Ashəter dza ta kumə lə mazə
5
Liy hum vici mahəkanə na va mənəhu ghəshi kala zəmə ma shiy kala sa ma shiy ki na, dzəghwa Ashəter paʼa pakən kubeŋer mali mazə nzə, mbaʼ tsəhəta kwa tipə miy ceker mazə. Mənziy niy nza mazə mbə ciki tsa ka naa nziy mbə, kwa gəzli mazə ci, dza kwa miy pi tsaa dzəmbə ciki tsa va kuma ci. 2 Ma sa nata mazə kwajən ci Ashəter məgarə kwa tipə ki na, lə wəzə ghəci nighəti. Dza na ka canta gəta ta dəvə ci va məntim tə tsahi mbəzə, kə Ashəter ki kəətə kəətəghəvata mbaʼ ndəŋwata gəta va tə miy tsa nzə.3 Ma kə mazə kaa ngəta ki na: «A shiy mənishi kiya kwajənee Ashəter? A shi ɗi gha ɗuwaa? Ya “təhəvəri hiɗi gha bakə mbə a gha ndara nahuti bəla kutiŋ” nə ghay, ta ndaŋashi dzee,» kə 4 Ma kə Ashəter na: «Waa shi zəmə niy tatee tərəŋu kaa ngəŋa, naa niy ɗee ghaa səəkə ta zəməshi ghuy lə Haman ndatsə gha gar zləɓavə pəraa mazə,» kə. 5 Sa gəzəkə Ashəter tsəgha ki na, dza mazə mbaʼ ghunay ndə tiɓata ta dza ta har Haman, ta mbəə mananati kuma kaa Ashəter njasa ɗi na va. Sa səəkiy Haman na, dza mazə mbaʼ tsəhiy ghəshi li ta zəmə shi tatati Ashəter va. 6 Ma sa kəɗanti ghəshi zəmə shiy lə sa shiy ki, ma kə mazə kaa Ashəter na: «A kuma ɗi gha ɗuwaa? ɗuw kuma gha, ta məntəŋa dzee. A shi ɗi gha yən məntəŋaa? Ya “təhəvəri hiɗi sləkə gha ni bakə mbə a gha ndara nahuti bəla kutiŋ” nə ghay, ta ndaŋashi dzee,» kə. 7 Ma kə Ashəter na: «Kuma ɗee ghaa məntəɗay, 8 mbaʼ pə gha gar məntəɗa wəzə hur, gha kə gar zləɓavə ɗuw kumee, ka mənɗa kuma ɗi yay maziy, nza gha zhikə həzlimə ghuy lə Haman ta zəmə shi dzee ta tatəŋuy. Həzlimə kiy, nzee gəzaŋa kuma ɗi gha va sənata mazə,» kə.
Haman liy tsəm ta ɓərti Mardushe
9 Səvəri Haman kiy ghyi tsa kwajən mazə fəcava ki na, war ka vəshi, fee nəfə tsa ci. Ma ghəci mbə səvəri na, mbaʼ nay Mardushe, kala sati ma ghəci kwa kuma ci, kala teɓəteɓə ma ghəci diɓa. Sa nay Haman tsəgha ki na, mbaʼ nəfə tsa ci satiy tərəŋu dzəkən. 10 Ya tsəgha satiy nəfə tsa ci ki na, kala cima ghəciy səvəri, ka dzay jighyi. Sa tsəhiy na kiy ghyi na, dza na mbaʼ ghunashi mbəzli ta har madigahiy mbaʼ mali ci Zereshə. 11 Dza na ka gəzanshi kumaa dzəkən shi və tərəŋu tsa shi lə dzəkən ɗaŋ tsa ndərazhi ci. Ka gəzanshiy dzəkən shəndəkə tsa fanati mazə, mbaʼ fiy ka ntsaa guranti dikə mbə ka sləni mazə gwanashi, mbaʼ nihuti mbəzli dikə dikə ni sləkə na hiɗi li shi. 12 Zhini ma kə Haman kaa ngəshi na: «Zhini diɓay, yən kutira na sa haray Ashəter kwajən mazə ta zəmə shiy kwasəbə mazə, sa tanatishi na ndatsə. Həzlimə diɓay, yən haray na ta zəmə shiy kwasəbə mazə. 13 Ya tsəgha nzə kiy, shi va gwanashi na, nashee ka shiy, kama na war mbə nay Mardushe ndə ka Zhəwifə tsa va pən mbə sləni kwa dəgha mazuw,» kə. 14 Ma kə kar mali ci Zereshə ghəshi lə madigahiy va kaa ngəci na: «Gəzanshi kaa mbəzli a ghəshi kəslikə tsəm bitə, metər bakəmətsəkə cifəti nza ghəshi dzaa laghwa kwa hiɗi. Ma həzlimə mekishiy, nza gha gəzanci kaa mazə a məndi ɓərtanti Mardushe ti. Ghalaɓay nza gha dzaŋa ta zəmə shiy lə vəshi ghuy lə mazə,» kə ghəshi kaa ngəci. Mbaʼ kuma va təɓanati kaa Haman, dza na mbaʼ ghunashi mbəzli ta kəsli tsəm.