Esdrasə 7

Səəkə tsa Esdəras ndə ta Hiyalaa dzəmbə məlmə Zheruzalem

Ghala vəghu tsaa niy məni Artaserses mazə tə hiɗi ka Persiy, a tsahuti ndə niy nza tiɓa Esdəras, kə məndi kaa slən tsa ci. Esdəras tsa vay, kwa miy dəgha Aruŋ ndə ta Hiyala tsa dikə tsa niy səvəri na, zəghu Seraya niy nza na. Seraya na, zəghu Azariya, Azariya na, zəghu Hilkiya, 2 Hilkiya na, zəghu Shalum, Shalum na, zəghu Saduk, Saduk na, zəghu Ahituv, 3 Ahituv na, zəghu Amariya, Amariya na, zəghu Azariya, Azariya na, zəghu Merayut, 4 Merayut na, zəghu Zerahiya, Zerahiya na, zəghu Uzi, Uzi na, zəghu Buki, 5 Buki na, zəghu Avishuwa, Avishuwa na, zəghu Pinhas, Pinhas na, zəghu Eliyazar, Eliyazar ki na, zəghu Aruŋ ndə ta Hiyala tsa dikə tsa. 6 Esdəras tsa vay, ntsaa kurahəhu kumaa niy pəhəti Kwa sləkəpə Hiyala ka Izərayel va, mbaʼ ɓanavə kaa Muyizə niy nza na. Kwasəbə niy nza Hiyala ci Kwa sləkəpə ka kəətiti mbə kuma məni na, Ya a shi ɗuw na va maziy, war mbə ɓancishi niy nza na. Dzəghwa na tə nahuti vici ki, mbaʼ kafiy mbə məlmə Babilunə ndəs tsəhiy mbə məlmə Zheruzalem.

7 Tə kwa mbərfaŋa piya Artaserses mbə maziy, a nihuti ka Izərayel, lə ka ta Hiyala, mbaʼ mbəzli mbə takə tsa Levi, mbaʼ ka ha cemer, mbaʼ mbəzliy nziy miy dəgha, mbaʼ ka ghəra sləni Juw Juw na dzar kiy ghyi tsa Hiyala niy zhəghəkəvashiy dzəmbə Zheruzalem kuraku. 8 Tə kwa cafa tirə, Artaserses mbə məni kwa mbərfaŋa piya ci mbə mazə niy tsəhə Esdəras mbə məlmə Zheruzalem ghəshi lə mbəzli va. 9 Fəca kwa taŋa vici, tə kwa taŋa tirə niy titi na vici ta kafə mbə məlmə Babilunə. Ma tə kwa taŋa vici tə kwa cafa tirə na, ndəs tsəhiy mbə məlmə Zheruzalem, kən niy nza dəvə Hiyala ci. 10 Ta na navay, lə nəfə tsa ci kutiŋ niy pəla Esdəras sənata kuma pəhəti Kwa sləkəpə, ka nuw kuma gəzəkə na, ka ɓananshi kuma pəhəti Hiyala va kaa ka Izərayel, ka canshi njasa dza ghəshi nziy.

Sləni ɓanavə mazə Artaserses kaa Esdəras

11 Avanata zliya ɓanavə mazə Artaserses kaa Esdəras ndə ta Hiyala, ntsaa kurahəhu kuma pəhəti Hiyala kwa sləkəpə, lə kuma gəzəkə na ta məni ka Izərayel: 12 «Yən yən Artaserses mazə tsa mezhizhi tsasli na zliya na kaa Esdəras ndə ta Hiyala, ntsaa kurahəhu kuma pəhəti Hiyala ta ghumə. Avee səkutəŋa

13 Avanata kuma gəzəkee ta məni məndi: Slən ndə ka Izərayel tsa tə hiɗee, lə ka ta Hiyala ghuy, mbaʼ mbəzli ghuy mbə takə tsa Levi, ka ɗi dzashi ghəshiy dzəmbə məlmə Zheruzalem kwasəbə ghay, ee ɓanavəshi kwal. 14 Ghiy lə mbəzli mbərfəŋ ni vaa cira kuma ghuniŋa naa dzəti hiɗi Zhuda, dzəmbə məlmə Zheruzalem ta dza ghaa nighəti nda njaa nu məndi kuma ɓənipə kuma Hiyala gha va nza zliya nzə ta dəvə gha. 15 Ghaa kafə diɓay, nza gha ɓəvə gəna, mbaʼ mbəzə kwa shamshama tarəkə ghiy lə ka cira kuma vəli kaa Hiyala ka Izərayel, Hiyala nza ghyi tsa nzə va mbə məlmə Zheruzalem. 16 Mbəzə kwa shamshama gwanata, mbaʼ gəna gwanata, njasa dza mbəzli tə hiɗi ka Babilunə gwanashiy tsəhəti diɓay, nza gha ɓasəvəshi. Ka gha dza diɓay, mbaʼ gha ɓasəvə shi dza mbəzli mbə hulfə ghaa lə ka ta Hiyalaa tsəhəti njasa tarəvə ghəshi mbə nefer shi ta kuma kən ghyi tsa Hiyala tsa ghuy va mbə məlmə Zheruzalem. 17 Sa ka gha tsəhəŋa mbə məlmə Zheruzalemiy, nza gha mənti məhərli lə gəna va, ta pa kəɓəhi slay, mbaʼ gemim, mbaʼ ndərazhi teŋkesli, mbaʼ shi zəmə zakə məndi ta vəlantashi kaa Hiyala, mbaʼ tay tsa ka məndiy vəlanta diɓa. Shi va gwanashiy, nza gha vəlantashi kaa Hiyala tə pi tsa ka məndiy vəli shiy kaa Hiyala ghuy mbə məlmə Zheruzalem. 18 Ma naa dzaa tərə gəna lə mbəzə kwa shamshamaa dzaa təriy, nza ghuy məni shi dza ghuy nashi wuzə gar məni ghuy lə ngwardəhiŋa, njasa dza naa təɓanta kaa Hiyala ghuy. 19 Shi ndaŋa məndi va ta ghəra sləni məndi li shi kiy ghyi tsa Hiyala ghay, nza gha dzaa fiyshi kwa kuma Hiyala mbə məlmə Zheruzalem va. 20 Ya a nihuti shi dza ghaa zhiniy ɗi ta məni kuma kən ghyi tsa Hiyala gha vay, lə gəna mazə pə gha dzaa pashi.

21 Yən yən mazə Artaserses gəzə na kaa slən ndə kəsə hutəvə tsa mazə tə hiɗi dza kwa bəla mərkwi va həl Əfəratə: Ya a shi dza Esdəras, ndə ta Hiyala tsaa kurahəhu kuma pəhəti Hiyala ta ghuməə ɗuw va ghuyiy, war njasa ɗi na pə ghuy dzaa mananati. 22 Ɓanavə tə ghuy gəna kiluw bələku bələku mahəkanəmətsəkə, mbaʼ alkamari kiluw bələku bələku mahəkanəmətsəkə bələku, mbaʼ tay litər bələku bələku faɗəmətsəkə, mbaʼ litər in bələku bələku faɗəmətsəkə, mbaʼ ghuni njasa dza naa ɗi. 23 Ya wa kuma dza Hiyala ta ghuməə gəzəkə ta məni məndi ta ghyi tsa nzə vay, war tsəgha kə məndi dzaa mənti. Va nəghətaa ghənzə ɓakən nəfəə dzəkən mbəzli tə hiɗee lə dzəkən ndərazhee. 24 Avanta nahuti kuma ɗi ghiy gəzaŋuy diɓa: «Əntaa ghuy dzaa ɗuw tsəhə ghən dzəti ghən tsa shi va ka ta Hiyala, lə mbəzli mbə takə tsa Levi, mbaʼ ka ha cemer, mbaʼ ka ndəghu miy dəgha, mbaʼ ka ghəra sləni Juw Juw na kiy ghyi tsa Hiyala ma, əntaa ghuy ɗuw tsəhə ghən və shi tə shi ɗəl ghəshi ma, əntaa ghuy ɗuw tsəhə ghən və shi tə kwal ma.

25 Na na ghay Esədərasiy, ə pə gha dzaa təravə ka sla nguvə lə mbəzliy sləkə ka sla nguvə, geʼi lə sənata kuma ɓanavəŋa Hiyala va kwa zliya nzə va kurahəhu gha. Mbəzli vay, ghəshi dza naa sla nguvə lə na kataŋ na kuma kwa jipə mbəzliy sənata kuma pəhəti Hiyala gha va, tə hiɗi njasaa dza kwa mirkwi va həl Əfəratə. Ma na mbəzliy sənata ma kuma pəhəti Hiyalay, nza gha ɓananshi. 26 Ghalaɓa ki, ya wa ntsaa dzaa ɗima fəti ta kuma pəhəti Hiyala, lə ta kuma pəhəti maziy, nza məndi ɓasanci nguvə geʼi lə fəti dzaa nza və. Ya ə dza məndi pəəsliti, ya ə dza məndiy təhanti tə hiɗi nza na ti shi, ya kuma dza məndi gəzanci wa, ya ə dza məndiy kalaghwa kwa fərshina,» kə mazə kwa zliya tsaslanavə na va kaa Esdəras.

Esdəras mananta usa kaa Hiyala

27 Ma kə Esdəras sa tsaslanavə mazə zliya va ki na: «Usa nə ya kaa Hiyala Kwa sləkəpə jijihimmə. Ghənzə fanambə na mbə nəfə tsa mazə ta fə shəndəkə ghəciy dzəti ghyi tsa Kwa Sləkəpə va mbə məlmə Zheruzalem. 28 A Kwa sləkəpə məntəra wuzə hur tsa nzə kwa kuma kar mazə lə mbəzliy canci kuma mbaʼ mbəzli dikə dikə ni gwanashi tə hiɗi ci. Sa nza na kwasəbee Hiyalee Kwa sləkəpə na, mbaʼee kumavə bərci, mbaʼee ɓasəvə nihuti mbə mbəzliy sləkə ka Izərayel ta zhəghəva ghəshiy dzəmbə məlmə Zheruzalem kwasəbee,» kə.