2 Mazə 4

Elize kəətiti nahuti mali mbəri

A nahuti mali niy nza tiɓay, ntsa mbə ka gəzə kuma Hiyalaa nuva kwa zərə kutiŋ zata niy nza, mbaʼ ntsa va mətiy. Dzəghwa mali va tə nahuti vici, mbaʼ dzaa kəsay Elize ndə gəzə kuma Hiyala lə wahə nzə. Ma kə kaa ngəci na: «A zara, ndə sləni tsa gha mətiy. A gha sənay təruŋ niy hazləni na va Kwa sləkəpə. Sa niy nza təm tsa tsahuti ndə viy, mbaʼ ntsa va səəkiy ta kəəsə ndərazhee bakanashi ta nza ghəshi ka mevivi ci, məndi kə kala gar wanati təm tsa ci va,» kə. 2 Ma kə Elizee kaa ngəta na: «A shi dzee nza gar məntəŋa sanaa? Gəzara shi va gha kiy ghi,» kə. Ma kə mali va na: «Shiy va kwa sləni gha kala war in juw tsətsə kwa hupəruw,» kə. 3 Ma kə kaa ngəta na: «Mbala cəʼu hupehuper kama shiy kwa shi va ka ghalahiŋa gwanashi. Ɗaŋ pə gha dzaa cəʼuvəshi. 4 Sa ka gha tsəhəŋa kiy ghiy, nza gha kalakən ciki kən ghən ghuy lə ndərazhi gha, nza gha shəkə in tsa vaa dzəghwa hupehuper va. Təhiy ma hupəriy, bəm gha fiy tsava vəgha bəla, ka shəkəə dzəghwa tsahuti,» kə.

5 Dza mali va ki, ka dzata. Sa tsəhəta na kiy ghyi na, disl kalakən ciki kən ghən tsa nzə lə ndərazhi nzə. Ka ɓanta hupehuper ndərazhi nzə na, ka shəkə in ghənzəə dzəghwa shi. 6 Mbaʼ hupehuper tihəshi gwanashi ki, ma kə kaa zəghu nzə na: «Ndara tsahuti hupər,» kə. «Tərə hupəruw,» kə zəghu va kaa ngəta. Mbaʼ in garəti hu ki. 7 Dza mali va mbaʼ dzaa slanakə kuma va kaa ndə gəzə kuma Hiyala tsa va. Ma kə ntsa va kaa ngəta na: «Mbala ɗəlanti in tsa va a gha wanti təm. Naa tərə gənay, nza ghuy pa shi dza ghuy ghəzliŋuy ti shi lə ndərazhi gha,» kə.

Elize ghəshi lə nahuti mali ka Shunem

8 Tə nahuti vici sa niy dzar Elize mbə məlmə Shunemiy, mbaʼ nahuti mali kwa shiy niy mbaɗəvə ta zəmə shiy kiy ghyi tsa nzə. Sa ka Elize dzar mbə məlmə va ya humɓa ki na, war mbə dzakə ghyi tsa va ghəciy nza ta zəmə shiy. 9 Ma kə mali va kaa zata geʼi lə tsahuti vəghu ki na: «Zal tsaa səəkə tsa va ghum zheviy, ee sənay ndə gəzə kuma Hiyala tsa kataŋ tsa na. 10 Ə cəʼuŋee, nganati ciki ghum jiwu mə ghən ciki, nza ghum fambə pi həni, mbaʼ tabəl, mbaʼ pi nziy, mbaʼ gərkuwa kaa ngəci. Ya hum səəkə naa dzakə ghyi tsa ghumiy, nza ghəci nziy mbəɓa,» kə. Mbaʼ ghəshi mənti tsəgha.

11 Ma tə nahuti vici ki na, mbaʼ Elize səəkiy dzakə ghyi tsa shi, mbaʼ dzay dzəmə ciki tsa va ta hi mbəɓa. 12 Dza na mbaʼ ghunay Gehazi ndə sləni tsa ci ta dza ghəciy haranakə mali ka Shunem va. Mbaʼ ntsa va harkə, mbaʼ səəkətaa dzəmiy ciki. 13 Ma kə Elize kaa Gehazi na: «Ma pə gha kaa mali vay: “Təruŋ səhuvaŋa gha lə ghiy. A shi dza ghiy məntəŋaa? Kuma gha tiɓa gar gəzanci ghiy kaa mazə, ya kaa dikə tsa ka sawji na?” pə gha kaa ngəta,» kə Elize. Ma kə mali va sa gəzanakə Gehazi kuma va na: «Kuma kən yaw, lə zərkə nziyre mbə mbəzlee,» kə. 14 Ma kə Elize kaa Gehazi ki na: «A shi dza ghum mananati ghaa nighə sanaa?» kə. Ma kə Gehazi na: «Sanay, zəghu vuw, zhini diɓay, mbaʼ zata haliy,» kə. 15 Ma kə Elize ki na: «Zhini harata,» kə.

Dza Gehazi mbaʼ zhiniy harata mali va mbaʼ zhikətaa dzəmiy ciki. 16 «Hazhi tsətsiy, gha lə zəghu zal tə hum gha,» kə Elize kaa ngəta. «Kuma gar məniva na navaw ndə sləkəraw, ndə gəzə kuma Hiyala nza gha, ka slaslara dzərvə gha yən kwa sləni gha ma,» kə mali va. 17 Liy hum ki na, mbaʼ mali va ɓəvə hur, baw yakə zəghu zal geʼi lə vəghu tsaa niy gəzanta Elize va kuma mbəradzə.

Elize zhanambə piy mbə zəghu mali ka Shunem

18 Dza zəghu mali ka Shunem va, mbaʼ kəliy. Ma tə nahuti vici na, mbaʼ dzaa kəsashi kar diy ghəshi lə mbəzli mbə məni shiy səəkə kwamti. 19 War sa ghavə na tsəgha na: «Ghən tsee pərəɗa, ghən tsee pərəɗa,» kə. Ma kə diy kaa ndə mbə ka sləni ci na: «Ɓəghə zəghu vaa jighi kaa mbəghiy,» kə. 20 Dzəghwa ntsa va mbaʼ ɓəghə kaa mbəghiy. Mbaʼ mbəghiy ɓəvəə faghwa kwa səɗa nzə, ma vici kwa ghən na, mbaʼ zəghu va mətiy.

21 Sa nay na zəghu va mətiy na, mbaʼ dzəmətaa dzəmbə ciki tsa Elize li, bəm fiy mbəri tsa va tə pi həni tsa ntsa va, mbaʼ səvəritaa kalay ciki. 22 Dza na daʼ haray zata. Ma kə kaa ngəci na: «Titihu, ghunavəra ndə sləni lə kwantəmcaa mali ee səəkəra kiyaŋu kiyaŋu va ndə gəzə kuma Hiyala,» kə. 23 Ma kə zata kaa ngəta na: «Vici makwaghwa pəzli tir na ndatsuw, vici dəkəva na diɓaw. Tawa dza gha və ndatsaa?» kə. Ma kə mali va na: «Kuma tiɓaw,» kə. 24 Dza na bəm fati ləferuw tə hum kwantəmca. Ma kə kaa ndə sləni tsa nzə na: «Ka kwantəmca, dzam ghum, ka garə gha kala sa kee gəzaŋa ma,» kə.

25 Dza na ka dzata ta dza ta kəsay Elize ndə gəzə kuma Hiyala mə dəlagwa Karmel. Ghənzə kərakəta na, mbaʼ ntsa va nata. Ma kə kaa Gehazi ndə sləni tsa ci na: «Ava mali ka Shuneməə kaʼum vaa səəkə. 26 Kəsli bali a gha dza ta kumə li. “Kuriŋ nza gha na? Kuriŋ na zaŋa na? Kuriŋ na zəghu gha na?” Pə gha kaa ngəta,» kə. Sa tsəhiy Gehazi vəgha mbaʼ gəzanakə tsəgha na, «kuriŋ nza ghiy gwanaŋiy,» kə mali va kaa ngəci. 27 Ma sa tsəhəta na vəgha ndə gəzə kuma Hiyala mə dəlagwa na, mbaʼ ndəɓatəvata tə hiɗi ka kəsə dzar ta shiɗəshiɗə ci. Dza Gehazi ka kətivaa dzəvəgha ta tsəkwanti. Ma kə ndə gəzə kuma Hiyala tsa va kaa ngəci na: «Zlata, kuma nza na kən təruŋ. Ə na na nza nay, a Kwa sləkəpə mbəliy kuma va viya. Gəzara kuma kən va naw,» kə.

28 Ma kə mali va kaa ngəci ki na: «Niy ɗuwəhu zəghuee va gha na ndə sləkəra? Ee niy gəzaŋa: “Ka ɓəra nzəghee ghaa səkwa tə gəm ma,” pən niy ni kaa ngəŋa,» kə. 29 Ma kə Elize kaa Gehazi na: «Pəhəva, nza gha ɓəvə gətee ta dəvə gha, a gha dzaa dzəmbə məlmə Shunem. Mbaʼ pə gha kumay lə ndiy, nəghətaa gha səku ma. Mbaʼ kə ndəə səkuŋay, nəghətaa gha zləɓa ma. Sa ka gha tsəhəŋay, nza gha zlaŋəlati gətee va dzar tə kuma zəghu va,» kə. 30 Ma kə mbəghiy zəghu va kaa Elize na: «Ava Kwa sləkəpə tiɓa ka favə, tiɓa gha ka favə diɓa, ka kafee tikə kala ghum lə ghaw,» kə. Dza Elize ki, mbaʼ kafiy ka dzay ghəshi li.

31 A na Gehaziy, pərɓa ghəci niy ʼwati na kwal kaa ngəshi. Sa tsəhiy na na, bəm fati gəta Elize va dzar tə kuma zəghu va. Ya tsəgha nzə ki na, gəzə kuma zəghuw, kufəghə naw. Dza na tərəɗ zhəghətəvay ta dza ta kəsay ndə gəzə kuma Hiyala. Ma kə kaa ngəci sa kumay ghəshi na: «Ee mənti njasa gəzəkəra gha vay, fərghiy zəghu va ya tsəgha nzuw,» kə. 32 Sa tsəhiy Elize, mbaʼ dzay dzəmbə cikə na, mbaʼ kəsay zəghu va tə pi həni tsa ci, məti məti. 33 Dza na dislə kalakən ciki dzəkən ghən tsa shi lə mbəri tsa va, ka cəʼu Kwa sləkəpə. 34 Dza na baʼu baʼwakənvay kən zəghu va. Bəm fati miy tsa ciy dzəti tsa zəghu va, tsəgha fati mətsəhi ciy dzəti mətsəhi ci, zhini tsəgha ghəci fati divədivi ciy dzəti ni ci diɓa. Ghəci məhəni tsəgha ti ki na, mbaʼ vəgha zəghu va mənti dzəkədzəkə. 35 Dza Elize kafə kafiy kən, ka dza dza mbə ciki tsa va. Zhini na diɓa mbaʼ hənakənvay kən. Dzəghwa zəghu va mbaʼ tsakə watəhima mbərfəŋ səɗa, ɓəŋ ghunanti mətsəhi ci. 36 Daʼa Elize haray Gehazi. Ma kə kaa ngəci na: «Mbala harkə mali ka Shunem va,» kə. Dza Gehazi mbaʼ səkwaa harata mali va, mbaʼ dzəməta. Ma kə Elize kaa ngəta na: «Pəmə zəghu gha» kə kaa ngəta. 37 Dza na kəətə kətəghəvataa dzəvəgha Elize, gəlɓə gəlɓəta paʼa tə hidi kwa kuma ci. Pəm pəməvə zəghu nzə ka dzata.

Elize zhəghanti er gəmgəm ni ka shi wəzə ni

38 Liy hum ki na, mbaʼ Elize zhəghəghəvay dzəmbə məlmə Gilgal. A ma niy səkwata tə hiɗi va. Dzəghwa ka gəzə kuma Hiyalaa nuva kwa zərə kutiŋ na mbaʼ ghəshi ɓasəshi kwa kuma ci. Ma kə kaa ntsa ta səɗa ci na: «Fati shaka dikə nava tə ghu, a gha tati er kaa ka gəzə kuma Hiyala tiɓa va gwanashi,» kə.

39 Dzəghwa tsahuti kutiŋ mbə shi mbaʼ dzay dzəmti ta ngəli er. Dza na mbaʼ kəsata nahuti fə tə gamba lə ya ti, mbaʼ ngəlivə ya va mbəriŋ mbə kubaŋ tsa ci. Sa zhəghəkəvay na kwamti na, mbaʼ slaslaghwashi kwa shaka er va. Ndə tiɓa niy sənashi nda a shiy na shivaw. 40 Dza məndi mbaʼ məndi mbəzanavəshi er va kaa mbəzli. War sa dzəghəmiyshi ghəshi na, usə ghəshi tə wahə, ma kə ghəshi na: «Ta jighə dza ndə mbə nini er kiya ndə gəzə kuma Hiyala,» kə ghəshi. Kala mbay ma ghəshiy zəməshi. 41 «Tikəram ghupə,» kə Elize. Sa tanakə məndi na, mbaʼ shəkaghwa ghupə vaa dzəghwa shaka er va. Ma kə kaa ntsa ta səɗa ci na: «mbəzanshi er kaa mbəzli a ghəshi huɓəshi,» kə. Mbaʼ er va zhəghəshi wəzə mbə miy.

Elize ngaslay mbəzli bələku lə shi zəmə

42 Geʼi lə vəghu tsa vay, a tsahuti ndə ka Baal-Shalisha niy ɓanakə shi zəməə ghaa nakə mbə za ci kaa Elize ndə gəzə kuma Hiyala. Peŋ tsa tati məndi tə shi har məndiy ʼurəzhə bakəmətsəkə, mbaʼ bəhu alkamari ʼwar dəʼu na niy nza shi ci va. Ma kə Elize kaa ntsa ta səɗa ci na : «Təhanshi shi zəmə va kaa mbəzli gwanashi a ghəshi zəməshi,» kə. 43 Ma kə ndə sləni tsa va na: «Njaa njaa dzee mbay tahanavəshi kaa mbəzli bələkua?» kə. Zhini ma kə Elize kaa ngəci na: «Təhə shi zəmə va kaa mbəzli va gwanashi a ghəshi zəməshi. Avanata kuma gəzəkə Kwa sləkəpə: “Ya wa ndiy, ngəslə ngəslə dza naa nza, paʼa ka tərə mbəvəli,” kə,» kə Elize 44 Dzəghwa ndə sləni tsa va ka təhə shi zəmə va kaa mbəzli, mbaʼ ghəshi zəməhushi, paʼa ka tərə mbəvəli njasa niy gəzəkə Kwa sləkəpə va.