Kwa taŋa zliya
Saməyel
Shi dza məndiy gha sənashi dzəkən zliya na
Zliya nay, zliya kutiŋ niy nza na lə kwa baka zliya Saməyel, liy hum təhəvəri məndi bakə mbə. Sənay ntsaa tsasliti zliya na məndiw. Nanzə kiy, mbə mbəzliy gura dikə dikə gəzə məndi kumaa dzəkən shi mbə zliya va na Saməyel, va tsəgha fanati məndi slən tsa ci kaa zliya va. Ghala vəghu tsa vay, ka sla nguvə niy har məndi mbəzli ka Hiyalaa təravə ta ʼwanshi kwal kaa ka Izərayel, Saməyel niy nza kwa kərni ndə sla nguvə. Va Eli niy mbəərə na sləni va. Gəmgəmshi niy nza ndərazhi Eli kala kama gar zəmə ghyi ta sləni dəshi (vəh 2. 27-36).
Ma sa ɗuw ka Izərayel tsa shi mazə ta sləkəshi nja nihuti hulfəhi ki na, dza Hiyala mbaʼ gəzanci kaa Saməyel, mbaʼ paranatishi Sawul. Ghəci niy nza kwa taŋa mazə tsaa sləkə ka Izərayel (vəh 9-10). Mbə məni mazə tsa ci na, kala ɗiti fəti ghəci ta kumaa niy gəzanakə Hiyala, mbaʼ Hiyala ndəghanti (vəh 15), Mbaʼ tivə Davitə ta məni mazə kwa səɗa ci, mbaʼ Saməyel pəərəti tə mbə (vəh 15). Sa fəti Sawul ghən ki na, war ə ghəciy pəla kwal tsaa pəəsli Davitə, mbaʼ Hiyala ndəghuti Davitə (vəh 16-vəh 31). Zhunataŋ, kə məndi niy ni kaa slən tsa zəghu Sawul, na na ciy, niy zləɓavə kuma ɗi diy va məni lə Davitə naw, madiga niy nza ghəshi lə Davitə. Liy hum sa mətiy Sawul mbə mbəzə lə ka Filisteŋ ki na, ka gha məni mazə Davitə dzəkən hulfə ka Izərayel.
Ɗuw tsa ɗuw ka Izərayel va tsa shi mazə, mbaʼ Hiyala paranatishi kwa taŋa mazə tsa shiy, ghənzə na kumaa gura diɓədiɓə na mbə zliya na.
Avanata kuma dza ghummə ɓənivə mbə zliya na ta nziy tsa ghummə ndatsə:
Mbaʼ kə ndə nuw Hiyalaa mbaɗə kuma va Hiyalay, kar naa mananati ya kala kwa ma nzə na kuma va (1 Sam. 8:19-22).
Mbaʼ kə Hiyala təravəŋa ta sləni nzə kala məni pə gha lə kwaliy, kar naa ndəghantəŋa, ya nguviy, kar naa ɓasakənəŋa (1Sam. 15:23-28).
Avanay njasa dza məndiy mbəə təhəvəri kuma mbə zliya na:
Bəla dikə dikə na mahəkanə na mbə:
I - Vəhə1-7: Kumaa dzəkən kar Eli lə Saməyel
Njasa yakə məndi Saməyel, mbaʼ mbəghiy ɓanavə kaa Kwa sləkəpə (vəh 1).
Anə fal Kwa sləkəpə (vəhə 2.1-11).
Kumaa dzəkən ghyi tsa Eli lə dzəkən sərndəkə sla kiri (vəhə 2.12- vəhə7).
II- Vəhə 8- Vəhə15: Kumaa dzəkən mazə tsa Sawul
Njasa pəərə məndi Sawul ka mazə (vehə 9-11).
Kuma gəzəkə Saməyel kaa ka Izərayel (vəhə 12).
Sawul dzəghway kən kuma gəzanakə Kwa sləkəpə, mbaʼ Kwa sləkəpə ndəghanti (vəhə 13-15).
III- Vəhə16- Vəhə31: Kumaa dzəkən kar: Saməyel, Sawul mbaʼ Davitə
Hiyala Tivə Davitə ta məni mazə Kwa pi tsa Sawul (vəhə 16).
Njasa pəəsliti Davitə Guliyatə (vəhə17. 1-53).
Madiga tsa kar Davitə ghəshi lə Zhunataŋ, ka pəla pəəsli Davitə Sawul, mbaʼ məti Sawul (vəhə 17.54-Vəhə 31).