Eli huy dzəmə dəlagwa Hurebə
19
Sa tsəhiy mazə Akab kiy ghyi ki na, mbaʼ slanakə kuma mənti Eli va gwanata kaa mali ci Zhezabel, mbaʼ gəzanakə njasa bakwanti na ka gəzə kuma hiyala Baal va gwanashi lə hwa. 2 Sa favə Zhezabel kuma va ki na, mbaʼ ghunay ndə ta dza ghəci gəzanci kuma kaa Eli: «Həzlimə geʼi lə vici tsətsə, kala dza pən mənti lə gha njasa mənti gha va lə ka gəzə kuma hiyala vay, nza hiyalahi ɓasakənɗa nguvəə guranti caslakə, kə Zhezabəl, pə gha kaa ngəci» kə kaa ntsa va. 3 Sa dza məndiy gəzanci tsəgha kaa Eli na, mbaʼ her ci dzashi, dza na ka huy, ta mbəliy va məti, ghəshi lə ndə sləni tsa ci. Nishə tsəhiy mbə məlmə Ber-Sheva tə hiɗi ka Zhuda, mbaʼ zlay ndə sləni tsa ci va tiɓa. 4 Na na ci ki na, mbaʼ kafiy tiɓa ka dzay, vəghwanti na mbə dza, sa tsəhiy na mbə gamba na, mbaʼ dzaa nziyiy ta fə jiwu. Tapə miy mbə ɗuw məti tiɓa, ma kə na: «Nanay wakə na kuma va kənee tsəgha Kwa sləkəpə. Ə pə gha ɓəhu piy tsee, pərɓa yən na kaa jijihiraw,» kə. 5 Dza na ki timə həniy, fəriŋ ɓanti hi ta fə juw na va. Ghəci tə hi ki na, mbaʼ ndə kwal Hiyala səəkəə kufaghay, ma kə kaa ngəci na: «Sati a gha zəmə shi zəmə,» kə. 6 Nighə kə kaa pi tsa tə ghən ci na, mbaʼ nay kwasay tsa ka məndi vaa ta lə ghuu nza mbə hərezli, sa ka məndiy pəsatishi, mbaʼ ghulpə lə yam kwa. Dza na mbaʼ zəməhu shi va, mbaʼ sahu yam, zhini na timə həniy. 7 Zhəghwa ndə kwal Hiyala tsa va mbaʼ zhikəə kufaghay. Ma kə kaa ngəci na: «Sati a gha zəmə shi zəmə, sa nza nay, ta dza dza gha kərakə,» kə. 8 Dza Eli ki, mbaʼ satiy, zəməʼ zəməhu shiy, saʼ kaa yam. Dza shi zəməhu na va mbaʼ ghəshi ɓanavə bərci, vici faɗəmətsəkə, mbaʼ virɗi faɗəmətsəkə ghəci mənti mbə dza, mbaʼ tsəhiy mə dəlagwa Hiyala va har məndiy Hurebə.Hiyala canati ghən tsa kaa Eli mə dəlagwa Hurebə
9 Dza Eli mbaʼ dzay dzəmbə ləgu məɓa, hi na mbə ləgu va. Ma kə Kwa sləkəpə kaa ngəci ki na: «A shi məni gha tikə shəkaa Eli?» kə. 10 Ma kə Eli na: «Lə nəfə tsee gwanay ɗitee kuma gha Hiyala Kwa sləkəpəə sləkə shiy gwaʼ gwaʼa. Sa dza ka Izərayel nashi kiy, mbaʼ ghəshi sawavəri sla kiri tsa slati gha li shi, mbaʼ ghəshi babaʼwanti pəhiy niy ngangati məndi ta vəliŋa shiy, mbaʼ ghəshi bakwanti ka gəzə kuma gha lə huahi. Yən kutira təra na. Pəəslira na sa ɗi ghəshi sana,» kə. 11 Ma kə Kwa sləkəpə kaa ngəci na: «Səvəri a gha dzaa garəŋa mə dəlagwa na kwa kumee, ta dzar dzee,» kə. War Kwa sləkəpə ghula ta səəkə tsəgha ki na, mbaʼ safə ghati viy lə bərci təruŋ, paʼa ka ngazlava dəlagwahi, ka wəreɗiva hərezli kwa kuma nzə. Ya tsəgha nziy, niy nza Kwa sləkəpə mbə safə tsa vaw. liy hum safə ki na, war ə hiɗiy gərgərə, ya tsəgha nzə diɓa na, niy tsahuta Kwa sləkəpə mbə gərgərə hiɗi vaw. 12 Liy hum sa gərgərəshi hiɗi ki na, mbaʼ ghu təzlita, ya mbə ghu vay, niy tsahuta kwa sləkəpuw. Liy hum ghu ki na, mbaʼ gaka məli səəkəta ɗekəɗekəɗekə pi tsa kwasəbə. 13 Ma sa favə Eli gaka məli va ki na, mbaʼ mbəkway kuma ci lə kubaŋ tsa ci, mbaʼ səvəriy mbə ləgu vaa nziyiy kwa miy pi tsaa dzəmbə. Ma kə məli kaa ngəci ki na: «A shi məni gha tikə shəkaa Eli?» kə. 14 Ma kə Eli na: «Lə nəfə tsee gwanay ɗitee kuma gha Hiyala Kwa sləkəpəə sləkə shiy gwaʼ gwaʼa. Sa dza ka Izərayel nashi kiy, mbaʼ ghəshi sawavəri sla kiri tsa slati gha li shi, mbaʼ ghəshi babaʼwanti pəhiy niy ngangati məndi ta vəliŋa shiy, mbaʼ ghəshi bakwanti ka gəzə kuma gha lə huahi. Yən kutira təra na. Pəəslira na sa ɗi ghəshi sana,» kə. 15 Ma kə Kwa sləkəpə kaa ngəci na: «Kafə a gha zhəghəvaa zhəti kwal dzar mbə gamba, sa ka gha dzay, mbaʼ gha dzaŋaa dzəmbə məlmə Damasə, Sa ka gha tsəhəŋay, nza gha dzaa shəkambə in dzəghwa mbə ghən Hazayel ta nza ghəci ka mazə tsaa sləkə hiɗi Shiri. 16 Ka gha dza diɓay, mbaʼ gha dzaa shəkambə in dzəghwa mbə ghən Zhehu zəghu Nimshi ta nza ghəci ka mazə tsaa sləkə ka Izərayel. Ma liy hum ki na, nza gha dzaa shəkambə in dzəghwa mbə ghən Elize zəghu Shafat ndə ka Avel-Mehula, ta nza ghəci ka ndə gəzə kuma Hiyala kwa pi tsa gha. 17 Ta bəku mbəzli dza Hazayel, niy dzaa mbəlishi mbəzli viy, ta bakwantishi dza Zhehu. Niy dzaa mbəlishi mbəzli va Zhehu na, mbaʼ Elize bakwantishi. 18 Ya tsəgha nzə kiy, ta zlashi mbəzli bələku bələku bələku mbərfəŋ dzee tə ghuməshi mbə ka Izərayel: Slən ntsaa səəkə maa iyambə shini ci mbə hiɗi kwa kuma baal, kala səəkə ma ghəciy hutəməhu pa shi ka məndi vaa mənti ka hiyalay, ta zlay dzee tə ghumiy,» kə.
Eli haray Elizee ta sləni kwa pi tsa ci
19 Sa gəzanakə Kwa sləkəpə tsəgha ki na, mbaʼ Eli kafiy tiɓa, mbaʼ dzaa kəsay Elize zəghu Shafat ghəci mbə za lə slay. Ngur məŋ lə bakə niy nza na tə vəhə tsa va mbə za, bakə slay ta mbahə ngur kutiŋ, mbaʼ ghəci tə kwa məŋ lə baka ngur. Dzəghwa ki, mbaʼ Eli tsəhiy vəgha. Ghəci mbə dzar vəgha na, fiyikə ndəghanakən kubaŋ tsa ci. 20 Dza Elizee tsəgha ki, mbərəkə zlata za lə slay, mbaʼ dzaa kəsay Eli lə bali. Ma kə kaa ngəci na: «Ndara kwal ee dzaa gəzanshi nza ghuy nza kaa kar dirə lə mərə kee səəkə ta nuŋa,» kə. «Mbala nza gha səəkəŋa, a gha sənata kuma məntəŋee va ɓay,» kə Eli kaa ngəci. 21 Dza Elizee mbərəkə zlay Eli, mbaʼ zhəghətəvay zhiti za ci. Dza na, mbaʼ kəəsəvə slay ci va bakə ni, mbaʼ sləsliyshi kaa Kwa sləkəpə, mbaʼ pəsanti sliw tsa va lə shighu tə ngur slay tsa za na va li. Dza na mbaʼ ɓanavəshi sliw tsa va kaa mbəzliy niy nza tiɓa, mbaʼ ghəshi zəməhu. Liy hum ki na, mbaʼ dzay kwasəbə Eli ta nza ka ndə sləni tsa ci.