Ester 3

Kar Haman lə Mardushe həərəshi

Liy hum kuma va ki na, dzəghwa mazə Zerkəses mbaʼ ɓanavə dikə kaa Haman zəghu Hamədata, ntsaa səvəri kwa miy dəgha Agagə. Dza na mbaʼ fiy ka ntsaa gura dikə mbə ka sləni dikə dikə ni tə hiɗi ci. 2 Ya wa ntsaa ghəra sləni kwa dəgha maziy, ka i shəni ciy dzəmbə hiɗi ta tsəfəku kwa kuma ci, sa nzana tsəgha mazə niy gəzəkə. Ma Mardushe na ci ki na, kala zləɓa i shəni ciy dzəmbə hiɗi ta tsəfəku kwa kuma ci. 3 Ma kə nihuti mbəzli ghəra na sləni li shi kaa ngəci na: «Tawa ɗi ma gha fəti ta kuma pəhəti mazəa?» kə ghəshi kaa ngəci. 4 War tsəgha, war tsəgha ghəshiy gəzanci njasa səəkə vici, ma ghəci na kala fa ma kuma shi va. A Mardushe niy gəzanshi: «Ndə ka zhəwifə nzee», kə. Dza ghəshi ki, mbaʼ ghəshi dzaa gəzanci kuma va kaa Haman, ta nighə nda nza Mardushe gariy tə kuma ci va. 5 Nighə Haman kataŋ na, kala zləɓa i shinin ci Mardushe dzəmbə hiɗi ta tsəfəku kwa kuma ci. Mbaʼ nəfə tsa ci satiy tərəŋu. 6 A məndi niy gəzanci, ntsa mbə hulfə ka zhəwifə na Mardushe, kə məndi. Ta pəəsliti Mardushe ghəci kwətiy na, daw ghəci nighəti. Va tsəgha ki na, dza na, mbaʼ tarəkə zanti mbəzli mbə hulfə ci gwanashi, slən ndə zhəwifə tsa tə hiɗi mazə Zerkəses. 7 Ma tə kwa taŋa tir tsa har məndiy tir Nisaŋ, Zerkəses mbə məni kwa məŋ lə bakə piya ci mbə mazə na, dzəghwa məndi ka nga zləra, ta sənay nda nama vici, nda tsama tir na sa wəzə tsa ta məni kuma va. «Pwər», kə məndi kaa har gəla zləra va. Dzəghwa zləra ki, mbaʼ zləra tərətaa dzəti kwa məŋ lə bakə tir, tir tsa har məndiy tir Adar.

Haman pəla kwal tsaa zanti ka Zhəwifə

8 Dzəghwa Haman ki, mbaʼ dzaa kəsay mazə Zərkəses, ma kə kaa ngəci na: «A hulfə nihuti mbəzli tiɓa dzar tə hiɗi gha gwanashi, kutita kutita na na shi kuma mbə mbəzli. Ghənghən na na shi kuma pəhəti ghəshi ta nuw lə nihuti mbəzli gwanashi ni. Ka ɗi fəti ghəshi ta kuma pəhəti ghaw. Ka təɓə na ghaa zlashi feyuw mazuw. 9 Mbaʼ kə təɓətəŋay, tsasliti zliya ta bakwamtishi məndi. Ee dzaa ɓanavəshi gəna tsahi tunə diwiy diwiy mahəkanə kaa mbəzliy dzaa məni sləni va, nza ghəshi shəkaghwaa dzəghwa hutəvə tsa mazə,» kə. 10 Dzəghwa Mazə kuratə sərəvə jaʼwa tə dəvə ci, mbaʼ ɓanavə kaa Haman zəghu Hamedata, ndə mbəzə tsa ka Zhəwifə, ntsaa səvəri kwa miy dəgha Agagə. 11 Ma kə kaa ngəci na: «Avee zlatavaa gəna gha. Mbəzli va diɓay, avee zlatavashi, njasa ɗi gha pə ghaa məni li shi,» kə.

12 Ma tə kwa məŋ lə mahəkana vici tə kwa taŋa tir ki na, ɓasə məndi ɓasəti mbəzliy tsasli shiy kaa mazə. Dzəghwa ghəshi tsasl tsasl ghəshi tsasliti zliyahi, war njasa gəzanakəshi Haman, ta vəlishi kaa mbəzliy gura dikə dikə ni fiy mazə ta nighəə dzəkən hiɗi ci, mbaʼ kaa ngwamənahi, mbaʼ kaa mbəzli dikə dikə ni mbə hulfəhi tə hiɗi va. Ya kaa nimaɓa mbəzliy njasa ka ghəshiy tsasli shiy, ya kaa nama hulfə na, lə ghani nzə. Lə slən tsa mazə niy tsasliti ghəshi zliya va, mbaʼ ghəshi ʼiyaslati lamba jaʼwa tə dəvə mazə. 13 Dzəghwa ki, mbaʼ məndi ghunashi ka kwal, ta vəli zliyahi va kaa mbəzli dzar tə bəlahi hiɗi va gwanashi, ta mbə məndiy bakwanti ka Zhəwifə gwanashi, ka zantishi kərəpə. Ya pəhepəhir, ya gula, ya ndərazhi, ya miʼi. Ka məndi dzay, mbaʼ məndi pahu shi shi gwanashi. Kuma vay, fəca vici kutiŋ na kə dzaa məniva, tə kwa məŋ lə mahəkana vici, tə kwa məŋ lə baka tir tsa har məndiy tir Adar. 14 Kuma pəhəti mazə ta məni məndi kə kuma mbə zliya va dzaa nza ya dzəghwa tə nama bəla tə hiɗi va. Ka məndi dzay, ka gəzə kaa mbəzli gwanashi ta mbə ghəshiy pəhətəvashi ta məni kuma va fəca vici slati məndi va. 15 Sa gəzəkə mazə ki na, ka dzashi ka kwal lə zliyahi va kiyaŋu kiyaŋu. Mbaʼ məndi zlapanti kuma va mbə məlmə Suzə nza mazə va. Dzəghwa kar mazə ghəshi lə Haman tasə ghəshi nziyshi ta sa shiy. Ma mbəzli mbə məlmə Suzə na, mbaʼ ghəshi səəshi va kuma va.