2 Mazə 5

Elize ndə gəzə kuma Hiyala mbəlanti Naaman dikə tsa ka sawji va dərna

A tsahuti ndə niy nza tiɓa Naaman, kə məndi kaa slən tsa ci. Ntsa vay, dikə tsa ka sawji mazə ka Shiri niy nza na. Təruŋ niy fati ntsa ci va dikə tsa shəndəkə ti. War kuma wəzə na niy mananci na, sa nza nay, dza kwa bəla ci niy ɓanavə Kwa sləkəpə ushanti ka mbəzə shi kaa ka Shiri. Ntsaa kurahəhu kuma kən mbəzə niy nza na. Ə na na nza nay, ndə dərna ghəci niy nza. 2 12Sa niy dzashi ka Shiri ta mbəzə lə ka Izərayel geʼi lə tsahuti vəghuy, mbaʼ ghəshi niy kəsəkə mava tə nahuti zha, mbaʼ niy mənita ka kwa ghəra sləni kaa mali Naaman. 3 Ma kə zha va kaa maliy sləkə va tə nahuti vici na: «War mbaʼ kə ntsee tsa dikə tsa niy nza gar tsəhiy vəgha ndə gəzə kuma Hiyala tsa mbə məlmə Samari vay, ta mbəlanti niy dza na va dərna ci va nza,» kə.

4 Sa tsəhəta kuma va kwa sləmə Naaman ki na, mbaʼ dzaa gəzanci kaa mazə ka Shiri, ntsa ci va dikə tsa: «Tsaʼaa tsaʼaa kə zhaa səəkə va tə hiɗi ka Izərayel,» kə. 5 Ma kə mazə ka Shiri, ntsa ci va dikə tsa kaa ngəci na: «Mbala kəsay mazə ka Izərayel, ta tsaslavəŋa zliya dzee nza gha dzaa ɓanavə,» kə. Dza Naaman mbaʼ ɓəvə gəna gar kiluw diwi mahəkan, mbaʼ kiluw tsahi mbəzə kwa shamshama kwaŋəmətsəkə, mbaʼ kubeŋer tə dimə məŋ, kəram dzay dzəti kwal. 6 Sa tsəhiy na na, mbaʼ ɓanavə zliya tsasliti mazə ka Shiri va. Avanata kumaa niy tsaslaghwa na kwa zliya va: «Nza gha mbəlanti Naaman dikə tsa ka sawjee va zəlghu dərna niya ghunay ya va gha lə zliya na,» kə. 7 Ma sa jangəti mazə ka Izərayel zliya va ki na, kuyahə kuyahə slakwanti kubeŋer kən ghən ci. Ma kə na: «Hiyala nzee gar paslanti ndə, ya gar zhanakati ndə mbə məti nə ntsa ghunikəra na ndə ta mbəlantee va dərna ci na? Ghuy kəə nighə kuma ci va na, miy ghəci pəla təya sa?» kə.

8 Ma sa favə Elize ndə gəzə kuma Hiyala a mazə ka Izərayel slakwanti kubeŋer kən ghən ci, kə məndi na, mbaʼ ghunay ndə ta gəzanci: «Tawa səəva gha slakwanti gha kubeŋer kən ghən gha kiyaa? Ə kə Naaman tsa vaa səəkə viya, ta sənay dza na: A ndə gəzə kuma Hiyala tə hiɗi ka Izərayel, kə» kə.

9 Dza mazə mbaʼ ghunay Naaman və ki, mbaʼ səəkəə gariy kwa dəgha Elize lə muwta gəduw ci mbaʼ gədewesli ci. 10 Mbaʼ Elize ghunay ndə ta gəzanci: « “Mbala yəkwambəvaŋa mbərfəŋ səɗa gha mbə yam kwa həl Zhurdeŋ, ta mbəliŋa dza gha, ɗewɗew dza ghaa nza, kə ndə gəzə kuma Hiyala” pə gha kaa ngəci,» kə kaa ntsa va. 11 Sa dza məndiy gəzanci kaa Naaman tsəgha na, mbaʼ nəfə tsa ci satiy, ka dzay. Ma kə ghəci mbə dzay na: «Nda ta səvəri dza ndə gəzə kuma Hiyala tsa va kiy ghyi tsa ci, garə gariy ka cəʼu Hiyala ci Kwa sləkəpə, mbaʼ fafati dəvə ci dzar tə pi tsa nza dərna va tə ya ma nzee mbəlira, niy nə ya. 12 Əə nza na parəɓa həleɗemer tə hiɗi ka Izərayel kən heleɗemer mbə məlmə Damas, kar həl Abana lə həl Parpar na? Ka yəkuvee kwa ni va ta zhəghəra ɗewɗew nza sa?» kə.

Dza na tərəɗ zhəghətəvay lə nəfə lə nəfə, ka dzay. 13 Ya tsəgha nzə ki na, mbaʼ ka sləni ci kətəghəvashiy dzəvəgha. Ma kə tsahuti mbə shi kaa ngəci na: «A pəniy ntsa ghiy dikə tsay, ya ndə gəzə kuma Hiyala tsa va niy gəzaŋa məni shi caslakə ni nzay, niy dza ghaa mənishi sa? Tərə na war sa nə na kaa ngəŋa: “Pivaŋa, ta mbəliŋa dza gha” kə kaa ngəŋa shəkəna,» kə kaa ngəci. 14 Dza Naaman ki, mbaʼ dzay dzəghwa həl Zhurdeŋ, mbaʼ yəkwambəvay mbə yam mbərfəŋ səɗa ci njasaa niy gəzanakə ndə gəzə kuma Hiyala va, mbaʼ mbəliy. Ndəɓa huta zəghu jiwu na, pə gha huta tə vəgha ci zhəghəta. 15 Dza na mbaʼ zhəghətəvay ta dza ta kəsay ndə gəzə kuma Hiyala ghəshi lə mbəzli kwasəbə gwanashi. Ma kə kaa ngəci sa tsəhiy na kwa kuma ci na: «Nanay, ee sənay, Hiyala tiɓa tə hiɗi gwanashi kala Hiyala ka Izərayeluw. Titihu zləɓavə vəli vəlitəŋee na, yən ndə sləni tsa gha.» kə. 16 Ma kə Elize kaa ngəci na: «Ava Kwa sləkəpə ghərantee va sləni tiɓa ka favə. Ka zləɓa ɓee ya a shiyuw,» kə. War a Naaman mbaɗə, war ka mbaɗə, kala zləɓa ma ɓə shi va Elize.

17 Ma kə Naaman ki na: «Njana zləɓa ma gha ɓə shi vəlitəŋee ni vəli li shiy, ndara kwal ee tivə hiɗi gar ɓəshi alfadarihi bakə, sa nza nay, ka dza ndə sləni tsa ghaa zhiniy slasla shiy ka ndindi shiy kaa nihuti hiyalahi, kala war kaa Kwa sləkəpuw. 18 Ya tsəgha nzə kiy, a kuma tiɓa kee məni, əə cəʼuee Kwa sləkəpə nza ghənzə pəlatara mbə nəfə tsa nzə: Ghala vəghu tsa ka mazə ka Shiri, ntsee dikə tsaa dzəmbə ciki hiyala har məndi vaa Rimun ta tsəfəku kwa kuma nziy, mbə gəlɓə kee nza kwasəbə. Sa nza nay, tə dəvee ka naa jihəva. Titihu pəlatara tə Kwa sləkəpə kuma dzee va ta məni tsəgha na,» kə. 19 «Mbala lə zərkə,» kə Elize kaa ngəci, ka dzay Naaman ki.

Gehazi mənti kuma jikir na

Niy dzavə dza Naaman kərakuw. 20 Ma kə Gehazi ndə sləni tsa Elize mbə ghən ci na: «A ntsee dikə tsa zlay Naaman ndə ka Shiri tsa vaa dzay kala zləɓa ma ɓə shiy niy ɓanakə na va ghəci. Ava Kwa sləkəpə tiɓa ka favə, na na yay ta nuw dzee ta kəsay, ta dzaa ɓəvə shiy və,» kə. 21 Dza na tap ta nuw Naaman. Sa nay Naaman kərakiy ghəci mbə səəkə na, mbaʼ səkway kiyaŋu kiyaŋu mə muwta gəduw ci, ka zhəghəva ta kumə li. Ma kə kaa ngəci sa tsəhiy na vəgha na: «A shiy mənishia?» kə. 22 Ma kə Gehazi na: «Shiy tiɓaa mənishiw. Ntsee dikə tsa ghunara na, a kiy: “Gula bakə mbə ka gəzə kuma Hiyala səəkəshi na viya sənzənva, səəkə mə dəlagwa Efrayim. Titihu ndara kiluw gəna mahəkanəmətsəkə, mbaʼ kubeŋer tə dimə bakə ta ɓanshi”, kə» kə. 23 Ma kə Naaman kaa ngəci na: «Kiluw kwaŋəmətsəkə pə gha ɓəvə gəna, yaŋ pə gha na gha,» kə. War ə ghəciy mbaɗə ta ɓə gəna va ghəci tsəgha, mbaʼ fanaghwa lə kubeŋer bakə ni va kwa mbəleɗemer bakə, mbaʼ ɓanavəshi kaa ka sləni ci bakə, a ghəshi pəhay li shi. 24 Sa tsəhəshi ghəshi tə pi tsa har məndi vaa Ufel na, mbaʼ Gehazi ɓəvə mbəleɗemer və shi va, mbaʼ dzaa fiyshi kiy ghyi tsa ci. Dza na mbaʼ gəzanshi nza ghuy tsəhə wəzə kaa ka sləni Naaman va, ka dzashi ghəshi.

25 Ma ghəci na ci ki na, mbaʼ zhay zhəvəgha Elize ntsa ci dikə tsa. Ma kə Elize kaa ngəci na: «Kuma səəkə gha shikaa Gehazi?» kə. Ma kə Gehazi na: «Səəkə ndə sləni tsa gha ya kumaw,» kə. 26 Ma kə Elize kaa ngəci ki na: «Kuma niy nza safə tsaa ghəra sləni va lə ya ghala səkwa ndə va kiyaŋu kiyaŋu mə muwta gəduw ci ta kumə lə gha nə məndi kaa ngəŋaa? Vəghu tsaa zləɓa ɓə ya gəna, ya kubeŋer, ya fəhi ulivə, ya fəhi ka məndiy ta tay tə ya shi, ya teŋkesli, ya slay, ya meviviy zhər lə miʼi niy nza sasaw. 27 Njana mənti gha tsəghay, ta zhəghtəvata dza dərna Naaman va tə gha lə mbəzli kwa miy dəgha gha ta kwa ndimndim,» kə. War sa ɓarvay Gehazi vəgha Elizee na, mbaʼ dərna dzataa dzəti vəgha ci gwaʼ gwaʼa, ndəɓa pəsər pə gha kaa vəgha ci tezlezli tsa nzə.