kumaa dzəkən kar Zhuwda lə Tamar
38
Ghala vəghu tsa va, Zhakubə ghulay mbə təhuni mbəri ki na, mbaʼ Zhuwda ɓarvay vəgha ngwardiy dzaa nziyiy tə hiɗi Adwəlam kiy ghyi tsa Hira. 2 Ma mbə məlmə va na, mbaʼ nata zha Shəwa, tsahuti ndə ka Kanan. Dza na mbaʼ ɓəhu ka mali ci, mbaʼ ghəshi jakəshi li. 3 Dza na mbaʼ ɓəvə hur, yaʼ yakə zəghu zal, Er, kə Zhuwda kaa slən tsa ci. 4 Zhini mali va mbaʼ ɓəvə hur, baw yakə tsahuti zəghu zal, ʼWənan, kə kaa slən tsa ci. 5 Zhini na diɓa, mbaʼ yakə zəghu zal, Shela, kə kaa slən tsa ci. Ghala vəghu tsa ya mali va Shelay, mbə məlmə Kezivə niy nza Zhuwda.6 Dza Zhuwda mbaʼ ɓanavə mali kaa Er kwa taŋa zəghu ci va. Tamar, kə məndi kaa slən tsa nzə. 7 Ma Er kwa taŋa zəghu Zhuwda va ki na, kala məni ma kuma wəzə na ghəci kwa kuma kwa Sləkəpə, mbaʼ Kwa sləkəpə paslanti. 8 Ma kə Zhuwda kaa ʼWənan sa mətiy Er na: «Zəmə ghyi ta mali zəməŋa, a gha həni li, nza gha yanakə hulfə kaa zəməŋa,» kə. 9 Na na ʼWənan kiy, aa niy sənay hulfə ci dza ndərazhi dza naa ya kwa mali vaa nzaw, kə. Sa ka naa həni lə mali zəmbəghiy vay, dzəti hiɗi dzəti hiɗi ka naa shəkati vəgha ci, əntaa ghəci yanakə hulfə kaa zəmbəghiy tsa va. 10 kuma məni na va tsəgha na ki na, kala təɓanta ghənzə kaa kwa sləkəpə, mbaʼ paslanti kuraku. 11 Ma kə Zhuwda kaa Tamar, makwa ci na: «Mbala nziyŋa ka mali mbəri kiy ghyi tsa dəŋa, kala kəliy zəghwee Shela,» kə. Əntaa tsava zəghu ci mətiy nja nihuti ngwarmbəghiy va niy nə na, va tsəgha niy gəzanta na kuma va tsəgha. Dza Tamar mbaʼ dzaa nziyta kiy ghyi tsa dəta ki.
12 Liy hum vici ɗaŋ ki na, dza zha Shəwa mali Zhuwda va mbaʼ mətita. Sa təhwananti Zhuwda na, mbaʼ dzay dzəmə məlmə Timna ghəshi lə madigay Hira ndə ka Adwəlam, ta dza ta nighə mbəzliy təɗi səbə tə teŋkesli ci. 13 Mbaʼ məndi gəzanta kaa Tamar: «Ava shəŋa mbə dzəmə Timna ta təɗi səbə tə teŋkesli ci,» kə məndi. 14 Sa favə na tsəgha na, dza na mbaʼ dzaa səranti kubeŋer mali mbəri kən ghən tsa nzə, mbaʼ pəlakən kadibəl kən ghən tsa nzə nəghətaa məndi sənata. Mbaʼ dzaa nziyta kwa miy pi tsaa dzəmbə məlmə Enayim, kwa kwal tsaa dzəmbə məlmə Timna. Sa nzanay, aa niy nay Shela kəliy, ya tsəgha nzə ki na, kala pəmə məndi kaa ngəci ta nza ghənzə ka mali ci. 15 Sa nata Zhuwda na, mbaʼ ɓəti ka mali mbə ghyi, sa nzana mbaʼ ghənzə niy pəlakən shiy kən ghən nzə. 16 Sa sənata ma na makwa ci na kə na, dza na mbaʼ kətəghəvay dzəvəgha vəgha kwal tsa va. Ma kə ngəta na: «Zləɓavə gha ghum dzam na?» Kə. Ma kə Tamar na: «A ni dza ghaa ndara ghum dzamaa?» Kə. 17 Ma kə Zhuwda na: «Ee dzaa kəsəkəŋa bəsə mbə kwiyee,» kə. Ma kə ngəci na: «Tsəgha na, A ni dza ghaa ndara nzee kəsətishi nza gha zhini shi gha sa ka gha kəsəkəra bəsə tseya?» Kə. 18 «A ni ɗi ghee ndaŋa nzee mbəərə shi ya?» Kə. «Səravəɗa shi kwa wəri gha ni nza slən tsa gha ti shi, lə ghur nza ghəshi va ti shi, mbaʼ gəta gha na,» kə Tamar. Dzəghwa na mbaʼ ɓanavə shi va, mbaʼ dzaa hənəhu həni li. Mbaʼ Tamar ɓəvə hur tə sa hənəhu na həni li ki. 19 Dza na mbaʼ dzataa jighyi, mbaʼ dzaa ɓanti shiy niy plakən na va kən ghən nzə, mbaʼ zhanakən kubeŋer mali mbəri nzə.
20 Dzəghwa Zhuwda ki mbaʼ ghunay ndə ka Adwəlam, madigay tsa va lə bəsə ta dza ta mbəərə shi ci va va mali va. Tsəhə ntsa va na, kala kəsata ghəci. 21 Dzəghwa na ka ɗuw va mbəzli tə pi tsa va, ma kə na: «kuma dzata mali mbə ghyi kwa ghurghuriy niy nza na tikə mbə məlmə Enayim dzar vəgha kwalaa?» Kə. «Səəkə mali mbə ghyi kwa ghughur nza tikuw,» kə ghəshi kaa ngəci. 22 Dza ntsa va mbaʼ zhəghəghəvay dzaa kəsay Zhuwda. Ma kə kaa ngəci na: «Kəsata mali va yaw. Ya mbəzli tə pi tsa vay a ghəshi gəzara: “səəkə mali mbə ghyi kwa ghurghuriy nza tikuw” kə ghəshi,» kə. 23 Ma kə Zhuwda kaa ngəci na: «Nzəyta ghənzə lə shi va, ka pa haʼu ghum dzəkən ghən ghum ma, njana nzana mbaʼee ghunaŋa lə bəsə tsa va kala kəsata ghay, gwaʼaa na ghum,» kə.
24 Liy hum tir gar mahəkanə ki na, mbaʼ məndi səəkəə gəzanci kaa Zhuwda: «A makwa gha Tamar mənti ghurghur, mbaʼ ɓəvə hur mbə ghurghur tsa va,» kə məndi kaa ngəci. Ma kə Zhuwda na: «Ə kə məndi pəməkəvəri mbə məlməə dzəti ngula, a məndi ndanti ləməcita,» kə.
25 Ma məndi mbə pəməə dzəti ngula ki na, mbaʼ ghunəghə ndə ta gəzə kaa shəta tsa va: «Ndə shi niy, ghəci ndara na hur. Nighətishi wəzə, nda shi wa na shi kwa wəri ni, lə ghur ni, mbaʼ gəta na,» kə 26 Sa nighətishi Zhuwda na, mbaʼ sənashi, shi ci na ghəshi, kə. Ma kə ki na: «Təruŋəɓa ghənzə nuti na kuma lə kwal tsa nzə kaa ngəra, sa nzanay, ɓanavee kaa zəghwee Shela ta nza ghənzə ka mali ciw,» kə. Mbaʼ məndi bashanti pəəsli nzə. Liy hum kuma vay, niy zhini Zhuwdaa hənəhu həni li ghulaw.
27 Ma sa səəkiy vəghu tsa dza tamar ta ya ti ki na, ihuhwir shi kwa hur nzə. 28 Ma ghəshi mbə səkwa na, mbaʼ tsahuti ɓəkiy pərɓa dəvə, mbaʼ mali kwa ya miʼi kəsəvə dəvə vaa pəhaghwa ghur ghəm ni kwa. «Avanay tsaa gha səkwa,» kə. 29 Dza tsava mbaʼ zhinəhu dəvə ci, mbaʼ zəmbəghiy səkway pərɓa ghəci. Ma kə kwa ya miʼi ki na: «Waa gha ghuni na kwal na?» Kə. Dzəghwa Zhuwda mbaʼ fanati slən Peres kaa zəghu va. Ɗi naa gəziy: «ghuni kwal». 30 Liy hum ki na, mbaʼ zəmbəghiy tsa nza ghur ghəm ni va kwa dəvə ci səkway, mbaʼ Zhuwda fanati slən Zerahə.