Ka mbəzə ka Zhəwifə mbə pəla kwal tsaa garəti nga ghyi tsa Kwa sləkəpə
4
Dzəghwa mbəzli tə hiɗi va, shiy ɗima kuma ka Zhəwifə mbə takə tsa Zhuda lə ni mbə takə tsa Benzhameŋ mbaʼ ghəshi favə: Mbəzliy zhəghəkəvashi va sa niy kəəsəhushi məndiy, mbə zhini ghəshiy nga ghyi kaa Kwa sləkəpə Hiyala ka Izərayel, kə məndi. Sa favə ghəshi tsəgha na, 2 mbaʼ ghəshi səəkəə kəsashi kar Zurubabel lə mbəzliy sləkə mbəzli kwa miy dəghahi, ma kə ghəshi kaa ngəshi na: «Ta kəətiŋuy dza ghiy lə nga ghyi tsa Hiyala tsa, sa nza nay, Hiyala nu ghuy va na sa nu ghiy kuraku. Ghala ɓəkəŋiy Asarhaduŋ mazə ka Ashiri tikə ghəci mbə məni maziy, kaa ngəta ka ghiy slasla shiy,» kə ghəshi. 3 Ma kə kar Zurubabel ghəshi lə Zhuzəwe, mbaʼ nihuti mbəzliy sləkə mbəzli kwa miy dəghahi ka Izərayel kaa ngəshi na: «Ka jakəva ghiy lə ghuy ta nga ghyi kaa Hiyala ghiyuw. Ghiy kutiŋiy dza na ta nga ghyi kaa Kwa Sləkəpə, Hiyala ka Izərayel. Tsəgha gəzəkəŋiy Shirus mazə ka Persə,» kə ghəshi.4 Sa zləɓanakəshi mbəzli va kuma tsəgha ki na, dzəghwa mbəzli tə hiɗi va va kamaa ka Zhəwifə, mbaʼ ghəshi kafəshi ta məməni kumaa dzaa ɓanshi daw bərci kaa ka Zhuda, ka pəla fanshi hazləniy dzəmbə nefer shi, nza ghəshi mbəə garəti nga ghyi tsa va. 5 Ghala vəghu tsa nza Shirus mbə mazə tə hiɗi ka Persə, paʼa ghala vəghu tsa nza Dariyəsə mazə tə hiɗi vay, war ə niy ɓə ghəshi gəna kaa mbəzliy canshi kuma kaa mezhizhi va ta mbə ghəshiy makəti ka Zhəwifə va məni kuma ɗi ghəshi va məni.
Zliya kaa Artaserses mazə ka Pərsə dzəkən ka Zhəwifə
6 Ma Kəserses mbə gha məni mazə tə hiɗi ka Persə ki na, dzəghwa mbəzliy ɗima kuma mbəzli mbə məlmə Zheruzalem lə mbəzli tə hiɗi ka Zhuda va, mbaʼ ghəshi tsaslanaghə zliya ta təɓanshi fəti kaa mbəzli va. 7 Ghala vəghu tsa məni Artaserses va mazə diɓay, zhəghwa kar Bishəlam ghəshi lə kar Mitredat, mbaʼ Tavel, mbaʼ nihuti mbəzli ghəra ghəshi sləni li shi, tsasl ghəshi tsaslanaghə zliya kaa Artaserses mazə ka Persə tsa va. Zliya vay, lə tsasli shi ka Aramaye niy nza na, ghani ka Aramaye sa tsasliti məndi li diɓa.
8 Zhəghwa kar Rehum nguməna tsa tə hiɗi va ghəshi lə Shiməshay ndə tsasli shiy, mbaʼ ghəshi tsaslanaghə zliya kaa mazə Artaserses dzəkən mbəzli mbə məlmə Zheruzalem. Ma kə ghəshi mbə gha zliya va na: 9 «Zliya nay, kar nguməna Rehum tsasli na, ghəshi lə Shiməshay ndə tsasli shiy, mbaʼ nihuti mbəzli ghəra ghiy sləni li shi mbə məlmə Din lə mbə məlmə Afarəsatak, mbaʼ mbə məlmə Tarəpel, mbaʼ mbə məlmə Afarasə, mbaʼ mbə məlmə Uruk, mbaʼ mbə məlmə Babilunə, mbaʼ mbə məlmə Suzə, mbaʼ mbə məlmə Deha, mbaʼ mbə məlmə Elam. 10 Lə slən tsa nihuti mbəzli kəəsəghə Asənapar mazə tsa dikə tsa diɓədiɓə tsa ta nziy ghəshi tə hiɗi Samari lə tə hiɗi dza kwa bəla mirkwi va həl Əfəratə, mbaʼ nihuti mbəzli diɓa tsasli ghiy zliya na,» kə ghəshi.
11 Avanta kuma tsasliti ghəshi mbə zliya shi va: «Kaa mazə Artaserses tsasli ghiy zliya na, ghiy ghiy mbəzliy ghəranci sləni tə hiɗi dza kwa mirkwi va həl Əfəratə mbaʼ nihuti mbəzli. 12 Əə ɗi ghiy gəzanci kaa mazə: Ka Zhəwifəə kafəshi va vəgha gha mbaʼ ghəshi səəkəshi tikəə dzəvəgha ghiy dzəmbə məlmə Zhəruzaləmiy, avanashi mbə zhiniy nga məlmə ka zhini ghən gəmgəm na va. Mbə guma səɗa kələm tsa va, ka zhiniy ngaa zhakati na ghəshi. 13 Əə ɗi ghiy ghaa sənay ki mazə, mbaʼ kə mbəzli va zhiniy nganti məlmə na, ngaʼ kaa kələm tsa vay, ta zlay tsəhə ghən dza ghəshiy dzəti ghən tsa shi, lə dzəti shi ɗəl ghəshi, lə wa shi ka məndiy wa tə kwal. Ka gha nighiy, daw shiy dzaa nza kwa hutəvə tsa mazə. 14 Gha fiyŋiy na, ka ɗi ghiy məndiy sawaŋaw. Va tsəgha gəzaŋa ghiy kuma va, 15 nza məndi mbəə pəlati kumaa dzəkən mbəzli va kwa zliya tsasliti jijihiŋaa mənəhu mazə. Sa dza məndiy pəlay, ta kəsata dza məndi, məlmə kwa zhini ghən na məlmə Zheruzalem ghala mbəradzəta. Ka mbə mezhizhi lə ngumənahiy nziy guŋəshi va mbəzli mbəɓaw, kə məndi kwaɓa. Mbəzli vay, a ghəshi sənaɓəshi mbəradzəshi mbə zhini ghən, va tsəgha niy ngazlanti məndi məlmə shi va. 16 Va tsəgha gəzaŋa ghiy kwatsəməta mazə, war mbaʼ kə mbəzli va zhiniy nganti məlmə va, zhini dəzlə ghəshi dəzaly lə kələmiy, ka zhini ghaa sləkəvə hiɗi njasaa dzəghwa mərkwi va həl Əfəratə ghulaw,» kə ghəshi kwa zliya va.
Mazə Artaserses zləɓa kumaa dzəkən zliya tsaslanaghə məndi va
17 Sa janganati məndi kuma va kaa mazə ki na, dza na ka zləɓanshi kwa zliya, ma kə na: «Yən mazə tsasli na zliya na kaa Nguməna Rehum, lə kaa ndə tsasli shiy tsa ci Shiməshay, mbaʼ kaa mbəzli ghəra ghəshi sləni li shi mbə məlmə Samari lə mbə nihuti hiɗi dza kwa mərkwi va həl Əfəratə, mbaʼ kaa nihuti mbəzli diɓa. Əə səkuŋuyee. 18 Zliya tsaslikəŋiy ghuy vay, a məndi jaŋgətəra wuzə wuzə. 19 Dzee mbaʼee gəzanshi kaa mbəzli a ghəshi pəlati kumaa dzəkən məlmə va. Lə kataŋiy, mbaʼ məndi kəsata, mbəradzəta na məlmə Zheruzalem mbə zhini ghən kaa mezhizhi. Ka ɗi mbəzli mbəɓaa nziyshi guŋəshi ka ɗi fətiw, war zləghu ghən tsa shi mbə dəvə mbəzliy sləkəshi ka ghəshiy ɗi. 20 Niy nza kwataŋay, a mezhizhi ka bərci niy nza mbə məlmə va. Ghəshi niy sləkə na hiɗi dza kwa mərkwi va həl Əfəratə gwanashi. Kaa ngəshi niy tsəhə mbəzli ghən dzəti ghən tsa shi lə dzəti shi ɗəl ghəshi, mbaʼ tsa tə kwal. 21 Ghənzə tsəghay, gəzanshim kaa ka Zhəwifə va a ghəshi garəti sləni shi va. Ka zhini məndiy nga məlmə va kala fəca dzee gəzəkuw. 22 Fə tə ghuy ghən, ka tsaɓana ghuy lə kuma va ma, Əntaa kuma gəmgəm na dzaa mətsəhəta kala dza məndi zhiniy fa kuma va mazə ka Persə,» kə mazə kwa zliya va.
23 War sa jangəti məndi zliya mazə Artaserses va kaa kar Rehum, ghəshi lə ndə tsasli shiy tsa ci Shiməshay, mbaʼ mbəzli ghəra ghəshi sləni li shi ki na, mbaʼ ghəshi dzashi kiyaŋu kiyaŋu dzəmbə məlmə Zheruzalem, mbaʼ ghəshi dzaa garəti sləni ka Zhəwifə va lə bərci, ka gulaŋanshi gulaŋ. 24 Dzəghwa ki, mbaʼ məndi garəti sləni nga ghyi tsa Hiyala va mbə məlmə Zheruzalem, paʼa va kwa baka piya Dariyus mazə ka Persə mbə mazə.