Kwa baka zliya
Saməyel
Shi dza məndiy gha sənashi dzəkən zliya na
Zliya nay, Saməyel tsasliti na njasa gəzəkə məndi va mbə kwataŋa zliya saməyel. Kuma mbə kwa baka zliya Saməyel nay, saa nuw kuma mbə kwa taŋa zliya Saməyel na.
Liy hum sa mətiy Sawuliy, mbaʼ Davitə mbərəhu məni mazə. Ya tsəgha nzə kiy, a Ishəbushetə zəghu Sawul niy pəla məni mazə dzəghwa səɗa diy, mbaʼ kar Abəner ntsaa niy sləkə ka Sawji Sawul ghəshi lə takəhi ka Izərayel məŋ niy pəərəti (Vəhə2). Ma Davitə na, ka məni mazə dzəkən takə tsa zhuda lə sa Benzhameŋ.
Sa bəkushi kar Ishəbushetə ghəshi lə Abəner ki na, mbaʼ Davitə məniy mazə tsaa sləkə ka Izərayel gwanashi, mbaʼ dzaa nziyiy mbə məlmə Zheruzalem (Vəhə5.1-10). Wəzəɓa Davitə niy məni na mazə kaa sawul.
Ya tsəgha nzə kiy, a Davitə niy mənti kuma jikir na kwa kuma Hiyala kuraku. Aa niy mənti ghurghur ghəshi lə Batəsheba, mbaʼ niy pəəsliti Uri zata mali va (Vəhə 11). Mbaʼ Hiyala niy ɓasanakən nguvə tə mbərkə kuma va (Vəhə 12.11-Vəhə 13.19). Ma Davitə ki na, mbaʼ niy tsati titihu kaa Hiyala tə mbərkə kuma ci va jikir na (vəhə12.13.) «Ntsa geʼi tsa lə nəfə tsa nzə,» kə Hiyala niy ni kaa Davitə (vəhə 7.21), mbaʼ niy slati kiri li, ta nza mbəzli kwa miy dəgha ci mbə mazə ta kwa ndimndim.
Avanata kuma dza ghumməə ɓənivə mbə zliya na ta nziy tsa ghummə ndatsə:
Ntsaa nuw kuma Kwa sləkəpə lə nəfə kutiŋ nja Davitiy, kar naa təfanci miy ya mbə nama kuma məni na. Kar naa ndəghu va mbəzliy ɗi ma kuma ci.
Kar Kwa sləkəpəə ɓasə nguvəə dzəkən ntsaa nuw ghəci kə mənti kuma jikir na, ta mbə ghəciy guma kwal tsa ci. Mbaʼ kə ndə nuw Hiyala tsati titihu va kuma ci jikir na kwa kuma nziy, kar naa pəlay mbə nəfə tsa nzə (vəhə 12.13-15).
Avanay njasa nuva kuma mbə zliya na:
Məti Sawul (vəhə1).
Davitə məni mazə dzəkən takə tsa Zhuda mbə məlmə Hebəruŋ (vəhə 2-vəhə 4).
Davitə məni mazə dzəkən ka Izərayel gwanashi (vəhə 5. 1-5).
Davitə Dzaa nziyiy mbə məlmə Zheruzalem (vəhə 5. 6-10).
Kuma mənti Davitə wuzə na kwa kuma Kwa sləkəpə (vəhə 5.11-vəhə 7).
Mbəzəhi mbəzəhu Davitə mbaʼ nihuti shiy məni va dzar kwa jipə ka sləni ci (vəhə 8-vəhə 10).
Kuma jikir na mənti Davitə (vəhə 11).
Njasa yakə məndi Saləmuŋ (vəhə 12).
Njasa kərni Davitə məni mazə tsa ci lə kumaa məniva ghənghən ghənghən (vəhə 13-vəhə 24).