Zliya
Esdəras
Kuma dza məndiy gha sənataa dzəkən zliya na
Zliya nay, Esdəras ntsaa kurahəhu kuma pəhəti Kwa sləkəpə Hiyala ka Izərayel tsasliti na. Ghəshi lə ka Izərayel bələku bələku bakəmətsəkə niy zhəghəkəvay na tə hiɗi Babilunə sa niy kəəsəhushi məndi. Ɗaŋ na kushalahi gəzə na kuma dəʼu ghən tsa ci ti shi (7.27-28, 8.1-34). Kumaa məniva mbə zliya na gwanatay, kumaa nighəə dzəkən məlmə Zheruzalem na. Sa nza nay, səəkə mbəɓa ka bərci kuma ka ka Izərayel məniy səəkə zhini mbəɓa naa dza kwa nuw kuma Hiyala diɓa.
Dzəkən mbəzli dikə dikə bakə gura zliya naa gəzə kuma. Kar Zurubabel (vəh 1-6) ghəshi lə Esdəras (Vəh 7-10). Mbəzli bakə ni va niy ʼwanshi na kwal kaa ka Izərayeləə zhəghəkəvashi dzəmbə məlmə Zheruzalem saa niy kəəsəhushi mazə ka Babilunə. Mbə zliya nay, ta nay dza ghummə njasa jihəkəvay Zurubabel ta guma hiɗi ka Izərayel dza kwa na ci bəla. Ma Esdəras na, mbaʼ jahambəvay dzəmbə guma kuma dza Kwa bəla nuw Hiyala. Ndə sləkə mbəzli nja Zurubabeliy, zhiniy nganti məlmə Zheruzalem lə ghyi tsa Hiyala na na ci kumaa niy tsəva na mbə, (3.8, 5.2). Sa nza nay ghyi tsa Hiyala va jikə na mbəzliy mənishi ka mbəzli nzə, zhini ghəci ci nza tsa nza Hiyala mbə mbəzli nzə. Ma Esdəras ghəci dikə tsa ka ta Hiyala na, ka tsəva ta mbə ka Izərayel nza ɗewɗew kwa kuma Hiyala, ka nuw njasa niy nuw ghəshi kwataŋa (7.10). Sləni mbəzli bakə ni vay, ta zhini shəndəkə zhəti hiɗi ka Izərayel, mbaʼ ta mbə mbəzli zhiniy nuw Hiyala njasa niy nuw ghəshi kwataŋa na.
Kwa taŋa kuma tsasliti məndi zliya na tiy, ta mbə məndiy sənata kumaa niy mənita na. Va tsəgha gəzə məndi njasa niy zhəghəkəvashi mbəzliy niy kəəsəhu mazə ka Babilunə, ka ci njasa məniva kumaa niy gəzanakəshi Hiyala kaa jijihishi ka Izərayel ghala mbəradzəta. Mbə gəzə na zliya na dzəkən njasa ka Hiyalaa zhəghəkə ntsaa dzay dzəmbə məni kuma jikir naa dzəghwa kwal tsa nzə. Zhəghəva tsa vay, aa nza sa ndə kutiŋ, ya sa mbəzliy nuw Hiyala mbə cikə Hiyala tsa kutiŋ tsa, ya sa mbəzliy nuw Hiyala lə slən tsa Jikəva tsa shi ka sa kutiŋ tsa, ya sa məlmə, ya sa mbəzli tə hiɗi kutiŋ ni gwanashi. Lə kwal tsa tsəgha tsa va ka Hiyalaa zhəghəkə mbəzli dzəghwa kuma nzə ghəshi kə tərəshiy dzəmbə kuma jikir na, ya dzəmbə ɗi shi tə hiɗi. Ka na dzay, mbaʼ ɓanavəshi yəwun bərci, lə yəwun sənata kuma dza kwa bəla kuma Hiyala.
Mbaʼ kə ndəə ɗi zhiniy məniy ka ndə nuw Hyalay, ə ka ndəə məni shi ka məndiy məni ta nza ɗewɗew kwa kuma nzə. Tsati ma ghummə titihu kaa Hiyalay, Tiɓa na Yesu ghəci ndə ta Hiyala tsa ghummə dikə tsa ta yaɓanti zəzə kuma ghummə lə nefer ghummə ta nza ghəshi ɗewɗew. Cəkeʼ dza naa ɓanti kuma jikir na kən ghummə, mbaʼ yaɓantəmmə ɗewɗew, kala kama kuma jikir na dzar kwa ghummə, mbaʼ zhiniy jakayimmə lə Hiyala, ka mənimmə kuma wuzə na njasa kwataŋa.
Avanta kuma dikə dikə na mbə zliya na:
Njasa kaʼuti məndi ghyi tsa Hiyala (vəh 1-6)
Kuma pəhəti mazə Shirus, mbaʼ kwataŋa mbəzliy zhəghəkəvashi dzəti hiɗi ka Palestinə kwasəbə Zurubabel sa niy kəəsəhushi məndi (vəh 1-2).
Njasa zhini məndiy nga ghyi tsa Hiyala (vəh 3-6).
Njasa zhəghanti ka Izərayel nziy tsa shi (vəh 7-10)
Esdəras ʼwanshi kwal səəkə mbə məlmə Babilunə ta dzəmbə məlmə Zheruzalem kaa kwa baka zərə ka Izərayel niy kəəsəhu məndi (vəh 7-8).
Njasa dzəghwashi ka Izərayel kən kuma Kwa sləkəpə ka ɓəɓə miʼiy kamaa ka Izərayel, mbaʼ Esdəras cəʼuti Hiyala ti shi (vəh 9).
Njasa tsati ka Izərayel titihu mbaʼ Hiyala zhiniy zləɓavə nziy li shi (vəh 10).