2 Mazə 1

Kwa baka zliya

Mezhizhi

Kwa sləkəpə ghunay Eli ta ɓanci fəti kaa mazə Akaziyas

Liy hum sa mətiy mazə Akab ki na, mbaʼ ka muwabə kafəshi ta pəla zləghu ghən tsa shi mbə dəvə ka Izərayel.

2 Tə nahuti viciy, dza mazə Akaziyas mbaʼ ɓəkə tərə səəkə mə gərka miy ciki tsa ci, tsaa niy ngati məndi mə ghən tsahuti, mbə məlmə Samari. Təruŋ ghəci niy məniy. Dza na mbaʼ ghunashi mbəzli va hiyala har məndi vaa Baal-Zebub. Ma kə kaa ngəshi na: «Mbalam a ghuy dzaa ɗutəra va Baal-Zebub hiyala ka Ekruŋ nda tə ghuməra dzee nza va zheher tə ya ni mbə tərə na,» kə. 3 Dzəghwa ndə kwal tsa Kwa sləkəpə, mbaʼ dzaa kəsay Eli ndə ka Tishəbe. Ma kə kaa ngəci na: «Mbala a gha dza ta kumə lə mbəzli ghunashi mazə ka Samari va. Ma pə gha dzaa ni kaa ngəshiy: “Aa kama Hiyala tə hiɗi ka Izərayel, dza ghuy ta ɗuw kuma va Baal-Zebub hiyala ka Ekruŋ na? 4 Va tsəgha ki, ma kə Kwa sləkəpə pə gha kaa ngəshiy: “Ka kafəŋa gha tə pi həni tsa nza gha vaw. Ta na navay, ta mətiŋa dza gha,” kə Kwa sləkəpə, pə gha kaa ngəshi,» kə.

Dza Eli ki mbaʼ kafiy, ka dzay ta gəzə kuma va. 5 Sa gəzanshi na na, tərəɗə mbəzli ghunashi mazə va zhəghətəvashi, mbaʼ ghəshi dzaa kəsay mazə. Ma kə mazə kaa ngəshi na: «A shiy mənishi zhəghətəvaŋuy ghuyaa?» kə. 6 Ma kə ghəshi na: «Tsahuti ndə səəkiy naa kumay lə ghiy: “Zhəghəvam a ghuy zhaa kəsay mazə tsaa ghunaŋuy va: Aa kama Hiyala tə hiɗi ka Izərayel ghuni gha mbəzli ta ɗuw kuma va Baal-Zebub hiyala ka Ekruŋ na? Va tsəgha kiy, ka kafəŋa gha tə pi həni tsa nza gha vaw. Ta na navay, ta mətiŋa dza gha, kə Kwa sləkəpə, pə ghuy kaa ngəci” kə kaa ngəŋiy,» kə ghəshi. 7 Ma kə mazə kaa ngəshi na: «Ndə njaay na ntsa səəkiy va ta kumə lə ghuy, mbaʼ gəzaŋuy kuma vaa?» kə. 8 Ma kə ghəshi na: «Kuɓaŋ ndə shiti na sa kən ghən ci, mbaʼ huta titi ci,» kə ghəshi. Ma kə mazə ki na: «Eli ndə ka Tishəbe na sava,» kə.

Mazə Akaziyas ghunashi mbəzli ta kəsə Eli

9 Dza mazə Akaziyas ki, mbaʼ ghunay dikə tsa ka sawji cifəmətsəkə lə ka sawji sləkə na va ta kəsə Eli. Kəram mbəzli va kafəshi ta dzəmə ta kəsay Eli mə hum pi tsaa niy nza na va. Tsəhə ghəshi na, Eli mənziy mə ghən hum pi tsa va. Ma kə dikə tsa ka sawji tsa va kaa ngəci na: «Ndə gəzə kuma Hiyala, səkwa kə mazə,» kə. 10 Ma kə Eli kaa ngəci na: «Ndə gəzə kuma Hiyala pəniy, ə kə ghu səkwata səəkə mə ghumə, mbaʼ ndantəŋuy lə mbəzli gha va cifəmətsəkə ni,» kə. War ghula na, mbaʼ ghu səkwata səəkə mə ghumə, bərkiɗ ndanti kar dikə tsa ka sawji tsa va lə ka sawji ci va cifəmətsəkə ni.

11 Dza mazə mbaʼ zhiniy ghunay tsahuti dikə tsa ka sawji cifəmətsəkə lə ka sawji cifəmətsəkə ni va sləkə na kwasəbə va Eli. Ma kə kaa Eli sa tsəhiy na na: «Ndə gəzə kuma Hiyala, səkwa kiyaŋu kiyaŋu, kə mazə,» kə. 12 Ma kə Eli kaa ngəci na: «Ndə gəzə kuma Hiyala pəniy, ə kə ghu səkwata səəkə mə ghumə mbaʼ ndantəŋuy lə mbəzli gha va cifəmətsəkə ni,» kə. War ghula na, mbaʼ ghu səkwata səəkə mə ghumə, bərkiɗ ndanti kar dikə tsa ka sawji tsa va lə ka sawji ci va cifəmətsəkə ni.

13 Dza mazə Akaziyas mbaʼ zhiniy ghunay dikə tsa ka sawji cifəmətsəkə, lə ka sawji sləkə na va cifəmətsəkə ni kwa mahəkana səɗa. Dza ghəshi ka dzəməə dzəmə hum pi tsa va. Sa tsəhəshi ghəshi na, dza tsava dikə tsa ka sawji gəlɓə gələɓiy tə shinin ci kwa kuma Eli, ka pəraʼwanci dəvə. Ma kə na: «Titihu ndə gəzə kuma Hiyala, aa cəʼuŋee, fati bamaa dzəti piy tsa ghiy a gha zlaŋiy tə ghuməŋiy, ghiy lə ka sləni gha ni, ka sawjee ni cifəmətsəkə ni. 14 Avanta ghu səkwata səəkə mə ghumə mbaʼ ndanti mbəzli dikə dikə ni va bakə ni sləkə ka sawji lə ka sawjihi ta səɗa shi gwanashi. Titihu aa cəʼuŋee fati bama tə piy tsa ghiy a gha zlaŋiy tə ghuməŋiy,» kə. 15 Ma kə ndə kwal tsa Kwa sləkəpə kaa Eli na: «Ka dza her gha və ma, ləghwa kwasəbə,» kə.

Dzəghwa Eli kafə, kafiy kwasəbə dikə tsa ka sawji tsa va, ka səkwa ta dza ta kəsay mazə. 16 Ma kə kaa mazə sa tsəhəshi ghəshi na: «Avanta kuma gəzəkə Kwa sləkəpə: “A gha ghunashi mbəzli ta ɗuw kuma va Baal-Zebub hiyala ka Ekruŋ njasa kama Hiyala ka Izərayel gar ɗuw kuma məndi və na gha ɓay? ndata tsəgha nay, ka kafəŋa gha tə pi həni tsa nza gha va ghulaw. Ta na navay, ta mətiŋa dza gha,” kə Kwa sləkəpə,» kə. 17 Liy hum ki na, mbaʼ Akaziyas mətiy njasa gəzəkə Kwa sləkəpə va lə miy tsa Eli. Sa niy kama zəghu və ki na, dza Yuram zəmbəghiy mbaʼ mbərəhu məni mazə kwa pi tsa ci. Ghalaɓay, kwa baka piya Zhuram, zəghu Zhuzafat niy nza na mbə məni mazə dzəkən ka Zhuwda.

18 Nahuti kumaa tərmbəə dzəkən mazə Akaziyasiy, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na diɓa.