Ka Zhəwifə tihəvərivashi lə miʼi shi kamaa ka Zhəwifə
10
Ma Esdəras məgəlɓə tə shinin ci, miy ghyi tsa Hiyala, ka wahə, ka cəʼu Hiyala, ka tsanta titihu va kuma shi jikir na ki na, mbaʼ ka Izərayel ɗaŋ dalala ɓasəshi vəgha. Zhər lə miʼi, mbaʼ ndərazhi, war ə ghəshiy wahə təruŋ təruŋ gwanashi. 2 Dzəghwa ma kə Shekaniya zəghu Yehiyel, ntsaa səvəri kwa miy dəgha Elam kaa Esdəras na: «A ghiy mananati kuma jikir na təruŋ kaa Hiyala ghummə, sa ɓəvə ghiy miʼiy kamaa ka Izərayel, ghyehi mbəzli tə hiɗi ni. Ya tsəgha nzə kiy, ka nə ghummə gwaʼa na kuma ka Izərayel tsəgha, pə ghumuw. 3 Ə pə ghummə pəhəti, mbaʼ ghummə slati kiri kwa jipə ghummə lə Hiyala ghummə, ta tihəvərivammə lə miʼiy kama va mbə hulfə ghummə gwanashi, lə ndərazhi shi ta. Ma nza ghiy nuw kuma ciŋiy gha va, ghuy lə nihuti mbəzliy nuw kuma pəhəti Hiyala ghummə gwanashi. Ka nuw kuma njasa pəhəti Hiyala. 4 Ə pə ghaa kafə, a gha ɓəvə kuma va mbə dəvə gha ta nighəə dzəkən. Kwasəbə gha dza ghiy nza, jihəkəvaŋa a gha məni kuma va,» kə.5 Sa gəzəkə na tsəgha ki na, dzəghwa Esdəras mbaʼ satiy, ma kə kaa mbəzli dikə dikə ni mbə ka ta Hiyala, lə kaa mbəzli mbə takə tsa Levi mbaʼ ka Izərayel gwanashi na: «Zəməkəm fəla ta məni kuma gəzəkə Shekaniya va,» kə. Dzəghwa ghəshi gwanashi mbaʼ ghəshi zəməkə fəla. 6 Dzəghwa Esdəras ki, mbaʼ kafiy dzəghwa tə pi tsaa niy nza na va miy ghyi tsa Hiyala, ka dzay dzakə ghyi tsa Yuhanan zəghu Eliyashiv, mbaʼ dzaa nziyiy kiyɓa. Ya tsəgha nzə kiy, kala zləɓa ma zəmə shiy ya sa shiy ghəci, sa nza na təruŋuy nəfə tsa ci niy zhanci va kuma gəmgəm na va tərəŋuta na niy mənti mbəzliy niy zhəghəkəvashi va, sa niy kəəsəhushi məndi.
7 Liy hum ki na, mbaʼ məndi ghunay miy kaa mbəzliy zhəghəkəvashi gwanashi dzəmbə məlmə Zheruzalem lə dzəti hiɗi Zhuda gwanashi, ta ɓasəva ghəshi mbə məlmə Zheruzalem. 8 Ma kə mbəzliy sləkə ka Zhəwifə lə nihuti mbəzli shi dikə dikə ni kaa kuma pəhəti ghəshi na: «Vici mahəkanə sliy məndi ta ɓasəva, ntsaa dzaa səəkiy may, ta ɓasəhu shi ci gwanashi dza məndi, mbaʼ məndi ɓanti mbə hulfə ka Zhəwifə» kə ghəshi. 9 Ma mbə vici mahəkanə na va ki na, mbaʼ zhər mbə takə tsa Zhuda lə ni mbə takə tsa Beŋzhameŋ ɓasəshi gwanashi mbə məlmə Zheruzalem ki, tə hi bakəmətsəkə mbə kwa məsleɗa tir. Mbaʼ ghəshi səəkəə ɓasəshi kwa tipə kiy ghyi tsa Hiyala va. War ə ghəshiy gurəgurə gwanashi va kuma va lə va tasli, sa niy nza vanə mbə nzəmə. 10 Dzəghwa Esdəras ndə ta Hiyala, kafə kafiy, ma kə kaa ngəshi na: «Ka Izərayel, a ghuy təvəti kuma təruŋ, sa nza na mbaʼ ghuy ɓəɓəvə miʼiy kamaa ka Izərayel ta nza ghəshi ka miʼi ghuy. Lə kuma mənti ghuy va tsəgha nay, a ghuy mətsahata nahuti kuma jikir naa dzəkən na mənti mbəzli mbə hulfə ghummə va kaa Hiyala. 11 Va tsəgha kiy, ə pə ghuy sənata kuma ghuy jikir na kwa kuma Kwa Sləkəpə, Hiyala jijihiŋuy, a ghuy məni kuma ɗi na. ka jakəva ghuy lə mbəzli tə hiɗi ni ma, ə pə ghuy təhəvərivaŋuy lə miʼiy kamaa ka Izərayel,» kə.
12 Ma kə mbəzliy ɓasəshi va zlaŋzlaŋ na: «Tsəgha na, ta məni dza ghiy njasa gəzəkə gha va. 13 Ə na na nza nay, ɗaŋ nza ghiy, zhini həviya pi. Ka mbay ghiy nziyŋiy tikə tə ngula va tasliw. Zhini diɓay, kuma gar sləkanti mbə vici kutiŋ ya mbə vici bakə na sanaw. Sa nza nay, ɗaŋ na mbəzliy mənti kuma jikir na dza kwa bəla va mbə ghiy. 14 Wəzəɓa dza mbəzli ghiy dikə dikə niy nziyshi tikə kwa pi tsa mbəzli gwanashi na. Ma nza mbəzli mbə ka Izərayeləə ɓəvə miʼiy kamaa ka Izərayel səəkə dzəghwa kuma shi geʼi lə vəghu tsa dza məndiy gəzanshi, ghəshi lə mbəzli shi dikə dikə ni, mbaʼ ka sla ghuvə mbə məlmə shi. Ghalaɓa kiy, nza ghummə gumanti kuma va wuzə, ma nza nəfə tsa Hiyala ghummə va satiy təruŋ tsaa dzəkən ghummə va kuma va dəpiy,» kə ghəshi.
15 Ma kar Zhunataŋ zəghu Asahel ghəshi lə Yahəzəya zəghu Tikwa na shi ki na, kala zləɓa ma kuma va ghəshi, ka kanshi dəvə kar Mashulam ghəshi lə Shabətay ndə ta Hiyala. 16 Niy tərəmbə ka Izərayeləə zhəghəkəvashi na shi ki na, mbaʼ ghəshi zləɓavə məni kuma va. Dzəghwa Esdəras ndə ta Hiyala təraʼ təraʼ təravə mbəzliy sləkə mbəzli lə slən lə slən njasa nza ghəshi kwa miy dəgha shi. Dzəghwa mbəzli va ki mbaʼ ghəshi nziyshi tə kwa taŋa vici mbə kwa maŋa tir ta sləka kuma va. 17 Ma tə kwa taŋa vici mbə kwa taŋa tir ki na, mbaʼ ghəshi kəɗanti sləka kuma mbəzliy niy ɓəɓəvə miʼiy niy kamaa ka Izərayel gwanashi.
Sləneɗemer mbəzliy niy təvəti kuma
18 Mbə ka ta Hyalay, avanashi mbəzliy niy ɓəvə miʼiy kamaa ka Izərayel:
Mbəzliy səvəri kwa miy dəgha Zhuzəwe zəghu Yutsadak ghəshi lə ngwardiyiy: kar Maseya, mbaʼ Eliyezer, mbaʼ Yariv, mbaʼ Gedalaya. 19 Dzəghwa mbaʼ ghəshi zləɓavə, zəməʼ kaa fəla kwa kuma mbəzli, ta təhəvərivashi lə miʼi shi kamaa ka Izərayel, mbaʼ ghəshi kəsəkə gamə ta sləniy kaa Hiyala, ta mbə ghənzə pəlata kuma shi jikir na. 20 Avanashi nihuti mbəzliy zləɓavə diɓa:
Mbə mbəzliy səvəri kwa miy dəgha Iməriy, kar Hanani ghəshi lə Zevadiya.
21 Mbə mbəzli kwa miy dəgha Harimiy, kar Maseya, mbaʼ Eliya, mbaʼ Shemaya, mbaʼ Yehiyel, mbaʼ Uziya.
22 Mbə mbəzli kwa miy dəgha Pashəhuriy, kar Eliyuwenay, mbaʼ Maseya, mbaʼ Yishəmayel, mbaʼ Netanel, mbaʼ Yuzavad, mbaʼ Eliyasa.
23 Mbə mbəzli mbə takə tsa Leviy, kar Yuzavad, mbaʼ Shimey, mbaʼ Kelaya tsa ka məndiy har Kelita diɓa, mbaʼ Petahiya, mbaʼ Yehuda, mbaʼ Eliyezer.
24 Mbə ka ha cemeriy, Eliyashiv.
Mbə ka ndəghu miy dəghay, kar Shalum ghəshi lə Telem, mbaʼ Uri.
25 Mbə nihuti ka Izərayel gwanashi niy, Avanashi:
Mbə mbəzli kwa miy dəgha Parewushiy, kar Ramiya, mbaʼ Yiziya, mbaʼ Malkiya, mbaʼ Miyamin, mbaʼ Eleyazar, mbaʼ Malkiya, mbaʼ Benaya.
26 Mbə mbəzliy kwa miy dəgha Elamliy, kar Mataniya, mbaʼ Zekariya, mbaʼ Yehiyel, mbaʼ Avədi, mbaʼ Yeremutə, mbaʼ Eliya.
27 Mbə mbəzli kwa miy dəgha Zatuy, kar Elyuwenay, mbaʼ Eliyashiv, mbaʼ Mataniya, mbaʼ Yeremutə, mbaʼ Zavad, mbaʼ Aziza.
28 Mbə mbəzli kwa miy dəgha Bevayiy, kar Yehuhanan, mbaʼ Hananiya, mbaʼ Zabay, mbaʼ Atəlay.
29 Mbə mbəzli kwa miy dəgha Baniy, kar Meshulam, mbaʼ Maluk, mbaʼ Adaya, mbaʼ Yashuv, mbaʼ Sheyal, mbaʼ Yeramut.
30 Mbə mbəzli kwa miy dəgha Pahat-Muwabiy, kar Adna, mbaʼ Kelal, mbaʼ Benaya, mbaʼ Maseya, mbaʼ Mataniya, mbaʼ Betsalel, mbaʼ Binuy, mbaʼ Manase.
31 Mbə mbəzli kwa miy dəgha Harimiy, kar Eliyezer, mbaʼ Yishiya, mbaʼ Malkiya, mbaʼ Shemaya, mbaʼ Shimeyuŋ, 32 mbaʼ Beŋzhameŋ, mbaʼ Maluk, mbaʼ Shemariya.
33 Mbə mbəzli kwa miy dəgha Hashumiy, kar Matenay, mbaʼ Matata, mbaʼ Zavad, mbaʼ Elifelet, mbaʼ Yeremay, mbaʼ Manase, mbaʼ Shimey.
34 Mbə mbəzli kwa miy dəgha Baniy, kar Maday, mbaʼ Amram, mbaʼ Uwel, 35 mbaʼ Benaya, mbaʼ Bediya, mbaʼ Keluhi, 36 mbaʼ Vaniya, mbaʼ Meremut, mbaʼ Eliyashiv, 37 mbaʼ Mataniya, mbaʼ Matenay, mbaʼ Yasay, 38 mbaʼ Bani, mbaʼ Binuy, mbaʼ Shimey, 39 mbaʼ Shelemiya, mbaʼ Natan, mbaʼ Adaya, 40 mbaʼ Makənadəvay, mbaʼ Shashay, mbaʼ Sharay, 41 mbaʼ Azarel, mbaʼ Shelemiyahu, mbaʼ Shemariya, 42 mbaʼ Shalum, mbaʼ Amariy, mbaʼ Zhuzef.
43 Mbə mbəzli kwa miy dəgha Nebuy, kar Yeʼiyel, mbaʼ Matitiy, mbaʼ Zavad, mbaʼ Zevina, mbaʼ Yaday, mbaʼ Yuʼel, mbaʼ Benaya.
44 Mbəzli va gwanashiy, a ghəshi niy ɓətəvashi lə miʼiy kamaa ka Izərayel, mbaʼ nihuti mbəzli ɗaŋ mbə shi niy yavə ndərazhi kwa shi.