Shəwhi Farawaŋ mazə ka Ezhiptə
41
Liy hum piya bakə ki na, dza Farawaŋ mbaʼ shəwti shəw. Shəw nay, ghəci məgarə miy həl Nil. 2 Nighə na na, slayiy miʼi mbərfəŋ mbə səəmə kwa həl. Slay vay, slay ka təɓə, lə vəgha vəshi niy nza ghəshi. Dza ghəshi ka pərə guzən dziy miy həl tsa va. 3 Liy hum diɓa na, mbaʼ nihuti slay mbərfəŋ səməshi kwa həl tsa va. Niy təɓə ghəshiw. Zhini ʼiresleŋw ʼiresleŋw ghəshi. Dza ghəshi mbaʼ ghəshi səəkəə garəshi vəgha ni kwa taŋa va miy həl Nil. 4 Dzəghwa niy təɓə ma va ʼiresleŋw ʼiresleŋw ni mbaʼ ghəshi pəranti niy təɓə va niy nza vəgha və shi. Fərəghə Farawaŋ fərəghiy ki.5 Dza na mbaʼ zhinəhu hi, mbaʼ shəwti kwa baka shəw. Mbə shəw tsa vay, dəŋw alkamari kutiŋ nay na, mbaʼ fati ghən dikə dikə ka təɓə mbərfəŋ. 6 Zhini mbaʼ tsahuti dəŋw pəsəy, mbaʼ fati ghən mbərfəŋ. Slehə slehə ghəci, mbaʼ safə tsaa səəkə kwa ghumə ghwalanti. 7 Dza tsa mbərfəŋ tsa va slehə slehə tsa ghən alkamari mbaʼ nda ndahu tsa mbərfəŋ tsa va dikə dikə tsa nza mətsə kwa bəvə bəvə. Dza Farawaŋ mbaʼ fərəghiy ki, mbaʼ sənay shəw shəwti na, kə.
8 Mbaʼ məhərli ci səəta. War sa kəɗiy pi na, mbaʼ harashi ka nga zləra lə mbəzliy sənata kuma tə hiɗi ka Ezhiptə gwanashi. Sa səəkəshi ghəshi na, mbaʼ slanakəshi shəwhi ci va. Ndə tiɓaa mbay zhananakə shi ɗi shiwhi vaa gəzə ya kutiŋəw. 9 Ma kə ntsaa sləkə mbəzliy nighəə dzəkən shi ka Farawaŋ sa ki na: «A mazə, ta gəzəkəvəri fəti məntee dzee ndatsə. 10 Tə nahuti viciy, a nəfə tsa gha niy satiy tərəŋu dzəkən ghiy lə ntsaa sləkə mbəzliy taŋa peŋ, mbaʼ gha niy faghwaŋəy kwa bəla fərshina nighə ntsaa sləkə ka sawjiy ndəghu fərshina. 11 Dza ghiy bakanaŋəy tə vərɗi kutiŋ na, mbaʼ ghiy shəwti shəw. Ya tsamaɓa shəwəy, lə shi ɗi naa gəzə tiɓa. 12 A tsahuti zəghu ka Ebərə, mava tsa ntsaa sləkə ka sawjiy ndəghu mazə niy nza lə ghiy. Dza ghiy mbaʼ ghiy slanakə shəwhi ghiy va. Dza na mbaʼ zhananakə shi ɗi shəw tsa ciy gəzə ya kaa tsama ndə mbə ghiy. 13 Liy hum ki na, war njasaa niy zhinikə na va shəwhi va shiy mənishi. Mbaʼ gha zhanambəra mbə slənee, ma tsahuti tsa va na, mbaʼm ɓərtanti,» kə.
Zhuzefəə zhini shəwhi Farawaŋ
14 Sa favə Farawaŋ tsəgha na, dza na mbaʼ ghunashi mbəzli ta har Zhuzefə. Dza məndi kiyaŋu kiyaŋu məndi ɓəkəmə kwa fərshina, mbaʼ məndi slənananti ghən, mbaʼ mbaranti shi kən ghən ci, mbaʼ səəkiy dzəghwa kuma Farawaŋ. 15 Ma kə Farawaŋ ngəci na: «Shiw shiwtee, kala mbay ndə ya kutiŋ zhinikəra shi ɗi shiw tsa vaa gəzə, mbaʼee favə a ghaa mbay zhini shəw slakəŋa ma məndi, kə məndi,» kə. 16 Ma kə Zhuzefə na: «Yən dza naa zhiniw, Hiyala dza naa zhananati kumaa dzaa dəpə nəfə tsa Farawaŋ,» kə. 17 Ma kə Farawaŋ kaa ngəci na: «Mbə shəw tsee vay, dziy miy həl Nil nzee məgarə. 18 Dza slayəy miʼi mbərfəŋ mbaʼ ghəshi səməshi kwa həl. Slay vay, slay ka təɓə zhini lə vəgha vəshi niy nza ghəshi. Dza ghəshi ka pərə guzən dziy miy həl. 19 Ma liy hum shi na, dza nihuti slayəy miʼi mbərfəŋ mbaʼ ghəshi səəməshi. Niy təɓə ghəshuw, ʼiresleŋw ʼiresleŋw niy nza ghəshi, niy nza sliw ti shiw. Tə hiɗi ka Ezhiptə gwanashiy, səəkee nashi shiy taŋətishi tə huvuw. 20 Dza ni mbərfəŋ ni va təɓə ma, ʼiresleŋw ʼiresleŋw ni slay, mbaʼ ghəshi pəranti ni kwa taŋa va slay mbərfəŋ ni nza vəgha vəshi. 21 Liy hum sa pərəhushi ghəshi na, pəəzli ghəshi njasa pərəhu ghəshi shiyəw, war tsəgha tsəghavashi ghəshi njasaa nza ghəshi kwataŋa. Dzee mbaʼee fərəghəra, mbaʼ hi zhinəhura. 22 Zhini mbaʼee shiwti tsahuti shiw. Shiw yay, dəŋw alkamari kutiŋ fati ghən mbərəfəŋ ka təɓə, lə mətsə kwa bəvə bəvə. 23 Liy hum ki na, mbaʼ tsahuti dəŋw alkamari pəsəy vəgha mbaʼ fati ghən. Slehə slehə mbərfəŋ, mbaʼ safə tsaa səəkə kwa ghumə ghwalanti. 24 Dza tsa slehə slehə tsa va ghən alkamari mbaʼ ndandahu tsaa təɓə va ghən alkamari. Dzee mbaʼee slanakəshi shiw tsa va gwanay kaa ka nga zləra na, tərəhə ntsaa mbəə zhinikəra shi ɗi naa gəzə,» kə.
25 Ma kə Zhuzefə kaa Farawaŋ na: «Shəwhi gha vay maziy, shiw tsa kutiŋ tsa na. Aa canati Hiyala shi dza na ta məni kaa Farawaŋ. 26 Slayəy miʼi mbərfəŋ ni va wəzə ni ghəshi lə ghən ha tsa mbərfəŋ tsa va wəzə tsay, piya mbərfəŋ na. Shəw tsa kutiŋ tsa na. 27 Slayiy miʼi mbərfəŋ ni va təɓə ma iresleŋw iresleŋw ni səməshi liy hum ghəshi lə ghən ha tsa mbərfəŋ tsa va slehə slehə tsa ghwalanti safə tsaa səəkə kwa ghumiy, piya kwa ma mbərfəŋ na. 28 Ava va tsəgha nə ya kaa mazə: Aa citəŋa Hiyala shi dza na ta məni pən. 29 Piya mbərfəŋ na va dzaa səəkiy, piya dza shiy zəmə ta məni tərəŋu ti tə hiɗi ka Ezhiptə gwanashi na. 30 Ma liy hum ki na, ta nza dza ma tiɓa mbə piya mbərfəŋ. Ta zanti ghən dza məndi ta piyahiy niy mənishi shi zəmə va tərəŋu ti shi. Təruŋ dza maa irəti mbəzli. 31 Tə mbərkə ma vay, ta zanti ghən dza mbəzli tə hiɗi ta shi har məndiy ngəsli, sa nzanay tərəŋuəta dza naa nza. 32 Sa nay gha va gha zhinti shiw tsa va bakə səɗay, a Hiyala garəta tə məni kuma va ɗi naa gəzə. Ndal tərə na ta məni nzuw.
33 Sana kiy maziy, ə pə gha pəlavə ntsaa sənata kuma mbaʼ tsəhuliy, nza gha ɓanavə nighəə dzəkən hiɗi ka Ezhiptə. 34 Sa ka gha dza diɓay, mbaʼ gha təravə nihuti ka nighəə dzəkən hiɗi ta səɗa ci. Mbəzli vay, nza ghəshi tsəhə shiy kutiŋ səvəri mbə shiy cifə, mbə shi dza mbəzliy zakə gwanashi tə hiɗi ka Ezhiptə, mbə piya mbərfəŋ na va dza shiy ta məni tərəŋu. 35 Ka ghəshi dza kiy, mbaʼ ghəshi ɓaɓasəti shi zəmə mbə piyahi wəzə ni va dzaa səəkə. Nza ghəshi ɓaɓasaghwa alkamari va dzar kwa temim mbə məlməhi, ta mbə mbəzliy zəmə kwa kuma. Gha kə dzaa sləkə shi va.
36 Ghalaɓa kiy, ta nza dza shi zəmə tiɓa tə mbə ta zəməshi məndi mbə na mbərfəŋ na va piya dza ma ta səəkə. Ma tsəghay, ka dza mbəzli tə hiɗi ka Ezhiptəə bekushi va maw,» kə.
Məndi pəərəti Zhuzefə ta nighəə dzəkən Hiɗi ka Ezhiptə
37 Dzəghwa kuma gəzəkə Zhuzefə va mbaʼ təɓanati kaa Farawaŋ lə kaa mbəzliy ghəranci sləni gwanashi. 38 Ma kə Farawaŋ kaa ngəshi na: «Ka dza ghummə kumavə tsahuti ndə lə Safə tsa Hiyala mbə nəfə ci nja ntsa na?» Kə. 39 Ma kə kaa Zhuzefə ki na: «Njana nzana mbaʼ Hiyala citəŋa shi va gwanashiy, tsahuti ndə tiɓa gar sənata kuma mbaʼ tsəhuliy nja ghaw. 40 Gha dza naa nighəə dzəkən hiɗee. Va gha dza mbəzlee fa kuma gwanashi. Tə sa nza na yən sa kwa gəzli mazə dzee taŋətəŋa gwaʼa tsəgha. 41 Avee fiyŋa ka ntsaa nighəə dzəkən hiɗi ka Ezhiptə gwanashi,» kə. 42 Dzəghwa na mbaʼ sərəvə jaʼwa mazə tə dəvə ci, mbaʼ səranati tə dəvə Zhuzefə. Dza na kiripə panakən kubaŋ tsa tə dimə, mbaʼ səranaghwa kwana məntim tə tsahi mbəzə kwa wəri ci. 43 Dza na mbaʼ faghwa kwa muwta gəduw ka kwa baka ntsaa nuw dza kwa. Ka zlapə mbəzli kwa kuma ci ki: «Ngam kwal, ngam kwal,» kə ghəshi. Ava tsəgha fiy Farawaŋ Zhuzefə ka tsaa nighəə dzəkən Hiɗi ka Ezhiptə gwanashi.
44 Ma kə kaa Zhuzefə diɓa na: «Yən na Farawaŋ ntsaa sləkə hiɗi ka Ezhiptə, kala gəzəkə pə ghay, ndə tiɓa dzaa ghunikə miy tsa ci tə hiɗi ni gwanashiw,» kə. 45 Dza Farawaŋ mbaʼ fanati slən Cafənat-Paneya kaa Zhuzefə, dza na diɓa mbaʼ ɓanavə mali Asənatə, kə məndi kaa slən tsa nzə. Zha Puti-Fera ntsaa ta mbəri kaa mbəzli mbə məlmə ʼWənə. Dza Zhuzefə ki mbaʼ dzaa nuwanti hiɗi ka Ezhiptə. 46 Ghala vəghu tsaa niy pəmə məndi Zhuzefəə dzəghwa kuma Farawaŋ mazə ka Ezhiptəy, piya mahəkanəmətsəkə niy nza sa ci.
Dza Zhuzefə mbaʼ kafiy vəgha, mbaʼ dzaa nuwanti hiɗi ka Ezhiptə gwanashi 47 Mbə piya mbərfəŋ na va niy dza shiy ta məniy, tərəŋu niy mənishi shiy tə hiɗi va. 48 Dzəghwa Zhuzefə mbə piya mbərfəŋ na va ki, mbaʼ ɓasəti shi zəmə tə hiɗi ka Ezhiptə gwanashi, mbaʼ ɓaɓasəyshi dzar mbə məlməhi. Shi zəmə zazakə məndi dzar mbə məlməhi ju ju ni na, mbaʼ ɓasəyshi mbə məlməhi dikə dikə ni vəgha shi. 49 Dza na mbaʼ ɓasəti Alkamari tərəŋu dalala nja ndarghə kwa həl. Niy mbay məndiy bərkə va ɗaŋ tsa nzuw.
50 Piya dza ma vaa nza ti ghula ta səəkiy, a Asənatə zha Puti-fera ntsaa ta mbəri va kaa mbəzli mbə məlmə ʼWənə niy yakə ndərazhiy zhər bakə kaa Zhuzefə. 51 Kwa taŋa zəghuy, Manase, kə kaa slən tsa ci. Sa nzanay: «A Hiyala kəətitəra mbaʼee zanti ghən ta ngəraʼu tsa sahwee mbaʼ təhəva tsa təhəvərivaree lə mbəzli kiy ghyi tsa dirə,» kə niy ni. 52 Ma tsa juw tsa na, Efrayim, kə kaa slən tsa ci. Sa nza nay: «A Hiyala ndara ya ndərazhi mbə hiɗiy niy nzee barcəcəku,» kə niy ni.
53 Ma sa kəɗita piya mbərfəŋ na va niy nza shi zəmə tərəŋuəshi tə hiɗi ka Ezhiptə na, 54 dza piya mbərfəŋ na va dza maa nza ti, mbaʼ ghati səkwa njasaa niy gəzəkə Zhuzefə va. A ma niy nza tə hiɗi gwanashi. Ma tə hiɗi ka Ezhiptə gwanashi na, lə shi zəmə niy nza tiɓa. 55 Ma sa maɗi maa tsəʼuta va mbəzli tə hiɗi ka Ezhiptə gwanashi na, dza ghəshi ka ɗuw shi zəmə va Farawaŋ. Ma kə kaa mbəzli tə hiɗi ka Ezhiptə gwanashi na: «Mbalam kəsayim Zhuzefə, nza ghuy məni njasa dza naa gəzaŋuy,» kə. 56 Sa mənta ma tə hiɗi gwanashi na, dzəghwa Zhuzefə mbaʼ ghunanti cekerəy niy ɓasəy məndi alkamari mbə shi gwanashi dzar mbə məlməhi. Dza na ka ɗelanshi kaa ka Ezhiptə, sa nzana tərəŋuəta ma niy səkwata tə hiɗi va. 57 Ya dza kwamaɓa tə hiɗi gwanashiy, mbə səəkə niy nza məndi ta pa alkamari va Zhuzefə. Sa nzanay, tərəŋu niy səkwata ma ya dza kwamaɓa nzə.