1 Mazə 21

Zhezabel paslanti Nabut ta ɓə za ci kaa zata Akab

Liy hum shi va kiy, avanata kumaa mənita: A tsahuti ndə niy nza tiɓa mbə məlmə Zhizərel, Nabut kə məndi kaa slən tsa ci, mbaʼ za fəhi ka məndiy ta tay tə ya shi niy nza və mbə məlmə va. Za vay, vəgha ghyi tsa Akab mazə ka Samari niy nza na. 2 Ma kə Akab kaa Nabut tə nahuti vici na: «Ndara za gha va ta za eree ti njana nza na ta hum ghyi tsee ghənzə, nzee ndaŋa naa gura za dzəghwa pi tsa nzə. Kala ɗi za pə gha tiy, mbaʼee pahu tə gəna njasa dza naa təɓə,» kə. 3 Ma kə Nabut kaa ngəci na: «Ndara kwal Kwa sləkəpə ta ndaŋa vəhə tsa zəməvee ghyi ti va jijihiraw,» kə.

4 Dza mazə Akab ka dzay jighi lə nəfə lə nəfə, lə zhi kwa hur ci va kuma zləɓanakə Nabut ndə ka Zhizərel va, sa nə na va: «Ndara kwal Kwa sləkəpə ta ndaŋa vəhə tsa zəməvee ghyi ti va jijihiraw,» kə. Sa tsəhiy na kiy ghyi na, timə həniy tə pi həni tsa ci, tərəɗə kuma ci mbə baŋwa. Kala ɗi ma zəmə shiy ghəci. 5 Dza mali ci Zhezabel mbaʼ dzaa kəsay. A shiy ɓakatəŋa nəfə tsa gha ɗi ma gha zəmə shiy shəkaa mazə?» kə. 6 Ma kə kaa ngəta na: «Zlatavəra za fəhi gha va ka məndi ta tay tə ya shi ee pahu, kala tsəghay, mbaʼee ndaŋa nahuti zaa dzəghwa səɗa nzə pən kaa Nabut ka Izərel na, “Ka ndaŋa za fəhee yaw” kə kaa ngəra,» kə kaa mali ci va. 7 Ma kə Zhezabel kaa ngəci na: «Əə kama na gha məni mazə dzəkən ka Izərayel na? Ə pə ghaa sati gha zəmə shiy, ka vəshi. Yəniy, ta ndaŋa za Nabut ndə ka Izərel va dzee,» kə.

8 Dza mali va mbaʼ tsasliti zliyahi lə slən tsa Akab mbaʼ ʼyaslati jaʼwa ci ti shi. Dza na mbaʼ vəlanaghəshi zliyahi va kaa mbəzli dikə dikə ni lə kaa ka sla nguvə mbə məlmə nza Nabut va. 9 Avanata kumaa niy tsaslaghwa na kwa zliyahi va: «Ɓasətim mbəzli ta məni sumay, nza ghuy fiy Nabut ka ntsa kwa kuma mbəzli mbə ɓasəva tsa va. 10 Ka ghuy dzay, mbaʼ ghuy fiy mbəzli gəmgəm ni bakə kwa kuma ci ta sla dzərvəə dzəkən. Ma kə ghəshi dzaa ni na: «A gha gəzəhu kuma bəzlaa dzəkən kar Hiyala ghəshi lə Mazə,» kə ghəshi dzaa ni kaa ngəci. Sa ka ghəshi gəzəkə tsəghay, nza ghuy kəsəkəvəri səvəri mbə məlmə nza ghuy pəʼuanti lə hərezli ka mbəri,» kə kaa kuma tsaslaghwa na kwa zliyahi va.

11 Dzəghwa zhər mbə məlmə Izərel, ghəshi lə mbəzli dikə dikə ni, mbaʼ ka sla nguvə mbə məlmə va mbaʼ ghəshi mənti war njasaa niy gəzanshi Zhezabel va kwa zliyahi nzə va. 12 Dza ghəshi mbaʼ ghəshi ɓasəti mbəzli ta məni sumay, mbaʼ ghəshi fiy Nabut ka ntsa kwa kuma mbəzli mbə ɓasəva tsa va. 13 Dzəghwa mbəzli gəmgəm ni bakə, mbaʼ ghəshi səəkəə nziyshi kwa kuma ci. Dza ghəshi ka təɓanci fəti kwa kuma mbəzli gwanashi. Ma kə ghəshi na: «A Nabut gəzəhu kuma bəzlaa dzəkən kar Hiyala ghəshi lə mazə,» kə ghəshi.

Sa gəzəkə ghəshi tsəgha ki na, mbaʼ məndi kəsəkəvəri mbə məlmə, ka pəʼu lə hərezli, mbaʼ məndi paslanti. 14 Dza ghəshi ki, mbaʼ ghəshi ghunəghə ndə kaa Zhezabel, ma kə dzaa ni kaa ngəta na: «A məndi pəʼuanti Nabut lə herezli ka mbəri» kə dzaa ni. 15 Sa dza ntsa vaa gəzanta kuma va kaa Zhezabel ki, ma kə kaa mazə Akabə na: «Mbala ɓə za Nabut ndə ka Zhizərel va niy zləɓa ma na ɗəlŋa. Sa nza nay aa mətiy» kə. 16 Sa gəzanakə na tsəgha ki na, mbaʼ Akab kafiy tsəhiy tə za Nabut ndə ka Zhizərel, mbaʼ ɓəhu ka sa ci.

Hiyala ghunay Eli ndə gəzə kuma Hiyala kaa mazə Akab

17 Liy hum ki, ma kə Kwa sləkəpə kaa Eli ndə gəzə kuma Hiyala, ndə ka Tishəbe na: 18 «Kafə a gha dzaa kəsay Akab mazə ka Izərayel, mbə məlmə Samari na lə ghyi tsa ci. Sanay, dzar mbə za fəhi Nabut va ka məndiy ta tay tə ya shi na. Ta ɓə za va ka sa ci tsəhiy na. 19 A pə gha kaa ngəciy: Avanta kuma gəzəkə Kwa sləkəpə: “Sa paslanti gha ndə, na ɗi gha ɓə vəhə tsa ci nana ɓay? Sənay tə gha: Dzəghwa tə pi tsa dərni kəreketi va miymiy Nabutiy, tiɓa dza ghəshi ta dərni ni gha miymiy kuraku” kə Kwa sləkəpə, pə gha kaa ngəci,» kə Kwa sləkəpə kaa Eli. 20 Dza Eli mbaʼ dzaa gəziy kuma va tsəgha. Ma kə Akab kaa ngəci na: «A gha hakəra ghən tsa gha ɓay ndə ghəra tsee,» kə. «Yə ee hakaa ghən tsee. Njana nza na mbaʼ gha ɓanavə ghən tsa gha kaa məni kuma jikir na kwa kuma Kwa sləkəpiy, 21 avanta kuma gəzəŋa na: “Ta ɓəkə ngəraʼu dzee dzəkən gha. Ta zanti mbəzli kwa miy dəgha gha dzee. Slən zal tsa nə məndi manəŋa na, kə məndi tə hiɗi ka Izərayel, ya mbə mevivi ghuy nay, Kərəp dzee ta zantishi. 22 Njasa məntee va lə mbəzli kwa miy dəgha Zherubuwam zəghu Nevatə, mbaʼ mbəzli kwa miy dəgha Basha zəghu Ahiyay, tsəgha dzee ta mənti lə mbəzli kwa miy dəgha gha. Sa nza nay a gha ɓakatəra nəfə tsee, mbaʼ gha fambə ka Izərayel mbə məni kuma jikir na,” kə Kwa sləkəpə. 23 A Kwa sləkəpə gəzəkə kumaa dzəkən Zhezabel ya ghənzə kuraku, ma kiy: “Dzar ta kələm tsaa dəzlay məlmə Zhizərel va dza kəreketi ta pərə mbəri tsa Zhezabel” kə. 24 Ma kə diɓay: “Ya wa ntsaa səvəri kwa miy dəgha gha dzaa məti mbə məlmiy, kireketi dza na ta pərə mbəri tsa ci, tsaa dzaa məti tə gambay, zliŋiŋ dza na ta tsəŋu tsava,” kə Kwa sləkəpə,» kə Eli, ndə gəzə kuma Hiyala.

25 Ta na navay, səəkə məndiy nay ntsaa ɓanavə ghən tsa ci kaa məni kuma jikir na kwa kuma Kwa sləkəpə njasa ɓanavə mazə Akab vaw. Mali ci Zhezabel niy ngəɗi naa dzəmbə məni kuma va tsəgha. 26 Dalalay niy dzay naa dzəmbə məni kuma jikir na, ka tsəfəku kwa kuma nihuti hiyalahi, nja ka Amurəə niy tahanti Kwa sləkəpə va tə hiɗi va, ta ɓanshi kaa ka Izərayel.

Akab tsa titihu kwa kuma Kwa sləkəpə

27 Ma sa favə mazə Akab kuma va ki na, kuyahə kuyahə slakwanti kubeŋer kən ghən ci, mbaʼ pakən bihuihui kən ghən ci ta ci tsa titihu tsa ci, kala kama nihuti shiy mbəɓa mbəɓa ci. Dza na ka məni sumay. Hi na lə shi va kən ghən ci, war sahə sahə niy dza na. 28 Ma kə Kwa sləkəpə kaa Eli ndə Tishəbe ki na: 29 «Ava ghaa nay Akab njasa mənti na ghən tsa ci kwa tsa ci kwal kwa kumee. Njana nza na tsəgha ghəci məntiy, ka dzee ɓə ngəraʼu dzəkən mbəzli kwa miy dəgha ci ghəci mbə mazuw. Sa ka zəghu ci mbərəhu mazə dzee ta ɓə ngəraʼu tsa vaa səəkə,» kə.