3
A kə Naꞌumiy kaa Rutə tə nahuti vici na: A zhee wəzəɓa dzee pəlaŋa kwal tsaa dzəmbə tsa gha ciki na, ta mbə ghaa nza lə vəshi mbə nziy tsa gha. 2 A gha sənay, Bəwazə tsaa ndaŋa kwal va ta pəla zləkə kwasəbə miꞌiy ghəranci sləniy, ka zəmə ghyi na ghəshi lə zhər ghum. Ndatsə həviriy, ta dəꞌu urzhə tsa ci dza na. 3 A pə gha məntiy, mbala pishəvaŋa, nza gha vərətəvaŋa, mbaꞌ gha pakən shiy guraa təɓaŋa. Liy hum kiy, nza gha dzaa dzəti pi tsa dəꞌu na va urzhə tsa ci, kwa mbəmbə pə gha taa dza. Sa ka gha tsəhəŋay, əntaa gha civaa dzəghwa kuma ci ma. war ghəci zəməhu shiy, mbaꞌ sahu shiy. 4 Ghala pi tsa dza naa dza ta həniy, nighəvətəgha pi tsa dza naa həniy ti wəzə, sa ka na həniy kiy, nza gha ghələghəvaŋaa dzəvəgha, ka gha dza na kafə gha kafashi shi dza naa pəlakən kən ghən ci, ta shiɗəshiɗə ci dza mbaꞌ gha həniŋa ta shiɗəshiɗə ci. Sa dza naa fəti ghən tə gha kiy, ta citəŋa shi dza ghaa məni dza na, kə.5 Ma kə Rutə kaa ngəta na: Tsəgha na mə, ta mənti dzee war njasa gəzara gha va, kə. 6 Sa mənta vərɗi ki na, dza Rutə kafə kafəta, mbaꞌ dzaa tsəhəta kwa lani Bəwazə va. Sa tsəhəta na na, mbaꞌ mənti war njasa gəzanta shəta va. 7 Sa zəməhu Bəwazə shiy, mbaꞌ sahu shiy ki na, tərəŋu ghəci vəshiy, mbaꞌ dzaa həniy vəgha urzhə tsa ci va. Dzəghwa Rutə ki ka ghəlivaa dzəvəgha, sa ghələghəvata na na, kafə kafashi shi kən ghən ci, ta shiɗə shiɗə ci, timə hənita ta shiɗəshiɗə ci va. 8 Ma mbə yam vərɗi, sa nə Bəwazə ee zhəghəva kə na mbaꞌ favə njasa nza ndə vəgha, gurəsə ghəci gurəsəy. Tsaꞌa kə na kar tə mali, məhəni ta shiɗəshiɗə ci. 9 A ndə shəka? Kə. Ma kə mali va na: Yən na yən Rutə kwa sləni gha, əə cəꞌuŋe, kəsəvəra mbə dəvə gha, sa nzanay, mali mbəri gha nzee, va kuma jiji ghuyiy, gar zəmə ghyi nza gha təya, kə. 10 Ma kə Bəwazə kaa ngəta na: Nza Hiyala təfətəŋa miy zhee. Kuma mənti gha na sanay, aa cikəvəri ɗi tsa ɗiti gha shəŋa, ka taŋəti naa mənti gha va kuma kwataŋa. Sa nzanay, nə gha war yən ɓəvə məgəla, nza shiy və lə kama shiy və, pə ghaw. 11 Ghənzə tsəghay, ka zəzə kuma gha ya juw ma. Ta məntəŋa kuma ɗuw gha va dzee, ndə tiɓa tikə tikə kala sənay mali wəzə nza gha kuw. 12 Ta na navay tsəgha na, a kwal vəya ta ɓə mali mbəri tə gha, ə na na nzanay, a tsahuti ndə tiɓa ndəku ndəkuɓa ghəci lə kar zaŋa kaa ngəra. 13 Kərnamti virɗi tikə, sa ka pi kəriyiy, ta dza dzee ɗuwti və, nda ka ɗi ɓə mali mbəri na tə gha. Ee ɗiŋa, kiy, nza ɓəŋa. Ma kala dza kəə ɗiŋay, ta ɓəŋa dzee dza na nee. Avanay kwa kuma Hiyala gəzəŋee mbə favə na, həniŋa, a gha kəranti pi, kə. 14 Dza na timə hənita tə pi tsaa niy hənita na va. Ma pəətə mekəshi pi ghula ta wali na, mbaꞌ kafəta ta dzata. Sa nzanay, niy ɗi Bəwazə məndiy sənay aa səəkə tiɓa, kə məndiw. 15 Ma kə ngəta ghənzəə kafə na: Ndaka kadibəl tsa kən ghən gha tsa, kəsəvə wəzə, kə. Dza na mbaꞌ tanavə urzhə gar taŋəti kiluw məŋ lə cifə, mbaꞌ ghəshi yanakən, ka dzata ghənzəə jighi ki. 16 Sa tsəhəta na kiy ghyi na, mbaꞌ kəsata shəta, ma kə shəta kaa ngəta na: Njaa mənti ghuyaa zhee, kə. Dzəghwa Rutə mbaꞌ slanakə kuma mananati zal tsa va gwanata. 17 Zhini ma kə na: Paꞌ lə urzhə tara na gar kiluw məŋ lə cifə, wəzə na gha tsəhə vəgha shəŋa batəbatəŋaw, kə kaa ngəra, kə 18 Ma kə Naꞌumiy na: Nziyŋa guŋaa tikə zhee. Ndəghə gha sənay njasa dza kuma va ta kərkəva, e sənay ka dza Bəwazə zləɓa nziyiy guŋəy kala sləkanti kuma va ghəci ndatsə ndatsətaw.