2 Mazə 3

Yuram məni mazə dzəkən ka Izərayel

Ma Zhuzafat mbə məni kwa məŋ lə dəghasa piya ci mbə mazə dzəkən ka Zhuda ki na, mbaʼ məndi pəərəti Yuram zəghu Akab ka mazə tsaa sləkə ka Izərayel. mbə məlmə Samari niy nza na lə nziy tsa ci. Piya məŋ lə bakə niy mənti na mbə mazə. 2 Shi gəmgəm ni niy məni na kwa kuma Kwa sləkəpə. Ə na nza nay, niy vəŋəti mənishi na nja kar diy lə mbəghiyuw. Na na ciy, aa niy ngəzlanti haku tsaa niy gariy diy va ka məjəʼa hiyala har məndi vaa Baal. 3 Ya tsəgha nzə kiy, aa niy fambə ka Izərayel dzəmbə məni kuma jikir na njasa niy fambəshi Zherubuwam zəghu Nebat va. Niy zlata məni kuma jikir na va niy məni Zherubuwam naw.

Mazə ka Muwabəə pəla zləghu ghən tsa ci mbə dəvə mazə ka Izərayel

4 Mesha niy nza mazə ka Muwabə, ndə kəli teŋkesli niy nza na. Ndərazhi teŋkesli diwiy diwiy diwiy məŋ, mbaʼ gemim dikə dikə ni lə shiti ti shi diwiy diwiy diwiy məŋ niy tsəhanci na ghən kaa mazə ka Izərayel. 5 Ma sa niy mətiy mazə Akab ki na, mbaʼ Mesha kafiy ta zləghu ghən tsa ci mbə dəvə Yuram mazə ka Izərayel. 6 Sa nighəti mazə Yuram tsəgha ki na, dza na mbaʼ Səvəriy mbə məlmə Samari ta dza ta ɓəlati ka sawji ka Izərayel gwanashi. 7 Liy hum ki na, mbaʼ kafiy lə ka sawji ci ta dza ta mbəzə lə ka Muwabə. Dza na mbaʼ ghunashi mbəzli va Zhuzafat mazə ka Zhuda. Ma kə kaa ngəshi na: «Mbalam kəsayim Zhuzafat mazə ka Zhuda, ma pə ghuy kaa ngəciy: “Avanay mazə ka Muwabə kafiy ta pəla zləghu ghən tsa ci mbə dəvee. Zləɓavə dza gha kwasəbee ta dza ta mbəzə lə ka Muwabə na?” kə mazə ka Izərayel, pə ghuy kaa ngəci,» kə. Sa dza mbəzli vaa gəzanci kuma va kaa Zhuzafat na, «Tsəgha na, ee zləɓavə dza. Mbəzli kutiŋ ni nza ghummə, ka sawji yay, shi gha na ghəshi, gədewesli yay, shi gha ghəshi diɓa. 8 Kwa tsama kwal dza ghummə ta dza nanzaa? kə, pə ghuy kaa ngəci,» kə kaa ngəshi. «Dzar mbə gamba ka Edum kə, pə ghuy kaa ngəci,» kə Yuram kaa mbəzli ghunashi na va.

9 Dzəghwa kar mazə ka Izərayel ghəshi lə mazə ka Zhuda, mbaʼ mazə ka Edum, kəram ghəshi kafəshi lə ka sawji shi ta dza ta mbəzə lə ka Muwabə ki. Sa mənti ghəshi vici mbərfəŋ mbə dza na, kala yam tiɓa ta sashi ka sawji lə ta sashi dəmbəkə tsa nza ghəshi li. 10 Ma kə mazə ka Izərayel ki na: «A kuma kən ghummə. Kwa sləkəpə ɓəkəmmə na dza kwakə ghummə mezher mahəkanə ni ni ta mbə ka Muwabəə mbammə,» kə. 11 Ma kə mazə Zhuzafat na: «Ndə gəzə kuma Hiyala Kwa sləkəpə tikə, gar ɗuwtəmmə kuma ghəci va Kwa sləkəpə bay sa?» kə. Ma kə tsahuti ntsa ta səɗa mazə ka Izərayel na: «Avanay Elize zəghu Shafat, ntsaa niy nza ta səɗa Eli tikə,» kə. 12 Ma kə mazə Zhuzafat ki na: «Kumaa səəkə va Kwa sləkəpə na sa ka ntsa vaa gəzə kataŋ,» kə.

Dzəghwa kar mazə ka Izərayel ghəshi lə mazə ka Zhuwda mbaʼ mazə ka Edum, mbaʼ ghəshi dzaa kəsay Elize. 13 Ma kə Elize kaa mazə ka Izərayel na: «A shiy jikətəra lə ghaa? Va ka gəzə kuma hiyala kar dəŋa va lə məŋa pə ghaa dza ta ɗuw kuma,» kə. Ma kə mazə ka Izərayel kaa ngəci na: «Yaŋ pə gha na gha, ya njaɓay, Kwa sləkəpə harkəŋiy na ghiy ghiy mezhizhi mahəkanə ni ni tikə ta mbə ka Muwabəə mbaŋiy,» kə. 14 Ma kə Elize na: «Ava Kwa sləkəpə Hiyala ghərantee na sləni, saa sləkə shiy va gwaʼ gwaʼa tiɓa ka favə. Kala sa haʼuee tə Zhuzafat mazə ka Zhuday, ka fə ghənee tə gha ya juw nzaw, ka nigheŋee nja ndə kwa kumee nzaw. 15 A pə ghuy məntiy: Pəlakəram ndə tsa gəzəpəli,» kə.

Dza ghəshi mbaʼ ghəshi pəlanakə ndə tsa gəzəpəli, ka tsa ghəci. Ma ntsa va mbə tsa gəzəpəli ki na, mbaʼ bərci Kwa sləkəpə dzataa dzəmbə Elize. 16 Ma kə na: «Ma kə Kwa sləkəpiy: “Lalatim keʼuer ɗaŋ dziy kwa həl tsa kama yam tsa kwa. 17 Yən gezəŋuy na yən Kwa sləkəpə: Ka dza ghuy nay safə viyəhu viyuw, ka dza ghuy nay vanə nzəməyuw. Pef pef dza ghuy nashi ma yam dziy kwa həl tsa. Ka sashi ghuy, ka sashi garəwahi ghuy lə dəmbəkə tsa ghuy,” kə Kwa sləkəpə,» kə Elize. 18 Ma kə Elize diɓa na: «Niva shiyiy, shiy jiwu tsətsə nashi Kwa sləkəpə kwa mətsə nzə. Ta fambə ka Muwabə dza na mbə dəvə ghuy diɓa. 19 Məlməhi shi kwa kələm lə ni nza bama ti shiy, ta ngangazlantishi dza ghuy gwanashi. Slən fəə zəmə tə hiɗi shiy, ta kəslati dza ghuy tə hiɗi, ta njənjəfay mətsəhi yam tə hiɗi shi dza ghuy gwanashi, ya tsama vəhə tsa nza zashi tiy, ta yiɗivəri shi zati ghəshi ti dza ghuy lə hərezli,» kə Elize. 20 Ma tə həzlimə mekəshi geʼi lə vəghu tsa ka məndiy vəlanta shiy ti kaa Kwa sləkəpə ki na, dza yam ka hu səəkə dza kwa hiɗi ka Edum, ray ghəshi təhay pi tsa dziy tə hiɗi.

21 Sa favə ka Muwabə gwanashi a mezher mahəkanə ni va səəkəshi ta mbəzə li shi, kə məndi na, dza ghəshi mbaʼ ghəshi ɓasəti zhər nza piya və shi gar dza ta mbəzə gwanashi, mbaʼ mbəzliy halishi gwanashi. Mbaʼ ghəshi dzaa ɓasiyshi kwa ghala. 22 Ma tə kəɗi pi sa satishi ka sawji ka Muwabə, tsaʼ kə ghəshi kwa kuma shi na, nja miymiy ghəshi nashi yam va ghəm tsa shi, sa mbərə vici dziy ti shi. 23 Dza ghəshi ka ngumə lala: «Waa miymiy na ghəshi. Ya njaɓay, aa həərəshi mezher va na bakwantəvashi ka sawjihi shi kwa jipə shi. Ka Muwabə, dzammə ta imə shi mbəzə shi,» kə ghəshi.

24 Dza ghəshi ka kəətivaa dzəti pi tsa ɓasəshi ka sawji ka Izərayel va. Sa tsəhəshi ghəshi na, dza ka sawji ka Izərayel pizlə ghəshi pəslishi ti shi, mbaʼ ghəshi mbashi. Bali va ka Muwabə. Dzəghwa ka Izərayel ka nushi paʼa tə hiɗi shi, mbaʼ ghəshi irəti ka Muwabə təruŋ. 25 Dza ghəshi mbaʼ ghəshi ngangazlanti məlməhi mbəzli va. Ya wa ndə na, war ə ghəciy bəzla haku tsa ciy dzəti za zati məndi kala pəzli ma pi tsa tə ngula va hərezli. Cəkeʼ ghəshi njənjəfay mətsəhi yam, cəkeʼ ghəshi kakaslati fəhi ka məndiy zəmə tə hiɗi.

War məlmə Kir-Hareset na saa niy dapata ma məndi. Ya tsəgha nzə ki na, dza ka sawji ka pəʼu gevirndiŋ dzəzlətsəɓ ghəshi dəzlay ka pəʼu hərezli dzəmbə. 26 Sa nighəti mazə ka Muwabə daw na bərci ci mbə mbəzə tsa va, kə na, mbaʼ ɓasəvə ka sawji ka mbəzə lə kafaʼi diwi diwi mbərfəŋ ta huy dza kwa bəla mazə ka Shiri, shaŋ ghəci. 27 Dzəghwa na ki, baŋ kəsəvə tsa dikə tsa zəghu ci, saa niy dzaa mbərə mazə kwa pi tsa ci, piyəŋ sliy kaa hiyala ci mə ghən kələm tsa məlmə va. Təruŋ nəfə tsa ka Izərayel zhanatishi va nava kuma. Dza ghəshi, garə ghəshi garəti mbəzə, ka zhashiy dzəti hiɗi shi.