Kar Zhuzəwe lə Zurubabel fərghəkə kumaa niy məni ka Izərayel kaa Hiyala shi kwataŋa
3
Ma tə kwa mbərəfaŋa tir ki na, dzəghwa ka Izərayeləə nziyshi va dzar mbə məlməhi shi, mbaʼ ghəshi ɓasəshi mbə məlmə Zheruzalem lə nəfə kutiŋ. 2 Dza kar Zhuzəwe zəghu Yutsadak ghəshi lə ngwardiy ka ghəshiy ta Hiyala li shi, mbaʼ kar Zurubabel zəghu Shaltiyel ghəshi lə manəhiy, pew ghəshi ngakati pi tsa ka məndiy ta Hiyala ti, ta ndi shiy kaa Hiyala ti njasa tsasliti məndi va mbə zliya Muyizə ndə sləni tsa Hiyala. 3 Ya tsəgha niy dza her shi va nihuti mbəzli tə hiɗi va va kamaa ka zhəwifiy, a ghəshi niy zhanati pi tsa ka məndi vaa ta Hiyala ti dzəghwa tə pi tsaa niy nza na va kwataŋa. Dzəghwa ghəshi ki, mbaʼ ghəshi ndanati shiy kaa Kwa sləkəpə ti, ni mekishi, mbaʼ ni hetihwer. 4 Ma liy hum ki na, dza ka Izərayel ka məni makwaghwa har məndi vaa makwaghwa mbə ciki tsa daŋəti məndi dzar tə hiɗi, njasa tsaslita na va. Mbə makwaghwa vay, mbə ndi shiy niy nza ghəshi kaa Hiyala njasa səəkə vici, njasa ka məndiy ndishi mbə vici kutiŋ. 5 Ma liy hum ki na, dza ghəshi ka ndanta shi ka məndiy ndanta kaa Hiyala mbə vici, njasa səəmə vici, ka ndanta ni ka məndiy ndanta tə kwa taŋa vici yəwun tirə. Ka ndi shi ka məndiy ndi mbə makwaghwahi ka məndiy məni kaa kwa Sləkəpə, ka ndi shi ka məndiy ndi kaa kwa sləkəpə ghala vəli ka mbəzliy vəlanta shi tarəkə ghəshi mbə nefer shi. 6 Sa ghati ghəshi tə kwa taŋa vici tə kwa mbərfaŋa tir ki na, dza ka Izərayel mbaʼ ghəshi zhiniy kəsəvə ndanta shiy kaa Kwa sləkəpə. Ghala vəghu tsa vay, niy ghati məndi ya fə səɗa yəwun ghyi tsa Hiyala diw.7 Dza ghəshi ki, mbaʼ ghəshi wanati gəna kaa ka baʼu hərezli mbaʼ kaa ka pəraʼu shighu. Dza ghəshi diɓa, mbaʼ ghəshi ɓanavəshi shi zəmə lə shi sa mbaʼ inə kaa ka Shiduŋ lə kaa ka Tirə nza ghəshi panakəshi shighu ka bərci tə hiɗi Libaŋ paʼa mbə məlmə Zhafa dzar tə yam. Shirus mazə ka Persə niy ɓanavəshi na kwal ta məni ghəshi tsəgha.
8 Tə kwa bakə piya shi ghala tsəhəshi ghəshi mbə Zheruzalem məlmə nza ghyi tsa Hiyala va mbə, tə kwa baka tir na, dza kar Zurubabel zəghu Shaltiyel ghəshi lə Zhuzəwe zəghu Yutsadak, mbaʼ nihuti ngwardəshi, ka ta Hiyalaa tərmbə, mbaʼ mbəzli mbə takə tsa Levi, lə nihuti mbəzliy zhəghəkəvashi sa niy kəəsəhushi məndi, ghaʼ ghəshi ghati sləni. Dzəghwa ghəshi mbaʼ ghəshi fiy mbəzli mbə takə tsa Levi nza piya shi bakəmətsəkə ka dzəmə, ta nza ghəshi ka mbəzliy nighəə dzəkən sləni nga ghyi tsa Kwa Sləkəpə. 9 Dza Zhuzəwe ntsa mbə takə tsa Levi ghəshi lə ndərazhi ci mbaʼ ngwardiy, mbaʼ Kadmiyel lə ndərazhi ci mbəzli mbə takə tsa Zhuda jakə ghəshi jakəshi ta ʼwa kwal kaa mbəzliy ghəra sləni kiy ghyi tsa Hiyala. Mbaʼ nihuti mbəzli mbə takə tsa Levi, mbəzliy səvəri kwa miy dəgha Henadad ka kəətishi.
10 Ma ka nga shiy mbə fə səɗa ghyi tsa kwa sləkəpə ki na, dza məndi mbaʼ məndi gariy ka ta Hiyala lə kubeŋer makwaghwa kən ghən shi, mbaʼ shi ka məndiy viy ta dəvə shi. Tsəgha məndi gariy mbəzli mbə takə tsa Levi, shiy səvəri kwa miy dəgha Asaf lə shi ka məndiy tsa ta fal Hiyala ta dəvə shi njasa niy gəzəkə Davitə mazə ka Izərayel va. 11 Dza ghəshi ka fə shəndəkə dzəti Kwa sləkəpə ka fal kwa cəm. Ma kə ghəshi na: «Wuzə na hur tsa Kwa sləkəpə, ka zhəghə hum na kaa ka Izərayel ya paʼ humɓaw,» kə ghəshi. Dzəghwa ka Izərayel gwanashi, ka ngumə lala, ka fal Kwa sləkəpə zlaŋ zlaŋ, tə mbərkə sa fə məndi va səɗa ghyi tsa Kwa sləkəpə.
12 Məndi mbə fə səɗa ghyi tsa vay, mbəzli ɗaŋ niy wahə na zlaŋ zlaŋ mbə ka ta Hiyala, mbaʼ mbə mbəzli mbə takə tsa Levi, lə mbə pəhepəhir zhəriy sləkə miy dəghahi, shiy niy nay ghyi tsa Hiyala tsa kwataŋa va. Nihuti mbəzli ɗaŋ diɓa na, ka ngumə lala va vəshi. 13 Ghala vəghu tsa vay, ni mbay məndiy təhəvəri gaka lala vəshi lə lala wahəw, sa nza nay, Zlaŋ zlaŋ niy ngumə mbəzli lala, ka favə məndi kərakə.