Kwa baka zliya
Saməyel
Məndi səəkəə gəzanci məti kar Sawul lə Zhunataŋ kaa Davitə
1
Liy hum sa irəkə Davitə ka Amalek ki na, mbaʼ zhikiy zhimbə məlmə Cikəlag. Vici bakə ghəci mənti mbə məlmə va ghala mətiy Sawul. 2 Ma tə kwa mahəkana vici na, wəɗ tsahuti ndə tsahuy mbə mbəzliy niy nza kwasəbə Sawul mbə mbəzə. Ntsa vay, sliku sliku niy nza kubeŋer kən ghən ci, war hiɗi pi tsa mbə ghən tsa ci, ta mbə məndiy sənay a mbəri məniy, kə məndi. War sa tsəhiy na vəgha Davitə na, mbaʼ tsəfəkwiy, gaʼ kuma ci mbə hiɗi. 3 Ma kə Davitə kaa ngəci na: «kuma səəkə ghaa?» kə. «Mbə mbəzli ka Izərayel hukəvaree mbə mbəzə» kə ntsa va. 4 Ma kə Davitə kaa ngəci na: «Njaa na kumaa mənitaa? slakəra shi» kə. Ma kə ntsa va na: «A məndi zəmanavəshi bali kaa ka sawji ka Izərayel, mbaʼ məndi bakwanti mbəzli ɗaŋ mbə shi. Ya kar Sawul lə zəghu ci Zhunataŋiy, a məndi bakwantishi,» kə. 5 «Njaa gha ghaa sənay a kar Sawul lə Zhunataŋ bekushi pə ghaa,» kə Davitə kaa ngəci diɓa. 6 Ntsa vay, məgəla niy nza na, ma kə na: «War yən mə dəlagwa Gilbuway, nighee na Sawul jihətəvay tə gwapa ci, ndəku ndəku ka sawji ka Filisteŋ mə gedewesli lə ni ka muwtahi gədewesli vəgha. 7 Sa nə na nighə kə dziy liy hum ci na, kar mətsə ci tə ya. Mbaʼ haraɗa. Mbaʼee wara. 8 «A ndə nza ghaa,» kə kaa ngəra. «Ndə ka Amalek nzee,» pən kaa ngəci. 9 Ma kə kaa ngəra ki na: “Kəətivaa sar a gha pəəslitəra, sa nza nay, wəzə favee vəghee ya tsəgha nzee ghulara mbə piy wəzə wəzəw” kə. 10 Sa gəzəkə na tsəgha ki na, dzee kəətə yən kəətəghəvaraa dzəvəgha, mbaʼee paslanti. Sa nzanay, ee niy sənay ka dza naa nza tə ghumiy sa mbashi ka Filisteŋ va mbəzli ciw, pən. Dzee ki na, mbaʼee sərəhu daghuba mazə tsaa nza mbə ghən ci, mbaʼ jaʼwa kwa dəvə ci. Avanashi sa ɓəkəŋashee ndə sləkəra,» kə.11 Sa favə Davitə kuma va tsəgha na, dza na kwiyah kwiyah slaslakwanti kwəbəŋer kən ghən ci. Dzəghwa mbəzli kwasəbə gwanashi mbaʼ ghəshi slaslakwanti ni shi kuraku. 12 Dza ghəshi ka təhuni mbəri. War ə ghəshi wahə, ka məni sumay paʼa hatihwer, tə mbərəkə sa bakwanti məndi va kar Sawul lə Zhunataŋ, mbaʼ ka Izərayel mbəzli Kwa sləkəpə va mbə mbəzə. 13 Ma kə Davitə kaa məgəla tsaa ɓanakə nuwur va na: «Ndə ka wa nza ghaa?» kə. «Zəghu ndə ka Amalek nzee, təɗikə na ghyi tsa ciy dzəti hiɗi ni,» kə. 14 Ma kə Davitə kaa ngəci na: «Njaa dza ma her gha va kafə dəvə gha ta pəəsli ntsa təravə Kwa sləkəpə mbaʼ shəkambə in dzəghwa mbə ghən ciaa?» kə. 15 Dzəghwa na daʼ haray ndə mbə ka sawji ci. «Ndi pəəsliti ntsa,» kə kaa ngəci. Dza ndə sawji tsa va mbaʼ pəəsliti ndə ka Amalek tsa va. 16 Ma kə Davitə kaa ngəci na: «Tə mbərkə kuma gha jikir na mətiŋa gha. Gha dəʼu ghən tsa gha kəsiy na ghən tsa gha lə nguvə, sa nə gha va: “Yən pəəsliti na ntsa təravə Kwa sləkəpə mbaʼ shəkambə in dzəghwa mbə ghən ci,” pə gha,» kə.
Davitə təhuni kar Sawul lə Zhunataŋ kwa cim
17 Dzəghwa Davitə ki, mbaʼ ghakəvəri cəm ta təhuni kar Sawul lə zəghu ci Zhunataŋ. 18 «Nza məndi ɓəni kaa mbəzli mbə takə tsa Zhuwda,» kə. «Cəm mbəri rigi», kə kaa har ci. Mbaʼ məndi tsaslaghwa cəm tsa va kwa zliya har məndi vaa «zliya ntsa tiɗiɗə kuma tsa». Avanay cəm tsa va:
19 A ka Izərayel, a ntsa ghuy dikə tsa mətiy məɓa mə dəlagwahi ghuy.
Njaa gha məndiy bakwanti ka sawji ghuy va guranti tə mbəzə kiyaa mbəzlia?
20 Ka dza ghuy ta gəzə tsava nuwur kaa mbəzli mbə məlmə Gatə ma,
ka gəzə kuma va ghuy kaa mbəzli dzar kwa kweler mbə məlmə Asəkalwəŋ ma,
nəghətaa ghyehi ka Filisteŋ, mbəzliy nuw ma Hiyala kataŋ na va vəshishi,
nəghətaa ghəshi zliy dzəta ghumə va vəshi sa ka ghəshi favə.
21 Nəghətaa vanə nzəmə dzar mbə dəlagwahi Gilbuwa ma,
ya miniy, nəghətaa ghənzə səmə ma,
Nəghətaa pi tsa dzar vəgha bahwahi ghuy nza ləɓə ləɓə ghula ma.
Sa nza nay, dzar vəgha ghuy pakən məndi haʼu kən galhi ka mbəzə,
dzar vəgha ghuy pakən məndi haʼu kən gal tsa Sawul,
ka dza məndiy zhiniy vərəhu gal tsa ci va lə inuw.
22 Niy va Zhunataŋ faghwa havə kwa rigi tsa ci,
mbaʼ hata kala nzərnzər miymiy ndə mbəzə tsa ci tə hiɗi kiw mbəzliyaw,
niy va naa hata havə ci ta dzəti ntsaa gura tə mbəzə kala pay gəkə ci tə ngulaw.
War nay gha, fəhu kə Sawul təɗikəvəri kafaʼi tsa ciy,
niy va naa zhimbə kwəɓəkə kala miymiy tiw.
23 Ghalaa nza kar Sawul lə Zhunataŋ tə ghumiy, tərəŋu niy ɗiva ghəshi,
paʼ mbə məti shiy, təhəvərivashi ghəshiw
Daw zəlikə niy nza ghəshi kiyaŋu kiyaŋu tsa shi,
Daw zhil niy nza bərci mbə shi.
24 Miʼi ka Izərayel, ə pə ghuy təhuni Sawul.
Ghəci niy pakənŋwiy na kwədeler ka gəna kiyas ni,
ghəci niy ghasləti na kubeŋer ghuy lə shi ghasl məntim tə mbəzə kwa shamshama
25 Njaa gha məndiy bakwanti mbəzliy gura tə mbəzə, mbə mbəzə kiya mbəzliya?
Njaa gha məndiy pəsliy Zhunataŋ ka mbəri dzar mbə dəlagwahi kiyaa?
26 Təruŋ zhira nəfə tsee va məti gha na zəmərə Zhuwnatan
Təruŋ niy ɗee kuma gha,
kuma gaga niy favee məni madiga lə ghaw.
Təruŋəɓa ɗi tsa kwa jipə ghum niy nza na kaa ɗi tsa kwa jipə kar zal lə mali.
27 A məndi bakwanti mbəzliy gura tə mbəzə kataŋ ki mbəzliya
A məndi bakwanti ka sawji tə slən kataŋ.
Tsəgha na cəm tsa va.