Kwa baka zliya
Mezhizhi
Shi dza məndiy gha sənashi dzəkən zliya na
Kwa baka zliya mezhizhi nay, ntsaa tsasliti kwa taŋa zliya mezhizhi va tsasli na. Sa kutiŋ na niy nza na, əə təhəvəri məndi bakə mbə. Ndə mbə ka Zhəwifəə niy kəəsəhu məndiy dzəti hiɗi ka Babilunə dza naa tsasliti zliyahi va bərkee.
Mbə zliya vay, njasa nuva kuma kən hiɗi ka Izərayel lə hiɗi ka Zhuda gəzə na kuma, paʼa va vəghu tsa səəkə məndiy zləghuhushi va mezhizhi shi. Ka Ashiri lə ka Shiri, mbaʼ ka Ezhiptə, mbaʼ ka Babilunə niy nza ka mbəzə shi. Ka Ashiri niy səəkə naa zləghuhu hiɗi ka Izərayel mbaʼ ghəshi ɓəhu Samari məlmə shi dikə na ka ka mazə nziy mbə (Vəh 17).
Kwataka hiɗi ka Zhuda niy tərə na. Ma liy hum diɓa na, mbaʼ Nebukadənetsar mazə ka Babilunə Səəkə ɓəhu hiɗi ka Zhuda kuraku, mbaʼ ndanti məlmə Zheruzalem, mbaʼ kəəsəhu mbəzli mbə məlmə vaa dzəti hiɗi ci (Vəh 18-25).
Mbə zliya vay, ka gəzə kuma Hiyala bakə na shiy niy nza tə slən, kar Eli lə Elize. Ya tsama mazə pəərəti məndiy, lə tsa ci nziy niy nza na.
Nihuti mezheriy, a ghəshi niy zlata nuw Hiyala ka Izərayel Kwa sləkəpə, ka dzashi ta tata mbəreketiy niy ta mbəzliy niy nza tə hiɗiy niy tahantishi Kwa sləkəpə va, ta ɓanshi kaa ka Izərayel. Ka mbəzli sləkə ghəshi vaa dza na, ka nuw na nuw ghəshi va kuma kuraku. Sa ka Hiyalaa dza na, mbaʼ fambəshi mbə dəvə ka mbəzə shi.
Nihuti mezher na shi kiy, kumaa niy pəhəti Hiyala va mbaʼ ɓanavə kaa Muyizə ta ɓanshi kaa ka Izərayel niy nuw ghəshi, Niy zləɓa ghəshi məndiy ta mbəreketi tə hiɗi shi ghəshi mbə mazuw, cəkeʼ ka ghəshiy zanti niva shiy. Sa ka Hiyalaa dza ki na, mbaʼ nziyta lə niva mezhizhi, lə mbəzli tə hiɗi shi gwanashi, ka kəətishi.
Mbaʼ kə mazə məni kuma gəmgəm na ka ta mbəreketiy, lə mazə Zherubəwam ka məndiy yimə mbə zliya na. Sa nza nay, Zherubəwam niy gha naa ngaɗambə ka Izərayel mbə ta mbəreketi. Ma tsaa nuw kuma wəzə na ka ɗi fəti va Kwa sləkəpə na, ka yimə lə mazə Davitə, sa nza na mbaʼ Davitə niy nuw Kwa sləkəpə lə nəfə tsa ci kutiŋ
Kumahi ɓənimmə zliya nay:
Shi kutiŋ ni ghəshi lə shi mbə kwataŋa Mezhizhi va.
Avanta kuma dikə dikə na mbə zliya na:
Njasa tihəvərivashi hiɗi ka Izərayel bakə mbə, lə shiy məniva dzar mbə hiɗi va sa təhəvərivashi ghəshi (1 Mezh 12- 2 Mezh 17).
Njasa kərkəva hiɗi ka Izərayel lə hiɗi ka Zhuda (2 Mezh 18- 25).