Mardushe gəzanta kaa Ashəter, a ghənzə ɓə wahəshi kaa mazə.
4
Ma sa favə Mardushe kumaa mənita na, dza na kuyahə kuyahə slakwanti kubeŋer kən ghən ci, mbaʼ pakən shi ka məndiy təhuni mbəri li shi, ngərə, ngərakən pəsər kən ghən ci, ka dzar mbə məlmə lə wahə zlaŋzlaŋ. 2 Dza na ndəsə tsəhiy miy dəgha mazə war tsəgha, mbaʼ gariy. Sa nzanay, kwal va ndə ta dzakə ghyi tsa mazə lə kubeŋer ka məndiy təhuni mbəri li shiw. 3 Ya tə nama bəla tə hiɗi va tsəhəta kuma gəzəkə mazə va, mbaʼ pəhəti ta məni məndiy, mbaʼ ka Zhəwifə səəshi tərəŋu. Dza ghəshi ka məni sumay, ka wahə, ka tihuni. Nihuti mbəzli ɗaŋ mbə shi na, mbaʼ ghəshi pakən kubeŋer təhuni mbəri, ka həhəni dzar mbə pəsər.4 Dza zhər tsəʼu tsəʼu ni lə miʼiy ghəranta sləni kaa Ashəter kwajən mazə, mbaʼ ghəshi səəkəə gəzanta kumaa mənita va. Sa favə na na, mbaʼ məhərəli nzə səəta. Dza na mbaʼ ghunay ndə ta ɓanci nihuti kubeŋer kaa Mardushe, nza ghəci səranti kubeŋer təhuni mbəri kən ghən ci va, kala zləɓa ma ghəci. 5 Dzəghwa Ashəter ki daʼ haray Hatak, tsahuti ntsa tsəʼu tsəʼu tsa mbə mbəzli ɓanavə mazə va ta ghəranta sləni, mbaʼ ghunay va Mardushe ta ɗuw shiy mənishi, ka ɗuw nda sa wa na məni na tsəgha. 6 Dzəghwa Hatak mbaʼ səvəriy dzaa kəsay Mardushe pərikə tə ngula miy dəgha mazə. 7 Dzəghwa Mardushe mbaʼ slanakə kumaa mənita va gwanata. Zhini mbaʼ gəzanci kuma gəna gəzəkə Haman va shəkəə dzəghwa hutəvə tsa mazə, sa ka məndi bakwanti ka Zhəwifə gwanashi. 8 Dza na diɓa mbaʼ ɓanavə zliya tsasliti məndi va zlapəy məndi mbə məlmə Suzə, ta bəku ka Zhəwifə. Ma kə kaa ngəci na: «Mbala gəzanta kumaa mənita kaa Ashəter, nza gha cinti zliya na, mbaʼ gha pəraslanakə kuma ɗi naa gəzə. Nza gha gəzanta a ghənzə dzaa kəsay mazə ta pəraʼanci dəvə ta mbə ghəciy zhəhur ta mbəzli mbə hulfə nzə,» kə. 9 Dza Hadak mbaʼ dzaa zhananavə kuma gəzəkə Mardushe va kaa Ashəter. 10 Dza na ki mbaʼ zhiniy ghunay va Mardushe, ma kə kaa ngəci na: 11 «Mbəzliy ghəra sləni kaa mazə gwanashi lə mbəzli dzar tə bəlahi tə hiɗi ci gwanashiy, a ghəshi sənay: «Ya wa ntsaa tsəhiy kwa tipə miy ciki tsa mazə, ta dzəvəgha mazə, kala haray ma ghəciy, ta pəəsliti tsava ndə dza məndi, ya zal na, ya mali na. War mazə citi na lə gəta ci va məntim tə tsahi mbəzə dza məndiy zlay pəəsli ci. Ghənzə nja nee kiy, vici mahəkanəmətsəkə na ndatsə ghala haraɗa ma məndiy dzəvəgha mazə,» kə. 12 Mbaʼ məndi dzaa zhananavə kuma gəzəkə Ashəter va kaa Mardushe. 13 Dza na mbaʼ ghunay ndə ta gəzanta, ma kə na: «Ta mbəliŋa dza gha va kuma va kutiŋa mbə ka zhəwifə gwanashi sa nza gha kiy ghyi tsa mazə bərkəti gha na? 14 Mbaʼ pə gha nziyŋa gwəŋəŋa mbə gəla kuma tsətsə na nay, ta tsahuy dza tsahuti kwal tsa dza ka zhəwifəə kumavə kəəti kwa, mbaʼ ghəshi mbəlishi. Ma gha lə mbəzli kiy ghyi tsa dəŋay, kərəp dza ghuy ta zaŋwiy. Talay, sənay ndə nda ta gəla kuma tsətsə na na nza ghaa kwajən mazə na?» kə. 15 Dzəghwa Ashəter ki mbaʼ zhiniy ghunəghə ndə kaa Mardushe, ma kə na: 16 «A pə gha kaa ngəciy: “Mbala ɓasəti ka zhəwifə mbə məlmə Suzə gwanashi a ghuy məni sumay tə ya. Vici mahəkanə, mbaʼ virɗi mahəkanə pə ghuy dzaa mənti kala zəmə ma shiy, kala sa ma shiy. Tsəgha dza ghiy məni lə ka slənee kuraku. Liy hum ki na, nzee dza va mazə ya tsəgha nza na dzəghwa kən kuma pəhətim ghənzə. Ya ə dzee kumavə məti mbiy, ee zləɓavə kə Ashəter,” pə gha kaa ngəci,» kə. 17 Dza Mardushe mbaʼ dzaa mənti njasa gəzanci Ashəter va.