Mazə Akab ɗi zhinəhu məlmə Ramut
(NəMezh 2 Veh 18.1-3)
22
Piya mahəkanə niy mənti ka Izərayel lə ka Shiri kala mbəzə kwa jipə shi. 2 Ma tə kwa mahəkana piya va na, mbaʼ Zhuzafat mazə ka Zhuda səəkiy ta wə va Akab mazə ka Izərayel. 3 A mazə ka Izərayel niy gəzanshi kaa mbəzli ta səɗa ci. Ma kə niy ni kaa ngəshi na: «A ghuy sənay məlmə ghummə niy nza Ramut tə hiɗi Galad, sa wa na dza ma ghummə ta zhinəhu mbə dəvə mazə ka Shiri kiya?» kə niy ni kaa ngəshi. 4 Ma kə kaa Zhuzafat mazə ka Zhuda ki na : «Zləɓavə dza gha kwasəbee ta mbəzə, ta zhinəhu məlmə Ramutə tə hiɗi Galad na?» kə. «Ta dza dzee kwasəbə gha. Mbəzli kutiŋ ni nza ghummə, ka sawji yay, shi gha na ghəshi, gədewesli yay, shi gha ghəshi diɓa,» kə.(NəMezh 2 Veh 18.4-11)
5 Ma kə Zhuzafat diɓa na: «Nanzə kiy, pərɓa ɗuw pə gha ɗuwti kuma va Kwa sləkəpə,» kə. 6 Dzəghwa Akab mazə ka Izərayel ɓasə ɓasəti ka gəzə kuma hiyalahi ci. Gar diwiy diwiy faɗə niy nza ghəshi. Ma kə kaa ngəshi na: «Ee dza ta mbəzə ta zhinəhu məlmə Ramut tə hiɗi Galad shəkənaa naa ee nziyra na?» kə. Ma kə ghəshi na: «Mbala, ta fambə məlmə va dza Kwa sləkəpə mbə dəvə gha mazə,» kə ghəshi. 7 Zhini ma kə Zhuzafat na: «Tərə tsahuti ndə gəzə kuma Hiyala tikə gar ɗuwtəm kuma ghəci va Kwa sləkəpə sa?» kə. 8 Ma kə mazə ka Izərayel kaa ngəci na: «A Tsahuti ndə gəzə kuma Hiyala tərə tiɓa kutiŋ gar ɗuwtəm kuma ghəci va Kwa sləkəpə, Mishe zəghu Yimla, kə məndi kaa slən tsa ci. Ə na na nza nay, ka ɗi kuma ci yaw. War dza kwa gəmgəm ka naa gəzə kumaa dzaa dzəkənee. Səəkə naa gəzəkəra na wəzə na kumaw,» kə. «Ka gəzə kuma gha tsəgha ma mazə,» kə Zhuzafat kaa ngəci. 9 Dza mazə ka Izərayel ki, daʼ haray tsahuti ntsaa ghəra sləni kwa dəgha ci. Ma kə kaa ngəci na: «Mbala harkə Mishe zəghu Yimla kiyaŋu kiyaŋu,» kə.
10 Kar Akab mazə ka Izərayel ghəshi lə Zhuzafat mazə ka Zhuday, mənziy mənziy niy nza ghəshi kwa gizli gizli mezhizhi shi kwa miy dəghaa dzəmbə məlmə Samari, lə kubeŋer mezhizhi shi kən ghən shi. Mbaʼ ka gəzə kuma hiyala tiɓa kwa kuma shi mbə gəzə kumaa dzaa məniva. 11 A tsahuti ndə gəzə kuma hiyala niy nza mbə shi, Sedekiya, kə məndi kaa slən tsa ci, zəghu Kenana niy nza na. Mbaʼ niy mənivə təlimim bakə tə tsahi. Ma kə kaa Akab na: «Ma kə Kwa sləkəpiy: “Njasa ka məcar tsa nza təlimimə va və nja tsahiy pəsli ta ndiy, tsəgha dza gha ta mbashi ka sawji ka Shiri,” kə» kə kaa Akab. 12 Ka gəzə kuma hiyala va gwanashiy, war dzəmiy kuma ntsa va niy tsəɓə ghəshi kuma. Ma kə ghəshi na: «Mbala pəsli ta məlmə Ramut tə hiɗi Galad. A Kwa sləkəpə fambə mbə dəvə gha, ta zləghuhu dza gha mazə,» kə ghəshi.
Mishe ndə gəzə kuma Hiyala gəzəkəvəri njasa dza kuma ta məniva kwa gəmgəm
(2 NəMezh 18.12-27)
13 Dza ntsa ghunay məndi ta har Mishe mbaʼ dzaa kəsay Mishe ki. Ma kə kaa ngəci na: «Mishe, ka gəzə kuma hiyala gwanashiy, miy kutiŋ na sa shi ta gəzə na wəzə na kuma dza kwa mazə. Kuma wəzə na pə gha dzaa gəzə dza kwa mazə nja ghəshi kuraku,» kə. 14 Ma kə Mishe kaa ngəci na: «Ava Kwa sləkəpə tiɓa ka favə, kuma dza Kwa sləkəpəə gəzaray, war ghənzə dzee ta gəzə, na nee» kə.
15 Dza Mishe mbaʼ tsəhiy kwa kuma mazə Akab ki. Ma kə mazə kaa ngəci na: «Ana Mishe, a ghummə dza ta mbəzə ta zhinəhu məlmə Ramut tə hiɗi Galad shəkənaa naa a ghummə nziyimmə na?» kə. Ma kə Mishe na: «Mbala, ta zləghuhu məlmə va dza gha, a Kwa sləkəpə fambə mbə dəvə gha mazə,» kə. 16 Ma kə mazə Akab kaa ngəci diɓa na: «A gha sənay ɗaŋ səɗa kee nza mbə gəzaŋa: “Zəməkə fəla ta gəzəra war kuma gəzəkəŋa Kwa sləkəpə gwaʼa tsəgha,” pən ni kaa ngəŋa nanzə ɓay?» kə. 17 Ma kə Mishe ki na:
Ee nashi ka Izərayel gwanashi
ndani ndani dzar mbə dəlagwa
nja dəmbəkə tsa kama ndə ndəghu ci tiɓa.
Ma kə Kwa sləkəpə dzəkən shi na:
“Ntsaa sləkə mbəzli va tiɓa ghulaw.
Ya wa ndə mbə shiy, mbala ghəciy jighi lə zərkə,” kə,» kə Mishe.
18 Ma kə mazə ka Izərayel kaa Zhuzafat mazə ka Zhuda ki na: «Gəzaŋa shivee kisa? War dza kwa gəmgəm ka naa gəzə kumaa dzaa dzəkənee. Səəkə naa gəzəkəra na wəzə na kumaw, pən kaa ngəŋa sa,» kə. 19 Zhini ma kə Mishe diɓa na: «Yaŋ tsəgha na, ə pə ghaa fa kuma gəzəkə Kwa sləkəpə ee zhiniŋa ki. Gəzə Kwa sləkəpə kuma vay, Mənziy niy natee kwa gəzli mazə nzə, lə mbəzliy ghəranta sləni mə ghumə məgarə məgarə tar kwa zleɓi nzə lə tar kwa bəzəmə nzə. 20 Dza na ka ɗuw kuma ki, ma kə na: “A ntsaa dzaa mbay həərəti mazə Akab ta dza ghəci ta mbəzə lə mbəzli mbə məlmə Ramut tə hiɗi Galad nza məndi pəsliti tay?” kə. Ta həərəti dzee lə kuma tsaʼ na, kə tsahuti. Lə na tsaʼ na dzee ta həərəti na nee, kə tsahuti diɓa. 21 Nighee ki na safə tsaa gəzə kuma kaa ka gəzə kuma Hiyala kəətikəvay, mbaʼ gariy kwa kuma Kwa sləkəpə. “Yən na saa dzaa mbay həərə ci,” kə. “Lə kwal tsa njaa tsa dza gha ta həərətia?” Kə Kwa sləkəpə. 22 Ma kə safə tsa va na: “Ə dzee dzaraa dzəmbə ka gəzə kuma hiyala ci va gwanashi mbaʼee gəzəkəvəri kuma dzərvə dzərvə na kwa miy shi” kə. Ma kə kwa Sləkəpə kaa ngəci ki na: “Ta mbay həərə ci dza gha kataŋ, a bərci va va gha. Mbala a gha dzaa mənti njasa gəzə gha va,” kə Kwa sləkəpə kaa ngəci,» kə Mishe. 23 Zhini ma kə Mishe diɓa na: «Ghənzə na kumaa mənita na sana. Sa dza Kwa sləkəpiy, mbaʼ fambə safə tsaa slasla dzərvəə dzəmbə ka gəzə kuma hiyala gha ni. Lə ɗi nzə mənti Kwa sləkəpə kuma va tsəgha, sa nza na mbaʼ tarəkə saŋa ngəraʼu dəʼu ghən tsa nzə,» kə.
24 War sa gəzəkə Mishe kuma va tsəgha na, dza Sedekiya zəghu Kenana, ndə mbə ka gəzə kuma hiyala va mbaʼ kəətəghəvay dzəvəgha, paw ləkənavə dəvə vəgha ghən ci. Ma kə kaa ngəci na: «Hum səvəri safə tsa Kwa sləkəpə mbə ya ta gəzaŋa kumaa?» kə. 25 «Ta nay dza gha dəʼu ghən tsa gha fəca dza gha vaa dza ta mbə mbə ciki tsaa gura mbəmbə tsa kiy ghyi tsa gha,» kə Mishe kaa ngəci. 26 Ma kə Akab mazə ka Izərayel kaa ndə mbə ka sləni ci ki na: «Mbala kəsəvə Mishe a gha dzaa fambə mbə dəvə kar Amun nguməna tsa mbə məlmə ghəshi lə zəghuee Yuha. 27 A pə gha dzaa ni kaa ngəshiy: “Kalaghwam ntsa kwa fərshina, nza ghuy nganci shi zəmə juw juw, lə yam juw juw. Tsəgha pə ghuy dzaa kəsəti paʼa va vəghu tsa dzee zhəghəkəvara kuriŋ,” kə mazə pə gha kaa ngəshi,» kə. 28 Ma kə Mishe kaa ngəci na: «Əə kama na Kwa sləkəpə ghunara ta gəzə kuma gha kə səəkəŋa kuriŋ,» kə. «[A ghuy favə gwanaŋuy ghuy shi tiɓa va ɓay mbəzli ni,»] kə diɓa.
Məndi paslanti mazə Akab mbə mbəzə
( 2 NəMezh Veh 18.28-34)
29 Dza kar Akab mazə ka Izərayel ghəshi lə Zhuzafat mazə ka zhuda, mbaʼ ghəshi pəslishi lə ka sawji shi ta mbəzli mbə məlmə Ramut tə hiɗi ka Galad ki. 30 Ma kə mazə ka Izərayel kaa Zhuzafat na: «Ta səranti kubeŋer mazee dzee, kala gar sənara ma məndi ta dza ta mbəzə tsa va. Na na ghay, lə kubeŋer mazə gha pə gha dzaa nza kən ghən tsa gha,» kə. Dza na ki, mbaʼ mbarantəvay, ka dzay ta mbəzə. 31 Ka shiriy kafə ta mbəzə tsa vay, a mazə tsa shi niy gəzanshi kaa mbəzliy sləkə mutiti gədewesli ka məndiy dza ta mbəzə li shi, mahəkanəmətsəkə bakəti niy nza mbəzli va. Ma kə niy ni kaa ngəshiy: «Əntaa ghuy pəla pəəsli ya ndə sawji tsa gwanay tsa, ya mbəzliy sləkə ka sawji ma. Mazə ka Izərayel pə ghuy dzaa pəla pəəsli ci gwaʼa tsəgha,» kə niy ni kaa ngəshi. 32 Va tsəgha ki, sa nay mbəzliy sləkə mutiti gədewesli mazə Zhuzafat na: «Ghəci na mazə ka Izərayel tsa va ya njaaɓa,» kə ghəshi. Tap ghəshi məshi mbə nuw ci ta dza ta pəəsli ci. Sa nighəti Zhuzafat tsəgha na, mbaʼ ngumata lala. 33 Mbaʼ mbəzli va fəti ghən mazə ka Izərayel na savaw, kə ghəshi, tərəɗ ghəshi zhəghətəvashi kala nuw ma.
34 Dza tsahuti mbə ka sawji ka Shiri mbaʼ hata havə tsəgha kala sənay ma ntsa hə na, mbaʼ havə va məta tə mazə ka Izərayel dzəvəri kwa pi tsa tsəɓəva shiy kəla havə va va dzəmbə ndə kwa hati. Ma kə mazə kaa ntsa zlərə muwta gəduw kwa mbəzə ci ki na: «Zhəghəva dziy liy hum a gha ɓarvaŋa lə ya kwa mbəzə, a məndi hantəra,» kə.
35 Fəcavay, ghiyanakiy niy nza mbəzə tsa va. War garə niy gariy məndi mazə kwa muwta gəduw ci məndi mbəzə lə ka Shiri. War ə miymiy zhi tsa ti hu dzəghwa hur muwta ci va. Ma hetihuer na, mbaʼ mətiy. 36 Ma vici mbə pəku ki na, mbaʼ məndi zlapay zapə: «Ya wa ndiy, ka dzəmbə məlmə səəkə na mbə, dzakə ghyi tsa ci. 37 A mazə mətiy,» kə məndi.
Liy hum ki na, mbaʼ məndi ɓəghə mbəri tsa ciy dzəmbə məlmə Samari, laʼ məndi lanti mbəɓa. 38 Ma məndi mbə yaɓə miymiy mazə kwa muwta gəduw ci va kwa kufa mbə məlmə Samari va ki na, mbaʼ kireketi səəkəshi ka dərni miymiy va, ka pi miʼi ka ghuighuir kwa kufa va diɓa, njasa niy gəzə Kwa sləkəpə va.
39 Nahuti kumaa tərmbəə dzəkən mazə Akabiy, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na gwanashi, lə dzəkən ghyi tsaa niy ngati na va, mbaʼ ghaslanti lə sliʼi ciwə, mbaʼ dzəkən məlməhi lati na gwanashi. 40 Sa mətiy mazə Akab ki na, mbaʼ zəghu ci Akaziyas mbərəhu məni mazə kwa pi tsa ci
Zhuzafat məni mazə dzəkən ka Zhuda
(NəMezh 2 Veh 20.31–21.1)
41 Tə piyaa niy məni Akab kwa faɗa piya ci mbə mazə dzəkən ka Izərayeliy, mbaʼ məndi pəərəti Zhuzafat zəghu Aza ka mazə tsaa sləkə ka Zhuda. 42 Piya mahəkanəmətsəkə cifəti niy nza sa ci ghalaɓa. Piya bakəmətsəkə cifəti niy mənti na mbə məni mazə, mbə məlmə Zheruzalem niy nza na lə nziy tsa ci. Azuva, kə məndi kaa slən tsa mbəghiy, zha Shilhi niy nza na. 43 Njasa niy məni diy Aza vay, tsəgha niy məni na kuma. Niy zhəghəvə məni nahuti kuma naw. Kuma tiɗiɗə na niy məni na kwa kuma Kwa Sləkəpə. 44 Ə na na nza nay, war ghulashi niy nza pihiy niy gugumati məndi va ta ta hiyalahi dzar ti shi. War ghulashi niy nza mbəzli mbə vəli shiy kaa Hiyala, ka ndanta shiy zən nja ʼurdi dzar ti shi. 45 Sayi niy nziyiy mazə Zhuzafat lə mazə ka Izərayel.
46 Nahuti kumaa tərmbəə dzəkən mazə Zhuzafatiy, kwa zliya: “Kuma nənəhu mezhizhi ka Zhuda” tsaslaghwa məndi. Kwa zliya va tsasliti məndi kumaa dzəkən zal tsa mənəhu na, lə mbəzəhi mbəzəhu na ghənghən ghənghən ni. 47 Kwa tərmbə mbəzliy niy məni ghuirghuir va kaa hiyalahi ghala vəghu tsaa niy məni diy va maziy, ghəci niy kərni naa tahantishi tə hiɗi ci. 48 Ghala vəghu tsa va diɓay, niy pəərəti mazə məndi ta sləkə mbəzli tə hiɗi ka Edumuw. [Nguməna na saa niy tivə mazə ka Zhuda ta nighə ghəciy dzəkən hiɗi va]. 49 A zhuzafat niy daŋuti kwambəwalhi dikə dikə ni, ta maɗi mbə məlmə Tarsis ta dzaa dzəti hiɗi Ufir ta dza ta ɓə mbəzə kwa shamshama, mbaʼ kwambəwalhi va niy wəwəreɗishi mbə məlmə Eshiyuŋ-gever. 50 «Jakay ka sləni ghum ghum a ghəshi dza ta dza va kwa kwambəwalhi kutiŋ ni» kə Akaziyas zəghu Akab niy ni kaa Zhuzafat na, kala zləɓa ma ghəci. 51 Ma sa mətiy Zhuzafat ki na, mbaʼ məndi lanti kwa kuli kutiŋ na lə jijihiy, mbə məlmə mazə Davitə. Dza zəghu ci Yuram, mbaʼ mbərəhu məni mazə kwa pi tsa ci.
Akaziyas məni mazə dzəkən ka Izərayel
52 Tə piyaa niy məni Zhuzafat kwa məŋ lə mbərfaŋa piya ci mbə mazə dzəkən ka Zhuday, mbaʼ məndi pəərəti Akaziyas zəghu Akabə ka mazə tsaa sləkə ka Izərayel. Mbə məlmə Samari niy nza na lə nziy tsa ci. Piya bakə niy mənti na mbə sləkə ka Izərayel. 53 Kuma gəmgəm na niy məni na kwa kuma Kwa sləkəpə. Njasa niy məni kar diy va lə mbəghiy shiyiy, tsəgha niy mənishi na. Zhini ka məni shiy nja Zherubuwam zəghu Nebat va niy fambə ka Izərayel dzəmbə məni kuma jikir na. 54 Mbə tsəfəku niy nza na kwa kuma hiyalahi baal, mbaʼ niy məniy ka ndə nuwshi. Mbə məni shiva tsəgha ki na, Mbaʼ ɓanakati nəfə tsa Kwa sləkəpə, Hiyala ka Izərayel, njasa niy ɓanakati diy va.