ZHƏWZEFƏ
Shiwhi Zhuzefə
37
Tə hiɗi Kanahaŋ niy nza Zhakubə lə ghyi tsa ci, tə pi tsaa niy nziyəhu diy va nziy. 2 Avanata kumaa dzəkən hulfə Zhakubə. Zhuzefə lə piya məŋ lə mbərfəŋəy, mbə ndəghu teŋkesli lə kwiy niy nza na ghəshi lə ngwardiy, ndərazhi Bilha lə Zilpa miʼi diy. Sa ka məndiy gəzə kuma gəmgəm naa dzəkən shiy, cəkeʼ ka Zhuzefəə zhananavə kaa diy. 3 Təruŋəɓa Zhuzefə niy ɗiti Zhakubə mbə ndərazhi ci, sa nzana mbə hali ghəci niy yavə. Dza na mbaʼ ɓanavə kubaŋ tsa wəzə tsa. 4 Sa nighəti ngwardiy ɗiɓa ghəci dəshi ɗiti kən shi gwanashi na, mbaʼ ghəshi fati ghəra ti, kala gəzanci kuma ghəshi lə wəzə ghula.5 Ma tə nahuti vərɗi na, mbaʼ Zhuzefə shiwti shiw. Dza na mbaʼ slanakəshi shiw tsa va kaa ngwardiy, kə ghəshi mətsəhə ghəshi mətsəhəti ɗi ma kuma ci. 6 Ma kə niy ni kaa ngəshi na: «Favəm shiw tsa shiwtee: 7 Shiw yay, ghummə mbə pəhə alkamari kwamti. Ghavə nee alkamari pəhətee tsəgha kafə kafəta, mbaʼ garəta, dzəghwa ni ghuy mbaʼ ghəshi səəkəə dəzlay, tsəfəku tsəfəku tsəfəku ghəshi tsətsəfəkushi kwa kuma nee va,» kə. 8 Ma kə ngwardiy kaa ngəci ki na: « Ta məni mazə dza ghaa dzəkən ghiy ta Sləkəŋiy ɗi ghaa gəzə tsəna?» Kə ghəshi. Dza ghəshi mətsəhə ghəshi zhiniy mətsəhəti ɗima kuma ci, tə mbərkə shiwhi ci va lə kuma ka naa gəgəzə.
9 Dzəghwa Zhuzefə mbaʼ shiwti tsahuti shiw, mbaʼ zhiniy slanakəshi kaa ngwardiy, ma kə na: «Ee zhiniy shiwti tsahuti shiw: Shiw yay, kar vici lə tir mbaʼ sasərkuhi məŋ lə tan mbə tsəfəku kwa kumee,» kə. 10 Dza na mbaʼ slanakə shiw tsa va kaa diy kuraku. Dza diy mbaʼ ʼwaŋanakən ʼwaŋə. Ma kə kaa ngəci na: «Shiw mbə tsava shiwəw. Ə dza ghiy səəkə ta tsəfəku kwa kuma gha, yən lə məŋa mbaʼ ngwardəŋa ɗi naa gəzə na?» Kə. 11 Dzəghwa ngwardiy ka hərhə və, ma diy na ci ki na war mbə zəzə ghəciy dzəkən shiwhi va.
Ngwardiy ɗəlanti Zhuzefə
12 Dzəghwa ngwardiy Zhuzefə mbaʼ ghəshi dzashiy dzəti hiɗi Shishem ta ndəghu teŋkesli lə kwiy dəshi. 13 Ma kə diy kaa Zhuzefə tə nahuti vici na: «Tə hiɗi ka Shishem na ngwardəhiŋa mbə ndəghu shiy ɓay? Ndi ee ghunaŋa və shi,» kə. «Tsəgha na,» kə Zhuzefə. 14 Ma kə diy ki na: «Mbala nighəti nda njaa na ngwardəŋa lə dəmbəkə, nza gha səəkəə gəzara,» kə.
Zhakubə lə ghyi tsa ci dzati kwa teʼu pi tsa har məndi vaa Ebəruŋ niy ghuni na. Dzəghwa Zhuzefə mbaʼ dzay dzəti hiɗi Shishem ki. 15 Dza tsahuti ndə mbaʼ kəsay mbə daŋərə dzar mbə gamba. «A shi pəla ghaa?» Kə ntsa va kaa ngəci. 16 Ma kə Zhuzefə na: «Ngwardirəə pəlee, titihu citəra tə pi tsa ndəghu ghəshi shiy,» kə. 17 Ma kə ntsa va kaa ngəci na: «A ghəshi ɓarvashi lə dəmbəkə tsa shi tikə. Ee favə ghəshiy gəzə: “Dzammə ghumməə dzəti hiɗi Dwətan,” kə ghəshi, » kə. Dzəghwa Zhuzefə ka nuw səəbə ngwardiy, mbaʼ dzaa kəsashi tə hiɗi Dwətan.
18 Ghəci ghula ta tsəhə vəgha shi na, mbaʼ ngwardiy va nay ghəci kərakiy. Dza ghəshi mbaʼ ghəshi pəhəti kuma shi ta pəəsli ci. 19 Ma kə ghəshi kwa jipə shi na: «Avam ndə shiw tsa va tsahuy. 20 Geʼgeʼi na nava, ə pə ghummə pəəsliti nza ghummə ndəghaghwa mbəri tsa ciy dzəghwa kəʼu. A shəkwadeshi pərəhu, pə ghummə dzaa ni, nza ghummə nighə nda njaa dza shəwhi ci vaa kərkəva di,» kə ghəshi. 21 Sa favə Ruben kuma gəzə ghəshi va tsəgha na, ka ɗi mbəlanti ghəci mbə dəvə shi, ma kə na: «Ka pəəsli ghummə ma,» kə. 22 Ma kə diɓa na: «Ka pəəsli ndə ngəri ghuy ma. Bəzlaghwam dzəghwa kəʼu tsa tə gamba na tsa, ka dapə dəvə ghuy dzəti ma,» kə. Ta mbəə mbəlanti Zhuzefə mbə dəvə shi, mbaʼ pəmanavə kaa diy niy gəzanshi Ruben kuma va tsəgha.
23 Ma sa tsəhiy Zhuzefə vəgha ngwardiy ki na, dza ghəshi baŋ ghəshi kəsəvə, kuratə ghəshi səranti kubaŋ tsa ci va wəzə tsa niy pakən na. 24 Dzəghwa ghəshi mbaʼ ghəshi ndəghaghwa kwa kəʼu. Mbasə mbasə niy nza kəʼu tsa va, niy nza yam kwaw. 25 Ma liy hum ki na, dza ghəshi mbaʼ ghəshi nziyshi ta zəmə shi zəmə. Sa nə ghəshi kafə kə ghəshi kaa kuma shi na, kar tə ka zhəghə dəvə ka Isəmayel mbə səəkə tə hiɗi ka Galad. Dzəti hiɗi ka Ezhiptə niy dza ghəshi. Lə takə diməhiy zən wəzə mahəkanə niy nza na tə hum ngeləwbahi shi. 26 Ma kə Zhuwda ka ngwardiy na: «A shi dza ghummə kumavə mbə pəəsli Zədəmmə ka mbəə dzəkənaa? 27 Kən na ka ghummə paslantiy, wəzəɓa ɗəlanti ghummə kaa ka Isəmayel ni na. Ka dapə dəvə ghummə dzəti ma. Sa nzanay, zədəmmə na, miymiy ghummə na,» kə. Dza ngwardiy va mbaʼ ghəshi zləɓavə kuma ci va. 28 Mbə taŋə niy nza ka zhəghə dəvə ka Madiyaŋ tiɓa. Dzəghwa ngwardiy Zhuzefə mbaʼ ghəshi mbahəkəmə Zhuzefə kwa kəʼu, mbaʼ ghəshi ɗəlanavəshi tə gəna kwa tsahi bakə mətsəkə. Dza mbəzli va mbaʼ ghəshi ɓəghə dzəti hiɗi ka Ezhiptə. 29 Zhəghəva Ruben zhəkə ta nighə pi tsa kwa kəʼu na, Zhuzefə kwaɓa ghulaw. Hashə ghəci, mbaʼ slakwanti kubeŋer ci. 30 Dza na mbaʼ zhəghəghəvay dzəvəgha ngwardiy. Ma kə na: «Zəghu va kwaɓaw. Kwama dzee dza, na nee kiya?» Kə.
31 Dzəghwa ghəshi piyəŋ ghəshi slanti bəsə, mbaʼ ghəshi ɓəvə kubaŋ tsa Zhuzefə vaa yəkwambə mbə miymiy bəsə tsa va. 32 Dza ghəshi ki, mbaʼ ghəshi ghunay ndə lə kubaŋ tsa wəzə tsa va kaa dəshi. Ma kə dzaa ni ngəci na: «Avanashi shiy kəsashi ghiy, nighəti nda kubaŋ tsa zəghu gha na, nda kala sa ci na,» kə dzaa ni kaa ngəci. 33 Sa canati məndi kaa Zhakubə mbaʼ nighəti na, kahə sənay, mbaʼ ngumata lala, a kə na: «Kubaŋ tsa zəghwee na! Shəkwadeshi kəsəhu na Zhuzefəə pərəhu,» kə. 34 Dza Zhakubə, kwiyahə, kwiyahə slakwanti kubeŋer kən ghən ci, mbaʼ pəhti shiy təhuni mbəri titi ci. Dza na ka təhuni zəghu ci va. Vici ɗaŋ ghəci mənti mbə təhuni ci. 35 Dzəghwa ndərazhi ci lə ghyehi ci gwanashi mbaʼ ghəshi səəkəshi ta dəpanci nəfə tsa ci, kala zləɓa ma ghəci. Ma kə na: «Paʼa fəca dzee məti mbaʼee dzaa kəsay zəghwee na kwa kwəli dzee nza mbə təhuni ci,» kə. War ə ghəciy wahə zəghu ci va.
36 Dza ka Madiyaŋ va ki, mbaʼ ghəshi ɗəlanti Zhuzefə tə hiɗi ka Ezhiptə, kaa Putifar ntsa dikə tsa mbə ka sləni mazə Farawaŋ. Putifar tsa va niy sləkə na ka Sawjiy ndəghu Farawaŋ.