Ester 1

Ashəter

Mazə Zerkəses mənti makwaghwa

Kuma mbə zliya nay, ghala vəghu tsaa məni Zerkəses mazə məniva na. Ghalaɓay hiɗi bələku mbaʼ bakəmətsəkə mbərfəŋti ghən kən shi niy sləkə na. Sa ghava ghəshi tə hiɗi Eŋəndə paʼa tə hiɗi Etiyupiy. 2-3 Ma ghəci mbə məni kwa mahəkana piya ci mbə mazə ki na, dzəghwa na mbaʼ səəkəə nziyiy ta məni mazə tsa ci mbə Suzə məlmə dikə na tə hiɗi ci va. Dza na mbaʼ mənti makwaghwa dikə na kaa ka sləni dikə dikə ni tə hiɗi ci lə kaa nihuti mbəzliy sləkə hiɗi ta səɗa ci. Dza na mbaʼ ɓasəti mbəzliy sləkə ka sawji ka Persə lə shi ka Medə, mbaʼ ngwamənahi lə mezhizhi tə hiɗi shi. 4 Tir kwaŋ ghəci hiy mbə makwaghwa va. War ka canshi njasa nza shi ka dimə tə hiɗi ci ɗaŋ tsa shi lə njasa nza wahə tsa nza na mbə tərəŋu tsa ci. 5 Sa kəriy vəghu tsa va ki na, dza mazə mbaʼ zhiniy mənti makwaghwa dikə na kaa mbəzli mbə məlmə Suzə gwanashi, ya ndə shiy, ya ndə ndərma gwaʼa. Vici mbərfəŋ məndi mənti mbə makwaghwa va tə pi tsa ka mazə məni makwaghwa ti. 6 Dzəghwa məndi kaa kadibəlhi tsati məndi tə məgapa pay na mbaʼ na ghəwə na, cislə məndi cacaslatishi tə jaʼwa məntim tə tsahi gəna, mbaʼ məndi səratishi tə ghur ghəm ni mbaʼ shi pay ni, pəhə pəhə məndi papahati ghur va tə hərezli zlizli ni, tezlezl tezlezl ni. Dzəghwa məndi diɓa mbaʼ məndi fəfiy pi hənihi məntim tə tsahi mbəzə mbaʼ tə tsahi gəna dzar tə pi tsa tsəti məndi, shamshamay tsahuti, payiy tsahuti, ghəmməy tsahuti, ngəriy tsahuti. 7 Kwa shi məntim tə tsahi mbəzə ghənghən ghənghən pa shi niy ɓanshim shi sa kaa mbəzli. Dalala tərəŋu niy tati mazə tay, njasa təɓə mazə ta tay. 8 Ya wa ndiy, njasa ɗi na niy savə na shiy, sa nzanay: «njasa ɗi ghəshi pə ghuy dzaa mananshi kaa mbəzli» kə mazə niy ni kaa mbəzliy ghəra sləni kiy ghyi tsa ci gwanashi. 9 Dza kwa na nzə bəla kuraku ki na, mbaʼ Vasti kwajən mbə miʼi mazə niy mənti makwaghwa dikə kiy ghyi tsa mazə Zerkəses kaa miʼi.

Mazə ɓanti Vasti mbə məni kwajən

10 Ma tə kwa mbərfaŋa vici ki na, mbaʼ mazə vəshiy, sa ngəsliy na va tay. Dza na mbaʼ harashi mbəzli mbərfəŋ ni va tsəʼu tsəʼu ni nighəə dzəkən miʼi ci: kar Mehuman, mbaʼ Bizəta, mbaʼ Harəbuna, mbaʼ Bigəta, mbaʼ Avəgəta, mbaʼ Zetar, mbaʼ Karəkasə. 11 Ma kə kaa ngəshi na: «Pəməkəm kwajənee Vasti dzəghwa kumee lə daghuba mali mazə tsa nzə mbə ghən nzə,» kə kaa ngəshi. Naa niy ɗi maziy, mbaʼ mbəzli dikə dikə ni tə hiɗi ci lə nihuti mbəzli tiɓa va nay təɓə tsa nzə, sa nzanay, tərəŋu niy təɓə na. 12 Ma sa dza mbəzli vaa zhananavə kuma gəzəkə mazə va kaa kwajən ci Vasti na, kala zləɓa səvəri ghənzə. Dzəghwa ki, mbaʼ nəfə tsa mazə satiy tərəŋu. 13 Dza na mbaʼ haharashi mbəzliy sənata kuma tə hiɗi ci, sa nzana ya namaɓa kuma maziy, mbəzliy sənay kwal tsa kuma, njasa ka məndiy məni ya mbə namaɓa kuma ka naa nighəə dzəkən. 14 Mbəzliy niy nza lə mazə ka naa ɗuw kuma ci və shi kiy, kar Karəshina, mbaʼ Shetar, mbaʼ Adəmata, mbaʼ Tarəshishə, mbaʼ Meres, mbaʼ Marsəna, mbaʼ Memukan niy nza ghəshi. Mbəzli mbərfəŋ ni vay, mbəzli dikə dikə ni ghəshi tə hiɗi Persə lə hiɗi Medə, ghəshi gura na ndəku vəgha mazə zhini ghəshi mbəzliy gura dikə dikə tə hiɗi ci. 15 Ma kə mazə kaa ngəshi ki na: «Dzee yən maziy, mbaʼee ghunashi mbəzliy nighəə dzəkən miʼee ta gəzanta məni kuma kaa kwajənee Vasti, kala zləɓa məni ghənzə. Njaa na kumaa pəhəta dzəkən gəla kuma va, ta mananta məndia?» kə.

16 Dzəghwa ma kə Memukan kaa mazə kwa kuma mbəzli dikə dikə ni va tiɓa ki na: «Kuma mənti Vasti kwajən mazə vay, kwataka kaa mazə mənti na kuma gəmgəm na gwaʼa tsəghaw, kaa ka sləni ci dikə dikə ni, mbaʼ kaa mbəzli tə hiɗi ci gwanashi mənti na. 17 Sa nzanay, ta favə kuma mənti na va dza miʼi gwanashi, ka gha nighiy, ka dza ghəshiy ɗi fəti va zhər shiw ghulaw. Ma kə ghəshi dzaa ni na: “A mazə Zerkəses harata Vasti kwajən ci ta səəkə ghənzəə dzəghwa kuma ci kala zləɓa səəkə ghənzə,” dza ghəshiy ni. 18 Ndatsəta kiy, ta favə kuma mənti kwajən mazə va dza miʼi mbəzli dikə dikə ni tə hiɗi Persə lə Medə. Ka gha nighiy ghəshi dzashiy dzəmbə zləɓa kuma tsəgha kaa zhər shi. Sa dza ghəshiy məni tsəgha kiy, ta sati dza nəfə tsa zhər shi. 19 Va tsəgha ki, gha gar zləɓavəy maziy, vanta kuma pə gha pəhəti, mbaʼ məndi tsaslaghwa kwa zliya nza kuma pəhəti məndi tə hiɗi Medə lə tə hiɗi Persə kwa, kala dza məndi ɓanti ghula: “Əntaa Vasti zhiniy səəkəə dzəghwa kuma gha ya humɓa ma, ə pə gha tivə nahuti mali wəzəɓa ghənzə kaa ngəta, ta nza ghənzə ka kwajən gha”. 20 Sa ka kuma dza gha vaa pəhəti tsəhəta kwa sləmə mbəzli tə hiɗi gha ni bəŋw ni gwanashi kiy maziy, ya namaɓa mali na, ta ɗi fəti dza na va zata, ya ntsa tə slən na, ya ntsa kwa tsa ci kwal na,» kə.

21 Dzəghwa kuma va mbaʼ təɓanati kaa mazə lə kaa mbəzli dikə dikə ni tə hiɗi ci. Dza na ki mbaʼ mənti njasa gəzəkə Mamukan va. 22 Mbaʼ vələghə zliyahi dzəti hiɗi ci gwanashi. Ya nimaɓa hiɗi na, njasa ka ghəshiy tsasli shiy məndi tsasliti, ya namaɓa hulfə na, lə na nzə ghani ka naa gəzə: «Ya wa zaliy, ghəci kəə sləkə mbəzli kiy ghyi tsa ci, ka gəzə kuma mbəzli kiyɓa lə ghani hulfə ci,» kə məndi tə zliya va.