Ashəter
Kuma dza ghumməə gha sənataa dzəkən zliya na
Slən Ashəter tsa har məndi tsa zliya na liy, slən tsa ntsaa guraa mənəhu kuma mbə zliya na na. Mali na sava, zha ka zhəwifə. Ghala vəghu tsaa niy məni Zerkəses mazə tə hiɗi ka Persə məniva kuma mbə zliya na. Ə niy tahanti mazə tsa va kwajən ci Vasti, tə sa niy zləɓa ma na məni kumaa niy ɗi na. Dzəghwa Zerkəses ki, mbaʼ ɓəvə Ashəter zha ka Zhəwifə, har məndi vaa Hadasa ta nza ghənzə ka kwajən ci kwa pi tsa Vasti. Zha vay, Mardushe niy kəliti na, tərəŋu dalala niy təɓə na. A tsahuti ndə niy nza tiɓa, Haman, kə məndi kaa slən tsa ci. Ghəci niy nza ntsaa gura dikə mbə mbəzliy ghəra sləni kaa mazə. Dzəghwa na ki, mbaʼ pəhəti zanti mbəzli mbə hulfə ka zhəwifə gwanashi, tə sa zləɓa ma Mardushe tsəfəku kwa kuma ci, mbaʼ mazə niy ɓanavə kwal. Sa zhəghəta Ashəter ka kwajən mazə ki na, mbaʼ mbəlanti mbəzli mbə hulfə nzə va bəkushi məndi. Tə kwa kərni ki na, mbaʼ məndi bakwanti kar Haman lə ka mbəzə ka zhəwifə. Tsəgha mbəlishi ka zhəwifə mbaʼ Mardushe zhəghiy ka ntsa nuw mazə tə dikə tə hiɗi ka Persə ki. Ya tsəgha nza na Hiyala mbəlanti ka zhəwifə mbə kuma va gwanata tsa nziy, slən tsa Hiyala mbə zliya na kiw. Dzəghwa ka zhəwifə tə hiɗi ka Persə ki, mbaʼ ghəshi mənti makwaghwa tə mbərkə mbəli tsa mbəlitishi Hiyala va bakwantishi məndi. Ya paʼa ndatsiy, mbə məni makwaghwa va na ka zhəwifə, Pwərim, kə məndi kaa slən tsa nzə. tərə tir kutiŋ ta makwaghwa pakə ka məndiy məni.
Ntsaa tsasliti zliya na lə piya tsasli na ti
Sənay ntsaa tsasliti zliya Ashəter na məndiw tsasliti. Ndə ka zhəwifə tsaa niy nza tə hiɗi ka Persə dza naa nza. Sa nzanay, aa sənata kuma jiji ka Persə, zhini diɓay, gəzə kuma naa dzəkən hiɗi ka Zhuwda ya dzəkən Zheruzalemuw. Tə piya 460 məndi ghula ta ya Yesəw Kəristəw tsasli məndi zliya na.
Njasa nuwva kuma mbə zliya na
Kumaa dzəkən makwaghwa dikə na mənti mazə Zerkəses (1:1-9)
Kumaa dzəkən təhəva tsa kar Vasti lə mazə (1:10-22)
Mazə ɓəvə nahuti yəwun mali (2:1-18)
Mardushe fəti ghən ta kuma pəhəm dzəkən mazə (2:19-23)
Haman ɓakən nəfəə dzəkən Mardushe (3:1-6)
Haman pəhə kuma ta bəku ka zhəwifə (3:7-15)
Mardushe cəʼwə Ashəter ta dza ghənzə ta cəʼwə mazə a ghəci mbəliti ka zhəwifə (4:1-17)
Ashəter dza va mazə (5:1-8)
Haman pəhə kuma ta pəsli Mardushe (5:9-14)
Mazə fati shəndəkəə dzəti Mardushe (6:1-14)
Mazə gəzəy məndi paslanti Haman (7:1-10)
Mazə Zerkəses ɓanavəshi kwal kaa ka zhəwifə ta ndəghu ghən tsa shi va məndi bakwamtishi (8:1-17).
Ka zhəwifə bakwanti ka mbəzə shi (9:1-19).
Njasa gha ka zhəwifəə məni makwaghwa har məndiy Pwərim (9:20-32).
Məndi ɓanavə dikə kaa Mardushe (10:1-3).