Nehemiy
Shi dza məndiy gha sənashi dzəkən zliya na
Zliya nay, Nehemiy tsasliti na; slən tsa ci na sa ti (vəh 1.1). Ghəciy, ndə dikə niy nza na mbə ka Zhəwifə, zhini ntsa dikə tsa mbə ka sləni mazə ka Persə ghəci. Ndə ta Hiyala niy nza naw. Zal gar pəghə kuma ci məndi, mazə tsa dzama her ci va kuma. Mbaʼ kə tarəkə məni kumay, kar naa gulaɓə va ka mbəzə ciw (vəh 4.8).
Ta mbə jijihishiy sənata kumaa taŋəta geʼi lə tsahuti vəghu tsa nza dimə ti mbə nziy tsa ka Izərayel tsasli Nehemiy kuma na. Kumaa mənita kataŋ geʼi lə vəghu tsaa niy zhəghəva ka Izərayel zhəti hiɗiy niy ɓanavə shi Hiyala saa niy kəəsəhushi məndi ka mevivi tə hiɗi Babilunə na sa sla na. Əə ɗi na citi, ya lə mezhizhiy kamaa ka Zhəwifiy, ka bashi kuma tarəkə na məni nzə Hiyalaw, kə (vəh 2.6).
Bakə na ghən tsa kuma dikə dikə na mbə zliya na. Kafə na tə kwataŋa vəh paʼa tə kwa mbərfaŋay, dzəkən njasa kaʼuti məndi kələm tsaa dəzlay məlmə Zheruzalem gəzə na kuma. Niy tərə va kwaŋ ni veher na, dzəkən njasa zhəghanti ka Izərayel nziy tsa shi lə njasa ɓanavə ghəshi nefer shi kaa Hiyala. Dzəkən nga shiy lə dzəkən ɓənipə kuma dza məndi ta məni na kuma gura məndiy gəzə kumaa dzəkən kwa zliya na. Təruŋ niy ɓanavə Nehemiy nəfə tsa ci kaa Hiyala (vəh 4.3), zhini təruŋ ghəci tarəkə ghəra sləni kala dziy ma liy hum kaa Hiyala ci va. Hiyala va fanambə na kaʼu kələm tsaa dəzlay məlmə Zheruzalem va mbə nəfə tsa ci.
Əə cimmə zliya na njasa dza ndəə ɓarvay mbə məni mava ta dzəti pi tsa gumanati Hiyala. Zliya na diɓay, ɗaŋɓa dzəkən la məlmə Zheruzalem lə kaʼu kələm tsaa dəzlay məlmə va gəzə na kuma. Kumaa ɓənimmə na ta mbə ghummə sənay, ka ɗi Hiyala her ghummə dzaw, mbə ndəghummə na, mbə ɓəmmə bərci diɓa pə ghummə.
Kələm tsa Zheruzalem va kaʼwakati Nehemiyiy, a kuma ɗi naa ciy səvəri tiɓa dza kwa kuma Hiyala. Ɗi naa gəziy, mbə mbəzli nzə na Hiyala ka ghəra sləni mbə shi. Aa ɓəmmə na bərci gwanammə ta mbə ghummə gumati nziy tsa ghummə njasa gumati məndi va kələm tsaa dəzlay məlmə Zheruzalem. Ghala vəghu tsa dza ghummə zhiniy gumati nziy tsa ghummiy, ta nziyta dza Hiyala lə ghummə, ka ghəra sləni lə bərci mbə ghummə lə ghummə. Səvəri mbə nziy tsa ghummə dza ghummə ci lə kataŋ na bərci va Hiyala wuzə hur tsa nzə pə ghummə.
Njasa nuwva kuma mbə zliya na
Njasa kaʼuti məndi kələm tsa məlmə Zheruzalem vəh 1-7
Nehemiy dzəkuva ta sləni ci vəh 1-2
Nehemiy cəʼu Hiyala vəh 1
Nehemiy ɗuw kwal va mazə vəh 2.1-8
Nehemiy kafəə dzəmbə məlmə Zheruzalem vəh 2.9-20
Njasa ngakati məndi kələm tsaa dəzlay məlmə Zheruzalem vəh 3-7
Fə gizlgizl miy dəghahiy dzəmbə məlmə Zheruzalem vəh 3
Mbəzliy ɗima kuma ka Zhəwifə mbə pəla kwal tsaa bashanti kaʼu kələm vəh 4-5
njasa kəranti məndi sləni kaʼu kələm vəh 6.15-19
Məndi mbərati ka Izərayel ta sənay ɗaŋ tsa shi vəh 7
Njasa zhəghanti ka Izərayel nziy tsa shi vəh 8-13
Məndiy jangəti kuma pəhanatishi Hiyala kaa ka Izərayel vəh 8
Ka Izərayel zhiniy slati kiri lə Hiyala vəh 9-10
Ka Izərayel zləɓavə məni kuma mbə sla kiri vəh 11-12
Nehemiy gumanti nuw Hiyala dza kwa bəla ɗaŋ vəh 13