2 Mazə 2

Hiyala ɓəhu Eliy dzəmə ghumə

Avanay njasa ɓəhu Kwa sləkəpə Eliy dzəmə ghumə mbə səpapəli: Tə nahuti viciy, mbaʼ kar Eli lə Elize kafəshi mbə məlmə Gilgal. 2 Ma kə Eli kaa Elize ghəshi mbə kwal na: «Yaŋ pə gha, nziyŋa tikə ee dzəmbə məlmə Betel, Kwa sləkəpə ghunara naa dzəmbə,» kə. Ma kə Elize na: «Ava Kwa sləkəpə tiɓa ka favə, ka favə gha diɓa, ka ɓarvee kwasəbə ghaw,» kə. Dza ghəshi ki, ka dzashiy dzəmbə məlmə Betel.

3 Ma ghəshi tə kwal na, mbaʼ ka gəzə kuma Hiyalaa nuva kwa zərə kutiŋ na mbə məlmə Betel səvərishiy kumay lə Elize. Ma kə ghəshi kaa ngəci na: «Sənay gha ta ɓəhuŋa ntsa gha dikə tsa dza Kwa sləkəpə dzəmə ghumə ndatsə pə gha na?» kə ghəshi. «Ya yəniy ee sənay, guŋəŋuy pə ghuy» kə Elize kaa ngəshi.

4 Liy hum ki, ma kə Eli kaa Elize diɓa na: «Elize, yaŋ pə gha, nziyŋa tikə, ee dzəmbə məlmə Zheriku, Kwa sləkəpə ghunara naa dzəmbə,» kə. Ma kə Elize na: «Ava Kwa sləkəpə tiɓa ka favə, ka favə gha diɓa, ka ɓarvee kwasəbə ghaw,» kə. Dza ghəshi ki, ka dzashiy dzəmbə məlmə Zheriku.

5 Sa tsəhəshi ghəshi na, dza ka gəzə kuma Hiyalaa nuva kwa zərə kutiŋ na mbə məlmə Zheriku, mbaʼ ghəshi səəkəə kəsay Elize. Ma kə ghəshi kaa ngəci na: «Sənay gha ta ɓəhuŋa ntsa gha dikə tsa dza Kwa sləkəpə dzəmə ghumə ndatsə pə gha na?» kə ghəshi. «Ya yəniy ee sənay, guŋəŋuy pə ghuy» kə Elize kaa ngəshi.

6 Liy hum diɓa, ma kə Eli kaa Elize na: «Elize, yaŋ pə gha, nziyŋa tikə, ee dzəghwa həl Zhurdeŋ, Kwa sləkəpə ghunara naa dzəghwa,» kə. Ma kə Elize na: «Ava Kwa sləkəpə tiɓa ka favə, ka favə gha diɓa, ka ɓarvee kwasəbə ghaw,» kə. Dza ghəshi ki, ka dzashi bakanashi. 7 A nihuti ka gəzə kuma Hiyala cifəmətsəkə niy nuvəshi. Sa tsəhəshi ghəshi na, mbaʼ ka gəzə kuma Hiyala cifəmətsəkə ni va garəshi vəri kərakə. Ma kar Eli lə Elize na, mbaʼ ghəshi garəshi miy həl Zhurdeŋ. 8 Dza Eli tsəgha ki, laŋ ɓəvə kubaŋ tsa ci mbaʼ pərəti, paw ləkatiy dzəti yam kwa həl Zhurdeŋ va. Mbaʼ yam va təhəvərivashi bakə mbə. Dza ghəshi bakanashi taŋ ghəshi taŋəshi dzəvəri tə həl tsa va dzar tə hiɗi, kala dapashi ma yam.

9 Ma kə Eli kaa Elize ghəshi mbə taŋə na: «Ɗuw shi ɗi gha yən məntəŋashi ka Kwa sləkəpə ɓəra vəgha gha,» kə. Ma kə Elize na: «Safə tsa gəzə gha va kuma Hiyala li ɗee ghəciy dzay dzəmbee ka taŋəti tsa mbə gha va bakə səɗa,» kə. 10 Ma kə Eli na: «kuma caslakə na sa ɗuw gha va. Mbaʼ pə gha dzaa nara ghala vəghu tsa dza Kwa sləkəpəə ɓəra vəgha ghay, ta kumavə shi ɗuw gha va dza gha, kala tsəghay, ka kumavə shi ghaw,» kə.

11 War ghəshi mbə dza, kala sla kuma ki na, vətəghə muwta gəduw kwa ghu lə gədewesli ka ghu səəkəə təhəvərishi. ka dzəmə Eliy dzay dzəmə ghumə mbə səpapəli. 12 War ə Elizee nighə ghəciy dzəməə dzay. Kə ka ngumə lala: «A di, a di, a gha niy taŋəti mutiti gədewesli ka Izərayel gwanashi lə ka sawji ka zlərə gədewesli ka Izərayel gwanashi,» kə. Liy hum ki na, kala nay ma ghəci. Dza na mbaʼ slikuvəri kubeŋer ci bakə mbə. 13 A kubaŋ tsaa niy nza tə bezlizli Eli niy təriy, dza Elize laŋ ɓəvə, mbaʼ zhəghəghəvay dzəmiy həl Zhurdeŋ, mbaʼ dzaa gariy miyɓa. 14 Dza na paw, ləkati kubaŋ tsa Eli vaa dzəti yam va. «Kuma na Kwa sləkəpə Hiyala Elia?» kə. Sa ləkati na kubaŋ tə yam njasa niy ləkati Eli va ki na, mbaʼ yam va təhəvərivashi, taŋ ghəci taŋiy kala dapay ma yam.

15 Mbaʼ ka gəzə kuma Hiyala mbə məlmə Zheriku va nata kuma mənti Elize va ghəshi pərikə pərikə ki. Ma kə ghəshi na: «Safə tsa Eli va gəzə na kuma Hiyala liy, mbə Elize na nana,» kə ghəshi. Dza ghəshi mbaʼ ghəshi səəkəshiy dzəghwa kuma ci, tsəfəku ghəshi tsəfəkushi paʼ mbə hiɗi. 16 Ma kə ghəshi kaa ngəci na: «Ghiy ka sləni ghay, a zhər ka bərci va ghiy cifəmətsəkə. Ɓanavəshi kwal a ghəshi dza ta pəla dikə tsa gha va. Sa ɓəhu safə tsa Kwa sləkəpə vay, sənay ghum nda ndəghiy na ya dzar mbə dəlagwa, ya dziy kwa teʼu piw,» kə ghəshi. «Ka ghunishi ghuy ma,» kə Elize kaa ngəshi. 17 Ya tsəgha nzə ki na, war ə ghəshiy mbaɗə Elizee. Ma kə kaa ngəshi fətəlghən ki na: «Ghunashim ghənzə tsəgha,» kə. Dza ghəshi mbaʼ ghəshi ghunashi mbəzli cifəmətsəkə ni va ta pəla Eli ki. Vici mahəkanə ghəshi mənti mbə pəla ci, kala nay ghəshi. 18 Mbə məlmə Zheriku niy nziyiy Elize na ci ki. Mbaʼ ghəshi səəkəə kəsay, ma kə kaa ngəshi na: «Niy gəzaŋuyee: ka dza ghuy ta pəla ma pən, war hwaʼ pə ghuy sa,» kə.

Elize zhəghanti yam gəmgəm ni ka yam wəzə ni

19 Dzəghwa nihuti mbəzli mbə məlmə Zheriku mbaʼ ghəshi səəkəə kəsay Elize. Ma kə ghəshi kaa ngəci na: «A ntsa ghiy dikə tsa, ya ghay, a gha nay wəzə na məlmə na ta nziy mbə. Ə na na nza yam tikə gəmgəmshi, kala məni ma shiy wəzə və shi tə hiɗi ni,» kə ghəshi kaa ngəci. 20 «Mbalam ɓəkəram ghuni kwa yəwun kwakwa,» kə Elize kaa ngəshi, mbaʼ ghəshi dzaa ɓanakə. 21 Dza Elize ki mbaʼ dzaa tsəhiy tə pi tsa nza mətsə yam mbə məlmə va, mbaʼ ndəghaghwa ghuni va kwa. «A kə Kwa sləkəpiy: “Avee zhəghanti yam va ka yam wəzə ni. Ka dza shiy piy bəku və shi ghulaw, ta məni dza shi tsaŋwambə məndi mbə hiɗi wəzə və shi nana” kə Kwa sləkəpə,» kə Elize. 22 Mbaʼ yam mbə məlmə va zhighəshi ka yam wəzə ni paʼa ndatsə, njasa gəzəkə Elize va.

Kwa sləkəpə ɓasanakənshi nguvə kaa ndərazhi, sa tsərə ghəshi Elize

23 Dza Elize ki, mbaʼ kafiy mbə məlmə Zheriku ta dzaa dzəmbə məlmə Betel. Ma ghəci mbə kwal na, dza ndərazhi mbaʼ ghəshi səvərishi mbə məlmə va ka tsərə: «Mbala sa kulaɗi kulaɗi ghən tsa tsa, mbala sa kulaɗi kulaɗi ghən tsa tsa,» kə ghəshi. 24 Dza na tərəɗə zhəghatavay dza kwa shi ka nighəshi lə nəfə lə nəfə, mbaʼ gəzanakəshi kuma bəzla lə slən tsa Kwa sləkəpə. War ghula tsəgha na, mbaʼ shi mbə gamba bakə səvərishi tiɓa, mbaʼ ghəshi slislikuvəri ndərazhi faɗəmətsəkə bakəti mbə ndərazhi va. 25 Liy hum ki na, mbaʼ Elize dzay dzəmə dəlagwa Karmel, sa kafə na məɓa na, mbaʼ dzay dzəmbə məlmə Samari.