2 Mazə 6

Tsəʼi zay mbə yam mbaʼ Elizee təzlikəvəri tə ghən yam

Ma kə ka gəzə kuma Hiyalaa nuva kwa zərə kutiŋ na kaa Elize tə nahuti vici na: «Nay gha na, juiy na pi tsa ɓasəŋiy ghiy tsa ti vəgha gha tə ghummə. 2 Ndaŋiy kwal a ghiy dzəghwaa dzəmiy həl Zhurdeŋ, ya wa ndə na, nza ghəci kəslivə tsəm kutiŋ ta səəkə ta la ciki ta nziy ghummə mbə,» kə ghəshi. «Mbalam» kə Elize kaa ngəshi. 3 Ma kə tsahuti kutiŋ mbə shi na: «Titihu zləɓavə dza kwasəbə ghiy ghiy ka sləni gha,» kə. «Tsəgha na, mbadzammə,» kə Elize. 4 Dza na mbaʼ dzay kwasəbə shi. Sa tsəhəshi ghəshi miy həl Zhurdeŋ na, dza ghəshi ka kəsli shighu.

5 Ma tsahuti kutiŋ mbə kəsli tsa ci tsəm na, mbaʼ tsəʼi tsa ci təɗiy, ɓəlaʼ təriy dzəmbə yam, mbaʼ ngumata lala: «Njaa dzee məni kiya ntsee dikə tsa? cəʼu cəʼu niy cəʼuvee tsəʼi tsa va,» kə. 6 Ma kə Elize na: «Dzəghwa tima tərə naa?» kə. Mbaʼ ntsa va canati dzəghwa tə pi tsa tərə na. Dza Elize kəsli kəslivə gəta, fiyəkə ndəghati dzəghwa tə pi tsa va, ɗalaw tsəʼi tsa va səmiy dzəti ghən yam. 7 «Ɓə sa gha» kə. Dza ntsa va mbaʼ ɓəvə.

Elize kəəsəti ka sawji ka Shiri ka mevivi

8 A mbəzə niy nza kwa jipi ka Shiri lə ka Izərayel. Ka mazə ka Shiriy dzay, mbaʼ ɓasəti mbəzliy sləkə ka sawji ci ta sləka kuma li shi. Sa ka ghəshi sləkantiy, tiʼ ka naa tivə pi tsa dza ghəshi ta ɓasəvə ta pəsli ta ka Izərayel ti. 9 Sa ka Elize ndə gəzə kuma Hiyalaa dza na, mbaʼ ghunay ndə va mazə ka Izərayel: «Əntaa gha dzar kwa pi tsa tsaʼ tsa va ma, a ka Shiri ɓasəshi tiɓa,» kəə ni kaa ngəci. 10 Sa ka mazə ka Izərayel dza ki na, mbaʼ ghunashi mbəzli ta ndəghu pi tsa gəzanakə ndə gəzə kuma Hiyala va.

Ɗaŋ səɗa niy mənita kuma va tsəgha: Sa ka Elize gəzanci kaa mazə ka Izərayel ki na, mbaʼ mazə tsa vaa sənay njasa dza naa ndəghu ghən tsa ci. 11 Təruŋ nava kuma səəti məhərli mazə ka Shiri. Dza na ɓasə ɓasəti mbəzliy sləkə ka sawji ci. Ma kə kaa ngəshi na: «Ee ɗi ghuy gəzara nda tsama ndə mbə ghummə na ntsaa titəvay tsa ta nza dza kwa bəla mazə ka Izərayel,» kə. 12 Ma kə tsahuti kutiŋ mbə mbəzli va na: «Ndə tiɓa dza kwa bəla ciw mazə tsaa sləkəraw. Shi nashi gha vay, Elize ndə gəzə kuma Hiyala tsa tə hiɗi ka Izərayel mənishi na. Kuma ka ghaa gəzəhu ya mbə ciki tsa ka ghaa həniy, cəkeʼ ka naa sənata, mbaʼ gəzanci kaa mazə ka Izərayel,» kə. 13 Ma kə mazə ka Shiri na: «Mbalam nighətim nda kuma na, nzee mbəə ghuni mbəzli ta kəsə ci,» kə.

Mbaʼ məndi dzaa nighəti. «Mbə məlmə Dutaŋ na,» kə məndi kaa ngəci. 14 Dza na mbaʼ ghunashi gədewesli, mbaʼ mutiti gədewesli, mbaʼ ka sawji ka mbəzə təruŋ dalala. Dza ghəshi həvir dəzlətsəɓə ghəshi dzaa dəzlay məlmə va. 15 Ma həzlimə pəətə mekəshi na, mbaʼ ndə sləni tsa Elize ndə gəzə kuma Hiyala səvəriy mbə məlmə, mbaʼ nashi mbəzli lə gədewesli, mbaʼ mutiti gədewesli dəzlətsəɓə məlmə va. Mbaʼ dzaa kəsay Elize, ma kə kaa ngəci na: «A kuma kəsam ntsee dikə tsa. Njaa dza ghum ta mənia?» kə. 16 Ma kə Elize kaa ngəci na: «Ka dza her gha ma. Ɗaŋɓa ni ghum ka sawji na kən ni shi,» kə. 17 Dza Elize ka cəʼu Hiyala. Ma kə na: «Əə cəʼuŋee Kwa sləkəpə, titihu ghunananti mətsəhi ci a ghəci mbəə nay pi,» kə. Dzəghwa Kwa sləkəpə mbaʼ ghunananti mətsəhi ndə sləni tsa va, tsaʼ kə na, ndəɓa hiɗi pə gha kaa pi tsa dzar mbə dəlagwa va va gədewesli mbaʼ mutiti gədewesli ka ghu, dəzlətsəɓə ghəshi dəzlay Elize.

18 Dza ka sawji ka Shiri ka dzaa dzəvəgha Elize. Dza Elize ka cəʼu Kwa sləkəpə. Ma kə na: «Titihu əə cəʼuŋee ghulfay ka sawji va,» kə. Dzəghwa Kwa sləkəpə mbaʼ ghulfayshi njasa gəzəkə Elize va. 19 Ma kə Elize kaa ka sawji va ki na: «Kwa kwal tsa wəzə tsa nza ghuyiw, məlmə va na nanaw. Nuram ee pəməghəŋuy dzəti pi tsa nza ntsa pəla ghuy va,» kə. Dza na mbaʼ pəməghəshiy dzəmbə məlmə Samari. 20 Sa dzəmbəshi ghəshiy dzəmbə məlmə ki, ma kə Elize na: «A Kwa sləkəpə, ghunanti mətsəhi shi a ghəshi nay pi nana,» kə. Dzəghwa Kwa sləkəpə mbaʼ ghunanti mətsəhi shi. Nighə ghəshi na, ghəshi tə hur məlmə Samari.

21 Ma kə mazə ka Izərayel kaa Elize sa nashi na ka sawji va na: «Ee bəkushi na didi?» Kə 22 Ma kə Elize kaa ngəci na: «Awə, ka bəkushi gha ma. Ndimndim tsa ghay, kar ghaa bəku mevivi kəəsəkə ka sawji gha mbə mbəzuw. Shi zəmə lə shi sa pə gha ɓanavəshi, nza gha zlashi ghəshi dzashi va mazə tsa shi,» kə. 23 Dzəghwa mazə ka Izərayel ki, mbaʼ ɓanavəshi shi zəmə tərəŋw. Zəməʼ zəməʼ ghəshi zəməhu shiy, saʼ saʼ kaa shiy. Dza mazə ki, mbaʼ gəzanshi dzashiy jighi, mbaʼ ghəshi dzashi va mazə tsa shi. Ghala fəcava ki na, mbaʼ ka Shiri niy hishi, kala səəkə ma ta pəsli ta ka Izərayel.

Ma səkwataa dzəmbə məlmə Samari

24 Ma geʼi lə tsahuti vəghu ki na, dza Ben-Hadadə mazə ka Shiri mbaʼ ɓasəti ka sawji ci gwanashi, mbaʼ ghəshi dzaa makay mbəzli mbə məlmə Samari. 25 Sa nza na mbaʼ ghəshi makay mbəzli mbə məlmə va vəghu ɗaŋ ki na, mbaʼ ma səkwata mbəɓa. Ya ghən kwantəmca kutiŋ ghənzə sa ka məndiy zəmə may, gəna kwa tsahi dəghəsmətsəkə niy pa məndi. Viʼi dighəlihi reta kilu na, ka pa tə gəna kwa tsahi cifə.

26 Tə nahuti vici mazə ka Izərayel mbə dza dzar tə kələmiy, dza nahuti mali ka gəzə kuma zlaŋ zlaŋ. Ma kə na: «Titihu kəətitəra mazə ndə sləkəra,» kə. 27 Ma kə mazə na: «Kala Kwa sləkəpə ka na kəətitəŋaw kiy, lə wa dzee mbay kətitətəŋa kiya mali? Tərə na ya alkamari, ya tay viya gar ndaŋee kiw,» kə. 28 Ma kə diɓa na: «A kumaa kəsaŋaa bayaa?» kə. Ma kə mali va ngəci na: «Mali na niy nə na kaa ngəra fəcava: “Tahu tsa gha zəghu ghum ndatsə, ma həzlimiy nza ghum ta tsee,” kə niy ni kaa ngəra. 29 Dzəghwa ghiy, mbaʼ ghiy tanti tsee zəghu. Ma tə həzlimə sa nə ya: “Ndaka tsa gha va zəghu a ghum ta” pən kaa ngəta na, mbaʼ mbəliy tsa nzə zəghu,» kə mali va kaa mazə.

30 War sa favə mazə kuma slanakə mali va va na, kuyahə kuyahə slakwanti kubeŋer kən ghən ci. Sa nza na dzar tə kələm ghəci niy dza ki na, cəkeʼ mbəzli niy nay, mbaʼ ghəshi nay kuɓaŋ buhu na sa pakən na mbəɓa mbəɓa, kə ghəshi. 31 Ma kə mazə na: «Nza Hiyala ɓasakənɗa nguvəə gura caslakə na yən kə zlay Elize zəghu Shafat tə ghumiy ndatsə,» kə.

Mazə mbə ɗi pəəsli Elize, mbaʼ Elize gəzəkə kumaa dza ta məniva

32 Ghalaɓay, kiy ghyi tsa ci niy nza Elize mbə sləka kuma ghəshi lə mbəzli dikə dikə ni sləkə məlmə. Dzəghwa mazə mbaʼ ghunay ndə mbə ka sləni ci va Elize. Ma kə Elize kaa mbəzli va, ntsa ghunay mazə va mbə kwaliy na: «Ava ghuy nay ndə bəkupə tsa va ghunikə ndə ta sla ghən tə ya. Fə tə ghuy ghən ti. Səəkiy ma ntsa ghunay na vay, kalay tə ghuy gəzli mbaʼ ghuy makəti va sakə. Talay, mbə gaka na səɗa ntsa ci va dikə tsa tə səəbə ci mbə səəkə,» kə. 33 War ghəci ghulay mbə gəzə kuma na, mbaʼ mazə səəkiy, ma kə kaa Elize na: «Kəəti wa dzee zhiniy ndəghə va Kwa sləkəpə ghula ghənzə ɓəkə ngəraʼu tsaa?» kə.