Sləneɗemer mbəzliy zhəghəkəvashi zhimɓə məlmə Zheruzalem kwasəbə Esdəras
8
Avanashi mbəzliy sləkə miy dəghahi, lə mbəzli shi zhəghəkəvashi səəkə tə hiɗi Babilunə kwasəbee yən Esdəras ghala vəghu tsaa məni Artaserses mazə:2 Gershum Kwa miy dəgha Pinhasiy,
mbaʼ Daniyel kwa miy dəgha Itamar,
mbaʼ Hatush kwa miy dəgha Davitə,
3 mbaʼ ndə kutiŋ kwa miy dəgha Shekaniya,
mbaʼ Zakari, kwa miy dəgha Paruhə, lə ngwardəhiy, zhər bələku mbaʼ cifəmətsəkə ghən kən,
4 mbaʼ Eliyuhinay zəghu Zeraya səvəri kwa miy dəgha Pahatə-Muwab lə zhər diwiy diwiy bakə kwasəbə,
5 mbaʼ Shekaniya zəghu Yahaziyel səvəri kwa miy dəgha Zatu lə zhər bələku bələku mahəkanə kwasəbə,
6 mbaʼ Ebedə zəghu Yunatan səvəri kwa miy dəgha Adiŋ lə zhər cifəmətsəkə kwasəbə,
7 mbaʼ Yeshaya zəghu Ataliya səvəri kwa miy dəgha Elam lə zhər mbərfəŋəmətsəkə kwasəbə
8 mbaʼ Zevadiya zəghu Mikayel səvəri kwa miy dəgha Shefatiya lə zhər dəghəsmətsəkə kwasəbə,
9 mbaʼ Ubadiya zəghu Yehiyel səvəri kwa miy dəgha Yuwav lə zhər bələku bələku bakə mbaʼ məŋ lə dəghəsə ghən kən kwasəbə,
10 mbaʼ Shelumit zəghu Yushifiya səvəri kwa miy dəgha Bani lə zhər bələku mbaʼ kwaŋəmətsəkə ghən kən kwasəbə, 11 mbaʼ Zakari zəghu Bevay səvəri kwa miy dəgha Bevay lə zhər bakəmətsəkə dəghəsti kwasəbə,
12 mbaʼ Yuhanan zəghu Ha-Katan səvəri kwa miy dəgha Azəgad lə zhər bələku mbaʼ məŋ kən kwasəbə,
13 Mbaʼ niy kəray Juw Juw ni ndərazhiy səvəri kwa miy dəgha Adunikam, kar Elifeletə lə Yeyel mbaʼ Shemaya, lə zhər kwaŋəmətsəkə kwasəbəshi.
14 mbaʼ kar Utay lə Zakur səvəri kwa miy dəgha Bigəway lə zhər mbərfəŋəmtsəkə kwasəbəshi.
Esdəras mbə dzəkuva ta zhəghəvaa zhimbə məlmə Zheruzalem
15 Dzəghwee yən Esdəras ki ɓasə yən ɓasəti mbəzli va gwanashi dziy miy həl tsaa hu va dza kwa Ahawa. Vici mahəkanə ghiy mənti tiɓa. Nighə nighə pən kaa mbəzliy ɓasəshi va, lə ka ta Hiyala tiɓa mbə shi na, nay ntsa mbə takə tsa Levi ya mbə shi ya kutiŋuw. 16 Dzee ki mbaʼee ghunashi mbəzli dikə dikə ni: Kar Eliyezer, mbaʼ Ariyel, mbaʼ Shemaya, mbaʼ Elnataŋ, mbaʼ Yarib, mbaʼ Elnataŋ, mbaʼ Natan, mbaʼ Zakari, mbaʼ Meshulam, mbaʼ mbəzliy ɓəni kuma pəhəti Hiyala kaa mbəzli bakanashi, kar Yuyarib ghəshi lə Elnataŋ. 17 Mbalam kəsayim Idu mazə tsa ka Kashifiya, pən kaa ngəshi. Dzee mbaʼe gəzanshi kuma dza ghəshi ta gəzə kaa kar Idu lə ngwardəhiy ka ghəra sləni Juw Juw na kiy ghyi tsa Hiyala mbə məlmə Kashifiya, nza ghəshi mbəə ghunashəŋiy mbəzli ta sləni kiy ghyi tsa Hiyala ghiy. 18 Sa nza na kwasəbə ghiy Hiyala ghiy niy nza ta kəətiŋiy ki na, mbaʼ ghəshi səəkəshi lə Shereviya, ndə məhərli, ntsaa səvəri kwa miy dəgha Mali, mbə takə tsa Levi, zəghu Zhakubə. Ghəci mbaʼ ndərazhi ci mbaʼ ngwardəhiy zhər məŋ lə dəghəsə niy səəkəshi na. 19 A ghəshi niy zhiniy pəməvə Hashaviya, mbaʼ Yeshaya ntsaa səvəri kwa miy dəgha Merari, mbaʼ ngwardəhiy lə ndərazhi shi, zhər bakəmətsəkə niy nza ni va. 20 A ghəshi niy zhiniy pəməvə ka ghəra sləni Juw Juw na kiy ghyi tsa Hiyala, mbəzli diwiy diwiy bakə mbaʼ bakəmətsəkə ghən kən diɓa. Mbəzli vay, kar Davitə lə mbəzli dikə dikə ni tə hiɗi ci niy təravəshi na, mbəzli sənashi məndi sləneɗemer shi niy nza ghəshi gwanashi. Ta kəəti mbəzli mbə takə tsa Levi mbə sləni niy təravəshi kar Davitə
21 Ma tiɓa miy həl Ahawa tsa va ki na, mbaʼee gəzanshi kaa mbəzli a ghiy məni sumay ta ci daw bərci tsa ghiy kaa Hiyala ghiy, nza ghənzə mbəə kəətiŋiy mbə dza dza ghiy va ta dza, ghiy lə ndərazhi ghiy, lə shi va ghiy gwanashi. 22 A haʼu niy ghəraɗa va ɗuw ka sawji lə ka zlərə gədewesli va mazə ta ndəghuŋiy ghəshi mbə kwal va ka mbəzə ghiy. Sa nza nay, a ghiy niy gəzanakə: «Kar Hiyala ghiy fakən dəvə nzə kən mbəzliy ɓanavə nefer shi gwanashi. Ma na mbəzliy zhəghanavə humiy, kar naa ɓakən nəfə kən shi gwanashi təruŋ, ka sanshi ngəraʼu,» pə ghiy niy ni kaa ngəci. 23 Va tsəgha ki na, dza ghiy tapə ta məni sumay, ka cəʼu Hiyala ghiy ta kətiŋiy ghənzə, mbaʼ zləɓavə cəʼu ghiy va.
24 Liy hum ki na, dzee təraʼ yən təravə mbəzli dikə dikə ni mbə ka ta Hiyala məŋ lə bakə, mbaʼ kar Shereviya, lə Hashaviya, lə nihuti ngwardəshi məŋ kwasəbə shi. 25 Dzee kwa kuma shi bərəkə bərəkə yən bərkanavəshi shi tsəhəti kar mazə va lə mbəzliy canci kuma, mbaʼ nihuti mbəzli dikə dikə ni tə hiɗi ci, mbaʼ ka Izərayel tə hiɗi va, ta nga ghyi tsa Hiyala ghiy. Shi vay, gəna, lə mbəzə kwa shamshama, mbaʼ nihuti shi nza dimə ti shi niy nza ghəshi. 26 Gwanashi tsa shiy niy ɓanavəshee vaa dzəmbə dəvə shiy: Gəna tunə bakəmətsəkə, mbaʼ shi tə dimə məntim tə tsahi gəna tunə mahəkanə, mbaʼ mbəzə kwa shamshama tunə mahəkanə, 27 mbaʼ ceʼuer mənti məndi tə mbəzə kwa shamshama bakəmətsəkə, lə mbəzə kwa shamshama tanə tanə diwiy məŋ niy məntishi məndi, mbaʼ kwekwer mənti məndi tə mbəzə ghəm na ka mbərə lə dimə ti shi nja mbəzə kwa shamshama bakə. 28 Ma pən kaa ngəshi ki na: «Njasa nza ghuy vaa mbəzli Kwa sləkəpiy, tsəgha na shi ni ka shi nzə kuraku. Gəna na, lə mbəzə kwa shamshama nay, vəli vəlanati mbəzli njasa tarəkə ghəshi mbə nefer shi kaa Kwa sləkəpə, Hiyala jijihimmə na ghəshi. 29 Ndəghuti tə ghuy shi wuzə ni ni wuzə, paʼa va tsəhə tsa ghuy mbə məlmə Zheruzalem. Sa ka ghuy tsəhəŋuyiy, nza ghuy bərkətishi kwa kuma ka ta Hiyala dikə dikə ni ghəshi lə mbəzli mbə takə tsa Levi, mbaʼ kwa kuma mbəzli dikə dikə ni kwa miy dəghahi mbə hulfə ka Izərayel. Dzar mbə ceker ka məndi vaa fə fə shiy kiy ghyi tsa Kwa sləkəpə pə ghuy dza bərkə shi va,» pən kaa ngəshi.
30 Dzəghwa ka ta Hiyala ghəshi lə mbəzli mbə takə tsa Levi ki, mbaʼ ghəshi ɓəvə shi bərkəti məndi va gwanashi, gəna va, lə mbəzə kwa shamshama va, mbaʼ shi nza dimə va ti shi, ta ɓəshi dzəmbə məlmə Zheruzalem ta fə shi kiy ghyi tsa Hiyala ghiy.
Mbəzliy niy kəəsəhu məndi zhashiy zhimbə məlmə Zheruzalem
31 Dzəghwa ghiy tə kwa taŋa tir, tə kwa məŋ lə baka vici ki, kafə ghiy kafəŋiy miy həl Ahava ta dzaa dzəmbə məlmə Zheruzalem. Mbə dza ghiy va gwanatay, a Hiyala ghiy niy fakən dəvə nzə kən ghiy mbaʼ ndəghutəŋiy va ka mbəzə ghiy lə va ka zləghu shiy kwa kwal. 32 Sa tsəhəŋiy ghiy mbə məlmə Zheruzalem na, mbaʼ ghiy dəkətəvaŋiy vici mahəkanə. 33 Ma tə kwa faɗa vici na, dza ghiy kiy ghyi tsa Hiyala ghiy bərəkə, ghiy bərkəti shi səəkə ghiy va li shi: gəna, mbaʼ mbəzə kwa shamshama, lə nihuti shi nza dimə ti shi. Mbaʼ ghiy fanambəshi mbə dəvə Meremutə ndə ta Hiyala, zəghu Uriya, ghəshi lə Eliyazar zəghu Pinhasə niy nza na, mbaʼ mbəzli mbə takə tsa Levi kwasəbə shi, kar Yuzabad zəghu Yeshuwa ghəshi lə Nuwadiya zəghu Binuwi 34 Shi va gwanashiy mbəra mbəra niy mbəratishi ghiy, zhini bərəkə ghiy bərkəti shəndəkə tsa shi, mbaʼ məndi tsaslaghwa shəndəkə tsa shi va gwanashi kwa zliya.
35 Dzəghwa mbəzliy zhəghəkəvashi va sa niy kəəsəhushi məndi mbaʼ ghəshi ndəniy shiy kaa Hiyala ka Izərayel. Avanashi shi ndiy ghəshi ta hulfə ka Izərayel gwanata: Kəɓəhi məŋ lə bakə mbaʼ gemim məsliɗəmətsəkə kwaŋti, mbaʼ ndərazhi təŋkesli mbərfəŋəmətsəkə mbərfəŋti, mbaʼ besher məŋ lə bakə ta mbə Hiyalaa pəlata kuma shi jikir na. Dəbəkəhi vay, ndi ndi niy ndantishi məndi gwanashi kaa Kwa sləkəpə. 36 Dza ghəshi mbaʼ ghəshi ɓanavə kuma pəhəti mazə ka Persə va kaa ngumənahi lə kaa nihuti mbəzli dikə dikə ni sləkə hiɗi dza kwa mərkwi va həl Əfəratə. Dza mbəzli va ki mbaʼ ghəshi kəətiti ka Izərayel mbə nga ghyi tsa Hiyala va.