbaʼ kafiy dzaa kəsashi, mbaʼ gəzanakəshi kuma va tsəgha. 7 Ma kə ghəshi kaa ngəci na: «Tawa gəzəŋəy gha kuma tsəgha na kiyaa ntsa ghiy dikə tsa? Məniŋəy ghiy ghiy ka sləni gha gar məni gəla ni tsəgha ni va shiyəw. 8 Sa niy kəsata ghiy gəna kwa miy gwararahi ghiy na, niy zhinikəŋa ghiy səəkə tə hiɗi ka Kanahaŋ? Njaa njaa dza ghiy zhiniy ghəli ya gəna, ya tsahi mbəzə kiy ghyi tsa ntsa gha dikə tsa diɓa kiyaa? 9 Pəlati gwararahi ghiy, ntsa dza ghaa kəsay kwakwa kwa gwarara ci mbə ghiyəy, nza gha pəəsliti, mbaʼ gha kəəsəhuŋəy ka mevivi gha,» kə ghəshi. 10 Ma kə ntsa va na: «Tsəgha na, ta məni dza ghummə njasa gəzə ghuy va. Ə na na nzanay, ntsa dzee kəsay kwakwa tsa va və na sa dzee kəsəhu ka mava tsee. Niy tərə mbəzliy, nza ghəshi dzashi,» kə. 11 Dzəghwa ya wa ndə ki, kyaŋwkyaŋw ghəci ɓəkəghwa shiy tə kwantəmca ci mbaʼ pəlanti gwarara ci. 12 Dza ntsaa nighə vaa dzəkən ghyi tsa Zhuzefə tapə dzəmbiy mbə pəla gwararahi shi gwanashi. Sa gha na tə na tsa dikə tsa ndiy ka kəray tə na tsa ju tsa. Mbaʼ kəsay kwakwa tsa va kwa gwarara Benzhameŋ. 13 Sa nata ghəshi tsəgha na, hashi ghəshi hashi shi kwiyahə kwiyahə ghəshi slikwəvəri kubeŋer shi. Ya wa ndə na, mbaʼ zhanamə shiy mə kwantəmca ci, tərəɗə ghəshi zhəghətəvashiy zhimbə məlmə.
Zhuwda mbə yipə ta Benzhameŋ
14 Dzəghwa kar Zhuwda lə ngwardiy ki, mbaʼ ghəshi tsəhəshi kiy ghyi tsa Zhuzefə. Kəghyiy niy nza Zhuzefə, dza ghəshi tsəfəku tsəfəku ghəshi tsəfəkushi gaʼa kuma shi mbə hiɗi kwa kuma ci. 15 Ma kə Zhuzefə kaa ngəshi na: «Tawa mənti ghuy tsəghaa? Ə sənay ma ghuy ndə njasa nzee tsa na cəkeʼ ka naa sənata kuma mbəmbə na pə ghuy na?» Kə 16 Ma kə Zhuwda na: « Njaa dza ghiy ni kaa ngəŋa kiya ntsa ghiy dikə tsa? Fəti va ghiyuw ka ghiy ni ki na? kuma va ghiy gar gəzəw. A Hiyala cikəvəri kuma ghiy jikir naa dzəti ngula. Mevivi gha dza ghiy nza kwasəbə ntsa kəsay məndi va kwakwa kwa gwarara ci,» kə. 17 Ma kə Zhuzefə na: «Ka dzee mənivə kuma tsəgha naw. Ntsa kəsayim va kwakwa kwa gwarara ciy, ghəci na sa dzee kəsəhu ka mava tsee. A na na ghuyiy mbalam kuriŋ ta kəsay dəŋuy,» kə.
18 Dzəghwa Zhuwda kəətə kəətəghəvay, ma kə na: «Titihu na gha ndə sləkəra, ndara kwal ee gəzəkəŋa kuma jiwu, əntaa nəfə tsa gha sati ma, sa nzanay ghala mbə gha lə Farawaŋuw. 19 Sa niy nza ghiy va tiɓa kwataŋay, a gha niy ɗuwəhu va ghiy ghiy mevivi gha: “Tə ghumiy na dəŋuy na? Tsahuti zədidi va ghuy na?” Pə gha niy ni. 20 “Tiɓay na dəŋəy, pəhal zal na. A tsahuti zədəŋəy tiɓa yavə na mbə hali. Təruŋəy ɗi dəŋəy zəghu va, sa nzanay ghəci kutiy tərə na va mbəghiy, a tsahuti zəmbəghiy mətiy,” pə ghiy niy ni kaa ngəŋa. 21 Ma pə gha niy ni kaa mevivi gha ki na: “Mbalam pəməkəram ee nay,” pə gha niy ni. 22 “Ka dza zəghu vaa ɓarvay vəgha dəŋəyəw. Mbaʼ kə ɓarvay vəghay, ta mətiy dza dəŋəy tsa va,” pə ghiy niy ni kaa ngəŋa 23 Ma pə gha niy ni kaa mevivi gha na: “Kala səəkə pə ghuy lə zədəŋuy tsa juw tsa vay, ka dzee zhiniy kaʼwəŋuyəw,” pə gha niy ni. 24 Ma sa zhəghəghəvaŋəy ghiy jighi dzəvəgha dəŋəy mava tsa gha na, mbaʼ ghiy gəzanakə kuma gha va ki ntsa ghiy dikə tsa. 25 Ma kə dəŋəy na: “Zhəghəvam, a ghuy dzaa pakəmmə shi zəmə jiwu” kə. 26 Ma pə ghiy kaa ngəci na: “Ta dza dza ghiy kama zədəŋəy tsa ju tsa va kwasəbə ghiy, sa nzanay, ka dza ntsa vaa kaʼwəŋəy kala zədəŋəy tsa ju tsa va kwasəbə ghiyuw,” pə ghiy. 27 Ma kə dəŋəy, mava tsa gha kaa ngəŋiy na: “A ghuy sənay bakəshi yakəra malee va ndərazhi. 28 Tsahuti kutiŋiy, aa mətiy. Sa təkə yay, shi kwa deshi pərəhu na, sa nzana paʼa ndatsə na, nay yaw. 29 Avanaŋuy ɗi ɓəhura tsatsa diɓa. Mbaʼ kə kuma kəsayəy, Pəhal njasa nzee tsa na, ta mətira dzee va nəfə tsee tə mbərkə kuma ghuy,” kə.
30 Sənzənva kiy ntsa ghiy dikə tsay, ka dzee mbay zhəghəghəvara dzəvəgha dirə, mava tsa gha, kala zəghu ɗiti na va tərəŋu dalala kwasəbə ghiyəy. 31 Sa naa nay ma zəghu va kwasəbə ghiyəy, ta mətiy dza na. Nay gha ghiy dzaa paslanti dəŋəy mbə hali ci lə kuma kwa hur ci tsəgha sa? 32 Sənay tə gha diɓa, ya a na kumaa dzaa kəsay zəghu vay, vəya ghaa ɗuw pən kaa dirə. Ma pən kaa ngəci diɓay: “Kala pəməkəŋa pəniy, kənee kə kuma va dzaa nza ya paʼa humɓa” pən kaa ngəci. 33 Titihu, a cəʼuŋee zləɓavə ee nziyra tikə kwa pi tsa zəghu na ka mava tsa gha, a ghəci mbəə dzay lə nihuti ngwardiy. 34 Ka dzee mbəə dzəghwa kuma dirə kala zəghu va tiɓaw. Ka ɗee nay ngəraʼu tsaa dzaa dzəkən dirəw,» kə Zhuwda.