Zhuzefə kiy ghyi tsa Putifar
39
Ma sa dzashi məndiy dzəti hiɗi ka Ezhiptə lə Zhuzefə ki na, mbaʼ Putifar ndə ka Ezhiptə pahu va ka zhəghə dəvə ka Madiyaŋ. Putifar tsa vay, ntsa dikə tsa mbə ka sləni mazə Farawaŋ niy nza na. Ghəci niy sləkə na ka Sawjiy ndəghu Farawaŋ. 2 Kəy ghyi tsa Putifar ndə ka Ezhiptə, ntsa ci va dikə tsa niy nza Zhuzefə. Ya nimaɓa shiy niy məni Zhezhefiy, war mbə dzava niy nza ghəshi, sa nzana kwasəbə Kwa sləkəpə niy nza. 3 Sa nighə ntsa ci va dikə tsa kuma Zhuzefə na, war kwasəbə ghəci nata Kwa sləkəpə. Ya nimaɓa shi məni na na, war mbə dzava ghəshi. 4 Dzəghwa na mbaʼ mawti kuma ci tərəŋu ki, mbaʼ ɓəvə ta ghəranci sləni. Dza na mbaʼ ɓanavə nighəə dzəkən ghyi tsa ci lə dzəkən shi ci gwanashi. 5 War sa mənti Putifar tsəgha ki na, dza Kwa sləkəpə mbaʼ təfakən miy kən shi ci tə mbərkə Zhuzefə. Ya nimaɓa shi ci gwanashi na, mbaʼ Kwa sləkəpə təfakən miy kən shi, ni kiy ghyi lə ni kwamti gwaʼa. 6 Dzəghwa Putifar ki mbərəkə zlatanavə shi ci gwanashi kaa Zhuzefə. Niy dzar na kwa shiy ya nimaɓa ghulaw, war shiy dzəghwa hur ci na shiy niy sənashi na gwaʼa tsəgha.Kar Zhuzefə lə mali Putifar
Təruŋ niy təɓə Zhuzefə. 7 Liy hum vəghu juw na, mbaʼ mali ntsa ci va dikə tsa ghati maw. Ma kə kaa ngəci na: «Ndi həni lə ya,» kə. 8 «Awə, ka zləɓa yaw, a ntsee dikə tsa fiyra ka ntsa slar tsa, mbaʼ ndara nighəə dzəkən shi ci gwanashi. Shiy tiɓa ghəciy dzar kwa shi kiy ghyi tsa ciw. 9 Kiy ghyi tsay, taŋətəra na tə dikə ya ghəciw, ka makəra na ya ta waɓaw, war gha gwaʼa tsəgha, sa nza ghaa mali ci. Njaa njaa dzee məra mbə məni gəla nava kuma huvə huvə na kaa ntsee dikə tsa, ka məni kuma jikir na kwa kuma Hiyala kiya?» Kə. 10 Ya tsəgha nzə kiy, war mbə har Zhuzefə niy nza na njasa səəmə vici, ta həni li. Kala zləɓa ma ghəci.
11 Ma tə nahuti vici na, mbaʼ Zhuzefə səəkiy ta ghəra sləni ci kiy ghyi. Niy nza nihuti ka sləni tiɓaw. 12 Dza mali Putifar va mbə ciki mbaʼ kəsəti tə kubaŋ tsa ci, «həni lə ya,» kə kaa ngəci. Dza na kuratə səranavə kubaŋ tsa ci va mbaʼ zlatanavə mbə dəvə nzə. Bəvbəpə huy dzəti ngula. 13 Ma sa nighəti mali va Zhuzefə zlatanavə kubaŋ tsa ci mbaʼ huy dzəti ngula ki na, 14 dza na mbaʼ ngumata lala ta har ka sləni nzə, ma kə ngəshi na: «Nighətim, a zara ɓəkə ndə ka Ebərə tsa ta sawammə. Əə səəkə na ta ɗuw həni lə ya, dzee mbaʼee ngumata lala zlaŋ zlaŋ . 15 Ma sa nay na yən ngumata lala ka har mbəzli na, mbaʼ zlay kubaŋ tsa ci vəghee, mbaʼ huy dzəti ngula,» kə.
16 Dza na mbaʼ fiy kubaŋ tsa Zhuzefə va sa ghula nzə paʼa va səəkə tsa zataa dzakə ghyi. 17 Sa səəkiy zata na, mbaʼ gəzanakə kuma va njasaa niy gəzəkə na va. «Ndə ka Ebərə, mava tsa ɓəkə gha tsa səəkiy na ta sawara. 18 Sa ngumatee lala ka har mbəzli na, dza na mbaʼ zlay kubaŋ tsa ci vəghee, mbaʼ huy dzəti ngula,» kə. 19 War sa favə ntsa dikə tsa va kuma slanakə mali ci va mənti mava tsa ci li na, mbaʼ nəfə tsa ci satiy tərəŋu. 20 Dza na mbaʼ kəsaghwa Zhuzefə kwa fərshina, pi tsaa niy kəəli məndi mbəzliy huti rəɗa kaa mazə.
Zhuzefə kwa Fərshina
Ma Zhuzefə kwa fərshina va ki na, 21 war kwasəbə Kwa sləkəpə niy nza. Dza na mbaʼ kəətiti, mbaʼ dikə tsa ka sawjiy ndəghu fərshina mananati wəzə hur. 22 Dza na mbaʼ fambə ka fərshina gwanashi mbə dəvə Zhuzefə. Ya namaɓa sləni məni məndi kwa fərshinay, ghəci niy nighə naa dzəkən. 23 Fanambə ma dikə tsa ka ndəghu fərshina tsa va sləni mbə dəvə ciy, kar naa zəzə kumaa dzəkən ghulaw. Sa nzanay, kwasəbə Zhuzefə niy nza Kwa sləkəpə. Ya nimaɓa shi məni nay, war mbə dzava niy nza ghəshi.