Esdrasə 6

Mazə Dariyus zləɓa kumaa dzəkən zliya tsaslanaghə məndi

Sa tsəhəta zliya va va mazə Dariyus, mbaʼ məndi janganati ki na, dza na mbaʼ gəzanshi kaa mbəzli, a ghəshi pəlati pihi ka məndiy fə shi tsasliti məndi, lə nihuti shi nza dimə ti shi mbə məlmə Babilunə. 2 Sa palashi məndi na, mbaʼ məndi kəsata zliya mənti məndi tə huta pəərə pəərə mbə məlmə Ekəbatanə, nahuti məlmə dikə na kwa kələm tə hiɗi Medi, tə hiɗi ka Babilunə. Ma kə məndi kaa kumaa niy mənita tsasliti məndi tə zliya va na: 3 «Shirus mbə məni kwa taŋa piya ci mbə maziy, Avanta kumaa niy gəzəkə na ta məni məndi: Ə kə məndi zhiniy ngakati ghyi tsa Hiyala tsaa niy nza va mbə məlmə Zheruzalem, nza məndi slaslanta shiy mbəɓa kaa Hiyala. Dzar tə pi tsaa niy dzar səɗa ghyi tsa va kwataŋay, zhar tiɓa kə məndi dzaa zhanati. Basa məŋ lə cifə kə bitə tsa ci dzaa nzaa dzəta ghumə, tsəgha buŋ tsa ci diɓa. 4 Lə hərezli fəɗi fəɗi ni tsəŋəzli mahəkanə, mbaʼ yəwun shighu tsəŋəzli kutiŋ kə məndi dzaa ngati. Kiy ghyi tsa mazə dza gəna səvəri ta sləni va gwanata. 5 A shi ka məndiy ghəra sləni li shi kiy ghyi tsa Hiyala niy nza kiy ghyi tsa va. Shi mənti məndi tə mbəzə kwa shamshama lə ni mənti məndi tə tsahi gəna, mbaʼ mazə Nabukudunuzur niy ɓasəhushi, mbaʼ dzaa fiyshi mbə məlmə Babilunə. Shi vay, nza məndi zhinivəshi, mbaʼ məndi dzaa zhinəghəshiy zhakə ghyi tsa Hiyala tsa mbə məlmə Zheruzalem va. Ya nimaɓa shiyiy, tə pi tsaa niy nza ghəshi kə məndi dzaa zhiniyshi, kə niy ni», kə məndi tə zliya va.

6 Ma sa favə mazə Dariyus kuma va ki na, mbaʼ tsaslanaghəshi zliya kaa kar Nguməna Tatənay, ntsaa sləkə hiɗi njasaa dza kwa mirkwi va həl Əfəratə ghəshi lə Shetar-Buzənay, mbaʼ ka Afarsak, mbəzliy sləkə hiɗi kwasəbəshi tə hiɗi dza kwa mərkwi va həl Efəratə. Ma kə kaa ngəshi kwa zliya va na: «Ka dzar ghuy kwa kuma mbəzli va ma. 7 Ə pə ghuy zlashi a ghəshi nuw lə sləni nga ghyi tsa Hiyala va. Ə kə kar nguməna tsa ka Zhəwifə lə mbəzli dikə dikə ni mbə shiy nga ciki tsa va dzəghwa tə pi tsaa niy nza na va. 8 Avanta kuma pəhətee ta məni ghuy kaa mbəzli dikə dikə ni va mbə ka Zhəwifə dzəkən kuma nga ghyi Hiyala tsa va: Ghuy kə dzaa ɓə gənaa səvəri ta shi dza məndiy ɗi gwanashi ya humɓa mbə sləni va, tə gəna mazə dza ghuy tsəhəvə tə hiɗi sləkə ghuy va. 9 Njasa səəkə viciy, ə pə ghuy dzaa ɓanshi shiy kaa ka ta Hiyala mbə məlmə Zheruzalem njasa dza ghəshiy ɗushi. Shiy nja kar Məcerihiy zhər gulgul ni, lə gemim, mbaʼ ndərazhi teŋkesli, ta ndishi kaa Hiyala mə ghumə. Tsəgha kar alkamari, lə ghuni, mbaʼ tay, mbaʼ inə, 10 ta mbə ghəshiy vəlanta shiy dzaa təɓanta kaa Hiyala ta ghumə, ka cəʼu ta mbə ghənzəə ndəghu piy tsa mazə lə sa ndərazhi ci. 11 Avanta kuma zhinee pəhəti: Ntsaa dzaa dzəghway kən kuma pəhətee vay, nza məndi ɓəvə tsəm kiy ghyi tsa ci mbaʼ məndi daŋwati ti. Ka məndi dza na, mbaʼ məndi zhəghəti ghyi tsa ci ka kəsəkə. 12 Ya mazə, ya hulfə mbəzli dza naa dzəghwashi kən kuma pəhətee na, mbaʼ ghəshi kafəshi ta ngazla ghyi Hiyala tsa mbə Zheruzalem vay, nza Hiyala mbə məlmə va va zanti dəʼu ghən tsa nzə. Yən pəhəti na kuma va yən Dariyus. Ə kə məndiy nuw wuzə wuzə,» kə.

13 Dzəghwa kar Tatənay nguməna tsa tə hidi dza kwa mirkwi va həl Əfəratə ghəshi lə Shetar-Buzənay, mbaʼ nihuti mbəzli ghəra ghəshi sləni li shi ki, mbaʼ ghəshi nuti kuma pəhəti mazə Dariyus va wuzə wuzə.

Məndi nganti ghyi tsa Hiyala, mbaʼ məndi ghunanti

14 Dzəghwa mbəzli dikə dikə ni va mbə ka Zhəwifə ki, ka nuw lə nga shiy, war ə sləni shiy dza kwa kuma kwa kuma. Sa nza na mbə mətsahanshi bərci ka gəzə kuma Hiyala, kar Azhee ghəshi lə Zakari ntsaa səvəri kwa miy dəgha Idu. Mbaʼ ghəshi kəɗanti nga ghyi tsa va njasa gəzanakəshi Hiyala ka Izərayel va, lə njasa pəhəti kar mazə Shirus va, mbaʼ mazə Dariyus, mbaʼ mazə Artaserses, mbəzliy sləkəhu hiɗi ka Persə. 15 Dzəghwa ki, mbaʼ nga ghyi tsa Hiyala kiriy tə kwa mahəkana vici, tə tir tsa har məndi vaa tir Adar, Dariyus mbə məni kwa kwaŋa piya ci mbə mazə. 16 Dzəghwa ka Izərayel lə ka ta Hiyala, mbaʼ mbəzli mbə takə tsa Levi, mbaʼ nihuti mbəzliy zhəghəkəvashi sa niy kəəsəhushi məndi, mbaʼ ghəshi mənti makwaghwa ka vəshi təruŋ ta ghuni ghyi tsa Hiyala va ki. 17 Mbə makwaghwa ghuni ghyi tsa va vay, mbaʼ məndi sləsliy shiy kaa Hiyala: Kəɓəhi bələku, mbaʼ gemim bələku bələku bakə, mbaʼ ndərazhi teŋkesli bələku bələku faɗə. Dzəghwa məndi diɓa mbaʼ məndi sləsliy Besher məŋ lə bakə kaa Hiyala, njasa nza takəhi ka Izərayel va, ta mbə ghənzəə pəlata kuma jikir na mənti mbəzli mbə hulfə ka Izərayel gwanashi. 18 Dzəghwa məndi diɓa mbaʼ məndi tihəvəri ka ta Hiyala kwa zərə shi kwa zərə shi, njasa ka ghəshiy ghəra sləni shi. Tsəgha mbəzli mbə takə tsa Levi kuraku, ta ghəra sləni ghəshi kaa Hiyala mbə məlmə Zheruzalem njasa tsasliti məndi va mbə zliya Muyizə.

Ka Zhəwifə mbə məni makwaghwa Pakə

19 Dzəghwa mbəzliy zhəghəkəvashi va gwanashi ki, ka məni makwaghwa Pakə fəca kwa məŋ lə faɗa vici tə kwa taŋa tir. 20 Dza ka ta Hiyala lə mbəzli mbə takə tsa Levi mbaʼ ghəshi yaɓanti rəɗa tar kaɓaka shi kwa kuma Hiyala kutiŋ kutiŋ tsa shi gwanashi. Sa nza ghəshi ɗewɗew kwa kuma Hiyala ki na, dza ghəshi ka slasla ndərazhi teŋkesli ta makwaghwa Pakə kaa mbəzliy zhəghəkəvashi va, mbaʼ kaa ngwardəshi ghəshi ka ta Hiyala, mbaʼ kaa ghən tsa shi. 21 Dzəghwa ka Izərayeləə zhəghəkəvashi va sa niy kəəsəhushi məndi, ka zəmə shi ka məndiy zəmə mbə makwaghwa Pakə, jakə lə nihuti mbəzliy kamaa ka Zhəwifə gwanashi niy nza vəgha shi, shiy niy zlata nuw kuma rəɗa rəɗa na va ka mbəzliy kamaa ka Zhəwifə tə hiɗi vaa məni. Ta nuw Kwa sləkəpə Hiyala ka Izərayel niy zlata ghəshi nuw kuma rəɗa rəɗa na va kwa kuma Hiyala. 22 Liy hum ki na, dza ghəshi vici mbərəfəŋ ghəshi mənti mbə məni makwaghwa ka məndi vaa zəmə peŋ tsa kama is mbə, war ka vəshi. A Kwa sləkəpə niy təhay nefer shi lə vəshi, sa nza na, mbaʼ niy fanambə mananshi wuzə hur mbə nəfə tsa mazə ka Ashiri ta mbə ghəshiy kumavə bərci ta nuw lə nga ghyi kaa Hiyala ka Izərayel.