Zhakubə ghunashi ndərazhi ciy dzəmbə Ezhiptə
42
Dzəghwa mbaʼ Zhakubə favə a alkamari kwa Ezhiptə, kə məndi. Ma kə kaa ndərazhi ci na: «Ka nziyŋuy ghuy hashi ma. 2 Ee favə a alkamari kwa Ezhiptə, kə məndi. Ləghwam a ghuy pakəmmə nza ghummə nza tə ghummə əntaa ghummə bəkummə va ma,» kə. 3 Dza ngwardiy Zhuzefə məŋ, mbaʼ ghəshi dzashiy dzəghwa Ezhiptə ta pa alkamari ki. 4 Ma Benzhameŋ tsa ju tsa zəmbəghiy Zhuzefə na ciy, niy zlay Zhakubəə dza kwasəbə ngwardiy vaw. Sa nzanay aa niy hazləni va nəghətaa kuma gəmgəm na kəsay. 5 Dzəghwa mbaʼ ndərazhi Zhakubə tsəhəshi kwa Ezhiptə ta pa alkamari nja nihuti mbəzli gwanashi ni ki. Sa nzana mbaʼ ma niy nza tə hiɗi ka Kanahaŋ.Kwa taŋa kumə tsa kar Zhuzefə lə ngwardiy
6 Zhuzefə niy nighə naa dzəkən hiɗi va. Ghəci niy nighə naa dzəkən ɗəl alkamari kaa mbəzli tə hiɗi gwanashi. Sa tsəhəshi ngwardiy na, dza ghəshi tsətsəfəku ghəshi tsətsəfəkushi kwa kuma ci, gaʼa kuma shi mbə hiɗi. 7 War sa nashi Zhuzefə na, mbaʼ sənashi, kala canshi ma ghən tsa ci ghəci. Dza na ka gəzanshi kuma lə gulaŋ, a kə na: «kuma səəkə ghuyaa?» Kə. «Tə hiɗi ka Kanahaŋ səəkə ghiy, ta pa shi zəmə,» kə ghəshi.
8 Ya tsəgha niy sənashi Zhuzefə ngwardiy kiy, na nashi na, niy sənay ghəshiw. 9 Dzəghwa na mbaʼ zəzəvə shiwhiy niy shiwti na vaa dzəkən shi. Ma kə kaa ngəshi na: « Ghuyəy, ta nighə pi tsa tiɓa səəkə ghuy, ta sənay nda dzəghwa tima na bərci ghiy daw,» kə. 10 Ma kə ghəshi na: « Aa awə ntsa ghiy dikə tsaw, ta pa shi zəmə səəkə ka sləni gha gwaʼa tsəgha. 11 Ndərazhi ndə kutiŋ nza ghiy gwanaŋiy. Mbəzli tiɗiɗə ni nza ghiy, ta nighə pi tsa tiɓa səəkə ghiyuw,» kə ghəshi. 12 «Dzərvəə sla ghuy, ta nighə nda dzəghwa tima na bərci ghiy daw səəkə ghuy» kə Zhuzefə kaa ngəshi. 13 Ma kə ghəshi na: «Tiɓaw, məŋ lə bakə niy nza ghiy ghiy ka sləni gha, ndərazhi ndə kutiŋ. Tə hiɗi ka Kanahaŋ səəkə ghiy. Tsa juw tsa mbə ghiyəy ghəshi lə dəŋəy na kiy ghyi. Tsahuti kutiŋiy aa zlaŋəy» kə ghəshi. 14 A kə Zhuzefə kaa ngəshi na: «Ta nighə pi tsa tiɓa səəkə ghuy pən ɓa sa,» kə. 15 Ma kə diɓa na: «Avanay njasa dzee sənata nda kataŋ na kuma gəzəkə ghuy va: Lə slən tsa Farawaŋ zəməkəŋuyee fəla, ka kafəŋuy ghuy tə hiɗi ni kala səəkiy zəməŋuy tsa juw tsa vaw. 16 Ghunayim ndə kutiŋ mbə ghuy a ghəci dzaa pəməkə. Ghuy ghuy niy tərə mbəzliy, tiɓa dza ghuy nza kwa fərshina. Nzee mbəə sənay nda kataŋ na kuma gəzəkəra ghuy va. Kala tsəgha kə dzaa nzay, lə slən tsa Farawaŋ gəzee, ta nighə pi tsa tiɓa səəkə ghuy kataŋ,» kə kaa ngəshi.
17 Dzəghwa Zhuzefə mbaʼ kasaghwashi gwanashi kwa fərshina, ta vici mahəkanə. 18 Ma tə kwa mahəkana vici ki na, mbaʼ harkəshi, ma kə kaa ngəshi na: «Yənəy, ndə ka hazləni va Hiyala nzee. Mbaʼ pə ghuy ɗi nza tə ghuməŋuyəy, məntim kuma dzee na ta gəzaŋuy. 19 Mbəzli tiɗiɗə ni pə ghuyiy, zlayim tsahuti ndə mbə ghuy kutiŋ tikə kwa fərshina. Ma ghuy ni gwanashi ni mbəzliy, nza ghuy dzaŋuy lə Alkamari kaa mbəzli ghuy va ma. 20 Ma ghuy zhikiy, nza ghuy pəməkəvəra zədəŋuy tsa juw tsa va. Ghalaɓay, ta sənay dzee kuma kataŋ na sa gəzəkəra ghuy va pən, ka dza məndiy bakwantəŋuy ghalaɓaw,» kə kaa ngəshi. Mbaʼ ghəshi zləɓavə məni njasa gəzanakəshi na va. 21 Ma kə ghəshi kwa jipə shi na: «Ta na navay, tə mbərkə kuma mənti ghummə va kaa zədəmmə sa ghummə ngəraʼu tsa. Sa nzanay, a ghummə niy nay ngəraʼu tsaa niy sa na ghala pi tsaa niy wahəmmə na va wahə ta zlay ghummə, kalaa zhimmə hur tsa ghummə ti. Va tsəgha kəsammə gəla ngəraʼu tsa ndatsə kuraku,» kə ghəshi. 22 Ma kə Ruben kaa ngəshi na: «Ee niy gəzəŋuy: “Ka məni kuma jikir na ghuy kaa zəghu va ma,” pən, kala zləɓa ghuy. Sana kiy, avanammə mbə kəsli kərhi ta məti ci,» kə. 23 Niy sənay ghəshi mbə favə ghani gəzə ghəshi va na Zhuzefə kə ghəshi kiw, sa nzanay, ndə niy zhini na kuma kwa jipə shi lə Zhuzefə. 24 Dzəghwa Zhuzefə mbaʼ katantəvay vəgha shi ka wahə ghəci.
Ngwardiy Zhuzefə zhəghəghəvashiy dzəti hiɗi ka Kanan.
Liy hum ki na, mbaʼ zhəghəkəvay ta gəzanshi kuma. Dza na mbaʼ kəsəhu Shiməyuŋ mbə shi, ɓiyakə pəhati tə zəʼwə kwa kuma shi mbaʼ faghwa kwa fərshina. 25 Ma kə kaa ka sləni ci na: «Tatanavəshim alkamari paf paf gwararahi shi, ya wa ndiy mbaʼ ghuy zhananaghwa gəna ci kwa mbəl tsa ci, mbaʼ ghuy ɓanavəshi shi zəmə ta zəməshi kwa kwal,» kə. Dza mbaʼ məndi mənti kuma va tsəgha. 26 Dzəghwa ghəshi ki, mbaʼ ghəshi fafati shiy tə kwantəmcahi shi ka dzashi.
27 Ma sa garəshi ghəshi mbə kwal tə tsahuti pi ta hi ki na, dzəghwa tsahuti mbə shi mbaʼ pəlanti gwarara ci ta ti shi zəmə kaa kwantəmca ci, tsaʼ kə na, gəna ci kwa miy gwarara. 28 Ma kə kaa ngwardiy na: «A məndi zhanavəra nee gəna, avanta kwa gwararee,» kə. Sa favə ghəshi tsəgha na, mbaʼ her shi dzashi, war ə ghəshiy gurəgurə. Ma kə ghəshi kwa jipə shi na: «A shi məntəmmə Hiyala niaa?» Kə ghəshi.
29 Ma sa tsəhəshi ghəshi tə hiɗi Kanahaŋ vəgha dəshi Zhakubə ki na, mbaʼ ghəshi slanakə shiy mənishi va gwanashi kaa ngəci. 30 Ma kə ghəshi kaa ngəci na: «Ntsaa nighəə dzəkən hiɗi vay, ghyanakiy gəzəkəŋəy na kuma. Nja mbəzliy tsəhəshi ta nighə pi tsa tə hiɗi va fiyŋəy na. 31 “Mbəzli tiɗiɗə ni nza ghiy, ta nighə pi tsa tə hiɗi ni səəkə ghiyuw. 32 Məŋə lə bakə niy nza ghiy ngwardidi va dəŋəy, mbaʼ tsahuti kutiŋ zlaŋəy. Tsa juw tsa mbə ghiyəy, ghəshi lə dəŋəy na tə hiɗi Kanahaŋ,” pə ghiy kaa ngəci. 33 Ma kə ntsa nza hiɗi va va mbə dəvə ci kaa ngəŋiyəy: “Kee gha sənay mbəzli tiɗiɗə ni nza ghuy pəniy, zlayram tsahuti zəməŋuy kutiŋ tikə a ghuy ɓəghə shiy kaa mbəzli ghuy va ma. 34 Sa ka ghuy zhikiy, nza ghuy pəməkəvəra tsa ju tsa va zəməŋuy. Ghalaɓay, ta sənay dzee ta nighə pi tsa tə hiɗi ni niy səəkə ghuyuw, mbəzli tiɗiɗə nza ghuy, pən. Kee dza kiy, mbaʼee pəmavəŋuy zədəŋuy, nza ghuy dza dza ghuy tə hiɗi ni njasa ɗi ghuy,” kə kaa ngəŋiy,» kə ghəshi.
35 Liy hum ki na, dza ghəshi ka shikə shiy səəmə kwa gwararahi shi, nighə ghəshi ya wa ndə na, gəna ci pəhə pəhə mbə shiy kwa gwarara ci. Sa nata ghəshi gəna shi, tsəgha dəshi nata kuraku na, mbaʼ her shi dzashi gwanashi. 36 Ma kə dəshi Zhakubə na: «Ta təhəvəriɗa lə ndərazhee ɗi ghuy. Sanay Zhuzefə tiɓaw, Shəməyaŋw tiɓaw. Avanaŋuy ɗi ɓəhu Bənjameŋ viya diɓa. Ngəraʼwə tsa va gwanayəy, war dzəkənee dza na,» kə. 37 Ma kə Ruben kaa diy ki na: «Fambəra Benjaməŋ mbə dəvee, ta zhinikəŋa dzee. Kala zhinikəŋa pəniy, nza gha bakwamti ndərazhee va bakə ni,» kə. 38 Ma kə Zhakubə na: «Tiɓaw, ka dzəghwa zəghwee kwasəbə ghuyuw. A zəmbəghiy mətiy, ghəci kutiy tərə na viya. Mbaʼ kə kuma dzaa kəsay mbə dza ghuy vay, ta mətira dzee va nəfə tsee tə mbərkə kuma ghuy, sa nzanay, pəhal zal tezlezl ghən tsa ci nzee,» kə.