1 Mazə 20

Mazə ka Shiriy pəla miy tə mazə Akab

Dzəghwa Ben-Hadad mazə ka Shiri mbaʼ ɓasəti ka sawji ci gwanashi ta dza ta zləghu məlmə Samari. Dza na mbaʼ cəʼuvə mezhizhi mahəkanəmətsəkə bakəti ta kəəti lə ni shi ka sawji, mbaʼ gədewesli, mbaʼ mutiti gədewesli. Dza ghəshi mbaʼ ghəshi pəslishi ta mbəzli mbə məlmə Samari ki. 2 Dza Bən-Hadad mazə ka Shiri mbaʼ ghunashi mbəzli va Akab mazə ka Izərayel. 3 Ma kə kaa ngəshi na: «Ben-Hadad mazə ka Shiri ghunaŋiy na: “Əə ɗee gha ndara gəna gha lə tsahi mbəzə kwa shamshama gha, mbaʼ miʼi gha lə ndərazhiy guraa təɓə mbə ndərazhi gha,” kə, pə ghuy kaa Akab mazə ka Izərayel,» kə kaa ngəshi. 4 Mbaʼ mbəzli va dzaa gəziy kuma va tsəgha. Ma kə mazə ka Izərayel kaa kuma zləɓa na na: «“Ta mənti dzee njasa gəzəkə gha va. Avee ndaŋa ghən tsee lə shi viya gwanashi” kə, pə ghuy kaa mazə,» kə. 5 Zhini Ben-Hadad mbaʼ ghunashi mbəzli va Akab. Ma kə kaa ngəshi na: «A pə ghuy kaa Akabiy: Ee niy ghunashi mbəzli va gha mbaʼ ghəshi gəzaŋa: “Gəna gha lə tsahi mbəzə kwa shamshama gha, mba miʼi gha lə ndərazhi gha ɗee gha ndarashi, pə ghuy kaa Akab,” pən niy ni kaa ngəshi. 6 Həzlimə geʼi lə vəghu tsa kiy, ta ghunəghə ka slənee dzee va gha ta pəla pi tsa kiy ghyi tsa gha, lə pi tsa dzar kiy ghyeghyer ka sləni gha. Slən shi nza dimə ti shi kwa mətsə ghay, ta ɓasəhushi dza ghəshi, kə Ben-Hadad, pə ghuy kaa Akab,» kə kaa ngəshi.

7 Dza mazə ka Izərayel mbaʼ ɓasəti mbəzli dikə dikə ni tə hiɗi ci. Ma kə kaa ngəshi na: «Avanay Ben-Hadad ghunikə mbəzli: “Əə ɗee ghaa ndara miʼi gha lə ndərazhi gha, mbaʼ gəna gha lə tsahi mbəzə kwa shamshama gha,” kə kaa ngəra, mbaʼee zləɓavə ɓanci shiva gwanashi. Ya ghuy nighə na kuma va sanay, jikir ghəci tarəkə lə ghummə sa?» kə. 8 Ma kə mbəzli dikə dikə ni va lə mbəzli gwanashi kaa ngəci na: «Entaa kuma ci va dzəghwa sləmə gha ma, ka zləɓa məni nava kuma gha ma» kə ghəshi. 9 Ma kə Akab kaa mbəzli ghunikə Bən-Hadad va ki na: «Mbalam gəzancim kaa mazə, ntsee dikə tsa: “Ya ə dzee zləɓavə məniŋa kwa taŋa kuma ghunashi gha va mbəzli tiy, ka zləɓavə na zhini gha naa ghunashi mbəzli ti yaw” kə Akab, pə ghuy kaa ngəci,» kə.

Dza mbəzli ghunikə məndi va mbaʼ ghəshi dza zhiniy kuma va. 10 Dza Ben-Hadad mbaʼ zhiniy ghunashi mbəzli kwa mahəkana səɗa. Ma kə kaa ngəshi na: «Ma pə ghuy kaa ngəciy: “Kərəp dzee ta ndanti məlmə Samari. Daw dza hiɗi mbəɓaa nza ta titivəshi ka sawjiy dzaa nza kwasəbee gwanashi dərəkə dərəkə mbə dəvə shi. Kala dza pən mənti tsəghay, nza hiyalahi ɓasakənɗa nguvəə gura jikir na,” kə Bən-Hadad, pə ghuy kaa ngəci,» kə. 11 Sa favə mazə ka Izərayel kuma va ki, ma kə kaa kuma zləɓa na na: «Mbalam gəzancim kaa Bən-Hadad: “Ka hanti waza gha, gha mbə pəhəva ta dza ta mbəzə, njasa nza na mbaʼ gha mbashi mbəzli dza gha ta mbəzə li shi ma” kə mazə ka Izərayel, pə ghuy kaa ngəci,» kə 12 Mbaʼ məndi səəkəə Zhananavə kuma va kaa Bən-Hadad ghəci mbə sa shiy mbə ceker gamtaʼwalhi ghəshi lə nihuti mezhizhi. War sa favə na kuma va ki na, dza na tiɓata mbaʼ gəzanshi kaa mbəzli dikə dikə ni mbə ka sawji a ghəshi pəhəva lə nihuti ka sawji ta dza ta mbəzə. Dza mbəzli va, mbaʼ ghəshi pəhantəvashi.

Mazə Akab mbashi ka Shiri mbə mbəzə

13 Geʼi lə vəghu tsa va ki na, mbaʼ ndə gəzə kuma Hiyala səəkəə kəsay Akab mazə ka Izərayel. Ma kə kaa ngəci na: «Avanta kuma gəzəkə Kwa sləkəpə: “Nashi ka sawji ɗaŋ ni va təruŋ ni gha sa? Ta fambəshi dzee mbə dəvə gha ndatsə, ta mbə ghaa sənay yən na Kwa sləkəpə, pə gha,” kə,» kə ndə gəzə kuma Hiyala tsa va. 14 Ma kə Akab kaa ngəci na: «Dza kwa tsama ndə dza na ta fambəshi mbə dəvə yaa?» kə. Ma kə ndə gəzə kuma Hiyala tsa va na: «Avanta kuma gəzəkə Kwa sləkəpə: “Dza kwa gula ka sawji təravə ngumənahi tə hiɗi gha va dzee ta fambəshi mbə dəvə gha,” kə,» kə ndə gəzə kuma Hiyala tsa va. Ma kə Akab diɓa na: «Tsama ndə dza naa gha pəsli ta mbəzəa?» kə. «Gha,» kə ndə gəzə kuma Hiyala tsa va kaa ngəci.

15 Sa gəzanakə ntsa va tsəgha ki na, dza Akab mbaʼ ɓasəti gula ka sawji təravə ngumənahi va. Bələku bələku bakə mbaʼ mahəkanəmətsəkə bakəti ghəci ɓəlatishi. Zhini na ka ɓəla niy tərmɓə ka sawji ka Izərayel gwanashi, bələku bələku mbərfəŋəmətsəkə ghəci ɓəlatishi. 16 Mbaʼ ghəshi kafəshi ta dza ta mbəzə vici kwa ghən ki. Ghalaɓay war ghulashi niy nza kar Ben-hadad dzar mbə ceker gamtaʼwalhi mbə sa shishi ghəshi lə mezhizh mahəkamətsəkə bakəti ni va niy cəʼuvə na ta kəəti ci, cəkeʼ ghəshi niy ghiyantəvashi. 17 Dzəghwa gula təravə ngumənahi va pərɓa ghəshi, mbaʼ ghəshi səvərishi ta pəsli ta mbəzə. Mbaʼ Bən-Hadad ghunashi ka sawji ta dza ghəshiy nighəti kumaa məniva. Mbaʼ mbəzli va səəkəə gəzanci: «Ka sawji səvərishi na mbə məlmə Samari,» kə məndi kaa ngəci. 18 Ma kə na: «Mbalam a ghuy dzaa kumay li shi. Ta zərkə kə ghəshi səəkiy, əntaa ghuy bəkushi ma, pəməkəvəshi tə ghuy. Ya ta mbəzə səəkə ghəshiy, əntaa ghuy bəkushi ma ə pə ghuy dzaa kəsəkəvəshi,» kə.

19 Ghalaɓa kiy, a gula ka sawji va səvərishi mbə məlmə ghəshi lə ka sawji kwasəbəshi va na shi ki. 20 Mbaʼ ghəshi kuməshi lə ka sawji ka Shiri, ya wa ndə mbə shi na, mbaʼ pəəsliy ndə kutiŋ mbə ka sawji ka Shiri. Mbaʼ ka sawji ka Shiri məshi mbə bali ki, ka tihəshi ka Izərayel. Mbaʼ Bən-Hadad mazə ka Shiri huy mə gəduy ghəshi lə nihuti ka sawji mə gədewesli. 21 Dzəghwa mazə ka Izərayel ki mbaʼ səvəriy lə ni gwanashi ni ka sawji ci, mbaʼ ghəshi bakwanti gədewesli ka Shiri, baʼu baʼu ghəshi baʼuanti mutiti gədewesli shi. Mbaʼ ghəshi mbashi ka Shiri dalala tsəgha ki. 22 Zhini ndə gəzə kuma Hiyala tsa va mbaʼ səəkəə kəsay mazə ka Izərayel ki. Ma kə kaa ngəci na: «Hazhi tsətsiy, ta səəkə dza Bən-hadad mazə ka Shiri ta pəsli tə gha, va tsəgha kiy, əntaa her gha dza ma, zəzəvə tə gha kuma dza gha ta məni wəzə wəzə,» kə.

Mazə Akab zhiniy mbashi ka Shiri mbə mbəzə

23 Dza mbəzli dikə ni ghəranci sləni kaa mazə ka Shiri mbaʼ ghəshi səəkəə gəzanci kuma. Ma kə ghəshi kaa ngəci na: «Hiyala ka Izərayeliy, Hiyala dzar mbə dəlagwahi na, va tsəgha niy mbammə ghəshi sa niy mbəzə ghumə li shi dzar mbə dəlagwahi. Nanay tə ngula pə ghumməə dza ta mbəzə li shi, Ya njaaɓay, ta mbashi dza ghummə ghalaɓa. 24 A pə gha məntiy: Zlashi mezhizhi kwasəbə gha va gwanashi, mbaʼ gha ɓəvə ngumənahi kwa pi tsa shi. 25 Ka gha dzay mbaʼ gha təravə ka sawji ɗaŋəɓa ghəshi kaa ni bakwanti məndi va. Tsəgha gədewesli lə mutiti gədewesli, ɗaŋəɓa ghəshi kaa ni kwataŋa va diɓa, nza ghummə dza ta mbəzə lə ka Izərayel tə ngula. Ya njaaɓay ta mbashi dza ghummə ghalaɓa,» kə ghəshi. Mbaʼ Ben-Hadad zləɓavə məni njasa gəzanakə ghəshi va.

26 Ma gəʼi lə vəghu tsa mbəradzə va ki na, dza Ben-Hadad mbaʼ ɓəlati ka sawji ka Shiri, mbaʼ dzay dzəmbə məlmə Afek ta pəsli ta mbəzə lə ka Izərayel. 27 Dzəghwa Akab kuraku mbaʼ mbərati ka sawji ka Izərayel, mbaʼ ɓanavəshi shi zəmə. Kaf ghəshi kafəshi ta dza ta kumə lə ka sawji ka Shiri. Sa dza ghəshiy, mbaʼ ghəshi ɓasəshi tə pi bakə kwa kuma ka Shiri. Nja ləngum kuy ju ju bakə niy pəəzli ghəshi na na shi. Ma ka Shiriy, niy pəəzli pi tsa tə ngula va və shiw. 28 Zhini ndə gəzə kuma Hiyala tsa va mbaʼ zhikəə kəsay mazə ka Izərayel diɓa. Ma kə kaa ngəci na: «Avanta kuma gəzəkə Kwa sləkəpə: “Njana nə ka Shiri: Hiyala dzar mbə dəlagwahi nzee yən Kwa sləkəpə. Hiyala tə ngula nzeyew, kə ghəshiy, ta fambə ka sawji shi ni ɗaŋ ni təruŋ ni dzee mbə dəvə gha. Ghalaɓay, ta sənay dza ghuy yən na kwa sləkəpə, pə ghuy,” kə,» kə ndə kwal Hiyala tsa va. 29 Vici mbərfəŋ niy mənti ka sawji va war ɓasə ɓasə ta dzəghwa mbəzə nihuti ghəshi lə nihuti. Ma tə kwa mbərfaŋa vici ki na, mbaʼ mbəzə ghay. Dzəghwa ka Izərayel mbaʼ ghəshi mbashi ka Shiri, bələku bələku bələku məŋ ghəshi bəkuvə ka sawji ka dza lə səɗa mbə shi mbə vici kutiŋ. 30 Bələku bələku məŋ bakəmətsəkə mbərfəŋti niy tərə ni tə ghuməshi ni, Sa hushi ni vaa dzəmbə məlmə Afec na, mbaʼ kələm tsaa dəzlay məlmə va ngazlakənvay dzəkən shi, mbaʼ ghəshi bəkushi.

Mazə Akab zlay mazə ka Shiri kala pəəsli ma

Ma Ben-Hadad na ci ki na, mbaʼ huy dzəmbə məlmə, mbaʼ dzaa mbiy mbə tsahuti ciki tsaa gura mbəmbə tsa mbə tsahuti ciki. 31 Ma kə ka sləni ci kaa ngəci na: «Kar ghiy favə, wəzə na hur tsa mezher ka Izərayel, kə məndi. Zlaŋiy a ghiy pəhəti bihuhui titi ghiy ta ci ciciku tsa ghiy, mbaʼ ghiy pərəti zhiʼuiʼui dzar ta wəri ghiy nja mbəzli kwa fərshina, nza ghiy dzaa kəsay mazə ka Izərayel tsəgha, nda nza naa zlaŋa tə ghuməŋa,» kə ghəshi. «Tsəgha na,» kə Ben-Hadad. 32 Dza ghəshi ki, mbaʼ ghəshi pakən bihuhui, mbaʼ ghəshi pəpəərəti zhiʼuiʼui dzar ta wərihi shi, mbaʼ ghəshi dzaa kəsay mazə ka Izərayel. Ma kə ghəshi kaa ngəci na: «Əə ghunaŋiy Ben-Hadad mava tsa gha ta cəʼuŋa a gha zlay pəəsli ci,» kə ghəshi. «Ghulay tə ghumiy na? Ntsee na,» kə.

33 Sa zləɓanakəshi na kuma va tsəgha kaa mbəzli ghunashi Ben-Hadad va na, mbaʼ ghəshi nata nja dza kwa wəzə ghənzə. Ma kə ghəshi lə diva kuraku ki na: «Ntsa gha na Ben-hadad na nava» kə ghəshi. «Ntsee na, mbalam pəməkəm,» kə. Mbaʼ ghəshi dzaa pəməkə. Sa səəkiy Ben-Hadad dzəghwa kuma ci ki na, mbaʼ Akab haramə mə muwta gəduw ci. 34 Ma kə Ben-Hadad kaa Akab ki na: «Məlməhiy niy zləghuhu dirə va va dəŋay ta zhanavəŋashi dzee, nza gha mənti pi tsa mbə məlmə Damas ka pi zhəghə dəvə tsa gha njasa niy mənti dirə va mbə məlmə Samari,» kə. «Yən kurakuy, ta slati kiri dzee lə gha, mbaʼee pəlaŋaa dzaŋa kala məniŋama kuma,» kə Akab. Liy hum sa slati ghəshi kiri ki na, mbaʼ Akab pəlay Ben-Hadad dzay kala mananci ma kuma.

Kwa sləkəpə ghunay ndə gəzə kuma nzə ta ɓanci fəti Kaa mazə Akab

35 Geʼi lə vəghu tsa va ki na, dza tsahuti kutiŋ mbə ka gəzə kuma Hiyala kwa zərə kutiŋ na, ka gəzə kaa tsahuti mbə shi, sa gəzanci Kwa sləkəpə: «Dəʼura,» kə. Kala zləɓa dəʼu ci tsahuti tsa va. 36 Ma kə ndə gəzə kuma Hiyala tsa va kaa tsaa zləɓa ma dəʼu va na: «Njana nza na kala zləɓa məni kuma gəzəkə Kwa sləkəpə ghay, sa ka gha dzaŋa vəgha yay, ta paslantəŋa dza zhəl» kə kaa ngəci. Dza ntsa va ka dzay. Ma ghəci mbə kwal na, mbaʼ kumay lə zhəl, mbaʼ zhəl tsa va paslanti.

37 Zhini ndə gəzə kuma Hiyala tsa va mbaʼ zhaa kəsay tsahuti ndə: «Dəʼura,» kə kaa ngəci. Dza tsava ndə mbaʼ ləkanti war zhi. 38 Dza ndə gəzə kuma Hiyala tsa va ki mbaʼ dəpay kuma ci lə kəjer kala gar sənay məndi, mbaʼ dzaa nziyiy kwa kwal tsa dza mazə Akab ta dza. 39 Ma sa tsəhiy mazə tə pi tsa va ki na, dza Ndə gəzə kuma Hiyala tsa va ka zlapanci kuma. Ma kə kaa ngəci na: «A mazə tsee, Sa səvəriɗee ta mbəzə kwasəɓə ka sawjiy, mbaʼ tsahuti ndə sawji kəsəvə mava, mbaʼ səvəriy mbə ka mbəzə, mbaʼ kəsara li. Ma kə kaa ngəra na: “Ndəghura ntsa, mbaʼ pə gha zlay dzayiy, ta pəəslitəŋa dzee kwa pi tsa ci, kala tsəghay, mbaʼ gha watəra gəna kiluw mahəkanəmətsəkə” kə kaa ngəra. 40 Ma sa kəslimbee ghən mbə məməni nahuti kuma ghənghən ghənghən ki na, mbaʼ mava tsa va ghəlantəvay,» kə ndə Kwal Hiyala tsa va kaa mazə Akab. Ma kə mazə kaa ngəci na: «Tsəgha təɓə na məndiy slakənŋa nguvə, njasa gəzəkə gha va dəʼu ghən tsa gha,» kə. 41 War sa gəzəkə mazə tsəgha ki na, dza ndə gəzə kuma Hiyala tsa va nzaʼ ju ɓanti shiy niy mbəliy na va pi tsa mbə kuma ci li shi. Mbaʼ mazə nay pi tsa mbə kuma ci, kahə sənay, ntsa kwa zərə ka gəzə kuma Hiyala na, kə. 42 Ma kə ndə gəzə kuma Hiyala tsa va kaa ngəci ki na: «Avanta kuma gəzəkə Kwa sləkəpə: “Njana nza na mbaʼ gha pəlay ntsaa niy nə ya, paslanti tə məndi ta fə shəndəkə dzətee, pəniy, gha dza na ta məti kwa pi tsa ci, zhini ka bəku mbəzli tə hiɗi gha kwa pi tsa mbəzli tə hiɗi ci” kə Kwa sləkəpə,» kə ndə gəzə kuma Hiyala tsa va kaa ngəci. 43 Sa gəzanakə ntsa va kuma va tsəgha ki na, dza Akab mazə ka Izərayel ka dzay dzəmbə məlmə Samari, dzakə ghyi tsa ci lə nəfə lə nəfə, war ə her ciy dza.