Rəwtə 4

Ma sa kəriy pi ki na, dza Bəwazə mbaꞌ dzaa nziyiy tə pitsa ka ka sləka kumaa nziy ti, kwa miy dəghaa dzəmbə məlmə va. Ma ghəci tiɓa ki na, mbaꞌ ntsaa niy gəzə na va ndəku ndəkuɓa ghəci na lə Elimelekə kaa ngəra kə kaa Rutə tsahuy kataŋ ki. Ma sa nay Bəwazə na, daʼ haray, ndi nziyŋa tikə, kə kaa ngəci, mbaꞌ ntsa va səəkəə nziyiy. 2 Sa nziyiy na ki na, dzəghwa Bəwazə mbaꞌ harashi mbəzli məŋ mbə pəhepəhir zhər ka sləka kuma mbə məlmə va. Ndim nziyŋuyim tikə, kə kaa ngəshi, mbaꞌ ghəshi səəkəə nziyshi. 3 Sa nziyshi ghəshi ki, ma kə kaa ntsaa gwəra ndəku ndəku va lə Elimelekə tə mani ki na: A gha sənay, Naꞌuməyiy, aa zhəghəkəvata tə hiɗi ka Muwabə. Sanay, mbə ɗi ɗəl vəhə tsa zədəm Elimelekə va mətiy na. 4 Va tsəgha zəzəti yay, wəzəɓa gəzaŋee na, pən, kwa kuma mbəzli tikə ni lə kwa kuma mbəzli dikə dikə ni mbə hulfə ghummə. Əə ɗee gəzaŋa kwa kuma shi a gha pahu vəhə tsa va. Mbaꞌ pə ghaa ɗi pa vəhə tsa vay, mbaꞌ gha pahu, kala ɗi pa ci pə ghay, mbaꞌ gha gəzara. Sa nzanay, gha na kwa taŋa ndə zəmə ghyi tsa Elimelekə, ma liy hum ghay, yən, kə. Ta pa vəhə tsa va dzee, kə ntsa va. 5 Ma kə Bəwazə ngəci ki na: Mbaꞌ pəgha dzaa pa za va va Naꞌuməyiy, ta zəmə ghyi dza gha ta Rutə, zha ka Muwabə va kuraku ki, ta mbə vəhə tsa vaa nza ghulay mbə dəvə ndərazhi zata tsaa mətiy va, kə. 6 Sa gəzəkə Bəwazə tsəgha, ma kə ntsa va na: Mbaꞌ Kə tsəghay, ka dzee pavuw, ka dzee yiɗivə gənee ta shiy dzaa kama ka shi yaw. Mbaꞌ pə ghaa ɗiy, ɓə zəmə ghyi tsa va, na nayay, ka dzee mbay zəməvuw, kə.

7 Va kuma jiji ka Izərayeliy, mbaꞌ kə mbəzliy ɗi pa səkəm tə shi zəmə ghyi, ya əə ɗi ghəshi mbəərə shiy, ə ka tsahutiy təɗivə kwakwahə tsa mbə səɗa ci mbaꞌ ɓanavə kaa tsahuti, ta mbə məndiy sənay, a kuma va pəhəta, kə məndi. 8 Sa ka naa nza tsəgha məndiy məni ki na, dza ntsa va fəkwatə təɗivə kwakwahə tsa mbə səɗa ci mbaꞌ ɓanavə kaa Bəwazə. Ma kə ngəci na: Ɓə zəmə ghyi tsa va, avee ndaŋa, kə. 9 Dza Bəwazə laŋ ɓəvə kwakwahə tsa va, a kə kaa mbəzli tiɓa va lə kaa mbəzli dikə dikə ni va mbə məlmə shi tiɓa na: Ghuy na ka ndəgha fəti ta kuma na, ꞌwava na tə ndatsiy, /E zəməhu ghyi ta slən shi nə məndi, shi Elimelekə na ghəshi kə məndi mbə dəvə Naꞌumiy. Lə shi ndərazhi ci, kar Kiliyaŋ lə Mahəlaŋ gwaꞌ. 10 Ya Rutə zha ka Muwabə va, mali Mahəlaŋ tsaa mətiy va kiy, ee mbərəhu ka malee ndatsə ta yanci ndərazhi kwa. Ghalaɓay, war ghulashi dza shi ciy nza mbə dəvə ntsaa mətiy va, ta nza dza slən tsa ci tiɓa ya paꞌ humɓa, ka dza slən tsa ciy zay mbə ngwardəhiy, lə mbə məlmə ciw. Ghuy na ka ndəgha fəti ta kuma va ndatsə, kə. 11 Ma kə mətikukwir va lə mbəzli tiɓa va gwanashi na: Tsəgha na, ka ndəgha fəti nza ghiy ta kuma va, nza Kwa sləkəpə təfanati miy kaa mali dza gha va ta ɓə, mbaꞌ ghənzə mənita nja kar Rashel lə Leya, miꞌi Zhakubə va bakə ni niy nza. Ghəshi yati na hulfə ka Izərayel. Ndə shiy tsa tərəŋu tsa kə Hiyala məntəŋa mbə takə tsa Efərata, mbaꞌ gha məniŋa ka ntsa tə slən mbə məlmə Betəlehem. 12 Nza Hiyala kwa sləkəpə yavəŋa ndərazhi ɗaŋ kwa makwa mali dza gha na ta ɓə, mbaꞌ ghyi tsa gha məniy nja ghyi tsa Pereshə, zəghu kar Zhuwda va lə Tamar, kə ghəshi.

13 Liy hum kuma va ki na dza Bəwazə mbaꞌ dzaa ɓəhu Rutə ka mali ci, mbaꞌ jakiy li Dzəghwa Hiyala mbaꞌ təfanati miy, mbaꞌ ɓəvə hur, baw yakə zəghuə zal. 14 Sa yakə Rutə zəghu ki, ma kə miꞌi mbə məlmə Betəlehem kaa Naꞌumiy na: ꞌWəsa kaa Hiyala Kwa sləkəpə, sa nzanay, aa yakəŋa ntsaa dzaa nighəə dzəkən gha ndatsə. Ntsaa tə slən ɗi na ghəci səvəriy tə hiɗi ka Izərayel. 15 Zəghu va dza naa dəpəŋa nəfə tsa gha, ghəci dza naa nighəə dzəkən gha sa ka gha haliŋa. Ma makwa gha vay, ya mbərfəŋ niy yakə gha ndərazhiy zhər na aa taŋətishi, sa nzanay, aa ɗitəŋa, mbaꞌ yakəŋa zəghu, kə ghəshi. 16 Dzəghwa Naꞌumiy mbaꞌ ɓəvə zəghu va, hutəm hutəməvə. Sa slanti məndi tə ꞌwa na mbaꞌ ɓəhu ta kəli ci. 17 Ma ka ghalahitaa miꞌi ki na, war ka gəəzə, ma kə ghəshi na: A Naꞌumiy kumavə zəghu, kə ghəshi. Mbaꞌ ghəshi fanati slən Ubedə kaa zəghu va. Sa kəliy Ubedə mbaꞌ ɓəvə mali ki na, mbaꞌ yakə Zheshe diy mazə Davitə. 18 Ana jijihiy mazə Davitiy, avanashi njasa ghava ghəshi tə Pereshə: Pereshə niy nza naa diy Hashərəŋ, 19 Hashərəŋ na diy Ram, Ram na, diy Avinadavə, 20 Avinadavə na diy Nashəŋ, Nashəŋ na, diy Saləma, 21 Saləma na, diy Bəwazə, Bəwazə na, diy Ubedə, 22 Ubedə na diy Zheshe, ma Zheshe ki na, diy Davitə, ava tsəgha niy nza ghəshi. Tiɓa kəray zliya Rutə ki.