Kwa taŋa zliya
Mezhizhi
Shi dza məndiy gha sənashi dzəkən zliya na
Ka ghummə gha gəzə kumaa dzəkən Kwa taŋa zliya mezhizhi nay, wəzə na ghummə Sənata kumaa dzəkən zliyahi mezhizhi bakanashi. Zliyahi va bakanashiy, zliya kutiŋ niy nza ghəshi, əə təhəvərishi məndi. Ntsa kutiŋ tsa tsaslitishi na. Ndə mbə ka Zhəwifəə niy kəəsəhu məndiy dzəti hiɗi ka Babilunə dza naa tsaslitishi bərke.
Kumaa ghata mbə zliyahi Sameyel nuw ghəshi lə sla nzəə sar. Dzəkən kumaa məniva lə hulfə ka Izərayel liy hum sa mətiy mazə Davitə gəzə ghəshi kuma bakanashi.
Kwa taŋa zliya mezhizhə nay, dzəkən njasa kərni Davitə məni mazə tsa ci tə hiɗi ka Izərayel gha na gəzə kuma. Davitə ghula ta mətiy, mbaʼ tsa dikə tsa zəghu ci Aduniyas niy ɗi ɓəhu mazə kala zləɓavə Davitə. Dza Davitə mbaʼ tivə Saləmuŋ ta nza ghəci ka mazə kwa pi tsa ci ki.
Sa ɓəvə Saləmuŋ maziy, wəzə niy məni na kuma kwa kuma Kwa sləkəpə. Ghəci ngati na ghyi kaa ngəta, təruŋ niy nza gəna və, zhini təruŋ ghəci niy sənata kuma. Ma liy hum na, mbaʼ dzay dzəmbə ɓəɓə miʼiy niy makəti Hiyala hulfə ka Izərayel va ɓəshi, mbaʼ miʼi va ngaɗambəə dzəmbə tata mbəreketi ki,(1 Mezh 1-11).
Sa satiy nəfə tsa kwa sləkəpə va kuma mazə Saləmuŋ va ki na, mbaʼ tihəvəri hiɗi ci va bakə mbə liy hum sa mətiy na. Gwanashi tsa nihuti takəhi ka Izəreyel na, mbaʼ ghəshi tivə Zherubəwam ta nza ka mazə tsa shi. Kwataka takə tsa Zhuda tsaa nziyiy kwasəbə zəghu Saləmuŋ. Bakə mezher tə hiɗi ka Izərayel tsəgha ki: Ka sləkə ka Zhuda Rubəwam zəghu Saləmuŋ jijiy mazə Davitə, ka sləkə ka Izərayel Zherubəwam, (1 Mezh 12).
Liy hum kiy, war mbə mbəərəva niy nza mezher tə hiɗi va bakanashi sa ka tsahutiy mətiy. Nihuti mezheriy, kuma gəmgəm na ka ghəshiy məni kwa kuma Kwa sləkəpə, ka tsəfəku kwa kuma nihuti hiyalahi ghənghən ghənghən. Ka ghəshiy dza na mbaʼ ghəshi ngaɗambə mbəzli sləkə ghəshi va mbə kuma va, ka Kwa sləkəpə dza ki na, mbaʼ ɓasanakənshi nguvə kaa kar mazə tsa va lə mbəzli tə hiɗi ci gwanashi, mbaʼ ka mbəzə shi səəkəə irətishi, ya ma na mbaʼ ɓəkə, ya van na kala nzəmə ma.
Nihuti mezheriy, kuma wuzə na ka ghəshiy məni kwa kuma Kwa sləkəpə, kar kwa sləkəpəə kəətiti niva mezher, ya ta mbəzə dza ghəshiy, kwasəbəshi ka naa nza, kar ghəshiy ushanti ka mbəzə shi.
Kumahi ɓənimmə zliya nay:
Mbaʼ kə ndəə nuw Hiyala lə nəfə kutiŋiy, ka zlay kəəti ndə Hiyalaw (1 Mezh 4.11).
Mbaʼ kə ntsaa ʼwanshi kwal kaa mbəzli gəmgəməyiy, tsəgha ka mbəzli liy hum ciy nza. Nguvə ɗi Hiyalaa slaa dzəkən ndə ʼwa kwal tsa vay, kar naa dapashi mbəzli sləkə na va kuraku. Tə mbərkə ghəciy, ɗaŋ ka ngəraʼu kəsashi mbəzli sləkə na (1 Mezh 14.14-16).
Mbaʼ kə ndə zhəghanavə hum kaa Hiyalay, kar Hiyalaa zhəghanavə hum kuraku. Ya əə mənti ndə kuma jikir na, mbaʼ kə ndə zhəghəkəvay va Hiyala, mbaʼ zlata kuma ci va jikir nay, kar Hiyalaa zhiniy zləɓavə, ka kəəti (1 Mezh 8. 33-36; 2 Mezh 20.1-6).
Avanta kuma dikə dikə na mbə zliya na:
Njasa kərkəva mazə tsa Davitə lə njasa mənəhu Saləmuŋ tsa ci mazə (1 Mezh 1-11).
Njasa tihəvərivashi hiɗi ka Izərayel bakə mbə, lə shiy məniva dzar mbə hiɗi va sa təhəvərivashi ghəshi. ( 1 Mezh 12- 2 Mezh 17).