40
Ma tə nahuti vici ki na, dzəghwa kar ntsaa sləkə mbəzliy nighəə dzəkən shi ka mazə ka Ezhiptəə sa, lə ntsaa sləkə mbəzliy tanci peŋ, mbaʼ ghəshi təvəti kuma kaa mazə ka Ezhiptə ntsa shi dikə tsa. 2 Mbaʼ nəfə tsa ci satiy tərəŋu dzəkən mbəzli bakə ni va. 3 Dza na mbaʼ kalaghwashi kwa fərshina. Na va bəla kwa Fərshina kalayshi məndi vay, ntsaa sləkə ka sawjiy ndəghu fərshina niy nighə naa dzəkən. Kwaɓa niy kəsaghwa məndi Zhuzefə kuraku. 4 Dzəghwa dikə tsa ka ndəghu fərshina tsa va mbaʼ ɓanavəshi Zhuzefə nza ghəci mananshi sləni. Dzəghwa mbaʼ ghəshi hyayvashi kwa fərshina ki.Zhuzefə zhinikə shiwhi ka fərshina bakə
5 Ma kwa fərshina va ki na, dzəghwa ntsaa sləkə mbəzliy nighə vaa dzəkən shi ka mazə sa ghəshi lə ntsaa sləkə mbəzliy tanci peŋ mbaʼ ghəshi shiwti shiw tə vərɗi kutiŋ na. Ya wa ndiy lə tsa ci shiw kutiy, tsəgha kuma ɗi shiw tsa vaa gəzə ghənghən diɓa. 6 Ma sa kəɗiy pi na, mbaʼ Zhuzefə səəkiy dzəvəgha shi. Gəmgəməshi ghəci nashi mbə kuma shi. 7 Dza na ka ɗuw və shi, ma kə na: «Tawa nza ghuy gəmgəməŋuy mbə kuma ghuy ndatsə bayaa?» Kə. 8 Ma kə ghəshi kaa ngəci na: «Shiw shiwti ghiy ghənghən bakanaŋəy, kala ndə tikə gar mbay zhiniŋəy shi ɗi shiwhi vaa gəzə,» kə ghəshi. Ma kə Zhuzefə na: «A Hiyala dzaa mbay zhinikə shi ɗi shiwhi vaa gəzə. Slarashim,» kə. 9 Dzəghwa ntsaa sləkə mbəzliy nighəə dzəkən shi ka mazə sa ka sla tsa ci va shiw kaa Zhuzefə ki. Ma kə na: «Shiw yay, dəŋw fəə ya fə ka məndiy ta tay ti kwa kumee, 10 mahəkanə divədivi ti. Sa ɗashi ghəshiy, mbaʼ ghəshi mbərəti ghu, dzəghwa ghəshi dəgwəzwək dəgwəzwək ghəshi yati ya təhətəhə na. 11 Yən nee kiy, lə shi ka mazə Farawaŋ sa shiy kwa shi niy nzee ta dəvee. Dzee ngəliʼ yən ngəlivə ya fə va mbaʼee ɓəsaghwa məəli nzəə dzəghwa shi, mbaʼee ɓanavəshi kaa mazə,» kə. 12 Ma kə Zhuzefə kaa ngəci na: «Avanashi shi ɗi shiw tsa gha vaa gəzə: Dividivi mahəkanə ni va tə fə vay, vici mahəkanə na. 13 Tərə vici mahəkanə ta ɓəŋa dikə Farawaŋ. Ta zhanambəŋa dza na mbə sləni gha. Ta zhini dza ghaa ɓanci shi saa dzəmbə dəvə ci njasa kwataŋa, ghala pi tsaa niy nza gha vaa dikə tsa mbəzliy nighəə dzəkən shi ka mazə sa. 14 Sa ka gha nza wəzəy, titihu zəzə tə ghaa dzəkənee, əntaa gha zanti ghən təya ma. Məntəra tə gha wəzə hur nza gha gəzanci kumee kaa Farawaŋ nza məndi mbəə pəlara səəmə kwa fərshina na. 15 Sa nza nay, tə hiɗi ka Ebərə kəsəhum mava tə ya, zhini tikə diɓa na, mbaʼ məndi kəsaghwara kwa fərshina kala shi məntee tiɓa,» kə.
16 Ma sa nay ntsaa sləkə mbəzliy nighəə dzəkən ka ta peŋ kaa mazə, dza kwa bəla wəzə na Zhuzefə zhinikə shiw tsa va na, dza na ka sla tsa ci va shiw. Ma kə na: «Yən kurakuy, shəwee na, yən lə gatakarhi mahəkanə kwa ghən tsee, lə gatwə dzar kwa shi. 17 Kwa tsa tə ghən va gatakarəy, mbaʼ peŋ lə gatwə tsa ka Farawaŋ zəmə ghənghən ghənghən kwaɓa. Dzəghwa ʼegwer ka səəkəə tsəŋu shi va kwa gatakar tsa va kwa ghən tsee,» kə. 18 Ma kə Zhuzefə na: «Avanashi shi ɗi shiw tsa gha vaa gəzə: Gatakar tsa mahəkanə tsa vay, vici mahəkanə na. 19 Vici mahəkanə tərə na Farawaŋ dzaa slanti ghən tə gha, ka na dzay, mbaʼ sərəyŋa mə fə, nza ʼegwer səəkə ta tsəŋu mbəri tsa gha,» kə.
20 Ma tə kwa mahəkana vici liy hum shi va ki na, mbaʼ Farawaŋ zəzətiy dzəkən vici yakə məndi ti. Dza na mbaʼ mənti makwaghwa kaa mbəzliy ghəra sləni kwa dəgha ci. Dza na kwa kuma mbəzli va, mbaʼ Fanatishi dikə kaa kar ntsaa sləkə mbəzliy nighəə dzəkən shi ka naa sa lə ntsaa sləkə mbəzliy tanci peŋ. 21 Dza na mbaʼ zhanambə ntsaa sləkə mbəzliy nighə vaa dzəkən shi ka mazə sa mbə sləni ci. Dza ntsa va ka ɓanci shi sa kaa Farawaŋ dzəmbə dəvə ci. 22 Ma ntsaa sləkə mbəzliy ta peŋ va na ci ki na, dza na mbaʼ ɓərtanti njasaa niy zhinikə Zhuzefə va shiw tsa va. 23 Ma ntsaa sləkə mbəzliy nighəə va dzəkən shi ka mazə sa ki na, kala zəzə ghəciy dzəkən Zhuzefə, mbaʼ zanti ghən ti.