Məndi zhiniy kafəshi ta nga ghyi tsa Hiyala
5
Ma tə nahuti vici ki na, dzəghwa ka gəzə kuma Hiyala, kar Azhee ghəshi lə Zakari ntsaa səvəri kwa miy dəgha Idu mbaʼ ghəshi gəzanakəshi kuma kaa ka Zhəwifə tə hiɗi Zhuda lə ni mbə məlmə Zheruzalem, sa gəzanshi Hiyala ka Izərayel kən shi. 2 Sa gəzanakəshi ghəshi kuma ki na, dzəghwa kar Zurubabel zəghu Shaltiyel ghəshi lə Zhuzəwe zəghu Yutsadak mbaʼ ghəshi kafəshi ka zhiniy nga ghyi tsa Hiyala va mbə məlmə Zheruzalem. Tiɓa ka gəzə kuma Hiyala ta ɓanshi bərci. 3 Ghala vəghu tsa va ki na, dzəghwa kar Tatənay nguməna tsa ti hiɗi dza kwa mirkwi va həl Əfəratə ghəshi lə Shetar-Buzənay, mbaʼ nihuti mbəzli ka ghəshiy ghəra sləni li shi, ndəs ghəshi səəkəə kəsashi. Ma kə ghəshi kaa ngəshi na: «A ntsaa ndaŋuy kwal ta zhiniy nga ghyi tsa lə ta kaʼu kələm tsa nza na tsa kwaa? 4 Kar wa kar wa na mbəzli mbə nga shiniya? ɓəlaŋiyim sləneɗemer shi,» kə ghəshi.5 Dzəghwa ghəshi ki, mbaʼ ghəshi tsaslanaghə zliya kaa mazə Dariyus ta gəzanci kumaa məniva, nza ghəshi ndəghə kuma dza naa zləɓanshi. Ya tsəgha nzə ki na, dza Hiyala mbaʼ ndəghuti mbəzliy ʼwa kwal kaa ka Zhəwifə. Ndə tiɓa mbaʼ niy səəkiy ta makəshi va ghəra sləni ghala vəghu tsa vaw.
Zliya tsaslanaghə məndi kaa mazə Dariyus
6 Avanta zliya tsaslanaghə kar Tatənay nguməna tsaa sləkə hiɗi dza kwa mərkwi va həl Efərata, ghəshi lə Shetar-Buzənay, mbaʼ ka Afarsak, mbəzliy sləkə hiɗi kwasəbəshi tə hiɗi dza kwa mərkwi va həl Efəratə kaa mazə Dariyus. 7 Ma kə ghəshi kwa zliya va na: «Kwa kuma kwa kuma kə mazə Dariyus dza ya mbə namaɓa kuma. 8 Avanta kuma ɗi ghiy ghaa sənata mazə: A ghiy səəkə tə hiɗi ka Zhuda, mbaʼ ghiy tsəhəŋiy tə pi tsa nza ghyi tsa Hiyala dikə na va. Mbə zhini na ka Zhəwifəə nga ghyi tsa va lə hərezli fəɗi fəɗi ni, ka fə shighu dikə dikə niy dzəmbə kələm tsa nza ghyi tsa va va kwa. A ghəshi jahambəvashi mbə ghəra sləni va wuzə, zhini mbə hu ghənzə kiyaŋu kiyaŋu. 9 Sa nata ghiy kuma va tsəgha na, mbaʼ ghiy ɗuti kuma va mbəzli shi dikə dikə ni. Ma pə ghiy kaa ngəshi na: A ntsaa ndaŋuy kwal ta zhiniy nga ghyi tsa, lə ta kaʼu kələm tsaa? pə ghiy kaa ngəshi. 10 Dza ghiy diɓa mbaʼ ghiy ɗuwuhu sləneɗemer shi ghəshi shiy nga shi va va ta mbə ghaa sənashi, ta mbə ghiy tsasləghəŋa sləneɗemer mbəzliy ʼwanshi kwal mbə sləni va. 11 Ma kə ghəshi kaa kuma zləɓakəŋiy ghəshiy: “Ka sləni Hyalaa mənti ghumə lə hiɗi nza ghiy. A mazə tsa dikə tsa tə hiɗi ka Izərayel niy ngati ghyi tikə kaa Hiyala ghala mbəradzə, mbaʼ kəranti, mbaʼ məndi səəkəə baʼwanti. Ghəci na sa zhini ghiy tsaa ngaa zhakati. 12 Sa niy ɓanakati jijihiŋiy nəfə tsa Hiyala ta ghumə, va tsəgha niy fambəshi na mbə dəvə Nabukudunuzur mazə ka Babilunə, ntsa mbə hulfə ka Kalde. Dza mazə tsa va mbaʼ ngangazlanti ghyi tsa Hiyala tsa, mbaʼ kəəsəhu mbəzli dzəti hiɗi Babilunə. 13 Ma Shirus mbə məni kwa taŋa piya ci mbə mazə tə hiɗi ka Babilunə ki na, Dza na mbaʼ gəzaŋiy: mbalam ta zhiniy ngati ghyi kaa Hiyala, kə 14 A mazə Nabukudunuzur niy ɓasəhu shi ka məndiy ghəra sləni li shi, shi mənti məndi tə mbəzə kwa shamshama lə tə tsahi gəna kiy ghyi tsa Hiyala tsa mbə məlmə Zheruzalem, mbaʼ dzaa fiyshi mbə ciki ta mbəri tsa ka Babilunə. Dzəghwa mazə Shirus mbaʼ pakəvərishi mbə ciki ta mbəri tsa va, mbaʼ ɓanavəshi kaa ntsa har məndiy Sheshəbasar, ntsa fiy na ka nguməna tə hiɗi ka Zhuda. 15 Ma kə kaa ngəci na: Pavə shi ni, nza gha dzaa zhiniyshi kiy ghyi tsa Hiyala va mbə məlmə Zheruzalem sa ka məndi zhiniy ngati dzəghwa tə pi tsaa niy nza na va kwataŋa, kə. 16 Dza Sheshəbasar tsa va dəʼu ghən tsa ci, mbaʼ səəkiy dzəmbə Zheruzalem, mbaʼ fəti səɗa ghyi tsa Hiyala va. Ghala fəcava paʼa ndatsiy, mbə nga ghyi tsa va nza məndi, ə na na kəranti ma məndi nga ci,” kə ghəshi kaa ngəŋiy. 17 Mbaʼ kə təɓətəŋa sənzənvay maziy, gəzanshi kaa mbəzli a ghəshi pəlati kwa zliyahi tsasliy mezhizhi ka Babilunə niy nza. Ghalaɓay, ta sənay dza gha nda kataŋ niy gəzanshi mazə Shirus nga ghyi tsa Hiyala mbə məlmə Zheruzalem kaa mbəzli. Sa dza ghaa pəlati kuma vay, nza gha gəzaŋiy na gha kuma ɗi gha mbə nəfə ghaa dzəkən kuma va mazə,» kə mbəzli va kwa zliya va.