Esdrasə 9

Kumaa dzəkən ka Zhəwifəə ɓətəvashi lə ghyehi mbə nihuti hulfəhi

Liy hum shi va ki na, mbaʼ mbəzli dikə dikə ni mbə ka Zhəwifə səəkəə kəsara. Ma kə ghəshi kaa ngəra na: «Mbəzli mbə hulfə ka Izərayel, lə ka ta Hiyala, mbaʼ mbəzli mbə takə tsa Leviy, təhəvərivashi ghəshi lə nihuti mbəzli tə hiɗi ni kamaa ka Izərayeluw. Mbə nuw kuma jijihi shi va gəmgəm na məni ka Kanan lə ka Hiti, mbaʼ ka Perizhi, mbaʼ ka Zhebuzi, mbaʼ ka Amun, mbaʼ ka Muwabə, mbaʼ ka Ezhiptə, mbaʼ ka Amur na ghəshi. 2 A ghəshi lə ndərazhi shi ɓəɓəvə ghehi mbəzliy kama vaa ka Zhəwifə tə hiɗi ni. Səvəri mbə kuma va ki na, mbaʼ hulfə ni Hiyala mbəzli dzavəɗita lə mbəzli tə hiɗi ni tsəgha ki. Mezhizhi ghummə ghəshi lə nihuti mbəzli ghummə dikə dikə ni gha naa dzashiy dzəmbə məni kuma gəmgəm na va», kə ghəshi kaa ngəra. 3 Sa favee kuma va tsəgha na, mbaʼ nəfə tsee satiy, kuyahə kuyahə yən slakwanti kubeŋer kən ghən tsee, mbaʼee taɗanti shiti mbə ghən tsee lə guzhemee gwaʼa, mbaʼee nziyra səsə məhərlee. 4 War tsəgha yən nziyra paʼa va vəghu tsa ka məndi vaa vəlanta shiy kaa Hiyala hetihwer. Mbəzliy niy hazləni va nguvə dza Hiyala ta slaa dzəkən ka Zhəwifəə zhəghəkəvashi va, tə mbərkə jikir tsa təruŋ tsa va mənti ghəshi na, mbaʼ ghəshi ɓasəshi kwasəbee gwanashi.

Esdəras cəʼu Hiyala ta mbəzliy mənti kuma jikir na

5 Ma sa məniy vəghu tsa dza məndi ta vəlanta shiy kaa Hiyala hetihwer ki na, mbaʼ nəfə tsee dəkiy. War ghulara niy nzee lə kubeŋeree va sliku sliku ni kən ghən tsee. Dzəghwee ki gaʼa yən ʼyambə shininee mbə hiɗi, mbaʼee kafashi dividivee dzəta ghumə kaa Hiyalee kwa Sləkəpə. 6 Ma pən kaa ngəta na: «A Hiyalee, ka mbee va haʼuw, sənayee njasa dzee kafə kumee ta nighəŋaw Hiyala yaw. Ɗaŋta mənti ghiy kuma jikir na ka taŋəti bərci, kala gar pəəzli ghiy və. Mbaʼ kə məndiy zli kuma ghiy va jikir nay, paʼa mə ghumə dza naa nza. 7 Ghala jijihiŋiy paʼa ndatsiy, a hulfə ghiy mənti kuma jikir na kwa kuma gha dalala. Tə mbərkə kuma ghiy va jikir na ki na, mbaʼ gha zlashi mezhizhi nihuti mbəzli, mbaʼ ghəshi mbaŋiy, ghiy lə mezhizhi ghiy, mbaʼ ka ta Hiyala ghiy. Dzəghwa ghəshi mbaʼ ghəshi irətəŋiy mbə mbəzə, kəəsə kaa nihuti mbə ghiy, mbaʼ ghəshi pahu shi ghiy, mbaʼ haʼu dzay dzəkən ghiy, njasa nza ghiy tsa mbə sana. 8 Sana kiy Hiyala ghiy Kwa sləkəpiy, a gha məntəŋiy wuzə hur tsa gha ta vəghu Juw tsətsə. Dzəghwa gha mbaʼ gha ɓanavəshi kwal kaa nihuti kwa tərmbə mbəzli mbə hulfə ghiy ta zhikə ghəshi ta nziy tə hiɗi gha. Mbə kuma mənti gha va tsəgha na kiy Hiyala ghiyiy, a gha mbəray waŋ pi tsa gha kaa ngəŋiy diɓa, a gha zhanambə piy mbə ghiy, mbə mava tsa məni ghiy. 9 Ta na navay Hiyala ghiyiy, mevivi nza ghiy, ya tsəgha nzə kiy, zlaŋiy gha mbə mava tsa məni ghiy vaw. Sa dza ghay, mbaʼ gha ndəŋway nəfə tsa mazə ka Persə ta məniŋiy wuzə hur ghəci, mbaʼ ndaŋiy kwal ta zhini hulfə ghiy nza tiɓata, mbaʼ ta zhini ghiy ngakati ghyi tsa gha gha Hiyala ghiy, ka kaʼuti kələm tsa ci dzəghwa tə pi tsaa niy ngazlay na. Ta mbə ghiy kumavə pi tsa dza ghiy nziyŋiy ti kala gar ndəŋwaŋiy shiy mbə məlmə Zheruzaləm mbaʼ tə hiɗi ka Zhuda.

10 Sana kiy Hiyala ghiyiy, njaa dza ghiy niy dzəkən kumaa mənita naa? Ta na navay a ghiy dzəghwaŋiy kən kumaa niy pəhətəŋiy gha. 11 A ghiy zlata nuw kumaa niy gəzaŋiy gha lə miy tsa ka gəzə kuma gha niy ghəraŋa sləni. A gha niy tsəhaghwa səəti kwa sləmə ghiy. Ma pə gha niy niy: “Hiɗi dza ghuy ni ta dzətishi, ta zləghushi ka shi ghuyiy, hiɗi hway mbəzli lə jikir na ghəshi, sa nza nay, ka məni kuma jikir na na mbəzli ti shi. Ya dza kwa namaɓa bəlay, a kuma shi va gəmgəm na təhay hiɗi va. 12 Va tsəgha kiy, əntaa ghuy zləɓa ghehi ghuy ɓəva li shi ma, əntaa ndərazhiy zhər ghuy ɓəva lə ghehi shi ma. Əntaa ghuy pəlanshi zərkə ma, əntaa ghuy pəla wuzə tsa shi ma. Ghalaɓay, ta məniŋuy dza ghuy ka hulfə mbəzli ka bərci, ka zəmə shi wuzə ni tə hiɗi va. Nza ndərazhi ghuy zəmə ghyi ta shi va, ta kwa ndimndim,” pə gha niy ni kaa ngəŋiy. 13 A Hiyala ghiy, kwemeriy kasaŋiy ni gəmgəm ni gwanashiy, tə mbərkə kuma mənti ghiy jikir na, sa nza fəti va ghiy dalala kəsaŋiy ghəshi. Ya tsəgha nzə kiy, ɓasakənŋiy nguvə gha geʼi lə kuma ghiy jikir naw, a gha zlaŋiy tə ghuməŋiy ghiy shi tikə ni. 14 Liy hum kuma va sana kiy, nza ghiy zhiniy dzəghwa kən kuma pəhəti gha, ka jakəva ta ɓəva lə hulfə mbəzliy məni shi gəmgəm ni va na? Mbaʼ pə ghiy məni tsəghay, ta satiy dza nəfə tsa ghaa dzəkən ghiy mbaʼ gha zantəŋiy gwanaŋiy kala tərə ndə ya kutiŋ. 15 Sa nza ghaa Hyalaa nuw kuma lə kwal tsa nzə kiy Hiyala ka Izərayeləə sləkəpiy, dzəghwa gha mbaʼ gha tərmbiyŋiy, ka mbəzliy mbəlishi, ghiy nihuti mbəzli mbə hulfə ghiy. Ya tsəgha kama ghiy gar dzəghwa kuma gha va kuma ghiy jikir nay, avanaŋiy kwa kuma gha sana, lə kuma ghiy va jikir na,» pən kaa Hiyalee Kwa sləkəpə.