Ashəter zhəghəta ka kwajən mazə
2
Liy hum kuma va ki na, mbaʼ nəfə tsa mazə Zerkəses dzəghway. Dza na mbaʼ zəzəti dzəkən kuma mənti Vasti va lə kuma pəhəti məndi vaa dzəkən. 2 Ma kə mbəzliy ghəranci sləni kaa ngəci ki na: «Ə kə məndi dzaa tərakə degheghir kiyas kiyas ni , shiy səəkə maa nza dzar vəgha zhər. 3 Ə pə gha tivə mbəzli ta ghəra sləni va dzar tə hiɗi gha, a ghəshi pala ghyehi kiyas kiyas ni, nza ghəshi pəməshiy səəkə dzəmbə məlmə Suzə, dzəti pi tsa nza miʼi mazə, kaa Hege ntsa ̍u tsəʼu tsa va nighəə dzəkən miʼi mazə. Nza məndi ɓaɓanshi shi ka miʼiy guma vəgha li shi ta təɓə. 4 Ma naa dzaa gura təɓaŋa mbə ghyehi va ki na, nza ghənzə nza ka kwajən gha kwa pi tsa Vasti,» kə ghəshi. Dzəghwa kuma va mbaʼ təɓanati kaa mazə, mbaʼ mənti tsəgha.5 A tsahuti ndə ka Zhəwifə niy nza mbə məlmə Suzə, Mardushe, kə məndi kaa slən tsa ci, zəghu Yaʼir niy nza na, jijishi kar Shimey lə Kish, mbə takə tsa Benzhameŋ. 6 Ntsa vay, mbə mbəzliy niy kəəsəkə Nabukudunuzur mazə ka Babilunə va mbə məlmə Zheruzalem niy nza na, ghəshi lə kar Yekuniya mazə ka Zhuwda. 7 Ma ghəci ki na, mbaʼ zha zəmbəghiy diy niy kəli kiy ghyi tsa ci, sa niy bəkushi kar dəta lə mbəghəta. Hadasa, kə məndi kaa slən tsa nzə, Ashəter, kə məndi kaa tsahuti slən tsa nzə diɓa. Zha vay, zha wəzə pa nzə, ka təɓə kiyasə niy nza na.
8 Ma sa tsəhiy nuwur tsa zliya mazə va tə hiɗi ci gwanashi ki na, mbaʼ məndi ɓasəəkə degheghir ɗaŋ dzəmbə məlmə Suzə. Dzəghwa mbaʼ məndi pəməkə Ashəter kwasəbəshi kuraku, pəm məndi pəməghəshiy dzakə ghyi tsa mazə dzəmbə dəvə Hege ntsaa nighəə dzəkən miʼi mazə. 9 Mbaʼ Ashəter təɓanati kaa Hege tərəŋu ki, war a ghəciy mananta kuma wəzə na. Ya nimaɓa shi wəzə ni ta təɓə ghənzə lə ta zəməshi ghənzə na, mbaʼ ɓaɓanavəshi kiyaŋu kiyaŋu. Dza na diɓa mbaʼ təranavə miʼiy gura mbərfəŋ mbə miy ghəra sləni kiy tsa mazə, ta mananta sləni ghəshi. Mbaʼ dzaa fiy Ashəter lə miʼi va mbə tsaa guranti ciki mbə ceker miʼi mazə. 10 Niy citi Ashəter ya mbəzliy yakə, ya hulfə nzuw, sa nzanay, a Mardushe niy makəti va cishi. 11 Njasa səəkə viciy, war dzar miy ghyi tsa nza miʼi mazə va kiy niy zhəghəva Mardushe, ta ɗuw nda njaa na Ashəter, nda njaa məni məndi li.
12 Ghyehi tərakə məndi vaa dzakə ghyi tsa vay, piya kutiŋ dza ghəshiy məni mbə guma vəgha shi, tsəgha sləniyshi məndi kaa miʼi. Tir kwaŋ dza ghəshiy mənti mbə vəərə in tsa nza ʼwərdi har məndiy mirə mbə, ma tsaa tərə tirə kwaŋ tsa na, nza ghəshi vərəva lə in tsa nza ʼwərdi mbə, mbaʼ nihuti shi ka miʼiy guma vəgha li shi. Ma sa ka vəghu tsa va kəriy ki na, nza ghəshi dzəvəgha mazə kutiŋ kutiŋ. 13 Maɗita ma zha kiy ghyi tsa nza miʼi mazə va ta dzəvəgha maziy, cesl ka məndiy ɓaɓanavə shi ɗi na dza li shi. 14 Ketihwer ka zhaa dza va mazə, ma mekishi na, nza məndi pəməghə dzakə kwa baka ghyi tsa nihuti miʼi mazə. Tsava ghyiy, Shashəgazə tsahuti ntsa tsəʼu tsəʼu tsa nighə naa dzəkən. Sa ka zha səəkətay, ka dza naa zhiniy zhəghəvaa zhəvəgha mazə ghulaw, war ghəci zhini naa mawti, mbaʼ harata lə slən tsa nzə.
15 Dzəghwa ki, mbaʼ tsa Ashəter vəghu səəkiy, ta dza ghənzə va mazə. Ghənzə na zha Abihayil va niy kəliti Mardushe tsa nza ghəshi vaa mani li. Ghənzəə maɗiy, niy ɓəvə nihuti shiy na dzəghwa kən shiy niy gəzanakə Hege ntsa tsəʼu tsəʼu tsa va nighəə dzəkən miʼi mazə va ɓuw. Ya wa ndə kiy, war mbə ɗi kuma Ashəter niy nza na. 16 Dza mbaʼ məndi pəməghə Ashəter dzəmbə ciki kaa mazə Zerkəses ki. Ghəci mbə məni kwa mbərəfaŋa piya ci mbə mazə, tə kwa maŋa tir tsa har məndiy tir Tebet. 17 Dzəghwa ki tərəŋu mazə ɗiti Ashəter, ka taŋəti nihuti miʼi gwanashi. Tərəŋuɓa kuma nzə ghəci ɗiti, mbaʼ zləɓavə mbə nəfə tsa ci taŋ kaa nihuti ghyehi va gwanashi. Dza na ki, mbaʼ fanambə daghuba mali mazə mbə ghən nzə, mbaʼ ɓəvə ta nza ghənzə ka kwajən mbə miʼi ci kwa pi tsa Vasti. 18 Dzəghwa na ki, mbaʼ mənti makwaghwa tərəŋu ta fə dikiy dzəti Ashəter, mbaʼ harashi mbəzli mbə sləni dikə dikə na gwanashi tə hiɗi ci, mbaʼ nihuti mbəzliy sləkə hiɗi ta səɗa ci ta makwaghwa va. Dza na diɓa mbaʼ dəkashi mbəzli tə hiɗi ci gwanashi va tsəhə ghən, mbaʼ tatahanavəshi shiy kaa mbəzli, njasa təɓə na va mazə.
19 Dzəghwa məndi diɓa mbaʼ məndi zhiniy ɓasəkə degheghir kwa baka səɗa. Ghala vəghu tsa vay, mbə ghəra sləni niy nza Mardushe kwa dəgha mazə. 20 Niy cikəvəri Ashəter nda zha wa na, nda mbə hulfə ka wa naw. Sa nzanay, tsəgha niy gəzanta Mardushe, mbaʼ Ashəter niy ɗiti fəti ta kuma ci va, njasa niy ɗanci na va fəti ghənzə mbə dəvə ci.
Mardushe fəti ghən ta kuma pəhə nihuti mbəzli dzəkən mazə
21 Ma tə nahuti vici, Mardushe mbə sləni kwa dəgha mazə ki na, mbaʼ nəfə tsa kar Bigətan lə Teresh, nihuti mbəzli bakə mbə mbəzli tsəʼu tsəʼu ni ndəghu miy ceker kiy ghyi tsa mazə satiy dzəkən mazə Zerkəses. Dza ghəshi mbaʼ ghəshi pəhəti kuma ta pəəsli ci. 22 Mbaʼ kuma va tsəhəta kwa sləmə Mardushe, dza na mbaʼ dzaa gəzanta kaa Ashəter kwajən mazə. Dza Ashəter mbaʼ dzaa gəziy kuma va kaa mazə, lə slən tsa Mardushe. 23 Ma sa dza məndiy cacəhəti kuma va na, tsəgha ghənzə kataŋ. Dza məndi ki, mbaʼ məndi ɓərtanti mbəzli bakə ni va tə tsəm, mbaʼ məndi tsaslaghwa kuma vaa dzəghwa zliya ka məndiy tsasli kumaa mənita tə hiɗi va, kwa kuma mazə tsa va.