Kwa taŋa zliya
Saməyel
kuma kiy ghyi tsa Eləkana
1
A tsahuti ndə niy nza tiɓay, Eləkana, kə məndi niy ni kaa slən tsa ci, mbə takə tsa Efrayim niy nza na. Ntsa vay, mbə kəleŋer tə hiɗi ka Efrayim mbə məlmə Ramatayim-Cufim niy nza na lə nziy tsa ci. Zəghu Yeruham niy nza na, Yeruham na zəghu Elihu, Elihu na zəghu Tuhu, Tuhu na zəghu Cufə. 2 Bakə niy nza miʼi və. Nahutiy, Ana, kə məndi niy ni kaa slən tsa nzə, ma kwa baka na, Penina. Penina nanziy, a ndərazhi niy nza və, ma Ana na, niy nza zəghu vuw. 3 Njasa səəkə piyay, mbə kafə niy nza Eləkana mbə məlmə ci Rama ta dzaa dzəmbə məlmə Shilu ta tsəfəku kwa kuma Hiyalaa sləkə shiy gwaʼ gwaʼa, mbaʼ ta slanta shiy. Ghala vəghu tsa vay, kar Hufəni lə Pinhasə, ndərazhi Eli niy nza naa ka ta Hiyala Kwa sləkəpə mbə məlmə va.4 Səəkəta ma vici ka Elkanaa sla shiy kaa Hiyalay, kar naa nganganavəshi sliw tsa sliy na va kaa kar mali ci Penina lə ndərazhiy zhər nzə mbaʼ ghehi nzə gwanashi. 5 Ma kaa Ana nanzə ki na, bəla mbəzli bakə ka naa ɓanavə, sa niy ɗiti na tərəŋuɓa ghənzə ya tsəgha niy mənti Kwa sləkəpə ka jəŋa. 6 Ka marəta vaa dza kiy, war ka tsəərə, ta mbə nəfə tsa nzəə satiy, sa nzana va mbaʼ Kwa sləkəpə niy mənti ka jəŋa. 7 Njasa səəkə piya vay, war tsəgha niy məniva kuma va. Dza ma Anaa dzəmə Shilu ta dzəmbə gaska Kwa sləkəpiy, war tsəgha niy tsəərə marəta. Sa tsəərəti Pənina tə nahuti vici na, mbaʼ nəfə tsa nzə zhanati, ka wahə ghənzə, kala ɗi ma zəmə shiy ghənzə. 8 Sa nata zata tsəgha ki, ma kə kaa ngəta na «Tawa wahə gha shəkaa Ana, tawa kama vəshi mbə nəfə tsa ghaa? Tawa zəmə ma gha shiya? Əə taŋəti mee ndərazhi məŋ va gha na?» kə.
9 Liy hum sa zəmanti məndi shiy, mbaʼ məndi santi shiy mbə məlmə Shilu ki na, mbaʼ Ana kafəta. Tiɓa niy nza Eli ndə ta Hiyala mənziy tə pi tsa ka naa nziy miy gaska Kwa sləkəpə. 10 War ə nəfə tsa Anaa zhanta tərəŋu, dza na ka cəʼu Kwa sləkəpə, lə wahə tərəŋu tərəŋu. 11 Ma kə na: «A Hiyala Kwa sləkəpəə sləkə shiy gwaʼ gwaʼa, nighətiy dzəkən ngəraʼu tsa kənee yən kwa sləni gha, zəzətiy dzəkənee, ka za ghən gha tə ya ma, mbaʼ pə gha ndara zəghu zal yən kwa sləni ghay, mbə dəvə gha dzee zlay ta ghəraŋa sləni ghəci ta kwa ndimndim, ka dza məndiy sləni shiti mbə ghən tsa ci ya paʼ humɓaw,» kə. 12 War ə Anaa cəʼu Kwa sləkəpə war ka cəʼu. War mbə nighə Eli. 13 Mbə nəfə tsa nzə niy cəʼu na, kwataka miy tsa nzə saa niy kufəghə gwaʼa tsəgha. Niy favə gaka məli nzə nduw. Va tsəgha ki na, əə ghyita mali na, kə Eli niy ni mbə ghən tsa ci. 14 Ma kə kaa ngəta ki na: «Paʼ hum dza ghaa nza ghyi ghyia? Mbala a gha dzaa wanti tay mbə ghən tsa gha tə tsahuti pi,» kə. 15 A kə kaa ngəci na: «Ə ghyiree kiw ntsee dikə tsaw, sahwee ya tay, ya nimaɓa shiy ghyipuw. Mali zhanta kuma mbə nəfə tsa nzə nzee. Ngəraʼu tsa kən ghən tsee pəliyee kwa kuma Hiyala Kwa sləkəpə. 16 Ka ɓətəra gha yən kwa sləni gha, nja mali gəmgəm na ma. Waa zəzə kuma təhəta na mbə nəfə tsee, ka zhira nəfə tsee tərəŋu, va tsəgha nay gha yən nzay nza mbə cəʼu,» kə. 17 Ma kə Eli kaa ngəta na: «Mbala lə zərkə kən gha, nza Hiyala ka Izərayel ndaŋa shi ɗuwti gha və,» kə. 18 Ma kə Ana na: «Zəzə kuma wəzə naa dzəkənee yən kwa sləni gha,» kə. mbaʼ zhəghəta wəzə mbə kuma nzə ki Mbaʼ dzata, mbaʼ dzaa zəməhu shi zəmə.
19 Ma həzlimə pəətə mekəshi ki na, dzəghwa kar Eləkana lə mbəzli kiy ghyi tsa ci mbaʼ ghəshi dzaa tsəfəkushi kwa kuma Kwa sləkəpə ta cəʼu. Liy hum ki na, mbaʼ ghəshi zhəghəghəvashiy dzəmbə məlmə shi Rama.
Njasa yakə məndi Saməyel
Dzəghwa Eləkana mbaʼ jakiy lə mali ci Ana, mbaʼ Kwa sləkəpə zləɓavə cəʼu nzə. 20 Dza Ana ki, mbaʼ ɓəvə hur, mbaʼ yakə zəghu zal. Ma kə na: «Njana nzana va Kwa sləkəpə yən cəʼuviy, Saməyel dza slən tsa ciy nza» kə.
Ana ɓanavə zəghu nzə kaa Kwa sləkəpə
21 Ma sa səəkəta nahuti piya ki na, mbaʼ kar Eləkana lə mbəzli kiy ghyi tsa ci gwanashi zhini dzashi dzəmə Shilu ta slasla shi ka ghəshiy sla njasa səəkə piya kaa Kwa sləkəpə, mbaʼ ta sla nihuti shiy niy gəzəkə na sla kaa Kwa sləkəpə. 22 Ma na Ana nanzə kiy, niy tsəhəta na kwasəbə shiw, a kə niy ni kaa zatay: «Sa kee slanti zəghu tə ʼwa dzee dzəmə li, ta dzəghwa kuma Kwa sləkəpə ghiy li ta ɓanta, ma nza ghəci nza məɓa ta paʼa kwa ndimndim,» kə niy ni kaa ngəci. 23 Ma kə zata kaa ngəta na: «Njasa təɓaŋa na pə gha mənti, nziyŋa paʼa va vəghu tsa dza ghaa slanti tə ʼwa. Nza Kwa sləkəpə mənti kumaa niy gəzəkə na gwaʼa tsəgha» kə. Dzəghwa Ana ki, mbaʼ nziyta kwa Rama ka sanci ʼwa kaa zəghu nzə paʼa va vəghu tsa slanti na tə ʼwa.
24 Ma sa slanti na tə ʼwa ki na, dza na mbaʼ kəsəvə kəɓə məcar ndə piya mahəkanə, lə bəhu ghupə, mbaʼ tay kwa hupər, mbaʼ dzəməta lə zəghu vaa dzəmə məlmə Shilu dzəmbə gaska Kwa sləkəpə. Juw niy nza zəghu va ghalaɓa. 25 Dza kar Ana lə zata ki, mbaʼ ghəshi sləniy məcar tsa va kaa Kwa sləkəpə, mbaʼ ghəshi ɓanavə zəghu va kaa Eli. 26 Ma kə Ana kaa ngəci na: «A ntsee dikə tsa, yaŋ pə gha, ava gha tə ghuməŋa, yən na maliy niy garəta va tikə tə nahuti vici vəgha gha ta cəʼu Hiyala Kwa sləkəpə. 27 Mbə cəʼwee vay, zəghu na niy cəʼwee va Kwa sləkəpə, aa ndara shiy niy cəʼwee va. 28 Yən kuraku kiy, ee ɓanavə kaa Kwa sləkəpə. Sa nzə dza na nza ta kwa ndimndim,» kə. Dzəghwa ghəshi ki, mbaʼ ghəshi tsəfəkushi kwa kuma Kwa sləkəpə.