Zhakubə zləɓavə Benzhameŋ nuw ngwardiy dzəghwa Ezhiptə
43
Dza ma, war ka zhiniy mətsəhəva tə hiɗi ka Kanahaŋ. 2 Ma sa kəranti mbəzli kiy ghyi tsa Zhakubə zəmə alkamariy niy ɓəkə ghəshi va tə hiɗi ka Ezhiptə ki, ma kə Zhakubə kaa ndərazhi ci na: «Zhəghəvam zhəti hiɗi ka Ezhiptə, a ghuy dzaa pakəmmə shi zəmə jiwu» kə. 3 Ma kə Zhuwda ngəci na: «A ntsaa nighə vaa dzəkən Hiɗi ka Ezhiptə gəzəkəŋəy wəzə wəzə: “Kala səəkə pə ghuy lə zədəŋuy tsa vay, ka Zhinee kaʼwəŋuyəw,” kə kaa ngəŋiy. 4 Mbaʼ pə gha zləɓavə ghuni Benzhameŋ kwasəbə ghiyəy, ta dza dza ghiy ta paŋa shi zəmə. 5 Kala zləɓavə pə ghay, ka zhəghwa ghiyuw. Sa nzanay, a ntsa va gəzaŋəy: “Kala zədəŋuy kwasəbə ghuyiy, ka dzee kaʼwəŋuyəw” kə,» kə Zhuwda.6 Ma kə Izərayel na: «Ta wa gəzanci ghuy kaa ntsa va, a tsahuti zədəŋuy tiɓa pə ghuyaa? A ghuy məntəra kuma gəmgəm na,» kə. 7 Ma kə ghəshi ngəci na: «kumaa ɗəɗuw ntsa va va ghiy dzəkən ghiy lə dzəkən ghyi tsa ghummə: “Tə ghumiy na dəŋuy na? Tsahuti zəməmə va ghuy na?” Kə. Ma zləɓanci ghiy kuma ɗuw na. Gəəzə ghiy, ta ni dza na: “Pəməkəm zədəŋuy tsa va” pə ghiy na,» kə ghəshi.
8 Ma kə Zhuwda kaa diy Izərayel ki na: «Pəmavəra zəghu va didi. Mbaʼ pə ghummə ɗi nza tə ghuməmə kala bəku ma, gha lə ghiy mbaʼ mbəzli kiy ghyi tsa ghummiy, wəzəɓa dzaŋəy ghiy na. 9 Avee ɓəvə kuma kən mbə dəvee, viya pə gha dzaa ɗuw yən kala dzaa zhinikəŋa. Kala dza pən zhinikəŋay, ntsaa məntəŋa kuma jikir na pən dzaa nza ya paʼ humɓa. 10 Kala sa kəslimbə ghummə ghəniy, ci ghiy səəkəŋəy kwaɓa kwa baka səɗa ghiy nza,» kə.
11 Ma kə Izərayel, dəshi kaa ngəshi na: «Ma pə ghuy mənti ghənzə tsəghay, ɓəvəm shi wəzə wəzə ni tə hiɗi ghummə kwa mbəlederem ghuy, nza ghuy dzaa ɓanavəshi kaa ntsa va. Ɓəvəm takə diməhiy zən wəzə ni mahəkanə juw juw, juw mbaʼ mbəzəku jiwu, mbaʼ takə ya fəhi wəzə ni bakə. 12 Ɓəvəm gənaa niy zlata məndi va miy mbəleɗerem ghuy, ə niy səəshi məndi mbaʼ ghən niy zay ti bərkee. Nza ghuy ɓəvə nahuti gəna ta dəvə ghuy tsəgha diɓa, 13 Pəməm zədəŋuy tsa juw tsa va a ghuy zha va ntsa va. 14 Nza Hyalaa guranti tə bərci fanambə zhəhur tə ghuy mbə nəfə tsa ntsa va. Nza ghəci zlatavəŋuy kar Bənjameŋ ghəshi lə tsahuti zədəŋuy tsa va. A na nayay, a tsahuti zəghu zay vəya, zhini ta zashi nihuti dza diɓa,» kə.
Zhuzefə zhiniy kumə lə ngwardiy, kwa baka səɗa.
15 Dzəghwa ndərazhi va ki, mbaʼ ghəshi pəlati shi dza ghəshi va ta ɓanci kaa ntsa va, mbaʼ ghəshi zhiniy ɓəvə nahuti gənaa zhəvəgha naa niy zhanaghwa məndi vaa dzəghwa mbəlederem shi, pəm ghəshi pəməvə benjameŋ ka dzashiy dzəghwa Ezhiptə. Mbaʼ ghəshi tsəhəshi kwa kuma Zhuzefə ki. 16 Ma sa nay Zhuzefə Benzhameŋ kwasəbəshi ki, ma kə kaa ntsaa nighəə dzəkən pi tsa kiy ghyi tsa ci na: «Pəməghə mbəzli niy dzakə ghyi tsee, nza gha hənanatishi shiy, mbaʼ məndi tanatishi. Sa nzanay, ghiy li shi dza na ta zəmə shiy ndatsə havəghu,» kə. 17 Dza ntsa va mbaʼ mənti njasa gəzanakə Zhuzefə va, mbaʼ pəməghəshiy dzakə ghyi tsa Zhuzefə. 18 Ma məndi mbə pəməshiy dzakə ghyi tsa Zhuzefə na, mbaʼ hazləni kəəsəvəshi, ma kə ghəshi kwa jipə shi na: «Tə mbərkə gəna zhanaghwa məndi va kwa mbəleɗerem Alkamari ghummə va tə kwa taŋa səəkə tsa ghummə pəməkəmmə məndi tikə. Ta pəsli dza ghəshi tə ghummə, ta sammə ngəraʼu. Ta kəəsəhu kwantəmcahi ghummə, dza ghəshi mbaʼ ghəshi zhəghətəmmə ka mevivi shi,» kə ghəshi. 19 Dza ghəshi kəətə ghəshi kətəghəvashiy dzəvəgha ntsaa nighəə dzəkən ghyi tsa Zhuzefə va. Ma kə ghəshi kaa ngəci kwa miy dəgha na: 20 «Titihu ntsa ghiy dikə tsa, a ghiy niy səəkə tikə kwataŋa mbə pa shi zəmə. 21 Ma ghiy mbə jighi, sa tsəhəŋəy ghiy tə pi tsa dza ghiy ta hi na, mbaʼ ghiy ghunanti mbəleɗerem ghiy. Ya wa ndə mbə ghiy na mbaʼ kəsata gəna ci njasa niy wati na miy gwarara ci. Li səəkə ghiy sana. 22 A ghiy səəkə lə nahuti gəna ta pa shi zəmə diɓa. Sənay ghiy nda wa ntsaa zhanaghwa gəna ghiy va kwa mbəleɗerem ghiyuw,» kə ghəshi. 23 Ma kə kaa ngəshi na: «kuma tiɓaw, ka hazləni ghuy ma. Hiyala nuw ghuy lə dəŋuy faghwaŋuy na gəna kwa mbəleɗerem ghuy. Ta na gəna pa ghuy Alkamari tiy, aa tsəhəta vəya,» kə.
Dzəghwa ntsa va ki, mbaʼ pəlanavəshi Shiməyuŋ, 24 mbaʼ pəməghəshiy, dzakə ghyi tsa Zhuzefə. Dza na mbaʼ tanavəshi yam ta yaɓə shiɗəshiɗə shi, mbaʼ tanavəshi shi guzən kaa kwantəmcahi shi. 25 Dza ghəshi ki mbaʼ ghəshi gumati shi dza ghəshi va ta ɓanci kaa Zhuzefə sa ka na səəkiy ta zəmə shiy havəghu. Sa nzanay, a məndi niy gəzanshi tiɓa dza ghəshi ta zəmə shiy kwasəbə, kə məndi. 26 Ma sa səəkiy Zhuzefəə dzakə ghyi ki na, mbaʼ ghəshi ɓanakəvəri shiy niy ɓanakə ghəshi va, mbaʼ ghəshi tsətsəfəkushi kwa kuma ci, gaʼa kuma shi mbə hiɗi. 27 «Kuriŋ nza ghuy na, kə Zhuzefə kaa ngəshi. Ma kə diɓa na: «Kuriŋ na dəŋuy tsa hali hali tsa va gəzara ghuy kuma ci na? Tə ghumiy na na?» Kə. 28 «Kuriŋ na dəŋəy ndə sləni tsa gha, tə ghumiy na,» kə ghəshi. Dza ghəshi mbaʼ ghəshi zhiniy tsəfəkushi gaʼa kuma shi mbə hiɗi. 29 Tsaʼ kə Zhuzefə na, mbaʼ nay Benzhameŋ, zəmbəghiy tsa səkwa ghəshi kwa hur tsa kutiŋ tsa li. Ma kə na: «Sasa na zədəŋuy tsa ju tsa va gəzə ghuy na?» Kə. Ma kə diɓa na: «Nza Hiyala təfətəŋa miy mazə,» kə 30 Sa nay Zhuzefə Benzhameŋ tsəgha ki na, mbaʼ kuma va dapay paʼa mbə nəfə ci. Ka ɗi wahə ghəci, dza na mbaʼ səvəriy mbə pi tsa nza ghəshi va kyaŋwkyaŋw, mbaʼ dzay dzəmbə ciki tsa ci, ka wahə mbəɓa. 31 Sa wahanti na wahə na mbaʼ pishi kuma ci ka səvəriy. Mbaʼ kəsəti nəfə tsa ci mbəɓa mbəɓa va wahə. «Təhəm shi zəmə,» kə. 32 Dzəghwa məndi ki, mbaʼ məndi ɓanavə ni ci shi zəmə kutiy, kutishi ni ngwardiy, zhini kutishi ni ka Ezhiptəə zəmə shiy kwasəbə. Sa nzanay, kar ka Ezhiptəə zəmə shiy lə ka Ebəruw, Mahalakə na va ka Ezhiptə. 33 Kwa kuma Zhuzefə niy fəniyshi məndi tsa shi pi nziy kaa ngwardəshi va, ɓizhi məndi sləkiy shi tə dikə tə dikə, ʼwava na tə tsa dikə tsa, paʼ tə tsa ju tsa. War ə ghəshiy nighəva kwa micic shi, ka mananshi maɗaŋa nava kuma tərəŋu. 34 Dzəghwa Zhuzefə mbaʼ gəzanshi kaa mbəzli a məndi ɓanshi ni ci va shi zəmə na. Mbaʼ gəzanshi ɓanci ni Benzhameŋ shi zəmə ɗaŋəɓa ni ci gar cifə səɗa kaa ni nihuti mbəzli. Mbaʼ ghəshi sahu shiy jakə jakə paʼa ka vəshishi.